Ta dia lam’asa wodja wa Israël la wedja wosukanyi awɔ​—Kakɔna kata Bible lo dikambo sɔ?

Anto wa l’andja w’otondo wekɔ l’okiyanu efula lo kɛnɛ kendana la ta dia lam’asa États-Unis, Israël ndo Iran. Onde ta sɔ diayoleka ntshɔ lo kɔlɔ ko ndjotambiya wedja ekina? Onde mandji ya l’andja ɔnɛ koka nshimba diaha ata monga dia mbidja wɔladi l’andja w’otondo?

Anto wadja yimba lo prɔfɛsiya ya lo Bible wekɔ lo ndjambola dia kana ta sɔ diekɔ etatelo ka Aramangɛdɔna wakatɛkɛtama lo dibuku dia Ɛnyɛlɔ.

Kakɔna kata Bible lo dikambo sɔ?

Onde mandji yayoshidiyɛ ta dialɔma l’Israël?

Bible mbutaka ɔnɛ: “Tanyoyaɛkɛke le ewandji kana le ɔna onto lahakoke mbela panda.”​—Osambo 146:3.

Paka nshi yayaye mbayotɛnya dia kana ewandji wayokoka mbidja wɔladi l’ɛtshi ka nkɛtɛ kɛsɔ. Koko Bible mɛnyaka hwe dia ndooko owandji wa pɔlitikɛ, lowandji l’ana w’anto kana olui w’anto wayokoka nkomiya ata dia mbela wɔladi wa pondjo. Paka Nzambi oto mbayokoka “nkomiya ata lo nkɛtɛ k’otondo.”​—Osambo 46:9.

• Dia nyomeya awui akina, adia asawo wa lo Tshoto y’Etangelo yele l’ɔtɛ a dui ɔnɛ: “Ngande wayokomɛ​—Ata?”

Onde ta dia l’Israël diekɔ lo nkotsha prɔfɛsiya kɛmɔtshi?

Bible mbutaka ɔnɛ: “Nyayoka awui w’ata ndo nkumu y’ata. . . . Wodja wayɔlɔsha wodja okina ndo diolelo diayɔlɔsha diolelo dikina.”​—Mateo 24:6, 7.

Ta dia l’Israël ekɔ dui dikina diɛnya dia tekɔ lo nsɛna lo “etena k’ekomelo ka dikongɛ di’akambo” ndo diɔ kotshaka tolembetelo tɛnya dia tekɔ lo nsɛna lo “nshi y’ekomelo.” (Mateo 24:3; 2 Timɔte 3:1) Ata wɛnaso ɛlɔ kɛnɛ mɛnyaka dia kem’edja Nzambi ayanga nkomiya ata ndo asui tshɛ.

• Dia nyomeya awui akina, adia sawo diele l’ɔtɛ a dui ɔnɛ: “Awui wɛnya dia tekɔ lo nsɛna lo “nshi y’ekomelo,” kana “etena k’ekomelo”?”

Onde Aramangɛdɔna ayotatɛ lo Moyen-Orient?

Bible mbutaka ɔnɛ: “Ko wakaasanganya lo dihole dielamɛ lo Hɛbɛru ɔnɛ Aramangɛdɔna.”​—Ɛnyɛlɔ 16:16.

Ta dia Aramangɛdɔna bu ta dia lam’asa mandji y’ana w’anto diayotatɛ lo Moyen-Orient. Diɔ diekɔ ta diayonga lam’asa mandji y’ana w’anto tshɛ vɔ la Nzambi.

• Dia nyomeya awui akina, adia sawo diele l’ɔtɛ a dui ɔnɛ: “Ta di’Aramangɛdɔna kɛdikɛdi na?”

Kakɔna kakoka tokimanyiya dia ndɔshana la tena di’ekiyanu?

Bible mbutaka ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.”​—Filipɛ 4:6.

Jehowaa Nzambi nangaka dia sho mbɔlɔmba. Lam’ele Nzambi ndjakiyanyaka dikambo diaso, nde ayohokamɛ alɔmbɛlɔ aso ndo ayotokimanyiya dia ndɔshana l’ekiyanu. (1 Petero 5:7) Yoho mɔtshi yasalande dui sɔ ele lo tokimanyiya dia sho nshihodia aha tsho lande na katetemala ata, koko ndo woho wayondokomiya ata ndo kɛnɛ kayondosala dia nshidiya paa ndo asui aso.​—Ɛnyɛlɔ 21:3, 4.

• Dia nyomeya awui akina lo woho watokimanyiya Nzambi, adia sawo diele l’ɔtɛ a dui ɔnɛ: “La Bible peut-elle m’apporter du réconfort ?”