Tokambe la Bible dia ndjakimanyiya ndo dia nkimanyiya anto akina

1. Lande na kahombaso ndjaɛkɛ l’Ɔtɛkɛta waki Nzambi?

ETENA kasawola dikumanyi l’ombeki ɔmɔtshi wa Bible wolanga ntatɛ ntomba l’olimu w’esambishelo dia mbeya kana nde ambokotsha kɛnɛ kalɔmbama, vɔ toyambolaka ɔnɛ: ‘Onde onto ɔnɛ mɛnyaka oma lo ɛtɛkɛta ande dia nde mbetawɔka dia Bible ekɔ Ɔtɛkɛta waki Nzambi wakasambiyama?’a Oyadi le ɔnɛ lalanga nkoma opandjudi kana le ekambi ekina waki Nzambi, okadimwelo wa dimbola sɔ pombaka monga eelo. Lande na? Nɛ dia wɛkamu aso l’Ɔtɛkɛta waki Nzambi ndo woho wakambaso la wɔ l’olimu w’esambishelo ayotokimanyiya dia sho nkimanyiya anto akina dia vɔ mbeya Jehowa ndo ndjokondja panda.

2. Lande na kahombaso ‘ntetemala lo akambo wakateke’?

² Ɔpɔstɔlɔ Pɔɔlɔ akatɔtɔmiya ohomba w’Ɔtɛkɛta waki Nzambi etena kakandafundɛ Timɔte ate: “Otetemale ndjela akambo wakayeke ndo wakawakokimanyiya dia mbetawɔ.” “Akambo” wakatɛkɛtaka Pɔɔlɔ lanɛ ekɔ akambo wa mɛtɛ wa lo Bible wakatshutshuya Timɔte dia monga la mbetawɔ lo lokumu l’ɔlɔlɔ. Akambo wa mɛtɛ asɔ wekɔ la shɛngiya ndo le so ɛlɔ kɛnɛ, ndo wekɔ lo ntetemala tokimanyiya dia sho monga la “lomba layotokimanyiya dia nkondja panda.” (2 Tim. 3:14, 15) Mbala efula, sho tokambaka l’ɛtɛkɛta ekina wakafunde Pɔɔlɔ dia mɛnya anto akina ɔnɛ Bible kakafundama lo ɛlɔmbwɛlɔ ka nyuma kaki Nzambi, koko sho shoamɛ kokaka nkondja wahɔ w’efula oma l’ɛtɛkɛta akɔ wele lo 2 Timote 3:16. (Adia.) Nyɛsɔ tɔsɛdingole divɛsa nɛ lo yoho ya lotshimola. Nsala ngasɔ ayokeketsha wɛkamu aso w’ɔnɛ wetshelo tshɛ waki Jehowa wekɔ “ololo.”​—Osam. 119:128.

“WEKƆ OHOMBA DIA MBETSHA”

3-5. a) Kakɔna kakasale lemba l’anto etena kakawoke sawo diakasha Petero lo Pɛntɛkɔsta, ndo lande na? b) Lande na kaketawɔ ase Tɛsalɔnika efula akambo wa mɛtɛ? c) Kakɔna kaambiya anto efula lo kɛnɛ kendana l’olimu aso w’esambishelo?

³ Yeso akatɛ wodja w’Isariyɛlɛ ate: “Diakɔ dianyotomɛmi amvutshi, akanga wa tomba ndo embetsha.” (Mat. 23:34) Yeso akatɛkɛtaka lo kɛnɛ kendana l’ambeki ande wakandetsha dia nkamba l’Afundelo l’olimu awɔ w’esambishelo. Lo Pɛntɛkɔsta 33 T.D., ɔpɔstɔlɔ Petero laki ɔmɔtshi l’atei wa “embetsha” ɛsɔ, akasha sawo la ntondo k’olui wa woke w’anto la Jɛrusalɛma ndo nde akashile avɛsa efula w’oma l’Afundelo w’ase Hɛbɛru. Etena kakahokamɛka anto woho wakalembetshiyaka Petero avɛsa, “etema awɔ wakanandema” ndo wakayatshumoya oma lo pɛkato yawɔ. Lushi lɔsɔ, anto oko nunu sato wa l’atei awɔ wakadimanyiyama oma le Nzambi ndo wakakome Akristo.​—Etsha 2:37-41.

