Wɛ koka nkotsha eyango ayɛ wa lo nyuma

1. Okakatanu akɔna wakahomana l’efula ka l’atei aso?

ONDE wɛ atayadjɛka oyango ɔmɔtshi wa lo nyuma, koko wɛ ekɔ l’okakatanu wa mbookotsha?b Naka wɛ ambohomanaka l’okakatanu ɔsɔ, kete eya diaha wɛ mɛmɛ oto. Ɛnyɛlɔ, Philip akalangaka ndowanya alɔmbɛlɔ ande ndo mfudia mbala yasalande alɔmbɛlɔ akɔ, koko nde aki l’okakatanu wa ntana etena ka nɔmba. Erika akayadjɛ oyango wa komaka la wonya lo nsanganya y’otsha l’olimu w’esambishelo; koko mbala tshɛ nde akakomaka l’ɔkɔngɔ suke la losanganya tshɛ. Tomáš akahembe mbala efula dia mbadia Bible k’otondo. Nde mbutaka ate: “Halɔngɛnangɛna tsho wadielo wa Bible. Lakahembe mbala shato, koko mbala yakɔ tshɛ lakakomɛka paka l’Akambo w’ase Lɛwi la ntondo ka dimi memadja wadielo.”

2. Lande na kahatahombe nkɔmɔ naka tekɔ l’oyango ɔmɔtshi wa lo nyuma weso tatakotsha?

² Naka l’etena kɛnɛ wɛ ekɔ l’oyango ɔmɔtshi weyɛ atakotsha, kete onga l’eshikikelo dia wɛ atakite tatala. Kaanga dia nkotsha oyango wa tshitshɛ, dui sɔ nɔmbaka mbala efula etena ndo welo. Lam’ele wɛ akalange paka nkotsha oyango ayɛ, dui sɔ mɛnyaka dia wɛ mbɔsaka diɔtɔnganelo diele lam’asayɛ la Jehowa la nɛmɔ ndo wɛ nangaka mbosha kɛnɛ koleki ɔlɔlɔ. Jehowa ngɛnangɛnaka welo wadjayɛ. Lo mɛtɛ, nde halongamɛ dia wɛ mbosha kɛnɛ kahayakoke mbosha. (Os. 103:14; Mika 6:8) Laasɔ, oyango ayɛ ayonga wɔnɛ wakokayɛ nkotsha lo ndjela akambo wele layɛ. L’ɔkɔngɔ wa wɛ nsɔna oyango ɔmɔtshi, kakɔna kakokayɛ nsala dia mbookotsha? Nyɛsɔ tɔsɛdingole alako amɔshi.

ONGA LA NSAKI KA WOLO KA NKOTSHA EYANGO AYƐ

3. Lande na kele nsaki kekɔ ohomba?

³ Nsaki ekɔ dui dimɔtshi di’ohomba efula dia wɛ nkotsha eyango ayɛ wa lo nyuma. Etena keyɛ la nsaki ka wolo ka nkotsha eyango ayɛ, wayosala la wolo dia mbookotsha. Sho koka mbɛdika nsaki la lɔpɛpɛ la wolo latatshutshuya waato otsha lɛnɛ atawatshu. Naka lɔpɛpɛ lekɔ lo ntetemala mpɛpa, kete ɔnɛ lataduke waato ayokoma lɛnɛ atandatshu. Ndo naka lɔpɛpɛ lekɔ wolo, kete nde ayokoka nkoma esadi eto lɛnɛ atandatshu. Woho akɔ waamɛ mbele, naka sho monga la nsaki k’efula, kete tayokotsha eyango aso. David, ɔnangɛso ɔmɔtshi ladjasɛ la El Salvador mbutaka ate: “Naka wɛ ekɔ la nsaki k’efula, kete wɛ ayosala tshɛ. Wɛ ayosala tshɛ diaha kaanga ɛngɔ ɔtɔi koshimba dia wɛ nkotsha oyango ayɛ.” Ko, kakɔna kakokayɛ nsala dia monga la nsaki k’efula?

