Onde Nzambi mbetawɔka weho w’ɛtɛmwɛlɔ tshɛ?
Ekadimwelo washa anto efula:
▪ “Ɛtɛmwɛlɔ tshɛ wekɔ mboka yakonya le Nzambi.”
▪ “Naka wɛ ekɔ kanga losembwe, kete dietawɔ bu nto ohomba.”
Kakɔna kakate Yeso?
▪ “Nyoto lu suku dia tshitshe, ne dia suku dieli wuki, la mbuka keli wuki utsha l’elanyelu, antu efula watotoka loko. Ne dia suku dieli tshitshe, la mbuka keli tshitshe utsha lu lumu, antu atoi mbatukienaka.” (Mateu 7:13, 14) Yeso kombetawɔka dia ɛtɛmwɛlɔ tshɛ konyaka le Nzambi.
▪ “Lushi loso, antu efula wayumvutela vati: Khumadiondjo, Khumadiondjo, shu kumvutaka akambu wahatayi lu lukumbu laye, shu kuntundjaka edienge lu lukumbu laye, shu kuntshaka akambu wa mamba efula lu lukumbu laye? Ku dimi layâhunwela nti: Dimi halanyeyi nduku yema. Nyumanganeli, nyu atshi wa kolo.” (Mateu 7:22, 23) Yeso hetawɔ wanɛ tshɛ wasɛma ɔnɛ vɔ mboyelaka.
ANTO efula wayasha l’awui w’ɔtɛmwɛlɔ mbɔsaka dietawɔ ndo wetshelo awɔ la nɛmɔ efula. Ko kakɔna katomba naka wetshelo ɛsɔ hawɔtɔnɛ la kɛnɛ katanema lo Bible, Ɔtɛkɛta waki Nzambi na? Yeso akɛnya wâle waya lo ndjela wetshelo w’anto etena kakandatɛ ewandji w’ɛtɛmwɛlɔ wa lo nshi yande ate: “Nyu nyatulanyaka diui dia [Nzambi] ne dia ditshelu dianyu.” Nde akawatɛ nto ɛtɛkɛta ɛnɛ waki Nzambi ɔnɛ: “Antu ane watonemiaka l’elomo. Keli etema awo weko etali uma le mi. Vo watontemolaka otemolatemola, watetshaka dietshelu dieli uku elembe w’antu.”—Mateu 15:1-9; Isaya 29:13.
Lɔkɛwɔ lekɔ nto ohomba koko aha dietawɔ nto. Bible mbutaka lo dikambo di’anto amɔtshi wasɛma dia Nzambi mbatɛmɔlawɔ ɔnɛ: “Vo watutaka vati: Shu mbeyaka [Nzambi], keli watuwangunaka lu etsha awo.” (Tito 1:16) Diakɔ diele, Bible mbutaka lo dikambo di’anto wasɛna lo nshi yaso nyɛ ɔnɛ: “Vo wayuyala . . . anangi wa engenongeno, wuleki wa [Nzambi]. Vo wayuyala l’efanelu ka ololo a [Nzambi], keli wayutuna wulu andi. Umo l’atei w’antu aso.”—2 Timote 3:4, 5.
Losembwe lekɔ ohomba, koko aha lɔ loto mbahombama. Lande na? Nɛ dia onto kokaka monga kanga kɔlɔ, kânga mbende la losembwe. Ɔnkɔnɛ, ekɔ ohomba monga la ewo k’oshika kendana la Nzambi. (Romo 10:2, 3) Kondja ewo kɛsɔ ndo sala akambo lo yoho yɔtɔnɛ la kɛnɛ kata Bible ayotokimanyiya dia ngɛnyangɛnya Nzambi. (Mateu 7:21) Lo mɛtɛ, ɔtɛmwɛlɔ w’ɔlɔlɔ mendanaka l’eyango, dietawɔ ndo etsha w’ɔlɔlɔ. Etsha w’ɛlɔlɔ nembetshiyaka salaka lolango laki Nzambi lushi la lushi!—1 Joani 2:17.
Naka wɛ nangaka mbeya awui efula wendana la kɛnɛ kata Bible lo dikambo dia Nzambi, kete ɛnana la Ɛmɛnyi wa Jehowa dia vɔ ndjoketshaka Bible lakayɛ aha la kɔlɔmba falanga.
[Efundelo wa l’etei w’odingɔ wa lo lɛkɛ 9]
Ɔtɛmwɛlɔ w’ɔlɔlɔ mendanaka la eyango w’ɔlɔlɔ, dietawɔ di’ɔlɔlɔ ndo etsha w’ɔlɔlɔ