⁴ Ɔpɔstɔlɔ Pɔɔlɔ laki osambisha okina wa lo sɛkɛ akasambisha lokumu l’ɔlɔlɔ lo ahole akina waanganyi etale efula la Jɛrusalɛma. Ɛnyɛlɔ, l’osomba wa Makɛdɔniya ka la Tɛsalɔnika, nde akasambisha wanɛ wakatɛmɔlaka lo shinangɔnga. L’edja ka nshi y’ekila shato, Pɔɔlɔ “akakanaka la wɔ yimba oma l’Afundelo, awalembetshiya ndo awaɛnya lo nkamba l’Afundelo dia aki dimɛna Kristo nsowa ndo mbolɔ oma lo nyɔi.” Etombelo akɔna waki la dui sɔ? “Amɔtshi l’atei awɔ [ase Juda] wakakome ambetawudi,” oko wakasale “lemba la woke l’ase Ngirika.”​—Etsha 17:1-4.

⁵ Yoho yakamba ekambi waki Nzambi la Bible nshi nyɛ mambiyaka anto efula. Ɛnyɛlɔ, l’ɔkɔngɔ w’ompokami ɔmɔtshi wa lo wodja wa Suisse pokamɛ woho wakadɛka kadiyɛso kɛmɔtshi Bible, nde akawombola ate: “L’ɔtɛmwɛlɔ akɔna weyɛ?” Kadiyɛso akookadimola ate: “Dimi l’osekami ɔnɛ tekɔ Ɛmɛnyi wa Jehowa.” Ompokami akɔ akate ate: “Lakeyaki mɛtɛ, lakatshi nte naka aha Ɛmɛnyi wa Jehowa, waa na wakoka ndja lakami dia ndjombadiɛ Bible?”

6, 7. a) Ngande wakoka wanɛ wetsha etshumanelo nkamba la Bible lo yoho ya dimɛna? b) Lande na kele ekɔ ohomba nkamba la Bible lo yoho ya dimɛna etena kalɔmbɔlaso wekelo wa Bible?

⁶ Ko ngande wakokaso ndeka nkamba la Bible dimɛna etena ketshaso anto akina? Naka tambokondja ɔkɛndɛ wa mbetsha etshumanelo oma lo lɔyɛnga, kete taadia avɛsa oma lo Bible. Lo dihole dia sho mbutɛ ampokami awui wele l’avɛsa akɔ kana mbawaadia oma l’ekanda ɛmɔtshi kana oma l’ɔrdinatɛrɛ, tofole Bible ndo taadia oma lɔkɔ, ndo tokeketsha ampokami dia vɔ lawɔ mbifola Bible yawɔ. Ndo nto tolembetshiya avɛsa lo yoho yakoka nkimanyiya ampokami aso dia vɔ ndeka ndjasukanya la Jehowa. Lo dihole dia nkamba la bɛnyɛlɔ dia wolo nshihodia, la ɛkɔndɔ wa lotshula, l’awui wa mbɔdia anto kana nsala shɛkɛsɛkɛ, tolembetshiya Ɔtɛkɛta waki Nzambi lo yoho yokɛma hwe.

⁷ Kakɔna kahombaso namaka lo yimba etena kekaso l’onto ɔmɔtshi Bible? Etena kekaso l’onto ɔmɔtshi Bible l’ekimanyielo k’okanda ɔmɔtshi, hatohombe ntamba kana mbewɔ avɛsa woshilami. Sho pombaka nɔmba ombeki aso dia nde mbadia avɛsa akɔ ndo mbokimanyiya dia nde mbashihodia. Lo ngande? Aha mbosha elembetshielo w’ɛtshɔlɔlɔ wakoka mbekola yimba yande oma lo kɛnɛ kadishande, koko lo mbɔlɔmba dia ndamɛ nembetshiya avɛsa akɔ lo ɛtɛkɛta ande hita. Lo dihole dia sho mbotɛ kɛnɛ kahombande mbetawɔ kana kahombande nsala, sho koka mbooka tombolambola takoka mbokimanyiya dia ndamɛ nshihodia kɛnɛ ketsha Bible.b

“WEKƆ OHOMBA . . . DIA MINGOLA”

