Tolowanya akoka aso wa nsambisha—Lo nɔngɔsɔlaka ɛtɛkɛta aso wa mbɔtwɛlɔ

Ohomba wa dikoka sɔ: Naka ɛtɛkɛta aso wa mbɔtwɛlɔ hemola nsaki, kete ompokami aso koka mpembola sawo diaso la ntondo ka sho mbosambisha. Diakɔ diele, apandjudi efula mbɔsaka ɛtɛkɛta awɔ w’etatelo oko etenyi koleki ohomba efula ka mbɔtwɛlɔ kawɔ. Kaanga mbatoshawɔ bɛnyɛlɔ dia mbɔtwɛlɔ lo Olimu aso wa Diolelo ndo lo dibuku Comment raisonner, aha tena tshɛ mbongadiɔ la mbɔtwɛlɔ kele l’awui tshɛ l’oyango wa tokimanyiya dia ndjaɔtɔnganyiya l’akambo. Oyadi bɛnyɛlɔ dia mbɔtwɛlɔ diekɔ l’awui tshɛ, apandjudi koka ditshikitanya kana nɔngɔsɔla yawɔ vɔamɛ. Ɔnkɔnɛ tayoleka monga tomanamana, naka tayɔlɔngɔsɔlaka ɛtɛkɛta aso wa mbɔtwɛlɔ dimɛna lo dihole dia tɛkɛtaka tsho kɛnɛ katoyɛ lo yimba etena kahomanaso l’ompokami.—Tuk. 15:28.

Woho wa nsala dui sɔ:

• Sɔna sawo dimɔtshi. Diɔ pombaka mbɔsama lo okanda wayangayɛ mbisha onto ndo diɔ pombaka ngɛnyangɛnya anto wa l’ɛtshi kayɛ ka nkɛtɛ.

• Lɔngɔsɔla dimɛna dui ɔtɔi kana ahende wayoyota l’ɔkɔngɔ wa mbisha onto mɔyɔ oko wele mbekelo kaso. Wɛ koka ntatɛ lo mbuta ɔnɛ: “Lamboya ndjokenda nɛ dia . . . ,” “Anto efula ndjakiyanyaka lo dikambo dia . . . ,” “Dimi nangaka mbeya kanyi yayɛ lo . . . ,” kana dui dikina. Mbala efula tɔtɛkɛta ta tomondo ndo ta wɔdu mongaka l’etombelo w’amɛna. Apandjudi efula kimɛka mbɔtwɛlɔ yawɔ lo yimba.

• Oka dimbola diatshutshuya onto dia mbisha kanyi yande dia nkutola yaambalo y’ompokami ayɛ lo sawo. (Mat. 17:25) Ohɔ dia ondo nde aki lo nkanyiya awui akina la ntondo ka wɛ nkoma, diakɔ diele dimbola diayɛ diatongake wolo amboleka kana mbosha sɔnyi.

Hemba nsala nganɛ lo ngɔndɔ kɛnɛ:

• Ɔsa etena ka nɔngɔsɔla ndo mpemba ɛtɛkɛta ayɛ wa mbɔtwɛlɔ etena kasalanyu ɔtɛmwɛlɔ wa lo nkumbo.

• Etena kenyu l’esambishelo, tɛ opandjudi watasambisha layɛ ɛtɛkɛta wa mbɔtwɛlɔ wakayatalɔngɔsɔdi. (Tuk. 27:17) Tshikitanya ɛtɛkɛta ayɛ wa mbɔtwɛlɔ naka vɔ bu l’etombelo w’amɛna.