Jehowa nongamɛka dia sho monga l’ekanelo k’ɔlɔlɔ. Yambola ɔnɛ: ‘Onde anto mɛnaka dia dimi lekɔ l’ekanelo ka yimba k’ɔlɔlɔ, halotshininala lo nkanyi ndo onto lanya yimba oma lo dikambo? Kana onde dimi pokamɛka anto akina ndo kitanyiyaka kɛnɛ kakombolawɔ naka dui sɔ diekɔ ohomba?’ Etena tshɛ kayotɛnyaka dia tekɔ l’ekanelo k’ɔlɔlɔ, mbayotokoyaka Jehowa nde la Yeso. Tekɔ l’ohomba wa monga l’ekanelo k’ɔlɔlɔ etena katshikitana awui lo lɔsɛnɔ laso. Etshikitanu ɛsɔ koka tokonya l’ekakatanu weso hatolongamɛki. Sho koka mpomana l’ekakatanu wa shashimoya wendana la yoonge. Kana etshikitanu wendana l’ekondjelo kana w’awui wa pɔlitikɛ weso hatolongamɛ wasalema lɛnɛ odjashiso koka mbetɛ lɔsɛnɔ laso ololo. (Ond. 9:11) Kaanga otshikitanu wendana la ɔkɛndɛ wa lo teokrasi koka todja l’ohemba. Sho kokaka ntondoya lo ndjaɔtɔnganyiya l’awui w’eyoyo wambotohomana la wɔ naka sho ndjela wanya anɛi wayela anɛ: 1) mbetawɔ akambo woho wewɔ, 2) enda kɛnɛ kahombayɛ nsala lo nshi yayaye, ndo leka mbidja yimba lo awui w’ohomba, 3) leka mbidja yimba lo awui w’amɛna wa lo lɔsɛnɔ layɛ, ndo 4) salɛ anto akina akambo. w23.07 21-22 od. 7-8

Omvutshi Danyɛlɛ aki ɔlɔngɔlɔngɔ etena kakokonya ase Babilɔna ose lokanu ndo kakawawanganya etale la wodja ande wa lootɔ. Koko Danyɛlɛ akambiya mɛtɛ wanɛ wakawonde asɔ. Vɔ wakɛnyi ‘kɛnɛ kɛnama lo washo,’ mbuta ate Danyɛlɛ ‘komonga la ɛkɔmɔ, aki l’ɛnamelo ka dimɛna’ ndo nde akotɔ lo nkumbo ka lokumu. (1 Sa. 16:7) L’ɔtɛ w’ɛkɔkɔ ɛsɔ, ase Babilɔna wakawosha olowanyelo dia nde nkoma ɔlɔhɛ ɔmɔ wakakambaka laka nkumekanga. (Dan. 1:​3, 4, 6) Jehowa akalangaka Danyɛlɛ, l’ɔtɛ wa woho w’onto wakasɔnɛ ɔlɔngɔlɔngɔ ɔsɔ dia monga. Lo mɛtɛ, etena kakate Jehowa dia Danyɛlɛ aki oko Nɔa la Jɔbɔ, ko nde eke l’ɛnɔnyi oko 20. Jehowa akɔsaka ɔlɔngɔlɔngɔ Danyɛlɛ oko onto ɔlɔlɔ oko wakandɔsaka Nɔa la Jɔbɔ wanɛ wakookambɛ la kɔlamelo l’edja k’ɛnɔnyi efula. (Eta. 5:32; 6:​9, 10; Jɔbɔ 42:​16, 17; Ɛzk. 14:14) Ndo Jehowa akatetemala mboka Danyɛlɛ ngandji l’edja tshɛ kakinde la lɔsɛnɔ la diambo efula.—Dan. 10:​11, 19. w23.08 2 od. 1-2

Etena kɔsayɛ yɛdikɔ ya nsomba luudu. Wɛ ayolanga wɛmɛ nsɛdingola awui tshɛ wa lo luudu la langayɛ nsomba. Sho koka nsala woho akɔ waamɛ etena kadiaso ndo kekaso Bible. Naka wɛ mbokiadia tsho esadi esadi, kete wɛ koka mbeka tsho “akambo w’etatelo wendana la ɛtɛkɛta w’ekila waki Nzambi.” (Hɛb. 5:12) Lo dihole dia nsala ngasɔ, l’ɛnyɛlɔ ka luudu, ɔtɔ “l’etei” dia wɛ nsɛdingola towuiwui tshɛ t’amɛna tendana la tɔ. Yoho mɔ yoleki dimɛna ya mbeka Bible ele mɛna woho wɔtɔnɛ tenyi diatɔ diotshikitanyi. Sala la wolo dia nshihodia aha tsho akambo wa mɛtɛ wetawɔyɛ, koko ndo nto lande na kawawetawɔyɛ. Dia nshihodia Ɔtɛkɛta wa Nzambi, sho pombaka mbeka akambo wa mɛtɛ wa lo Bible lo yoho ya lotshimola. Ɔpɔstɔlɔ Pɔɔlɔ akakeketsha anango l’akadiyɛnde w’Akristo dia mbekaka Ɔtɛkɛta wa Nzambi l’etete dia vɔ “monga la akoka wa nshihodia dimɛna wekeke, otale, wemema ndo ɔhɔngɔ” w’akambo wa mɛtɛ. Oma laasɔ mbakawahombe nyomoleka ‘mbika edio ndo nshikimala’ lo mbetawɔ kawɔ. (Ɛf. 3:​14-19.) Sho lawɔ pombaka nsala woho akɔ waamɛ. w23.10 18 od. 1-3