8. Okakatanu akɔna wa l’etei ka demba wakalɔshanaka la ɔpɔstɔlɔ Pɔɔlɔ?

⁸ Mbala efula, sho fɔnyaka dia dikumanyi nto mbele l’ɔkɛndɛ wa “mingola.” Eelo mɛtɛ, emendji wekɔ l’ɔkɛndɛ wa ‘mingola wanɛ wasala pɛkato.’ (1 Tim. 5:20; Tito 1:13) Koko ndjangola shoamɛ ekɔ nto ohomba. Ɔpɔstɔlɔ Pɔɔlɔ akatshikɛ Akristo ɛnyɛlɔ ka dimɛna lo woho wakinde la nkum’otema ka pudipudi. (2 Tim. 1:3) Kaanga mbakidiɔ ngasɔ, nde akafundɛ Timɔte ate: “Dimi mɛnaka ɔlɛmbɛ okina wele l’etei ka demba diami walɔshana la ɔlɛmbɛ wele lo yimba yami ndo wambetɛ mfumbe ka ɔlɛmbɛ wa pɛkato wele l’etei ka demba diami.” Naka sho mbeka awui akina wosukanyi la divɛsa nɛ, kete tayoleka nshihodia kɛnɛ kakasale Pɔɔlɔ dia nde mbahemɛ nsaki yande ya nsala pɛkato.​—Adia Rɔmɔ 7:21-25.

9, 10. a) Wɛɔdu akɔna wakalɔshanaka la Pɔɔlɔ? b) Kakɔna kakasale Pɔɔlɔ dia ntondoya wɛɔdu akɔ?

⁹ Ko wɛɔdu akɔna wakahombe Pɔɔlɔ nsala la wolo dia mbahemɛ? Kaanga mbele nde koombashila, nde akafundɛ Timɔte ate nde aki ntondo “ɔsɛndji.” (1 Tim. 1:13) La ntondo ka nde nkoma Okristo, Pɔɔlɔ akahɛnyahɛnyaka Akristo efula. Lo menda woho wakandayaokaka lo dikambo di’ambeki wa Kristo, nde aketawɔ ate: “Dimi lakawaokaka nkɛlɛ k’efula.” (Etsha 26:11) Pɔɔlɔ akeke dia mbahemɛ nkɛlɛ kande, koko lo tena dimɔtshi, nde aki l’okakatanu dia mbahemɛ nsaki ndo ɛtɛkɛta ande. (Etsha 15:36-39) Kakɔna kakookimanyiya dia ntondoya dui sɔ?

¹⁰ Etena kakandafundɛka Akristo w’ase Kɔrɛtɔ, ɔpɔstɔlɔ Pɔɔlɔ akɛnya kɛnɛ kakandasale dia ntondoya dui sɔ. (Adia 1 Kɔrɛtɔ 9:26, 27.) Nde akadje welo wa l’otema ɔtɔi dia mbahemɛ wɛɔdu ande. Mɛnamaka dia nde akayangaka alako oma l’Afundelo, akalɔmbaka Jehowa dia mbosha ekimanyielo dia nde nkamba l’alako akɔ ndo oma laasɔ, nde akasalaka la wolo dia ndjalowanya.c Sho kokaka nkondja wahɔ oma l’ɛnyɛlɔ kande nɛ dia sho tshɛ tekɔ lo ndɔshana la eongelo kaso kele bu kokele.

11. Ngande wakokaso ‘ntetemala ndjasɛdingola’ dia menda kana tekɔ lo nkɛndakɛnda lo mboka k’akambo wa mɛtɛ?

¹¹ Hatohombe pondjo mfɔnya ɔnɛ hatoyokoka ndɔshana la wɛɔdu aso. Lo dihole dia nsala ngasɔ, ‘totetemala ndjasɛdingola’ dia ndjashikikɛ kana tekɔ lo ntetemala nkɛndakɛnda lo mboka k’akambo wa mɛtɛ. (2 Kɔr. 13:5) Etena kadiaso avɛsa wele oko Kɔlɔsayi 3:5-10, sho kokaka ndjambola ɔnɛ: ‘Onde lekɔ lo nsala la wolo dia mbahemɛ nsaki yami yatshutshuya dia nsala pɛkato, ko kana yɔ mbambahemɛ? Etena kemi la ntondo k’Ɛtɛrnɛtɛ, ko esato wɛnyawɔ anto etakataka wambotomba, onde dimi mbanyaka mbala kakɔ ɔtɔi, ko kana dimi tatɛka mbaenda?’ Nkamba l’alako w’oma l’Ɔtɛkɛta wa Nzambi wendana la wɛɔdu wele la so ayotokimanyiya dia sho ‘ntetemala nsɛna ndo monga l’ekanelo ka yimba ka dimɛna.’​—1 Tɛs. 5:6-8.

