Ekadimwelo lo ambola anyu

◼ Edja ka ngande kahombaso mbeka l’ombeki wa Bible watahame?

Ndeka dimɛna ntetemala mbeka l’ombeki wa Bible watahame edja ndo nde amboshidiya abuku ahende—Bible etshatɔ mɛtɛ? la ‘Nyotshikale lo ngandji ka Nzambi.’ Naka ombeki wa Bible ambobatizama la ntondo ka nshidiya abuku akɔ ahende, kete pombaka ndjotetemala mbeka la nde edja ndo nde amboshidiya abuku akɔ ahende. L’ɔkɔngɔ wa batismu kande, onto lêka la nde mbeyaka ntetemala mbɔsa wenya, waendelo w’eyoyo ndo mbadia onto ɔsɔ oko ombeki wa Bible. Naka opandjudi ɔmɔtshi ambototshindɛ ndo akasha lonya lo wekelo ɔsɔ, kete nde lawɔ mbeyaka mbɔsa wenya.—Enda lo Olimu aso wa Diolelo wa Ngɔndɔ ka sato 2009, lɛkɛ 2.

Ekɔ ohomba di’eyoyo mpikama dimɛna l’akambo wa mɛtɛ la ntondo ka sho ntshika mbeka la wɔ. Vɔ pombaka ‘mbika edio’ le Kristo ndo ‘shikimala lo mbetawɔ’ dia vɔ ndjeya nshika ekolo lo ehemba wayohomana la wɔ. (Kol. 2:6, 7; 2 Tim. 3:12; 1 Pet. 5:8, 9) Ndo nto, dia mbetsha anto akina dimɛna, vɔ pombaka monga la ‘ewo k’oshika k’akambo wa mɛtɛ.’ (1 Tim. 2:4) Naka sho nshidiya abuku ahende sho la ambeki aso, kete tayowakimanyiya dia vɔ nshikikala lo ‘mboka katɔla otsha lo lɔsɛnɔ.’—Mat. 7:14.

La ntondo ka mbetawɔ di’onto ɔmɔtshi batizama, dikumanyi pombaka ndjashikikɛ dia nde nshihodiaka dimɛna dimɛna wetshelo w’etatelo wa lo Bible ndo vɔ sɛnaka lo yoho yɔtɔnɛ la wetshelo akɔ. Dikumanyi pombaka mbidja yimba efula lo dikambo sɔ, djekoleko etena kasɛdingolawɔ onto lele atashidiya dibuku dia ntondo dia wekelo. Naka onto bu suke dia batizama, kete dikumanyi pombaka nsala tshɛ dia nde nongola ekimanyielo kahombama dia nde nkotsha kɛnɛ kalɔmbama dia ndjobatizama lo nshi yayaye.—Enda Tamboyakongɛ dia sala lolango la Jehowa, lɛkɛ 217-218.

[Efundelo wa l’etei w’odingɔ wa lo lɛkɛ 2]

Ekɔ ohomba di’eyoyo mpikama dimɛna l’akambo wa mɛtɛ