4. Kakɔna kakokaso nɔmbaka l’alɔmbɛlɔ aso? (Filipɛ 2:13) (Enda ndo osato.)

⁴ Lɔmba dia monga la nsaki k’efula. Lo tshimbo ya nyuma kande, Jehowa koka kotshutshuya dia wɛ nkotsha oyango ayɛ. (Adia Filipɛ 2:13.) Ntena dimɔtshi sho ndjadjɛka oyango ɔmɔtshi nɛ dia sho mbeyaka dia sho pombaka ndjadjɛ oyango akɔ ndo ɔsɔ ekɔ dui dia dimɛna. Koko mbeyaka monga ko sho bu la nsaki ka mɛtɛ ka nkotsha oyango akɔ. Kɛsɔ mbakakomɛ kadiyɛso kɛmɔtshi ka l’Ouganda kelɛwɔ Norina. Nde akayadjɛ oyango wa monga l’ombeki ɔmɔtshi wa Bible, kaanga mbakinde komonga la nsaki, nɛ dia nde akayaokaka dia nde komonga l’akoka wa mbetsha. Kakɔna kakokimanyiya? Nde mbutaka ate: “Lakatatɛ nɔmba Jehowa lushi la lushi dia nde kimanyiyami dia dimi mfudia nsaki kami ka nɔmbɔla wekelo wa Bible. Lo yoho yɔtɔnɛ l’alɔmbɛlɔ ami, lakasale tshɛ dia ndowanya akoka ami wa mbetsha. L’ɔkɔngɔ wa ngɔndɔ ngana tsho, lakɛnyi dia nsaki kami kakafule. Ɔnɔnyi akɔ waamɛ, lakatatɛ mbeka Bible l’anto ahende.”

5. Lo na akokaso nkana yimba dia mfudia nsaki kaso?

⁵ Nkana yimba lo kɛnɛ kambokosalɛka Jehowa. (Os. 143:5) Ɔpɔstɔlɔ Pɔɔlɔ akakanaka yimba l’ɔlɔlɔ waheya mbɛdika wakawɛnya Jehowa ndo dui sɔ diakotshutshuya dia nde ndjasha tshɛ l’olimu wa Jehowa. (1 Kɔr. 15:9, 10; 1 Tim. 1:12-14) Woho akɔ waamɛ mbele, lo yɛdikɔ yayotalekaka nkana yimba la kɛnɛ kakakosalɛ Jehowa, mbayoyotalekaka monga la nsaki ka nkotsha oyango ayɛ. (Os. 116:12) Tɔsɛdingole kɛnɛ kakakimanyiya kadiyɛso kɛmɔtshi kadjasɛ la Honduras dia nkotsha oyango ande wa nkoma ombatshi mboka wa pondjo. Nde mbutaka ate: “Lakakane yimba lo ngandji k’efula kamboka Jehowa. Nde akakotola l’atei w’ekambi ande. Nde kotshaka ehomba ami ndo kokɛkami. Ekanelo ka yimba kɛsɔ kakakeketsha ekanelo kami ndo mfudia nsaki kami.”

6. Naa dui dikina diakoka tokimanyiya dia mfudia nsaki kaso?

⁶ Ka washo l’ɛtshɔkɔ wayoyokondja naka wɛ nkotsha oyango ayɛ. Lembetɛ kɛnɛ kakakimanyiya Erika, lakatatɛkɛtshi l’etatelo, lakayadjɛ oyango wa komaka la wonya lo losanganya l’otsha l’olimu w’esambishelo. Nde mbutaka ate: “Lakayoshihodiaka dia okomelo ami l’ɔkɔngɔ otsha l’olimu w’esambishelo, akapandjiyɛka awui efula. Lo nkoma la wonya, dimi koka mbishana mɔyɔ kaamɛ l’anangɛso l’akadiyɛso ndo mbetsha wenya kaamɛ lawɔ. Dimi koka nto monga suke dia mpokamɛ alako shikaa wayokimanyiya dia ngɛnangɛna ndo ndowanya olimu ami w’esambishelo.” Erika akaleke mbika washo lo wahɔ wayondokondja lo komaka la wonya ndo lo nkotsha oyango ande. Ɛtshɔkɔ akɔna wahombayɛ ndeka mbika washo lɔkɔ? Naka oyango ayɛ mendanaka la wadielo wa Bible kana dɔmbɛlɔ, kete nkana yimba la woho wayokeketsha dui sɔ lɔngɛnyi lasayɛ la Jehowa. (Os. 145:18, 19) Naka oyango ayɛ ekɔ wa nkɛnɛmɔla dionga dimɔtshi di’Okristo, kete kanyiya woho wayolowanya dui sɔ diɔtɔnganelo diele lam’asayɛ l’anto akina. (Kɔl. 3:14) Lande na keyɛ hasale listɛ l’ɛkɔkɔ tshɛ wayangayɛ dia nkotsha oyango ayɛ? Okaka sso lo listɛ lɔsɔ mbala la mbala. Tomáš, lakatatɛkɛtshi l’etatelo mbutaka ate: “Naka lekɔ l’ɛkɔkɔ efula watshutshuya dia nkotsha oyango ɔmɔtshi, kete hatohekɔ dia nkotsha oyango akɔ.”   