“WEKƆ OHOMBA . . . DIA MBIDJA AKAMBO L’ƆNƆNGƆ”

12, 13. a) Oyango akɔna wahombaso monga la wɔ etena kalangaso “mbidja akambo l’ɔnɔngɔ,” ndo ngande wakokaso mbokoya ɛnyɛlɔ ka Yeso lo dui sɔ? b) Ɛtɛkɛta wa ngande wahatahombe tondjɛ anto akina naka sho nangaka “mbidja akambo l’ɔnɔngɔ”?

¹² Tshɛkɛta ya lo Grɛkɛ yokadimɔmi ɔnɛ “mbidja akambo l’ɔnɔngɔ” nembetshiyaka “nsala akambo lo dimɛna, mbasembola, mbalowanya ndo mbadja l’ɔnɔngɔ.” Lo tena dimɔtshi, sho pombaka mbidja akambo l’ɔnɔngɔ lam’asaso l’anto akina wahoki kɛnɛ kotshiso kana kosadiso dimɛna. Ɛnyɛlɔ, ewandji w’ɛtɛmwɛlɔ w’ase Juda wakate dia Yeso akalekaka mbɔtɔnɛ “la afutshanyi w’elambo ndo la atshi wa pɛkato.” Yeso akaakadimola ate: “Anto wele alemba ki hawotoyangaka onganga, paka anto wele la hemɔ. Ɔnkɔnɛ nyotshu, nyoteke kitshimudi ya ɛtɛkɛta ɛnɛ: ‘Kɛtshi kalangami koko aha olambo.’” (Mat. 9:11-13) Yeso akalembetshiyaka anto tshɛ Ɔtɛkɛta waki Nzambi la solo dia lotutsha ndo la lɔsɛngɔ. Diakɔ diele, akanga w’okitshakitsha wakayeya Jehowa dia nde ekɔ “[Nzambi k]a ketshi ndu ngandji ka mamba, lahuki kele esadi, luludi too la ngandji ka shikaa la kolamelu.” (Etum. 34:6) Etombelo wakonge lo welo wakadje Yeso dia “mbidja akambo l’ɔnɔngɔ” ele, anto efula wakonge la mbetawɔ lo lokumu l’ɔlɔlɔ.

¹³ Ɛnyɛlɔ ka Yeso tɛnyaka woho wahombaso nkimanyiya anto akina. Onto ɔmɔtshi lambotonyangɛ mbeyaka totɛ la nkɛlɛ tshɛ ɔnɛ: ‘Paka sho mbidja akambo l’ɔnɔngɔ dimi ayɛ.’ Koko lo ndjela 2 Timɔte 3:16, aha ngasɔ mbahombaso mbidja akambo l’ɔnɔngɔ. “Afundelo tshɛ” hawotosha lotshungɔ la sho mpangwɛ anto akina. “Uku yombo,” mbala efula ɛtɛkɛta wa diɔnyɔ pomuyaka anto akina ndo bu ndoko la wahɔ le wɔ.​—Tuk. 12:18.

14-16. a) Ngande wakoka dikumanyi “mbidja akambo l’ɔnɔngɔ” etena kakimanyiyawɔ anto akina dia vɔ nkandola ekakatanu awɔ? b) Lande na kele ekɔ ohomba di’ambutshi nkamba l’Afundelo “dia mbidja akambo l’ɔnɔngɔ” lo wodielo w’anawɔ?

¹⁴ Ko laasɔ, ngande wakokaso monga la solo dia lotutsha ndo la lɔsɛngɔ etena kalangaso “mbidja akambo l’ɔnɔngɔ”? Tɔshi dia wadi l’omi amɔtshi wambɔlɔmba ekumanyi kɛmɔtshi k’Okristo dia nde ndjaakimanyiya diaha vɔ ntetemala nsana. Kakɔna kakoka ekumanyi kɛsɔ nsala? Aha la mbɛkama ɔmɔtshi, nde kokaka nkana la wɔ yimba l’ekimanyielo k’atɔndɔ wa lo Bible, ondo lo nkamba l’alako watanema lo tshapita 3 ya dibuku Sheke y’ɔngɛnɔngɛnɔ wa lo nkumbo. Etena katalɔmbɔla ekumanyi kɛsɔ ɔkɛtshanyelo akɔ, atshukanyi asɔ vɔamɛ mbeyaka nshihodia dia vɔ akɔ ahende pombaka nsala etshikitanu ɛmɔtshi. Koko l’ɔkɔngɔ diko, ekumanyi kɛsɔ kokaka ndjombola nkumbo kɛsɔ woho wowɔsɛna ndo nyomosha ekimanyielo naka kokaka.

