Onde Nzambi ndjakiyanyaka dikambo diami?
Ekadimwelo washa anto efula:
▪ “Nzambi ekɔ woke efula woho ɔnɛ wahandakoke ndjakiyanya lo dikambo di’ekakatanu ami.”
▪ “Hafɔnya dia nde ndjakiyanyaka dikambo diami.”
Kakɔna kakate Yeso?
▪ “Hawutusundjaka [nsɔlɛ tanu] akuta ahendi? Keli nduku otoi ato atuhamameka lu ashu a [Nzambi]. Ndu weondji wa divu dia l’ete anyu wambalema tshe. Tanyukaki woma: Nyu nyambuleka [nsɔlɛ] efula ushinga a wulu.” (Luka 12:6, 7) Aha la tâmu, Yeso aketsha dia Nzambi ndjakiyanyaka dikambo diaso.
▪ “Tanyuyakananyaki [pondjo] nyati: Ayutole na? kana, ayutono na? kana, ayutolota na? Ne dia asi wedja watuyangaka diango so tshe. Shenyu leli l’ulungu mbeyaka ati: Nyu dihumbaka dio tshe.” (Mateu 6:31, 32) Yeso aki l’eshikikelo ɔnɛ Nzambi mbeyaka ehomba aso.
BIBLE mbutaka hwe dia Nzambi ndjakiyanyaka dikambo diaso. (Osambu 55:22; 1 Petero 5:7) Ko naka ngasɔ, lande na kasowaso heyama ɛlɔ kɛnɛ? Naka Nzambi ekɔ ngandji ndo la wolo tshɛ, lande na kahandakumiya asui?
Okadimwelo wa dimbola sɔ mendanaka la dikambo dimɔtshi diahaleke anto mbeya, di’ɔnɛ Satana Diabolo mbele omboledi w’andja ɔnɛ wa kɔlɔ. Etena kakandahembe Yeso, Satana akawɛnya waolelo tshɛ wa l’andja, ndo akawotɛ ate: “Dimi layukusha wulu one tshe, ndu lutumbu la waulelu aku; ne dia wakambisha wulu, okone untu tshe lalangami mbusha, layuwushawo.”—Luka 4:5-7.
Onto akɔna aketɛ Satana omboledi w’andja ɔnɛ na? Etena kakakitanyiya ambutshi aso wa ntondo, Adama la Eva, awui waki Satana ndo kakawoke Nzambi ɔkɔngɔ, vɔ wakasɔnɛ Satana oko omboledi awɔ. Tatɛ oma l’ɔtɔmbɔkwɛlɔ ɔsɔ, Jehowa Nzambi akatshike dia etena kɛmɔtshi mbeta dia mɛnya dia ɛlɔmbwɛlɔ kaki Satana kambokita tatala. Jehowa hatshutshuya anto la wolo dia vɔ mbokambɛ, koko nde ambotodihwɛ mboka dia sho kalola oya le nde.—Romo 5:10.
Lam’ele Nzambi ndjakiyanyaka dikambo diaso, nde akɔshi tɛdikɔ dia Yeso ndjototshungola oma l’ɛlɔmbwɛlɔ kaki Satana. Kem’edja, Yeso ayanga “nembia [ɔnɛ] laki la wulu a nyoi, letawo vati: Uhimbanyi, uma lu nyoi kandi.” (Heberu 2:14) Lo sala ngasɔ, nde ayolanya “elimu wa uhimbanyi.”—1 Joani 3:8.
Paradiso kayonga nto la nkɛtɛ kɛnɛ. L’etena kɛsɔ, Nzambi “ayukitula asoi tshe lu ashu [w’anto]; nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.”—Enyelo 21:4, 5.a
[Nɔte ka l’ɛse ka dikatshi]
a Dia wɛ mbeya awui akina wendana la bonde katshika Nzambi asui, enda lo tshapita 11 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.
[Efundelo wa l’etei w’odingɔ wa lo lɛkɛ 8]
Paradiso kayonga nto la nkɛtɛ kɛnɛ