Tɛkɛta la dietawɔ

ETENA katɛkɛta onto la dietawɔ tshɛ, wanɛ wohokamɛ mɛnaka dia nde mɛtɛ mbetawɔka kɛnɛ katande l’ɔlɔlɔ tshɛ. Dietawɔ dia ngasɔ diakɛnama l’olimu waki ɔpɔstɔlɔ Paulo. Nde akafundɛ wanɛ wakakome ambetawudi la Tɛsalɔnika ate: “Ne dia lukumu l’ololo lakayi le nyu, aha la diui tu, keli ndu . . . la [“dietawɔ dia,” NW] wulu.” (1 Tes. 1:5) Dietawɔ sɔ diakɛnama lo yoho yakandatɛkɛtaka ndo yakandasɛnaka. Dietawɔ diaso dia wolo la dia mɛnama nto oma lo woho wewoyaso akambo wa mɛtɛ wa lo Bible.

Tɛkɛta la dietawɔ halembetshiya dia sho pombaka tshininala lo kɛnɛ ketawɔso, mbetawoya anto awui la wolo kana monga la lotamanya. Koko, onto lele la dietawɔ tɛkɛtaka awui w’oma l’Ɔtɛkɛta wa Nzambi lo yoho yɛnya mbetawɔ kande ka wolo.​—Heb. 11:1.

Waaso wa mɛnya dietawɔ. Ekɔ ohomba tɛkɛta la dietawɔ etena keyɛ l’esambishelo. Mbala efula anto mbidjaka yimba lo yoho yatɛkɛtayɛ ndo lo losango lawatɛyɛ. Vɔ mɛnaka woho wayaokayɛ lo kɛnɛ kendana l’awui watayɛ. Dietawɔ diele layɛ di’ɔnɛ wɛ ekɔ la dui dimɔtshi di’ohomba efula dia mbutɛ anto akina koka monga la shɛngiya ya wolo oleki ɛtɛkɛta wayoyotondja.

Ekɔ nto ohomba tɛkɛta la dietawɔ etena katɛkɛtayɛ la ntondo ka anyayɛ ambetawudi. Ɔpɔstɔlɔ Petero akafunde mukanda ande wa ntondo wakasambiyama ‘dia keketsha ndo mɛnya l’ɔlɔlɔ tshɛ ɔnɛ ngandji k’otamanya kaki Nzambi tɔ kɛnɛ.’ Lɔkɔ, nde akakeketsha anyande dia ‘tshikala nge.’ (1 Pet. 5:12) Lam’akandafundɛ etshumanelo ka la Rɔma, dietawɔ diakɛnya Paulo diaki la wahɔ le wɔ. Nde akafunde ate: “Dimi [“la dietawɔ,” NW] nti: Aha nyoi, kuyanga lumu, kuyanga andjelo, kuyanga waulelu, kuyanga akambu wa kakiane, kuyanga akambu wayayi, kuyanga wulu, kuyanga utali, kuyanga ohongo, kuyanga engo kekina kakatungama kayeya ntanganya uma lu ngandji ka [Nzambi] keli le Kristu Jesu Khumesu.” (Romo 8:38, 39) Paulo akafunde nto la diewo dia mbetawoya lo kɛnɛ kendana l’ohomba wa sambisha anto akina, ndo ohetoheto ande hita l’olimu ɔsɔ wakasha djembetelo ya shikaa yakɛnya dia nde akɛnaka ohomba w’olimu ɔsɔ. (Etsha 20:18-21; Romo 10:9, 13-15) Dikumanyi di’Akristo dia nshi nyɛ pombaka monga la dietawɔ dia ngasɔ etena ketshawɔ awui w’oma l’Ɔtɛkɛta wa Nzambi.