7. Kakɔna kakakimanyiya Julio la wadɛnde dia vɔ nkotsha eyango awɔ?

⁷ Etshaka wenya kaamɛ la wanɛ wayokokeketsha. (Tok. 13:20) Tende kɛnɛ kakakimanyiya Julio nde la wadɛnde dia nkotsha oyango awɔ wendana la mpamia olimu awɔ. Nde mbutaka ate: “Sho sɔnaka angɛnyi wasukɛ eyango aso ndo sho sawolaka lawɔ dikambo di’eyango akɔ. Efula l’atei awɔ wamboshilaka nkotsha eyango akɔ waamɛ, laasɔ vɔ kokaka tosha alako w’ohomba efula. Angɛnyi aso wakatombolaka woho watete eyango aso ndo wakatokeketshaka etena keso l’ohomba wa dui sɔ.”

ETENA KASHISHASO NSAKI

8. Kakɔna kakoka ntomba naka tayosala dia nkotsha oyango paka etena keso la nsaki? (Enda ndo osato.)

⁸ Koko lo mɛtɛ, ekɔ nshi mɔtshi yele sho bu la nsaki. Onde dui sɔ nembetshiyaka dia hatokokaki nsala la wolo dia nkotsha oyango aso? Ndooko. Tɔshi ɛnyɛlɔ: Lɔpɛpɛ koka monga ɛngɔ ka wolo efula kakoka ntshindjiya waato polo lɛnɛ atawatshu. Koko mpɛpɛ tshɛ bu la wolo akɔ waamɛ ndo nshi mɔtshi mongaka ko lɔpɛpɛ hapɛpɛ. Onde dui sɔ koka nembetshiya dia waato hayokoka nkɛndakɛnda? Ndooko. Ɛnyɛlɔ, waato ɛmɔtshi wekɔ la mɔtɛrɛ ndo ekina wekɔ la nkahi. Oduki wa waato koka nkamba la mɔtɛrɛ kana la nkahi dia ntshindjiya waato otsha lɛnɛ atawatshu. Nsaki kaso koka mbɛdikama la lɔpɛpɛ; etena kɛmɔtshi tɔ koka monga efula ndo etena kekina tɔ koka nkitakita. Ndo nshi mɔtshi, sho mbeyaka ndjaoka dia sho bu la nsaki ka nkotsha oyango aso. Laasɔ naka sho nsala la wolo dia nkotsha oyango aso paka etena keso la nsaki, kete hatokokaki nkotsha oyango akɔ pondjo. Koko l’ɛnyɛlɔ k’oduki a waato la nkamba la toho tokina dia nkoma otsha lɛnɛ atandatshu, sho koka nsala la wolo dia nkotsha oyango aso kaanga etena keso bu la nsaki. Koko dui sɔ nɔmbaka dia ndjashimba awui amɔtshi ndo etombelo wayonga w’amɛna. La ntondo ka sho nkɛtshanya kɛnɛ kakokaso nsala, nyɛsɔ tɔsɛdingole dimbola dimɔtshi diakoka munyiyama.

