Okambelo wa la Bible dia kadimola

ETENA katokawɔ wembola wendana la dietawɔ diaso, la yoho yaso ya lɔsɛnɔ, la woho wɔsaso akambo watomba nshi nyɛ, ndo l’elongamelo kaso ka lo nshi yayaye, sho salaka la wolo dia kamba la Bible dia kadimola. Lande na? Nɛ dia tɔ kekɔ Ɔtɛkɛta wa Nzambi. Oma lo Bible mbotumbi waetawɔ aso. Sho mbɔtɔnganyiyaka lɔsɛnɔ laso la kɛnɛ kata Bible. Tɔ ndowanyaka tokanyi taso lo kɛnɛ kendana l’awui wa l’andja ɔnɛ. Elongamelo kaso ka nshi yayaye mbika etshina ka wolo l’alaka wa lo Bible wakasambiyama.​—2 Tim. 3:16, 17.

Sho mbeyaka dimɛna ɔkɛndɛ wele laso l’ɔtɛ wa lokombo laso. Sho tekɔ Ɛmɛnyi wa Jehowa. (Is. 43:12) Ɔnkɔnɛ, sho kadimolaka wembola, aha lo ndjela filozofi y’anto, koko lo ndjela kɛnɛ kata Jehowa l’Ɔtɛkɛta ande wakasambiyama. Lo mɛtɛ, oko weso anto, tekɔ la tokanyi taso hita l’awui amɔtshi, koko sho tshikaka di’Ɔtɛkɛta wa Nzambi ndowanya tokanyi taso nɛ dia sho tekɔ l’eshikikelo ka wolo ɔnɛ vɔ wekɔ mɛtɛ. Aha la tâmu, l’awui efula, Bible toshaka diaaso dia sala kɛnɛ kalangaso. Koko, lo dihole dia sho fundɛ anto akina kɛnɛ kalangaso, sho kombolaka mbetsha atɔndɔ wele l’Afundelo, dia tshikɛ ampokami aso diaaso dia vɔ lawɔ sɔna kɛnɛ kalangawɔ. L’ɛnyɛlɔ k’ɔpɔstɔlɔ Paulo, sho nyangaka di’anto monga “l’ukitanyia lu mbetawo.”​—Romo 16:26.

Lo Enyelo 3:14 Yeso mbelamɛka ɔnɛ “omenyi wa kolamelo la mete.” Ngande wakandakadimolaka wembola ndo wakandasalaka la ntondo k’akambo wakokomɛka na? Mbala mɔtshi, nde akakambaka la bɛnyɛlɔ diakatshutshuyaka anto dia kana yimba. Lo tena dikina aki lo mimbola onto lowoki wombola eokelo kande hita lo divɛsa dimɔtshi. Mbala efula nde akakadimolaka lo shila avɛsa, lo mbuta awui w’oma lɔkɔ, kana lo mbisha kanyi yele l’avɛsa akɔ. (Mat. 4:3-10; 12:1-8; Luka 10:25-28; 17:32) Lo ntambe ka ntondo, wɛɔmbɔ w’Afundelo wakombamaka lo shinangɔnga. Ndoko kɛnɛ kɛnya dia Yeso aki l’olui ande hita wa wɛɔmbɔ ɛsɔ, koko nde akeyaka Afundelo dimɛna ndo akashilaka awui wa lɔkɔ mbala efula lam’akandetshaka anto. (Luka 24:27, 44-47) Nde mɛtɛ akakoke mbuta di’awui wakandetshaka kondja oma le nde. Nde akate awui wakandoke oma le She.​—Joa. 8:26.

Sho nangaka mbokoya Yeso. Ndoko lushi lakatoke Nzambi atɛkɛta, oko wakoke Yeso. Koko Bible ekɔ Ɔtɛkɛta wa Nzambi. Naka ekadimwelo aso wayotombaka oma lɔkɔ, kete tayewɔ dia kotola yambalo y’anto oya le so. Sho mɛnyaka dia lo dihole dia ndakanya tokanyi t’anto wele kema kokele, tambɔsa yɛdikɔ ya wolo ya tshikɛ Nzambi dihole dia nde totɛ kɛnɛ kele mɛtɛ.​—Joa. 7:18; Romo 3:4.

Lo mɛtɛ, oyango aso bu tsho wa kamba la Bible, koko wa sala dikambo sɔ lo yoho yayokoka ɔnɛ latohokamɛ kondja wahɔ efula. Sho nangaka nde mpokamɛ l’oyango wa mbetawɔ kɛnɛ kawotɛso. Lo ndjela dionga diele l’onto, wɛ kokaka mbɔtshiya tokanyi t’oma lo Bible lo mbuta ɔnɛ: “Kema wɛ mbetawɔka dia kɛnɛ koleki mɛtɛ ohomba ele kɛnɛ kata Nzambi?” Kana mbuta ɔnɛ: “Onde wɛ mbeyaka dia Bible tɛkɛtaka dikambo sɔ?” Naka wɛ ekɔ lo tɛkɛta l’onto lahalɛnya Bible, kete wɛ koka kamba la mbɔtwɛlɔ kotshikitanyi. Wɛ koka mbuta ɔnɛ: “Lekɔ lo nanga kotɛ awui w’oma lo prɔfɛsiya kɛmɔtshi k’edjedja.” Kana wɛ koka mbuta wate: “Dibuku diamboleka kahanyema l’andja w’otondo mbutaka ɔnɛ . . .”

Mbala mɔtshi, wɛ koka mɛna ɔlɔlɔ mbuta tsho awui wa lo divɛsa dimɔtshi. Koko, lanɛ wɛnayɛ wate kokaka, ndeka dimɛna mbifola Bible twamɛmɛ ndo mbadia kɛnɛ katatɔ. Ɛnya onto divɛsa diakɔ lo Bible kande hita mbala tshɛ kɛnayɛ wate kokaka. Yoho shɔ ya kamba la Bible mbala kakɔ ɔtɔi mongaka mbala efula la shɛngiya ya wolo le anto.​—Heb. 4:12.

Dikumanyi di’Akristo wekɔ l’ɔkɛndɛ wa lânde wa kamba la Bible etena kakadimolawɔ wembola. Dui dimɔtshi dialɔmbama le ɔnangɛso dia kamba oko ekumanyi ele nde pombaka ‘kimela dui dia kɔlamelo la wolo tshɛ lo kɛnɛ kendana la diewo diande dia mbetsha.’ (Tito 1:9) Os’etshumanelo koka mbɔsa yɛdikɔ ya woke lo lɔsɛnɔ lande l’ɔkɔngɔ w’ekumanyi kɛmɔtshi mbosha dako. Ekɔ ohomba efula dako sɔ mbɔsama oma l’Afundelo! Ɛnyɛlɔ kayosha ekumanyi lo sala dikambo sɔ koka monga la shɛngiya le anto akina lo kɛnɛ kendana la yoho yawɔ ya mbetsha.