¹⁵ Ngande wakoka ambutshi nkimanyiya anawɔ lo nyuma dia “mbidja akambo l’ɔnɔngɔ”? Tɔshi dia nyekɔ lo nanga nkimanyiya ɔnanyu la womoto leke l’ɛnɔnyi dikumi l’ɛmɔtshi dia nde nkakitɔna l’ɔngɛnyi ande ɔmɔtshi wa kɔlɔ. La ntondo ka nyu ndjowotɛ dui sɔ, nyu pombaka tongi l’ɛkɔkɔ w’eshika. Oma laasɔ, naka ekɔ dui dimɔtshi dianyokiyanya, nyosawole la nde, ondo lo nkamba la dibuku Les Jeunes s’intérrogent — Réponses pratiques, volume 2. L’ɔkɔngɔ wa nshi mɔtshi, nyu kokaka ntatɛ mbetshaka wenya efula kaamɛ la nde. Nyu kokaka nto sɛdingolaka eongelo kande etena kende l’olimu w’esambishelo kana wonya wakɔkɔlanyu demba lo nkumbo. Naka nyu monga la solo dia lotutsha ndo la lɔsɛngɔ, kete ɔnanyu ɔsɔ ayɛna dia nyekɔ lo ndjakiyanya dikambo diande. Dui sɔ mbeyaka mbotshutshuya dia nde nkamba l’alako anyu ndo mbewɔ yoho ya lɔsɛnɔ ya kɔlɔ.

¹⁶ Naka sho monga la solo dia lotutsha ndo la lɔsɛngɔ la ngasɔ, kete tayokimanyiya wanɛ wayakiyanya amboleka dikambo dia yoonge yawɔ, wambɔkɔmɔ l’ɔtɛ wambowoshisha olimu kana weke l’okakatanu dia nshihodia wetshelo ɛmɔtshi wa lo Bible. Nkamba l’Ɔtɛkɛta wa Nzambi dia “mbidja akambo l’ɔnɔngɔ” mongaka l’etombelo w’amɛna le ekambi waki Jehowa.

“WEKƆ OHOMBA . . . DIA MPOKOLA LO LOSEMBWE”

17. Lande na kahombaso mbetawɔ ohokwelo la lowando tshɛ?

¹⁷ Bible mbutaka ɔnɛ: “Ohokwelo tshɛ bu dui di’ɔngɛnɔngɛnɔ etena kashamawɔ, koko ekɔ dui dia kandji. Koko, l’ɔkɔngɔ diko wanɛ wetshama oma l’ohokwelo akɔ mongaka la wɔladi ndo komaka anto w’ɛlɔlɔ.” (Hɛb. 12:11) Akristo efula w’epalanga mbetawɔka dia ohokwelo wakawalongola oma le ambutshi awɔ wa lo nyuma, akaakimanyiya efula. Ndo mbetawɔ ohokwelo watosha Jehowa lo tshimbo ya dikumanyi, tokimanyiyaka dia sho ntshikala lo mboka katɔla otsha lo lɔsɛnɔ.​—Tuk. 4:13.

18, 19. a) Lande na kele dako diele lo Tukedi 18:13 diekɔ ohomba dia “mpokola lo losembwe”? b) Etena katongolaka dikumanyi otshi wa pɛkato la memakana ndo la ngandji, naa etombelo watongaka mbala efula?

¹⁸ Mbisha ohokwelo lo yoho ya dimɛna ekɔ tshondo ya losha. Jehowa keketshaka dikumanyi ndo ambutshi dia vɔ mpokola anto akina “lo losembwe.” (2 Tim. 3:16) Kɛsɔ nembetshiyaka dia vɔ pombaka nkamba l’atɔndɔ wa lo Bible etena kangolawɔ anto akina. Ɛnyɛlɔ, Tukedi 18:13 mbutaka ɔnɛ: “Untu latukadimulaka diui ntundu ndi atuki dikambu, ekadimwelu kandi katuweteka enginya ndu katuwutshaka sonyi.” Ɔnkɔnɛ, etena kayanga dikumanyi dia nsawola l’onto ɔmɔtshi lakawoke dia nde ambosala pɛkato ka woke, vɔ pombaka nsala la wolo dia takondjisha tolembetelo tshɛ tɛnya mɛtɛ ka dikambo sɔ. (Euh. 13:14) Paka l’ɔkɔngɔ wa vɔ nsala ngasɔ mbakoka ohokwelo wayowowosha monga “lo losembwe.”

