Onde Yeso ekɔ Nzambi Kanga-Wolo-Tshɛ?
Ekadimwelo washa anto efula:
▪ “Eelo, Yeso ekɔ Nzambi Kanga-Wolo-Tshɛ.”
▪ “Yeso aki wɛnamelo waki Nzambi lo demba.”
Kakɔna kakate Yeso?
▪ “Utunduyala nyu nyakanangi, tshiki nyutongenangena, ne dia dimi layutsho le Papa, ne dia Papa ambundeka.” (Joani 14:28) Yeso akate dia nde la She hawɛdimi.
▪ “Dimi layumbela le Papa, Shenyu, le [Nzambi k]ami ndu [Nzambi k]anyu.” (Joani 20:17) Yeso kondjaɔsa oko Nzambi, koko akɔshi Nzambi oko onto lotshikitanyi la nde.
▪ “Ne dia dimi kundjata dime. Keli Papa lakantumi, kakambisha olembe uku ayumuta ndu wuhu wayumoteketa.” (Joani 12:49) Wetshelo waki Yeso kondja oma le nde ndamɛ, kele wakaye oma le She.
YESO akate dia nde ekɔ Ɔnaki Nzambi, koko nde kombuta dia nde ekɔ Nzambi Kanga-Wolo-Tshɛ. Naka Yeso aki Nzambi, ko onto akɔna akandalɔmbaka lam’akinde lanɛ la nkɛtɛ? (Mateu 14:23; 26:26-29) Lo mɛtɛ, totondonga dikambo diokɛma otondongaka Yeso akasɛmaka tsho dia onto okina mbakasawolaka la nde!
Etena kakɔlɔmbɛ ambeki ande ahende dia vɔ monga l’ahole wa lânde lo Diolelo diande, Yeso akakadimola ate: “Keli mbidjase lu lunya lami la pami kana lu lunya lami la lomoso, kema dikambu diami dia mbisha untu. Keli dio dieko dikambu dia wane wakalongoswela Papa.” (Mateu 20:23) Onde Yeso akâkese etena kakandate dia nde kema la lotshungɔ la mbasha kɛnɛ kakawɔlɔmbɛ? Kema! Koko la okitshakitsha tshɛ, nde aketawɔ dia paka Nzambi mbele la lotshungɔ la mbɔsa tɛdikɔ ta ngasɔ. Yeso akakome ndo lo mbuta dia aki akambo amɔtshi wele oyadi nde kana andjelo kombaeyaka, koko paka She oto mbakawaeyaka.—Mako 13:32.
Onde paka lam’aki Yeso lanɛ la nkɛtɛ mbakinde l’ɛse kaki Nzambi? Kema. Kânga l’ɔkɔngɔ wa nyɔi ndo wa eolwelo kande, Bible mbutaka dia Yeso aki paka l’ɛse kaki Nzambi. Ɔpɔstɔlɔ Paulo toholaka dia “Nzambi ekɔ lâdiko dia Kristo.” (1 Koreto 11:3, Today’s English Version) Bible mbutaka dia lo nshi yayaye “lam’ayuyala diango tshe diolembiami le ndi, ndu ona ndame ayolembiama le one lakayalembiya diango tshe, dia [Nzambi] ayali la diku dia diango tshe, la lu diango tshe.”—1 Koreto 15:28.
Mbokɛmaka hwe dia Yeso kema Nzambi Kanga-Wolo-Tshɛ. Diɔ diakɔ diakandelɛ She ate: ‘Nzambi kami.’—Enyelo 3:2, 12; 2 Koreto 1:3, 4.a
[Nɔte ka l’ɛse ka dikatshi]
a Dia wɛ mbeya awui efula lo dikambo sɔ, enda lo lɛkɛ 201-204 la dibuku Bible etshatɔ mɛtɛ? diakatondjama oma le Ɛmɛnyi wa Jehowa.
[Efundelo wa l’etei w’odingɔ wa lo lɛkɛ 7]
Yeso akate dia aki akambo amɔtshi wele oyadi nde kana andjelo kombaeyaka, koko paka She oto mbakawaeyaka.