Lushi la samalo, Ngɔndɔ ka divwa 13
Wɛ ekɔ onto la nɛmɔ efula. —Dan. 9:23.
Omvutshi Danyɛlɛ aki ɔlɔngɔlɔngɔ etena kakokonya ase Babilɔna ose lokanu ndo kakawawanganya etale la wodja ande wa lootɔ. Koko Danyɛlɛ akambiya mɛtɛ wanɛ wakawonde asɔ. Vɔ wakɛnyi ‘kɛnɛ kɛnama lo washo,’ mbuta ate Danyɛlɛ ‘komonga la ɛkɔmɔ, aki l’ɛnamelo ka dimɛna’ ndo nde akotɔ lo nkumbo ka lokumu. (1 Sa. 16:7) L’ɔtɛ w’ɛkɔkɔ ɛsɔ, ase Babilɔna wakawosha olowanyelo dia nde nkoma ɔlɔhɛ ɔmɔ wakakambaka laka nkumekanga. (Dan. 1:3, 4, 6) Jehowa akalangaka Danyɛlɛ, l’ɔtɛ wa woho w’onto wakasɔnɛ ɔlɔngɔlɔngɔ ɔsɔ dia monga. Lo mɛtɛ, etena kakate Jehowa dia Danyɛlɛ aki oko Nɔa la Jɔbɔ, ko nde eke l’ɛnɔnyi oko 20. Jehowa akɔsaka ɔlɔngɔlɔngɔ Danyɛlɛ oko onto ɔlɔlɔ oko wakandɔsaka Nɔa la Jɔbɔ wanɛ wakookambɛ la kɔlamelo l’edja k’ɛnɔnyi efula. (Eta. 5:32; 6:9, 10; Jɔbɔ 42:16, 17; Ɛzk. 14:14) Ndo Jehowa akatetemala mboka Danyɛlɛ ngandji l’edja tshɛ kakinde la lɔsɛnɔ la diambo efula.—Dan. 10:11, 19. w23.08 2 od. 1-2
Lushi la lomingu, Ngɔndɔ ka divwa 14
Nshihodia dimɛna wekeke, otale, wemema ndo ɔhɔngɔ.—Ɛf. 3:18.
Etena kɔsayɛ yɛdikɔ ya nsomba luudu. Wɛ ayolanga wɛmɛ nsɛdingola awui tshɛ wa lo luudu la langayɛ nsomba. Sho koka nsala woho akɔ waamɛ etena kadiaso ndo kekaso Bible. Naka wɛ mbokiadia tsho esadi esadi, kete wɛ koka mbeka tsho “akambo w’etatelo wendana la ɛtɛkɛta w’ekila waki Nzambi.” (Hɛb. 5:12) Lo dihole dia nsala ngasɔ, l’ɛnyɛlɔ ka luudu, ɔtɔ “l’etei” dia wɛ nsɛdingola towuiwui tshɛ t’amɛna tendana la tɔ. Yoho mɔ yoleki dimɛna ya mbeka Bible ele mɛna woho wɔtɔnɛ tenyi diatɔ diotshikitanyi. Sala la wolo dia nshihodia aha tsho akambo wa mɛtɛ wetawɔyɛ, koko ndo nto lande na kawawetawɔyɛ. Dia nshihodia Ɔtɛkɛta wa Nzambi, sho pombaka mbeka akambo wa mɛtɛ wa lo Bible lo yoho ya lotshimola. Ɔpɔstɔlɔ Pɔɔlɔ akakeketsha anango l’akadiyɛnde w’Akristo dia mbekaka Ɔtɛkɛta wa Nzambi l’etete dia vɔ “monga la akoka wa nshihodia dimɛna wekeke, otale, wemema ndo ɔhɔngɔ” w’akambo wa mɛtɛ. Oma laasɔ mbakawahombe nyomoleka ‘mbika edio ndo nshikimala’ lo mbetawɔ kawɔ. (Ɛf. 3:14-19.) Sho lawɔ pombaka nsala woho akɔ waamɛ. w23.10 18 od. 1-3
Lushi l’ɔtɔi, Ngɔndɔ ka divwa 15
Analengo, lo kɛnɛ kendana la mbikikɛ akambo wa kɔlɔ ndo monga la solo dia lotutsha, nyokoya ɛnyɛlɔ k’amvutshi wakatɛkɛta lo lokombo la Jehowa. —Jak. 5:10.
Bible kekɔ la bɛnyɛlɔ efula di’anto waki la solo dia lotutsha. Ondo ayonga dui dia dimɛna dia salaka eyangelo wendana la bɛnyɛlɔ sɔ. Ɛnyɛlɔ, kaanga mbakakitama Davidɛ esɔ etena kakinde eke dikɛnda dia nde ndjonga nkumekanga k’Isariyɛlɛ, nde akahombe nkonga l’edja k’ɛnɔnyi efula la ntondo ka nde ndjolongola lowandji. Simɛyɔna nde la Anna wakatɛmɔlaka Jehowa la kɔlamelo tshɛ l’etena kakɔ kaamɛ wakonga Mɛsiya wakalakema. (Luka 2:25, 36-38) Etena katayeke ɛkɔndɔ ɛsɔ, yanga ekadimwelo lo ambola wayela anɛ: Kakɔna ondo kakakimanyiya onto ɔnɛ dia mɛnya solo dia lotutsha? Ngande wakandakondja wahɔ oma lo solo dia lo tutsha? Ngande wakokaso mbookoya? Wɛ koka nto nkondja wahɔ lo mbeka awui wendana la wanɛ waki kɔmɛnya solo dia lotutsha. (1 Sam. 13:8-14) Wɛ koka ndjambola ɔnɛ: ‘Kakɔna kakaakonya diaha vɔ monga la solo dia lotutsha? Etombelo akɔna wakawahomana la wɔ?’ w23.08 25 od. 15