Lo wonya wa wekelo wa lo nkumbo kana lo tena dikina, ambutshi la dia tɛkɛtaka la dietawɔ tshɛ etena ketshawɔ anawɔ awui wa lo nyuma. Dui sɔ nɔmbaka ambutshi dia vɔ monga la ngandji ka Nzambi ndo ka mboka yande l’etema awɔ. Lo sala ngasɔ mbayowokoka tɛkɛta l’anawɔ la dietawɔ tshɛ, ‘nɛ dia onyɔ atɔtɛkɛtaka oma l’efula k’akambo wele l’otema.’ (Luka 6:45; Euh. 6:5-7) Monga la dietawɔ dia ngasɔ ayotshutshuya ambutshi nto dia mbisha ɛnyɛlɔ ka ‘mbetawɔ kaha la dungi pende.’​—2 Tim. 1:5.

Ekɔ ohomba tɛkɛta la dietawɔ djekoleko etena katona anto dietawɔ diaso. Onyayɛ la la kalasa, ombetsha ayɛ, kana onyayɛ ɔmɔtshi la l’olimu koka mamba lo woho wahayatambiya l’ɔnɔngɔ awɔ lo afɛstɔ amɔtshi. Okadimwelo w’oshika, ndo wa l’ekanelo ka yimba koka mbokimanyiya dia nɛnya mbetawɔ kayɛ k’oma lo Bible. Kayotota naka onto ɔmɔtshi okɔnga dia monga la lɔkɛwɔ la kɔlɔ, ɛnyɛlɔ: monga la lokeso, nɔ nɔnɔ dia wolo, kana ndjakimɔ l’awui wa mindo wa dieyanelo na? Ekɔ ɔlɔlɔ wɛ mbolembetshiya hwe dia wɛ hakokaki ndjakimɔ pondjo l’awui asɔ ndo ndoko dui diahomba ndjotshikitanya yɛdikɔ yayɛ shɔ. Kɛsɔ nɔmbaka dia wɛ tɛkɛta la dietawɔ tshɛ etena katonayɛ kanyi ya ngasɔ. Lam’akandatone wadi Pɔtifara lakawɔngaka dia mbeyana la nde, Yɔsɛfu akate la dihonga tshɛ ate: “Ukundi ukukimi ntsha munga kene ka wuki, la ntshela [Nzambi] kolo?” Lam’akatetemala mama kɛsɔ la yimba shɔ, Yɔsɛfu akalawɔ l’andja wa luudu.​—Etat. 39:9, 12.

Woho wa tɛkɛta la dietawɔ. Ɛtɛkɛta wakamba layɛ mbakoka mɛnya lo yɛdikɔ y’efula dia wɛ ekɔ la dietawɔ. Lo waaso efula, la ntondo ka mbuta dui dimɔtshi di’ohomba, Yeso akatatɛka mbuta ɔnɛ: “Mete, mete, kakutelami nti.” (Joa. 3:3, 5, 11; 5:19, 24, 25) Paulo akɛnyaka dietawɔ diande lo mbuta ɔnɛ: “Dimi lambetawo nti,” “dimi lambeya ndu lambetawo uma le Khumadiondjo Jesu,” “lambuta mete, halati kashi.” (Romo 8:38; 14:14; 1 Tim. 2:⁠7) Lo kɛnɛ kendana l’ekotshamelo k’ɔtɛkɛta ande, Jehowa akatome amvutshi ande lo tena dimɔtshi dia mbuta ɛtɛkɛta w’eshikikelo wele oko, “to [ɛnɛlɔ] kayuya mete.” (Hab. 2:3) Etena katɛkɛtayɛ dikambo dia prɔfɛsiya nyɛ, wɛ la dia tɛkɛta woho akɔ wamɛ. Naka wɛ ndjaɛkɛ le Jehowa koko aha le yɛ wɛmɛ ndo naka wɛ tɛkɛta l’anto akina la loshilambo tshɛ, kete ɛtɛkɛta ayɛ woludi la dietawɔ wayɛnya dia wɛ ekɔ la mbetawɔ ka wolo.