9. Onde ekɔ kɔlɔ mbidja welo dia nkotsha eyango aso kaanga etena keso bu la nsaki ka nsala dui sɔ? Lembetshiya.

⁹ Jehowa nangaka dia sho mbokambɛ l’ɔngɛnɔngɛnɔ ndo la lolango. (Os. 100:2; 2 Kɔr. 9:7) Ko onde sho pombaka ntetemala nsala la wolo dia nkotsha oyango aso wa lo nyuma kaanga etena keso bu la nsaki? Tɔsɛdingole ɛnyɛlɔ ka ɔpɔstɔlɔ Pɔɔlɔ. Nde akate ate: “Dimi pokolaka la wolo tshɛ demba diami ndo dietɛka oko mfumbe.” (1 Kɔr. 9:25-27, nɔtɛ ka lo divɛsa 27) Kaanga etena kaki Pɔɔlɔ komonga la nsaki ka nsala kɛnɛ kakakombolaka Jehowa dia nde nsala, nde akasale la wolo dia kisala. Onde Jehowa akangɛnangɛna l’olimu waki Pɔɔlɔ? Eelo! Ndo Jehowa akɔtshɔkɔla l’ɔtɛ wa welo wakandadje.​—2 Tim. 4:7, 8.

10. Ɛlɔlɔ akɔna wakokaso nkondja lo mbidja welo wa nkotsha oyango ɔmɔtshi kaanga etena keso bu la nsaki kasala dui sɔ?

¹⁰ Woho akɔ waamɛ mbele, Jehowa ngɛnangɛnaka etena katɛnande tasala la wolo dia nkotsha oyango aso kaanga etena keso bu la nsaki kasala dui sɔ. Nde ngɛnangɛnaka kaanga mbele mbeyaka monga ko aha mbala tshɛ ka ngɛnangɛnaso nkamba olimu akɔ, nde mbeyaka dia sho nangaka nsala dui sɔ l’ɔtɛ wa ngandji kawokaso. Oko wakatshɔkɔla Jehowa Pɔɔlɔ, mbayondɔtshɔkɔla ndo welo aso. (Os. 126:5) Ondo etena kɛnaso ɛtshɔkɔ wa Jehowa, sho mbeyaka ndjotatɛ monga la nsaki. Kadiyɛso kɛmɔtshi k’oma la Pologne kelɛwɔ Lucyna mbutaka ate: “Ntena dimɔtshi, handolangaka ntshɔ l’olimu w’esambishelo, djekoleko etena kamomɔlɛmba. Koko ɔngɛnɔngɛnɔ watongakami l’ɔkɔngɔ wa dimi nkalola oma l’esambishelo, ekɔ woshasha wa diambo.” Ɔnkɔnɛ, nyɛsɔ tende kɛnɛ kakokaso nsala etena keso bu la nsaki ka nsala dui dimɔtshi.

11. Ngande wakoka Jehowa tokimanyiya dia sho nkeketsha ndjakimɛ kaso?

¹¹ Lɔmba dia monga la ndjakimɛ. Ndjakimɛ ekɔ dikoka dia mbahemɛ nsaki ndo ditshelo diaso. Mbala efula tshɛkɛta shɔ mbelaka nkanyi ya ndjashimba dia nsala dui dimɔtshi dia kɔlɔ. Koko, ekɔ nto ohomba monga la ndjakimɛ dia nsala dui dimɔtshi di’ɔlɔlɔ, djekoleko naka dui diakɔ diekɔ wolo kana naka sho bu la nsaki ka nsala dui diakɔ. Tohɔ dia ndjakimɛ ekɔ dionga dimɔtshi dia l’atei w’olowa wa nyuma, laasɔ tɔlɔmbɛ Jehowa nyuma k’ekila dia tokimanyiya dia sho nkɛnɛmɔla dionga di’ohomba sɔ. (Luka 11:13; Ngal. 5:22, 23) David, lakatatɛkɛtshi oma l’etatelo, akalembetshiya woho wakokimanyiya dɔmbɛlɔ. Nde akakombolaka nsala wekelo ande w’onto ndamɛ mbala la mbala. Nde mbutaka ate: “Lakalɔmbɛ Jehowa dia nde kimanyiyami dia monga la ndjakimɛ. La ekimanyielo kande, lakatatɛ monga l’ekongelo ka dimɛna ka wekelo ndo lakatetemala latɔ.”

