Onde Bible koka kokimanyiya naka wɛ ekɔ la hemɔ kahakɔnɔ?

Okadimwelo washa Bible

Eelo. Nzambi ndjakiyanyaka dikambo di’ekambi ande wele la hemɔ. Lo kɛnɛ kendana l’okambi ande ɔmɔtshi wa kɔlamelo, Bible mbutaka ɔnɛ: “Jehowa ayowosukɛ lo mbeto kande k’ɔkɔnyi.” (Osambo 41:3) Naka wɛ ekɔ lo ntata hemɔ kɛmɔtshi kahakɔnɔ, kete awui asato wayela anɛ koka kokimanyiya dia ndɔshana la tɔ:

1. Lɔmba dia nkondja wolo wa mbikikɛ. Wɛ koka nongola “wɔladi wa Nzambi woleki tokanyitshɛ,” wakoka nkitshakitsha okiyanu ayɛ ndo kosukɛ.​—Filipɛ 4:6, 7.

2. Ɛna akambo la sso di’ɔlɔlɔ. Bible mbutaka ɔnɛ: “Monga l’ɔngɛnɔngɛnɔ kokimanyiaka dia ntetemala monga la yoonge ya dimɛna ntena tshɛ.” (Tokedi 17:22, Good News Translation) Salaka yema ya shɛkɛsɛkɛ nɛ dia sɔ koka nkitshakitsha lonyangu layɛ ndo monga la etombelo w’ɛlɔlɔ lo yoonge yayɛ.

3. Keketsha elongamelo kayɛ kendana la nshi yayaye. Elongamelo k’oshika koka kokimanyiya dia monga l’ɔngɛnɔngɛnɔ kaanga mbalɔshanayɛ la hemɔ kahakɔnɔ. (Rɔmɔ 12:12) Bible tɛkɛtaka di’etena kele “ndooko onto lodjashi lɛkɔ layota ate: ‘Dimi leki la hemɔ.’” (Isaya 33:24) L’etena kɛsɔ Nzambi ayɔkɔnɔla wanɛ tshɛ wele la hemɔ yahakɔnɔ ndo yambohekɔ ase siansɛ wa nshi nyɛ. Ɛnyɛlɔ, Bible mbutaka di’anto hawototshunda esombe nto ndo sho mbadiaka lɔkɔ ɔnɛ: “Demba diande diayale ashashi oko lo nshi yande ya dikɛnda; nde akalole lo nshi ya wolo ande w’ɔlɔngɔlɔngɔ.”​—Jɔbɔ 33:25.

Nɔtɛ: Kaanga mbeyawɔ dia Jehowa kokaka mbaakimanyiya, Ɛmɛnyi wa Jehowa nyangaka nto esakelo k’aseka enganga etena kandamawɔ la hemɔ kahakɔnɔ. (Makɔ 2:17) Koko, sho hatofundɛ anto woho ɔmɔtshi w’osakelo. Sho mɛnaka di’onto tshɛ pombaka mbɔsa tɛdikɔ tande hita lo kɛnɛ kendana l’esakelo.