Tokoya mbetawɔ kawɔ
1. Kakɔna kayotɔsɛdingola lo Wekelo wa Bible wa l’etshumanelo ntatɛ lomingu la Ngɔndɔ ka dikumi 19?
1 Lo lomingu la Ngɔndɔ ka dikumi 19, 2015, tayotatɛ mbeka dibuku Tokoya mbetawɔ kawɔ lo Wekelo wa Bible wa l’etshumanelo. Dibuku nɛ sɛdingolaka ɛkɔndɔ wa lo Bible w’apami la wamato 14 waki la mbetawɔ. Diɔ diakafundama lo yoho yatokimanyiya dia sho monga oko tekɔ lo mɛna anto asɔ dia vɔ monga oko anto wa mɛtɛ mɛtɛ le so lo ehemba wakahomana la wɔ lo kambɛ Jehowa. Ndo nto, dibuku sɔ tetshaka wetshelo w’oma lo ɛkɔndɔ wele lɔkɔ dia tokimanyiya l’onto l’onto dia nkamba la wetshelo akɔ ɛlɔ kɛnɛ.—Hɛb. 6:12.
2. Lembetshiya awui amɔtshi w’ohomba watanema lo dibuku Tokoya mbetawɔ kawɔ.
2 Awui w’ohomba wele lɔkɔ: Dibuku diakɔ mɛnyaka woho wakayahɔnaka akambo ndo waa kartɛ dia tokimanyiya dia sho nshikikɛ etena ndo dihole diakasɛnaka onto tshɛ la lɔkɔ. Laadiko wa laasɔ, tshapita tshɛ yekɔ la etenyi kata ɔnɛ: “Kanyiya yema . . . ,” kayotokimanyiya dia sho nkana yimba lo ɛkɔndɔ ndo nkamba la wetshelo wakondjaso. Dibuku diakɔ diekɔ nto la esato w’amɛna efula wele la kulɛrɛ, awui wokɛma hwe ndo eyangelo efula wakasalema lo kɛnɛ kendana la esato, kɛsɔ tokimanyiyaka dia sho nkana yimba lo ɛkɔndɔ akɔ.
3. Kakɔna kakokaso nsala dia nkondja wahɔ oma lo wekelo aso wa dibuku nɛ?
3 Woho wakokayɛ nkondja wahɔ: Dibuku diakɔ tatɛka la mukanda w’oma le Olui-walɔmbɔla watokeketsha sho tshɛ l’ɛtɛkɛta ɛnɛ ɔnɛ: “Nyokambe la yimba ndo l’awoki anyu. Nyoyaoke oko wakayaoke anto wɔtɛkɛtshiwɔ lɔkɔ, ndo nyonge oko anto wɛna kɛnɛ kakawɛnyi. Nyɛdike kɛnɛ kakawasale la ntondo k’awui wakaakomɛ la kɛnɛ kotonyosala la ntondo k’awui akɔ.” Lo mɛtɛ, nkamba la yimba yaso halembetshiya mfɔnya tsho esadi esadi ko amboshila, koko sho pombaka mbeya kakɔna kata ɔkɔndɔ ndo nshihodia dimɛna anto watɛkɛtama lɔkɔ. Dia nsala ngaasɔ, nɔmbamaka etena ndo nkana yimba. (Neh. 8:8) Naka wetshelo wambotatɛ l’atei wa tshapita, ɔnɔmbɔdi ayotatɛ la mvusola wetshelo wa mbala k’etshi l’edja ka sekɔndɛ 30 polo 60. Dimbola ɔtɔi kana ahende koka mbokama oko ovuswelo wa l’ekomelo naka wetshelo bu lo etenyi kata ɔnɛ: “Kanyiya yema . . .”
4. Lande na kahombaso mbeka dibuku Tokoya mbetawɔ kawɔ?
4 Tekɔ lo nsɛna l’andja wayanga lushi tshɛ dia mfukutanya mbetawɔ kaso lo toho totshikitanyi. Dibuku nɛ, mbuta ate ɛtɛ w’asawo amɔtshi watotombaka lo Tshoto y’Etangelo lɛnɛ ɔsami dibuku nɛ, ekɔ tshondo ya woshasha w’oma le Jehowa dia tokimanyiya dia nkeketsha mbetawɔ kaso. (Jak. 1:17) Nyɛsɔ tokondja wahɔ tshɛ lo tshɛ oma lɔkɔ lo mbɔtɔka mbala mbala lo Wekelo wa Bible wa l’etshumanelo ndo lo ndjashaka efula lo mbishaka kɔmatɛrɛ etena kekaso dibuku nɛ kaamɛ.