12. Ngande watokimanyiya Ondaki 11:4 dia nkotsha eyango aso?

¹² Tatolongamɛke waaso wa kokele. L’andja ɔnɛ, hatongaki pondjo la waaso wa kokele. Naka sho kongɛɛ waaso asɔ, kete hatokotshaki pondjo oyango aso. (Adia Ondaki 11:4.) Ɔnangɛso ɔmɔtshi lelɛwɔ Dayniel mbutaka ate: “Ndooko diaaso diele kokele. Sho ndjatongɛka waaso woleki amɛna lo mbɔsa tsho yɛdikɔ ya ntatɛ.” Ɔnangɛso ɔmɔtshi la l’Ouganda lelɛwɔ Paul shilaka ɔkɔkɔ okina wɛnya lande na kahatahombe ntaloya akambo: “Etena katatɛso oyadi lo ntena dia wolo, sho mbishaka Jehowa ɛngɔ kɛmɔtshi ka nde ntshɔkɔla.”​—Mal. 3:10.

13. Wahɔ akɔna waya lo ntatɛ l’eyango wa totshitshɛ?

¹³ Tatɛ l’oyango wa tshitshɛ. Sho mbeyaka monga ko sho bu la nsaki nɛ dia eyango aso mɛnamaka dia wekɔ wolo nkotsha. Naka ngasɔ mbediɔ ndo lo dikambo diayɛ, onde wɛ hakoke nkahanya oyango ayɛ lo eyango wa totshitshɛ? Naka oyango ayɛ wekɔ wa nkɛnɛmɔla dionga dimɔtshi, lande na keyɛ hasale la wolo dia dikɛnɛmɔla ntondo l’awui wa totshitshɛ? Naka oyango ayɛ ele wa mbadia Bible k’otondo, onde wɛ hakoke ndjadjɛ oyango wa ntatɛ mbadiaka tshenyi ya tshapita lo ntatɛ nsala ekongelo ka mondo kahɔshi etena efula ka wadielo? Tomáš, lakatatɛkɛtshi oma lo mbɔtwɛlɔ, akalɔ ta dia ta dia nkotsha oyango ande wa mbadia Bible k’otondo l’ɔkɔngɔ w’ɔnɔnyi ɔtɔi. Nde mbutaka ate: “Lakayoshihodia dia lakasɔnɛ enna kɛmɔtshi kakakimanyiya dia nshidiya esadi esadi. Ɔnkɔnɛ, lakɔshi yɛdikɔ ya ntatɛ nto, koko mbala kɛnɛ lakadiaka edingɔ engana eto lushi tshɛ ndo lakakanaka la wɔ yimba. Etombelo waki la dui sɔ ele lakatatɛ ngɛnangɛna wadielo.” Lam’ele Tomáš akatatɛ ngɛnangɛna la wadielo wa Bible, nde akakombola kiadia l’etena k’otale. L’ekomelo, nde akayoshidiya mbadia Bible k’otondo.c

WEKAMU WATOKƆKƆMƆLAKE

14. Nshi yakɔna ya kɔlɔ yakokaso monga la yɔ?

¹⁴ Dui dia paa ele, oyadi sho kongaka la nsaki kana koyashimbaka awui amɔtshi, tayotetemalaka monga la nshi ya kɔlɔ. Ɛnyɛlɔ, “awui wa shashimoya” mbeyaka tɔlelɛ wenya weso lawɔ ohomba dia nkotsha oyango aso. (Ond. 9:11) Sho mbeyaka mpomana l’okakatanu wakoka tɔkɔmɔla ndo toshishɛ wolo. (Tok. 24:10) Demba diaso diele bu kokele, mbeyaka tokonya dia nsala akambo wahatokimanyiya dia nkotsha oyango aso. (Rɔmɔ 7:23) Kana sho mbeyaka ndjaoka tsho dia tambɔkɔmɔ. (Mat. 26:43) Kakɔna kakoka tokimanyiya dia ntondoya nshi ya kɔlɔ shɔ?

