Ambola w’oma le ambadi aso

Lande na kahoke Nzambi alɔmbɛlɔ amɔtshi?

Nzambi ekɔ suke efula l’anto. Oko watɔngɛnangɛnaka ombutshi wa ngandji di’anande mbotɛ awui tshɛ hwe, mbele Jehowa Nzambi kombolaka dia sho mbɔ̂lɔmba. Koko l’ɛnyɛlɔ k’ombutshi tshɛ wele la lomba, Nzambi ekɔ l’ɛkɔkɔ wa shikaa wahandoke alɔmbɛlɔ amɔtshi. Onde ɛkɔkɔ ande hawomanema fundo? Onde bɛnyɛlɔ dia lo Bible kokaka tokimanyiya dia shihodia lande na kahandoke alɔmbɛlɔ amɔtshi?

Ɔpɔstɔlɔ Joani akalembetshiya ate: “Dihunga ne mbeli la su le ndi shati: Naka shu tayolomba engo uku lulangu landi, ndi ayutukela.” (1 Joani 5:14, sho mbɛnganyisha alɛta ango.) Alɔmbɛlɔ aso pombaka mbɔtɔnɛ la lolango laki Nzambi. Amɔtshi nɔmbaka akambo wahɔtɔnɛ la lolango laki Nzambi, ɛnyɛlɔ oko ndɛ owale kana mbidja otshumba lo kɛnyɔ mɔtshi. Anto akina nɔmbaka l’eyango wa kɔlɔ. Ombeki Jakɔba mbewolaka anto diaha nɔmba l’eyango wa ngasɔ lo mbuta ate: “Nyu nyatolombaka ku hanyulungula, ne dia nyu nyatolombaka olombalomba, dia nyu ndjangenyangenya.”​—Jakoba 4:3.

Ɛnyɛlɔ, tɔshi dia akɛnyi wa ponde wa lo bɛkɛ diakɔ pende wekɔ lo nɔmba dia mbidja otshumba. Ayonga dui dia kɔlɔ dia sho nongamɛ ɔnɛ Nzambi kokaka mboka alɔmbɛlɔ wa ngasɔ. Kɛsɔ mbakoka mbutama lo dikambo dia alɔmbɛlɔ wasala andɔshi w’ata wa lo bɛkɛ diakɔ pende dia mbidja otshumba.

Anto watona dia kitanyiya ɛlɛmbɛ waki Nzambi hawokoke nongamɛ dia nde ayoka alɔmbɛlɔ awɔ. Mbala kɛmɔtshi, Jehowa akatshutshuyama dia mbuta lo dikambo di’atɛmɔdi wa dungi pende ate: “Lam’ayunyediaka anya anyu, dimi layunyaka ashu ami uma le nyu. Lam’ayunyufudiaka alombelo, dimi haluhukamaka anya anyu weli too la dikila.” (Isaya 1:15) Bible mbutaka ɔnɛ: “One latunyaka atui andi uma l’elembe, dombelo diandi dieli wononyi.”​—Tukedi 28:9.

Lo wedi okina, Jehowa ayohokamɛka nshi tshɛ alɔmbɛlɔ w’atɛmɔdi ande wasala la wolo tshɛ dia mbôkambɛ lo yoho yɔtɔnɛ la lolango lande. Ko onde dui sɔ nembetshiyaka dia nde ayowashaka ɛngɔ tshɛ kalɔmbawɔ? Kema. Tɔsɛdingole bɛnyɛlɔ dimɔtshi di’oma l’Afundelo.

Mɔsɛ aki la diokanelo dia lânde lam’asande la Nzambi, koko nde lawɔ akahombaka nɔmba “uku lulangu” la Nzambi. Otshikitanyi la sangwelo diakawewoya Nzambi, Mɔsɛ akɔ̂sɛngasɛnga dia nde mbɔtɔ lo nkɛtɛ ya Kanana ate: “Etawo dimi nteho dia ntena kete y’ololo sho ya la wedi wa Jorodana.” Koko ntondo, l’ɔtɛ wa pɛkato kakandasale, Nzambi akatɛ Mɔsɛ dia nde hatɔtɔ lo nkɛtɛ shɔ. Kakianɛ, lo dihole dia nde mboka dɔmbɛlɔ diaki Mɔsɛ, Jehowa akawotɛ ate: “Ambukuka, tumvutelaki dikambu so ntu.”​—Euhwelu k’Elembe 3:25, 26; 32:51.

Ɔpɔstɔlɔ Paulo akalɔmbɛ dia nde tshungɔ oma lo kɛnɛ kakandelɛ ate: “Tende lu dimba.” (2 Koreto 12:7) “Tende” sɔ mbeyaka monga hemɔ ka lo washo kahakɔnɔ kaki la nde kana atunyi ndo ‘anango wa kashi’ wakatetemalaka mbɛnya pâ. (2 Koreto 11:26; Ngalatiya 4:14, 15) Paulo akafunde ate: “Dimi lakalombe Khumadiondjo tena satu dia minyiayami engo kene.” Koko Nzambi akeyaka ɔnɛ naka Paulo akatetemala sambisha kânga mbakinde la “tende lu dimba,” kete dui sɔ diakɛnya hwe dia aki oma lo wolo waki Nzambi ndo ɔnɛ Paulo akayaɛkɛka tshɛ le Nde. Ɔnkɔnɛ, lo dihole dia nde mboka dɔmbɛlɔ diaki Paulo, Nzambi akawotɛ ate: “Wulu ami atukukiamaka lu wodu.”​—2 Koreto 12:8, 9.

Eelo, Nzambi mbeyaka dimɛna otoleki sho dia kana mboka alɔmbɛlɔ amɔtshi ekɔ lo wahɔ aso. Tena tshɛ, Jehowa mbokaka alɔmbɛlɔ wɔtɔnɛ l’asangwelo ande wa ngandji wofundami lo Bible dikambo dia wahɔ aso.