WEKELO 32

Diolelo diaki Nzambi diekɔ lo mbolɛ!

Okanda wa l'akatshi

Diolelo diaki Nzambi diakatatɛ mbolɛ l’olongo l’ɔnɔnyi wa 1914. L’etena kɛsɔ mbakatatɛ nshi y’ekomelo y’ɛlɔmbwɛlɔ k’ana w’anto. Ngande weyaso dikambo sɔ? Tɔsɛdingole prɔfɛsiya ya lo Bible, awui weta l’andja ɔnɛ ndo waonga wele l’anto ntatɛ oma lo 1914.

1. Kakɔna kɛnya prɔfɛsiya ya lo Bible?

Dibuku dia lo Bible dia Danyɛlɛ diakatatshi dia Diolelo diaki Nzambi diayotatɛ mbolɛ l’ekomelo k’etena kelamɛ ɔnɛ “tena 7.” (Danyɛlɛ 4:16, 17) Ɛnɔnyi nkama l’ɔkɔngɔ, Yeso akatɛkɛta di’etena kakɔ kaamɛ lo kielɛ ɔnɛ “etena kakashikikɛma k’ase wedja,” ndo nde aketsha dia tɔ katakomɛ. (Luka 21:24) Oko wayotodiɛna, ntena esambele sɔ diakakomɛ l’ɔnɔnyi wa 1914.

2. Awui akɔna weta l’andja ɔnɛ ndo waonga akɔna wele l’anto ntatɛ oma lo 1914?

Ambeki wa Yeso wakawombola ɔnɛ: “Djembetelo yakɔna yayɛnya woongelo ayɛ ndo etena k’ekomelo ka dikongɛ di’akambo?” (Mateo 24:3) L’okadimwelo ande, Yeso akate awui efula wayosalema l’ɔkɔngɔ wa nde ntatɛ mbolɛ l’olongo oko Nkumekanga ka Diolelo diaki Nzambi. L’atei w’awui akɔ mbele, ata, ndjala ya kasha ndo adidimu wa nkɛtɛ. (Adia Mateo 24:7.) Bible kakatatshi dia waonga wayonga l’anto lo “nshi y’ekomelo” wayetɛ lɔsɛnɔ “wolo mbikikɛ.” (2 Timɔte 3:1-5) Awui ndo waonga asɔ wakatatɛ mɛnama oma lo 1914.

3. Lande na kamboleka monga awui wa kɔlɔ ntatɛ lam’akatatɛ mbolɛ Diolelo diaki Nzambi?

Yema tshitshɛ l’ɔkɔngɔ wa Yeso ntatɛ mbolɛ oko Nkumekanga ka Diolelo diaki Nzambi, nde akalɔ ta l’olongo nde la Satana l’ɛdiɛngɛ ande. Satana akalɛndjama lo ta sɔ. Bible mbutaka ɔnɛ: “Wakawokasha la nkɛtɛ nde l’andjelo ande.” (Ɛnyɛlɔ 12:9, 10, 12) Satana ekɔ la nkɛlɛ k’efula nɛ dia nde mbeyaka dia nde ayolanyema. Diakɔ diɛnyande anto paa ndo diasoyande anto wa lo nkɛtɛ k’otondo. Aha la taamu, akambo wa l’andja ɔnɛ waya kɔlɔ efula! Diolelo diaki Nzambi diayonya ekakatanu ɛsɔ tshɛ.

NYOMOTSHIMOLA

Tɔsɛdingole woho weyaso dia Diolelo diaki Nzambi diakatatɛ mbolɛ lo 1914 ndo kɛnɛ kahomba dui sɔ nembetshiya le so.

4. Awui wa lo Bible wɔlɔngami lo ndjela woho wakawayasalemaka mɛnyaka dia Diolelo diaki Nzambi diakatatɛ mbolɛ lo 1914

Nyende VIDƐO.

VIDƐO: Diolelo diaki Nzambi diakatatɛ mbolɛ lo 1914 (5:02)

Nzambi akasale dia nkumekanga Nɛbukadinɛza ka la Babilɔna k’edjedja mɛna dɔ dimɔtshi dia prɔfɛsiya. Dɔ sɔ ndo elembetshiyelo wakasha Danyɛlɛ mɛnyaka dia dɔ sɔ diakendanaka la ɛlɔmbwɛlɔ ka Nɛbukadinɛza ndo la Diolelo diaki Nzambi.—Nyadia Danyɛlɛ 4:17.a

Nyadia Danyɛlɛ 4:20-26, ndo oma laasɔ, nyokambe la tablo dia nkadimola ambola wayela anɛ:

A) Kakɔna kakɛnyi Nɛbukadinɛza lo dɔ diande?—Enda divɛsa 20 ndo 21.
B) Kakɔna kakahombe nkomɛ osongo?—Enda divɛsa 23.
C) Kakɔna kakahombe salema l’ekomelo ka “tena 7.”—Enda divɛsa 26.