¹⁹ Laadiko dia laasɔ, Ɔtɛkɛta waki Nzambi keketshaka dikumanyi di’Akristo dia vɔ mingola asekawɔ ambetawudi “la memakana.” (Adia 2 Timɔte 2:24-26.) Ekɔ mɛtɛ dia onto lambosala pɛkato mbeyaka nkonya anto akina dia vɔ monga la kanyi ya kɔlɔ lo dikambo dia Jehowa kana salɛ anto akina kɔlɔ. Koko, naka ekumanyi momala etena kalakande onto la ngasɔ, kete nde howokimanyiya lo woho wahombama. Ɔnkɔnɛ, naka dikumanyi mbokoya ‘dionga dia lɔsɛngɔ diaki Nzambi,’ kete vɔ mbeyaka nkimanyiya otshi wa pɛkato dia nde ndjatshumoya.​—Rɔmɔ 2:4.

20. Atɔndɔ akɔna wahomba ambutshi nkamba la wɔ etena kahokolawɔ anawɔ?

²⁰ Ambutshi vɔ lawɔ pombaka nkamba l’atɔndɔ wa lo Bible etena kalangawɔ ‘mpokola anawɔ.’ (Ɛf. 6:4) Ɛnyɛlɔ, kakɔna kahomba ombutshi nsala naka onto ɔmɔtshi ambowotɛ ɔnɛ ɔnande akasadi dikambo dimɔtshi dia kɔlɔ? Nde pombaka nyanga dia mbeya akambo tshɛ wendana la dui sɔ la ntondo ka nde ndjosha ɔnande dilanya, nɛ dia kanga nkɛlɛ ka tshambandeko kema la dihole lo nkumbo k’Akristo. “Jehowa ekɔ la ngandji k’efula ndo la kɛtshi,” ndo wanɛ wele l’ɔkɛndɛ wa mbisha ana ohokwelo pombaka monga la waonga wa ngasɔ.​—Jak. 5:11.

WOSHASHA W’OSHINGA WOLO WAKATOSHA JEHOWA

21, 22. Tɔtɛkɛta takɔna tele l’⁠Osambu 119:97-104 tɛnya woho wayaokayɛ lo kɛnɛ kendana l’Ɔtɛkɛta wa Jehowa?

²¹ Okambi ɔmɔtshi wa Nzambi akɛnya lande na kakandalangaka ɛlɛmbɛ wa Jehowa. (Adia Osambu 119:97-104.) Lo mbeka Bible, nde akayonga la lomba, shɛnɔdi ndo la eokelo ka dimɛna k’akambo. Nkitanyiya alako wa lɔkɔ, akookimanyiya dia mbewɔ awui wa kɔlɔ efula wasala anto akina. Nde akangɛnangɛnaka ndo akalangaka mbeka Afundelo. Nde akayashikikɛ dia nkitanyiya ɛlɛmbɛ waki Nzambi wakawela wahɔ lɔsɛnɔ lande l’otondo.

²² Onde ndo sho mbɔɔsa “Afundelo tshɛ” la nɛmɔ? Paka vɔ mbakoka tokimanyiya dia sho nkeketsha mbetawɔ kaso k’ɔnɛ Nzambi ayokotsha alaka ande. Alako wakasambiyama w’oma lɔkɔ tokokɛka oma lo ditshelo diakoka tokonya lo nyɔi. Ndo naka sho kilembetshiya anto akina la diewo tshɛ, kete tayowakimanyiya dia vɔ mbɔtɔ lo mboka k’otsha lo lɔsɛnɔ la pondjo ndo ntshikala lɔkɔ. Ɔnkɔnɛ, nyɛsɔ tokambake la “Afundelo tshɛ” lo yoho ya dimɛna etena kakambɛso Jehowa Nzambi ka ngandji ndo kanga lomba tshɛ olimu.