Dietawɔ diayɛ koka mɛnama nto oma l’ɛtɛkɛta ayɛ w’eshika ndo w’ohetoheto. Ɛnamelo k’elungi kayɛ, tɔjɛstɛ ndo yoho yayɛ ya tɛkɛta kimanyiyaka lo dikambo sɔ, kânga mbakoka dikambo sɔ tshikitana lo ndjela onto l’onto. Kânga wɛ ekɔ ɔsɔnyi kana kema l’ɔtɛkɛta wa bakubaku, naka wɛ mbetawɔka mɛtɛ dia kɛnɛ katayɛ kekɔ mɛtɛ ndo ɔnɛ anto akina wekɔ l’ohomba wa mboka awui akɔ, kete wɛ ayɔtɛkɛta la dietawɔ tshɛ.

Lo mɛtɛ, sho la dia tɛkɛta la dietawɔ dia mɛtɛ. Naka anto wambɛna dia tekɔ lo funa tsho, koko hatɔtɛkɛta awui w’oma l’etei k’otema, kete vɔ koka mbɔsa dia losango laso kema ohomba. Ɔnkɔnɛ, lâdiko di’akambo asɔ tshɛ, tɛkɛta woho wokoyɔtɛkɛtaka. Lo menda efula k’anto wele la ntondo kayɛ, ondo wɛ koka mɛna ohomba wa mbidiya yema ya dui oleki woho wokoyɔtɛkɛtaka. Koko oyango ayɛ la dia monga wa tɛkɛta l’otema ɔtɔi ndo woho wokoyɔtɛkɛtaka.

Kɛnɛ kayokokimanyiya dia tɛkɛta la dietawɔ. Lam’ele tɛkɛta la dietawɔ nemanɛka la woho wɔsayɛ awui wahombayɛ tɔtɛkɛta, kɛnɛ kayoleka kokimanyiya lo dikambo sɔ ele ɔlɔngɔswɛlɔ wa dimɛna. Aha sangola tsho awui oma lo dibuku dimɔtshi ko towata oko okongoso kete lâsɔ ambokoka. Wɛ la dia shihodia awui akɔ dimɛna ndo monga l’akoka wa mbatɛkɛta l’ɛtɛkɛta ayɛ hita. Wɛ la dia mbetawɔ dimɛna di’awui akɔ wekɔ mɛtɛ ndo kɛnɛ katayɛ kekɔ ohomba le ampokami ayɛ. Dui sɔ nembetshiyaka dia etena kalɔngɔsɔlayɛ sawo diayɛ, wɛ la dia mbidja yimba l’ekakatanu wele l’ampokami ayɛ ndo kɛnɛ kambowoshilaka la mbeya lo dikambo diakɔ kana nganɛ wadiɔsawɔ.

Naka tekɔ lo mbisha sawo diaso la lolimi l’ɔsɛlɔ, kete hatonga wolo di’anto akina mboka dia tekɔ la dietawɔ l’awui wataso. Koko, lâdiko wa wɛ nɔngɔsɔla awui ayɛ dimɛna, yasha tshɛ dia vusola sawo diayɛ. Dja yimba efula lo tenyi dia lo sawo diayɛ diahombayɛ tɛkɛta l’eshikikelo tshɛ woho wa wɛ disha aha la mendaka nɔtɛ yayɛ wonya tshɛ. Tohɛke dia nɔmba Jehowa dia nde tshɔkɔla welo ayɛ. Lo sala ngasɔ, wɛ ayonga la ‘dihonga oma l’ekimanyielo ka Nzambi kaso’ dia tɛkɛta lo yoho yɛnya dia wɛ ekɔ la dietawɔ di’ɔnɛ awui watayɛ wekɔ mɛtɛ ndo losango layɛ lekɔ ohomba.​—1 Tes. 2:2.