Ɔnaki ɔnango Pɔɔlɔ aki la dihonga

Ɛsɔ tɔsɛdingole akambo amɔtshi wendana l’ɔlɔngɔlɔngɔ ɔmɔtshi wakatshɛ lɔsɛnɔ la nyango pami. Nyango pami k’ɔnɔsɔ aki ɔpɔstɔlɔ Pɔɔlɔ. Hateye lokombo l’ɔnɔsɔ, koko sho mbeyaka dia nde akasale dui dimɔtshi la dihongo di’efula. Onde wɛ nangaka mbeya kɛnɛ kakandasale?—

Pɔɔlɔ aki lo lokanu la Jerusalɛma. Wakawonde nɛ dia nde akasambishaka akambo wendana la Yeso. Apami amɔtshi wakahetshaka Pɔɔlɔ wakawɔtwɛ sheke ya kɔlɔ. Vɔ wakate vate: ‘Nyɛsɔ tɔlɔmbɛ kɔmanda k’asɔda dia nde ntoma asɔda ande dia vɔ tɔla Pɔɔlɔ lo lokanu lokina. Tayotoholama lo mboka, kele wonya wayowoteetaka la Pɔɔlɔ, ko sho mbodiaka.’

Ɔnaki ɔnango akeye sheke shɔ. Kakɔna kakandasale? Nde akatshu lo lokanu lɛnɛ aki Pɔɔlɔ ko akatowotɛ dui sɔ. Aha la ntshimbatshimba, Pɔɔlɔ akawotɛ dia nde totɛ kɔmanda sheke ya kɔlɔ shɔ. Onde wɛ fɔnyaka dia aki wɔdu le ɔnaki ɔnango Pɔɔlɔ dia nde totɛ kɔmanda dui sɔ?— Keema, nɛ dia kɔmanda aki onto la woke efula. Koko ɔnaki ɔnango Pɔɔlɔ aki la dihonga ndo akatotɛ kɔmanda.

Kɔmanda akeye kɛnɛ kakandahombe nsala. Nde akɔshi asɔda suke la 500 dia vɔ nkokɛ Pɔɔlɔ. Nde akawatɛ dia vɔ ntshɔ la Pɔɔlɔ la Kayisariya kootsho akɔ. Onde Pɔɔlɔ akakome ki?— Eelo, apami wa kɔlɔ asɔ kookoka mbosalɛ ndooko dui. Sheke yawɔ ya kɔlɔ yakɔtɔ l’ashi.

Wetshelo akɔna wakokayɛ nkondja oma l’ɔkɔndɔ ɔsɔ?— Ndo wɛ lawɔ koka monga la dihonga oko waki ɔnaki ɔnango Pɔɔlɔ. Sho pombaka monga la dihonga etena katɛso anto akambo wendana la Jehowa. Onde wɛ ayonga la dihonga ndo ayotetemala mbutɛ anto akina akambo wendana la Jehowa?— Naka wɛ nsala ngasɔ, kete wɛ ayoshimbɛ nsɛnɔ y’anto.