Woho wendana dɔ di’osongo la Diolelo diaki Nzambi

PRƆFƐSIYA (Danyɛlɛ 4:20-36)

Ɛlɔmbwɛlɔ

A) Shaka y’osongo

Ɛlɔmbwɛlɔ kambokomɛ

B) “Nyɔkɔtɛ osongo akɔ,” ndo nyotshike dia “tena 7 diawetee”

Osongo wambokelekama la lowolo ndo l’ɔhɔtɛla.

Ɛlɔmbwɛlɔ kambotatɛ nto

C) “Diolelo diayɛ diayonga diayɛ nto”

L’okotshamelo wa ntondo wa prɔfɛsiya kɛnɛ . . .

D) Osongo waki didjidji di’onto akɔna?—Enda divɛsa 22.
E) Ngande wakakomɛ ɛlɔmbwɛlɔ kande?—Nyadia Danyɛlɛ 4:29-33.
F) Kakɔna kakakomɛ Nɛbukadinɛza l’ekomelo ka “tena 7”?—Nyadia Danyɛlɛ 4:34-36.

OKOTSHAMELO WA NTONDO

Ɛlɔmbwɛlɔ

D) Nɛbukandinɛza, nkumekanga ka Babilɔna

Nkumekanga Nɛbukadinɛza memala la lotamanya tshɛ.

Ɛlɔmbwɛlɔ kambokomɛ

E) L’ɔkɔngɔ w’ɔnɔnyi wa 606 N.T.D., Nɛbukadinɛza akadjɔ dadi ndo nde komonga l’akoka wa nɔmbɔla l’edja k’ɛnɔnyi esambele wa mɛtɛ mɛtɛ

Ɛlɔmbwɛlɔ kambotatɛ nto

F) Nɛbukadinɛza amboshila dadi ndo ambotatɛ mbolɛ nto

Nkumekanga Nɛbukadinɛza memɛ anya ndo awalɛ l’olongo.

L’okotshamelo wa hende wa prɔfɛsiya kɛnɛ . . .

G) Osongo waki didjidji di’anto akɔna?—Nyadia 1 Ɛkɔndɔ 29:23.
H) Ngande wakahembɔ ɛlɔmbwɛlɔ kawɔ? Ngande weyaso dia tɔ kakakomɛ polo ndo l’etena kaki Yeso lanɛ la nkɛtɛ?—Nyadia Luka 21:24.
I) Etena kakɔna ndo lende akakaloyama lowandji lɔsɔ?

OKOTSHAMELO WA HENDE

Ɛlɔmbwɛlɔ

G) Nkumi ya dikanga y’Isariyɛlɛ nyɛ yaki didjidji di’ɛlɔmbwɛlɔ ka Nzambi

Woho wakayahɔnaka nkumi ya dikanga ya l’Isariyɛlɛ. Esase wekɔ lo mbakɔmɔla.

Ɛlɔmbwɛlɔ kambokomɛ

H) Jɛrusalɛma yambolanyema ndo ɔlɔndji wa nkumi ya dikanga y’Isariyɛlɛ wambokomɛ ambeta ɛnɔnyi 2 520

Dja yambolanya Jɛrusalɛma y’edjedja lo 607 N.T.D. Oma laasɔ, ɛnɔnyi 2 520 wambeta.

Ɛlɔmbwɛlɔ kambotatɛ nto

I) Yeso ambotatɛ mbolɛ l’olongo oko Nkumekanga ka Diolelo diaki Nzambi

Yeso olɛ laadiko dia nkɛtɛ oma lo kiti kande ka l’olongo ntatɛ lo 1914 T.D. Esase watomba oma le nde.

Ntena esambele diekɔ l’edja ka ngande?

Ntenyi dimɔtshi dia lo Bible tokimanyiyaka dia nshihodia ntenyi dikina. Ɛnyɛlɔ, dibuku dia lo Bible di’Ɛnyɛlɔ mbutaka dia ntena sato l’etenyi diekɔ la yɛdikɔ ya nshi 1 260. (Ɛnyɛlɔ 12:6, 14) Ntena esambele diekɔ lofulo lɔsɔ ndodia l’ahende, mbuta ate nshi 2 520. Ntena dimɔtshi, Bible kambaka la lushi ɔtɔi oko didjidji di’ɔnɔnyi ɔtɔi. (Ɛzɛkiyɛlɛ 4:6) Ngasɔ mbediɔ lo dikambo dia ntena esambele diɔtɛkɛtami lo dibuku dia Danyɛlɛ. Diɔ diekɔ didjidji di’ɛnɔnyi 2 520.

