Prɔfɛsiya kɛdikɛdi na?

Ekadimwelo washa Bible

Prɔfɛsiya kɛdikɛdi losango lakasambiyama oma le Nzambi, wɛnɛlɔ w’oma le Nzambi. Bible mbutaka dia amvutshi “wakate akambo w’oma le Nzambi nɛ dia wakasokoyama oma le nyuma k’ekila.” (2 Petero 1:​20, 21) Omvutshi ekɔ onto lalongola losango l’oma le Nzambi ndo laliewoya le anto akina.​—Etsha 3:​18.

Ngande wakalongola amvutshi losango l’oma le Nzambi?

Nzambi akakambe la toho totshikitanyi dia mbewoya amvutshi tokanyi tande:

• Losango la lofunda. Lo diaaso dimɔtshi, Nzambi akakambe la yoho shɔ lo mbisha Mɔsɛ Ɛlɛmbɛ dikumi wakafundama.​—Etombelo 31:18.

• Lo tshimbo y’andjelo. Ɛnyɛlɔ, Nzambi akakambe l’ondjelo dia mbutɛ Mɔsɛ losango lakandahombe mbewoya Farawɔ ka l’Edjibito. (Etombelo 3:​2-4, 10) Etena kaki ɔsɔnwɛlɔ wa tɔtɛkɛta tɔmɔtshi ohomba efula, Nzambi akatɛ andjelo dia mboka afundji losango lande looka, ɛnyɛlɔ etena kakandatɛ Mɔsɛ ate: “Funda awui asɔ, nɛ dia lo ndjela awui akɔ kayangami mbidja sheke la yɛ ndo la Isariyɛlɛ.”​—Etombelo 34:27.a

• Wɛnɛlɔ. Lo tena dimɔtshi, omvutshi akalongola wɛnɛlɔ etena kakinde bu lo djɔ ndo kakandeyaka akambo tshɛ dimɛna. (Isaya 1:1; Habakuka 1:1) Waɛnɛlɔ ɛmɔtshi waki diaambo efula ndo wanɛ wakawaɛnaka wakayaɛnaka lɔkɔ. (Luka 9:​28-​36; Ɛnyɛlɔ 1:​10-​17) Lo tena dikina, ɔnɛ lakɛnaka wɛnɛlɔ akandamaka la nende. (Etsha 10:10, 11; 22:17-​21) Ndo nto, Nzambi akewoyaka losango lande lo tshimbo ya alɔ etena kaki omvutshi lo djɔ.​—Danyɛlɛ 7:1; Etsha 16:​9, 10.

• Lo nɔmbɔla tokanyi tawɔ. Nzambi akalɔmbɔla tokanyi t’amvutshi ande dia mbewoya losango lande. Oko wadilembetshiya divɛsa nɛ: “Afundelo tshɛ wakasambiyama oma le Nzambi.” Etelo k’ɔnɛ: “wakasambiyama oma le Nzambi” koka nto nembetshiyama ɔnɛ: “Nzambi akafufe loowe.” (2 Timɔte 3:​16; note, Bible avec notes et références) Nzambi akakambe la nyuma kande k’ekila kana wolo wakamba olimu dia ‘mfufa’ tokanyi tande lo timba t’ekambi ande. Losango laki la Nzambi, koko omvutshi mbakasɔnɛ tɔtɛkɛta ta mfunda.​—2 Samuɛlɛ 23:​1, 2.

Onde prɔfɛsiya mendanaka paka la nshi yayaye?

Ndooko, prɔfɛsiya ya lo Bible hendana paka la nshi yayaye. Koko, nsango efula y’oma le Nzambi mendanaka la nshi yayaye kaanga etena kahatama dui sɔ hwe hwe. Ɛnyɛlɔ, amvutshi wa Nzambi wakahɛmɔlaka ase Isariyɛlɛ w’edjedja mbala la mbala lo kɛnɛ kendana l’etsha awɔ wa kɔlɔ. Ɛhɛmwɛlɔ ɛsɔ wakɛnyaka ɛtshɔkɔ wakahombe monga la wɔ lo nshi yayaye naka vɔ mbakitanyi ndo mpokoso yakahombe monga la wɔ naka hawosadi dui sɔ. (Jɛrɛmiya 25:​4-6) Nshi yayaye y’ase Isariyɛlɛ yakalemanɛka la kɛnɛ kakawahombe nsɔna dia nsala.​—Eohwelo k’Ɛlɛmbɛ 30:19, 20.

Bɛnyɛlɔ dia prɔfɛsiya ya lo Bible yahendana la nshi yayaye

• Lo diaaso dimɔtshi etena kakalɔmbɛ ase Isariyɛlɛ Nzambi ekimanyelo, nde akatome omvutshi ɔmɔtshi dia talembetshiya ɔnɛ lam’ele vɔ wakatone nkitanyiya ɛlɛmbɛ wa Nzambi, nde hatowakimanyiya.​—Embadi 6:​6-​10.

• Etena kakasawolaka Yeso la womoto l’ose Samariya, nde akawotɛ akambo wakandasale lo nshi yakete wele Yeso akakoke mbaweya paka diɛsɛ la wɛnɛlɔ w’oma le Nzambi. Womoto ɔsɔ akate dia Yeso aki omvutshi kaanga mbakinde kɔtɛkɛta di’akambo wa lo nshi yayaye.​—Joani 4:​17-​19.

• Etena kakawalomboshaka Yeso, atunyi ande wakafɛ elungi kande, wakɔkɔmɔla ndo oma laasɔ wakate ɔnɛ: “Naka wɛ ekɔ omvutshi, otote okɔkɔmɔdi?” Vɔ komimbolaka Yeso dia mbatɛ akambo wendana la nshi yayaye, koko dia mbeya oma lo wolo wa Nzambi onto akɔna owɔkɔmɔdi.​—Luka 22:63, 64.