Tokambe la biukubuku “Mbɔtwɛlɔ k’Ɔtɛkɛta wa Nzambi”—Dia tatshiya sawo
1. Naa ehomɔ k’oyoyo kambotokondja dikambo di’esambishelo?
1 Bible ka Ekadimwelo k’andja w’oyoyo kambovuswama l’Angɛlɛ kekɔ l’etenyi kɛmɔtshi kelamɛ “Mbɔtwɛlɔ k’Ɔtɛkɛta wa Nzambi” l’etatelo. Ngande wakokaso nkamba la ehomɔ k’oyoyo kɛsɔ etena kalɔngɔsɔlaso mbɔtwɛlɔ ya l’esambishelo? Lam’ele etenyi kɛsɔ kekɔ l’avɛsa l’ɛse k’ɛtɛ w’awui wotshikitanyi wɔsami oma lo Bible oko wediɔ lo dibuku Comment raisonner, tɔ koka tokimanyiya efula dia ntatɛ asawo.
2. Ngande wakokaso nkamba la biukubuku “Mbɔtwɛlɔ k’Ɔtɛkɛta wa Nzambi” l’esambishelo?
2 Wɛ koka nkamba la dimbola 8 ndo mbuta ɔnɛ: “Tekɔ lo tasawola l’asukanyi aso lo tshena pe, nɛ dia anto efula wekɔ lo ndjambola ɔnɛ ‘Onde Nzambi mbele lo kiɔkɔ y’asui w’anto?’ [Lo bɛtshi dia nkɛtɛ dimɔtshi, ndeka dimɛna mɛnya ompokami ayɛ dimbola diakɔ.] Ko wɛ atayɛ lo dikambo sɔ? [Tshikande akadimole.] Bible mbishaka okadimwelo w’oshika lo dimbola nɛ.” Adia mbala kakɔ ɔtɔi oma lo Bible divɛsa ɔtɔi kana ndekana woshilami ndo nyɔkɛtshanya. Naka ompokami ambɛnya nsaki, wɛ koka mbɛnya ambola 20 wɔlɔngami l’etatelo ndo mbɔlɔmba dia nde nsɔna dimbola dimɔtshi dia nyu ndjɔkɛtshanya mbala kayaye. Kana wɛ koka mbosha okanda aso ɔmɔtshi wekaso l’anto Bible wele l’awui efula wendana la ɔtɛ a dui wambonyosawolaka.
3. Ngande wakokaso nkamba la biukubuku “Mbɔtwɛlɔ k’Ɔtɛkɛta wa Nzambi” dia tatshiya sawo l’ahole wele l’anto wele l’ɔtɛmwɛlɔ wele bu w’Akristo?
3 Dimbola 4 ndo 13 polo 17 koka ndeka tokimanyiya etena kasambishaso l’ɛtshi ka nkɛtɛ kele l’anto wa l’ɔtɛmwɛlɔ wele bu w’Akristo. Ɛnyɛlɔ, wɛ koka nkamba l’awui wele lo dimbola 17 ndo mbotɛ ɔnɛ: “Tekɔ lo takɛtshanya l’ase nkumbo tshɛ dui dimɔtshi di’ohomba efula lo tshena pe. Onde wɛ mbetawɔka dia nkumbo yekɔ lo mpomana l’ekakatanu efula nshi nyɛ? [Tshikande akadimole.] Atshukanyi efula wamboshihodia dia ɛtɛkɛta wa lomba ɛnɛ wekɔ ohomba efula: “Wadi lo wedi ande pombaka monga la dilɛmiɛlɔ di’efula otsha le omɛnde.” [Hatonga ohomba mbuta ɔnɛ awui asɔ wekɔ lo Ɛfɛsɔ 5:33. Naka wɛ ekɔ lo nsawola la womoto, wɛ koka mbotɛ ɛtɛkɛta wele lo Ɛfɛsɔ 5:28.] Oko le yɛ, naka atshukanyi nkamba la dako sɔ, vɔ wayokondja wahɔ?”
4. Kakɔna kakokayɛ nsala l’ekomelo ka sawo dianyu wɛ la onto ɔmɔtshi lele l’ɔtɛmwɛlɔ wele bu w’Akristo?
4 L’ekomelo ka sawo dianyu, nyokane dia ndjotetemala nkɛtshanya lo diaaso dikina. Wɛ koka nkongɛ dia ndjosawola la nde lo dikambo dia divɛsa dikina dia lo dimbola diakakambe la yɛ. L’etena kahombama, tɛ ompokami ayɛ ɔnɛ awui w’amɛna wakanyasawodi mbɔsama oma lo Bible. Lo ndjela ɔkɛtshanyelo wakanyasale mbala ketshi ndo woho wɔsa onto akɔ Bible, shande okanda wakoka mbɔngɛnyangɛnya.—Enda dikatshi di’okotsha dia lo Olimu aso wa Diolelo wa Ngɔndɔ ka dikumi l’ahende 2013.