“Diɔ diakalodja otema ami la kɛnɛ kakimi l’ohomba”
“LAMBONYOSHA losaka l’otema ɔtɔi dikambo dia woshasha wa dimɛna efula wa dibuku Approchez-vous de Jéhovah. Diɔ ndodjaka otema ami la kɛnɛ kewɔ l’ohomba, mbut’ate, ohomba wa mbeya dia Jehowa nangakami ndo ngɛnangɛnakami. Lekɔ lo ndjaoka kakianɛ dia lamboleka ndjasukanya le Jehowa ndo le Ɔnande la ngandji. Dimi nangaka tɛkɛta l’onto tshɛ dikambo dia dibuku nɛ ndo mbisha anto tshɛ wokami ngandji kɔpi kɛmɔtshi.” Ɔsɔku mbakayaoke Ɔmɛnyi wa Jehowa ɔmɔtshi lo dikambo dia dibuku diele la ndjɛkɛ 320 diakatombe lo nsanganya ya Distrikɛ yaki l’ɔtɛ a dui ɔnɛ: “Apandjudi wa Diolelo Wele l’Ohetoheto,” yakasalema l’ɔnɔnyi 2002/2003. Nyɛsɔ tɔsɛdingole awui amɔtshi wele lo dibuku di’oyoyo sɔ ndo teye lande na kakadiatondjama.
Awui amɔtshi wele lo dibuku di’oyoyo
Awui akɔna wele lo dibuku di’oyoyo nɛ? Awui tshɛ wele l’asawo ahende wa wekelo wa numɛlɔ ka Tshoto y’Etangelo nyɛ, ndo awui akina efula! Dibuku nɛ diekɔ la totshapita 31, tshapita tshɛ yekɔ l’otale wele oko sawo dia wekelo wa Tshoto y’Etangelo. L’ɔkɔngɔ wa mbɔtwɛlɔ ndo wa totshapita tosato ta ntondo, dibuku nɛ kahanyema lo tenyi nɛi, etenyi l’etenyi tɛkɛtaka dikambo dia dionga dimɔtshi dia woke diaki Jehowa. Etenyi tshɛ tatɛ la tshapita yatɛkɛta lo tshena pe dikambo dia dionga diɔmbwami l’etenyi kakɔ. Totshapita tongana tayela mɛnyaka woho wakɛnɛmɔla Jehowa dionga sɔ. Etenyi tshɛ kekɔ la tshapita mɔtshi yatɛkɛta dikambo dia Yeso. Lande na? Eelo, Yeso akate ate: “One lakamenyi akenyi Papa.” (Joani 14:9) Oko wakandokoya Jehowa l’akambo tshɛ, Yeso akatosha bɛnyɛlɔ di’amɛna efula diakɛnɛmɔla waonga waki Nzambi. Etenyi tshɛ komɛ la tshapita ya tetsha woho wa mbokoya Jehowa dia kɛnɛmɔla dionga diekiso l’etenyi kakɔ. Lo tɛkɛta dikambo dia waonga waki Jehowa, dibuku nɛ di’oyoyo tɛkɛtaka awui w’oma lo dibuku tshɛ dia lo Bible.
Dibuku nɛ diele l’ɔtɛ a dui ɔnɛ, Approchez-vous de Jéhovah diekɔ nto l’akambo amɔtshi w’ohomba efula. Tatɛ oma lo tshapita 2, tshapita tshɛ yekɔ la kiombo yele l’ɔtɛ a dui ɔnɛ: “Wembola wa Kana la Wɔ Yimba.” Oyango w’avɛsa ndo wa wembola wele lo kiombo shɔ kema dia vusola awui wa tshapita yekami. Koko oyango awɔ ele wa tokimanyiya dia sho kamba la Bible dia kana yimba dimɛna la dui diekiso. Adia oseka divɛsa tshɛ dimɛna dimɛna. Oma lâsɔ ko wɛ kana ladiɔ yimba ndo sala la wolo dia mbeya woho wakokayɛ kamba ladiɔ. Okanelo wa yimba ɔsɔ wayokokimanyiya dia wɛ ndeka ndjasukanya le Jehowa.—Osambu 19:14.
Lo kɛnɛ kendana l’esato wele lo dibuku Approchez-vous de Jéhovah, eyangelo efula wakasalema ndo esato akɔ wakalɔngɔswama dimɛna dia mbetsha ndo dia keketsha. Totshapita dikumi l’esambele tekɔ l’esato w’amɛna w’awui wele lo Bible.
Lande na kakadiatondjama?
Lande na kakatondjama dibuku Approchez-vous de Jéhovah na? Oyango woleki wa dibuku di’oyoyo nɛ ele wa tokimanyiya dia sho nyomoleka mbeya Jehowa woho wa sho monga la diɔtɔnganelo dia dimɛna efula la Nzambi kaso.
Onde wɛ koka kanyiya onto ɔmɔtshi lakoka kondja wahɔ oma lo dibuku Approchez-vous de Jéhovah, ɛnyɛlɔ ombeki wa Bible, ɔnangɛso kana kadiyɛso kɛmɔtshi k’Okristo kahayosambisha? Ko kayotota dikambo diayɛ, onde wɛ ambotatɛka mbadia dibuku di’oyoyo nɛ? Naka wɛ atatatɛ, lande na kahayatshungola etena ka diada aha la tshimbatshimba? Ɔsaka etena ka kanaka yimba la kɛnɛ kadiayɛ. Sala dia dibuku di’oyoyo nɛ kokimanyiya dia wɛ ndeka ndjasukanya le Jehowa Nzambi, woho wa wɛ mbeya mbewoya Diolelo diande l’ɔngɛnɔngɛnɔ ndo l’ohetoheto w’efula!