5. Andja wakatshikitana ntatɛ lo 1914

Nyende VIDƐO.

VIDƐO: Andja wakatshikitana ntatɛ lo 1914 (1:10)

Yeso akatatshi akambo wakahombe salema l’ɔkɔngɔ wa nde nkoma Nkumekanga. Nyadia Luka 21:9-11, ndo oma laasɔ, nyɔkɛtshanya dimbola nɛ:

Naa dui dimɔtshi l’atei w’awui asɔ diamboyɛna kana diamboyoka?

Ɔpɔstɔlɔ Pɔɔlɔ akalembetshiya woho wayonga anto lo nshi y’ekomelo k’ɛlɔmbwɛlɔ k’ana w’anto. Nyadia 2 Timɔte 3:1-5, ndo oma laasɔ, nyɔkɛtshanya dimbola nɛ:

Naa dionga dimɔtshi l’atei wa waonga asɔ diɛnayɛ le anto ɛlɔ kɛnɛ?

Esato womamatanyi: Esato wɛnya woho wele akambo ndo waonga w’anto lo nshi y’ekomelo. 1. Owandji ɔmɔtshi w’asɔlayi ahangɔhangɔ lo lɔyɛnga ndo nde memɛ anya ande l’olongo. 2. Mvudu yambolanyema la didimu dia nkɛtɛ. 3. Aviyɔ w’asɔlayi. 4. Olui w’anto wɔlɔtshi wa maskɛ watakɛndakɛnda. 5. Mvudu hiende y’etale etale yalongola la dja y’oma lo bɔmbɛ ka wa dengalenga. 6. Pami kɛmɔtshi ayaka didjoyadjoya. 7. Omi ɔmɔtshi ahangɔhangwɛ wadɛnde ndo alanga mbɔkɔmɔla. 8. Didjoyadjoya diotshikitanyi ndo wanu la mɛsa. 9. Wamato ahende watshukanyi lam’asawɔ wayanda foto. 10. Onto ɔmɔtshi atalɔmbɔla olui w’anto otsha kɔsɛrɛ. 11. Onto ɔmɔtshi akasha ɛngɔ kɛmɔtshi.

6. Ɛlɔmbwɛlɔ ka Diolelo diaki Nzambi pombaka tokeketsha

Nyadia Mateo 24:3, 14, ndo oma laasɔ, nyɔkɛtshanya ambola anɛ:

Naa olimu w’ohomba wɛnya dia Diolelo diaki Nzambi diekɔ lo mbolɛ?
Ngande wakokayɛ mbisha lonya l’olimu ɔsɔ?

Diolelo diaki Nzambi diekɔ lo mbolɛ, ndo lushi layodiɔlɔmbɔla akambo tshɛ wa la nkɛtɛ laya suke. Nyadia Hɛbɛru 10:24, 25, ndo oma laasɔ, nyɔkɛtshanya dimbola nɛ:

Kakɔna kahombaso sho tshɛ nsala oko “wɛnaso dia lushi lakɔ laya suke”?

Esato womamatanyi: 1. Ombeki wa Bible ele lo losanganya lɔmɔtshi l’Ɛmɛnyi wa Jehowa. 2. Ombeki akɔ waamɛ asambisha onto ɔmɔtshi leyande. — Naka wɛ ambeka dui dimɔshi diakoka nkimanyiya ndo nshimbɛ anto akina, kakɔna katshutshuyamayɛ dia nsala?

ONTO ƆMƆTSHI MBEYAKA KOMBOLA ƆNƐ: “Lande na kele Ɛmɛnyi wa Jehowa tɛkɛtaka efula dikambo di’ɔnɔnyi wa 1914?”

Kakɔna kayoyota?

LO TSHENA PE

Prɔfɛsiya ya lo Bible, woho wakayahɔnaka akambo ndo awui weta l’andja ɔnɛ mɛnyaka dia Diolelo diaki Nzambi diekɔ lo mbolɛ. Sho mɛnyaka dia sho mbetawɔka dui sɔ lo nsambisha awui wendana la diɔ ndo lo mbɔtɔka lo nsanganya ya l’etshumanelo.