15. Naka tambohomana la nshi ya kɔlɔ, onde kɛsɔ nembetshiyaka dia tambokita tatala? Lembetshiya. (Osambo 145:14)

¹⁵ Ohɔ diaha naka wɛ ambohomana la nshi ya kɔlɔ kete wambokita tatala. Bible mbutaka dia sho mbeyaka mpomana l’ekakatanu mbala la mbala. Koko, tɔ mbutaka nto dia sho koka mbatondoya, djekoleko l’ekimanyielo ka Jehowa. (Adia Osambo 145:14.) Ɔnangɛso ɔmɔtshi lelɛwɔ Philip lakatatɛtshi oma l’etatelo mbutaka ɔnɛ: “Handoleke mbidja yimba lo ntena diemi hakotsha oyango ami. Koko dimi ndekaka mbidja yimba lo ntena dimɔtshi lo ntatɛ nkamba la wolo dia nkotsha oyango akɔ.” David, lakatatɛkɛtshi oma l’etatelo mbutaka ate: “Lakasale la wolo dia mbɔsa nshi ya kɔlɔ, aha oko wekamu, koko oko waaso wa mɛnya Jehowa ngandji k’efula kawokami.” Eelo, lo ntetemala ntshɔ otsha la ntondo kaanga lo nshi ya kɔlɔ, wɛ mɛnyaka Jehowa dia wɛ nangaka mbɔngɛnyangɛnya. Jehowa pombaka mɛtɛ monga l’ɔngɛnɔngɛnɔ etena kakɛnande atetemala mbidja welo dia nkotsha oyango ayɛ!

16. Wetshelo akɔna wakondjayɛ naka dui dimɔtshi dia mbotomba diakoshimba dia wɛ nkotsha oyango ayɛ?

¹⁶ Ɔsa nshi ya kɔlɔ oko dikambo dia nkondja wetshelo oma lɔkɔ. Nkanyiya kɛnɛ kele lo kiɔkɔ yawɔ ndo yambola wate: ‘Onde dimi koka ntshikitanya dui dimɔtshi dia mbewɔ diaha ndjonga la nshi ya kɔlɔ?’ (Tok. 27:12) Koko ntena dimɔtshi, nshi ya kɔlɔ koka mɛnya dia takayadjɛ oyango weso bu l’akoka wa mbookotsha oko wakatafɔnyaka. Naka ngasɔ mbele lo dikambo diayɛ, kete nyomɔsɛdingola oyango ayɛ dia wɛd menda kana wɛ koka mbokotsha. Jehowa hatokɔsa diele oko wɛ ambokita tatala l’ɔtɛ wakayayadjɛ oyango weyɛ bu l’akoka wa mbokotsha.​—2 Kɔr. 8:12.

17. Lande na kahombaso namaka lo yimba kɛnɛ kambotoshilaka nkotsha?

¹⁷ Tolame lo yimba eyango wambotoshilaka nkotsha. Bible mbutaka dia: “Nzambi keema kɔlɔ dia nde mbohɛ olimu anyu.” (Hɛb. 6:10) Ɔnkɔnɛ, tatohɛke dui sɔ. Nkana yimba lo kɛnɛ kamboyoshilaka nkotsha, oyadi lo lɔngɛnyi lele lam’asayɛ la Jehowa, mbutɛ anto akina awui wendana la nde kana batizama. Oko wakayahame ndo wakayakotsha eyango ayɛ wa lo nyuma wa lo nshi yakete, wɛ koka mpama dia nkotsha eyango w’eyoyo wamboyoyadjɛ.​—Flpɛ. 3:16.

18. Kakɔna kahombaso mbohɔka etena kasalaso la wolo dia nkotsha oyango aso? (Enda ndo osato.)

¹⁸ L’ekimanyielo ka Jehowa, wɛ koka nkotsha oyango ayɛ, l’ɛnyɛlɔ k’onto la duka waato lele l’ɔngɛnɔngɛnɔ dia nkoma lɛnɛ atandatshu. Koko tohɛke dia, aduki wa waato nto ngɛnangɛnaka la lɔkɛndɔ lawɔ. Woho akɔ waamɛ mbele, salaka la wolo dia mɛna woho wakokimanyiya Jehowa ndo dui sɔ diayokokimanyiya dia wɛ monga l’ɔngɛnɔngɛnɔ etena kasalayɛ la wolo dia nkotsha eyango ayɛ. (2 Kɔr. 4:7) Naka wɛ hahekwe, kete wɛ ayokondja ɛtshɔkɔ efula.​—Ngal. 6:9.