Wakasambisha Ɔtɛkɛta wa Nzambi la dihonga tshɛ

Akristo wa mɛtɛ mongaka la dihonga etena kahɛnyahɛnyamawɔ. L’ɛnyɛlɔ k’Akristo wa lo ntambe ka ntondo, sho nɔmbaka Jehowa nyuma kande kakoka tokimanyiya dia nsambisha la dihonga.—Etsha 4:23-31.

Lo kɛnɛ kendana l’olimu aso w’esambishelo wakasalemaka etena kakalɔmaka Ta dia ntondo di’andja w’otondo, ɔnangɛso ɔmɔtshi akafunde ate: “Ekambi waki Nzambi wakakahe vɔlimɛ y’esambele ya dibuku Études des Écritures yaki l’ɔtɛ a dui ɔnɛ Le mystère accompli. Diɔ mbakaleke kahanyema. Nkumu ya Diolelo No. 1 yakatondjama lo 1918. L’ɔkɔngɔ diko, wakayotondja Nkumu ya Diolelo No. 2 yakalembetshiyaka lande na kakashimbe ewandji wa lɛɛta okahanyelo wa dibuku Le mystère accompli. Oma lâsɔ, wakayotondjaka Nkumu ya Diolelo No. 3. Ekanda ɛsɔ tshɛ wakakahanyema lo yɛdikɔ y’efula oma le olui w’akitami. Vɔ wakahombe mɛtɛ monga la mbetawɔ ndo la dihonga dia nkaha Nkumu ya Diolelo shɔ.”

Ɛlɔ kɛnɛ, apandjudi wa Diolelo w’eyoyo ndowanyemaka dia nsambisha, koko aha mbala tshɛ mbonga dui sɔ l’etombelo w’amɛna. Lo ntɛkɛta dia mbala ka ntondo kakandatatɛ nsambisha lo 1922, ɔnangɛso ɔmɔtshi l’ose Pologne ladjasɛ l’États-Unis akate ate: “Kânga mbakimi kombeyaka woho wa mbisha anto ekanda l’esambishelo ndo ntɛkɛta Angɛlɛ dimɛna, lakatombe dimɛ l’esambishelo lushi lɔmɔtshi ndo lakatɔkɔkɔla lo biro ka dɔkɔtɛlɛ dimɔtshi ko onganga ɔmɔtshi akadihola lokuke. Hambohɛki kɛnɛ kakasalema lushi lɔsɔ nɛ dia laki la wɔma w’efula ndo lakasakaka lokomba. Etena kakamalange ndjihola tapa diami, abuku tshɛ waki lɔkɔ wakakɔ l’ekolo w’onganga ɔsɔ. Handjohɔ kɛnɛ kakamawotɛ, koko lakawosha okanda ɔmɔtshi. Etena kakamamɔ oma lâwɔ, laki la dihonga ndo lakoke dia Jehowa ambɔtshɔkɔla nɛ dia lakakahe tobukubuku efula lushi lɔsɔ l’ɔsɛsɛ w’amundji w’okanda.”

Kadiyɛso kɛmɔtshi mbutaka ate: “Oya lo 1933, anangɛso efula wakakambe la vɔatirɛ yanunya dui dia nsambisha losango la Diolelo.” Lo diaaso dimɔtshi, nde la wadi l’omi amɔtshi wakatasambishaka l’ɛtshi ka nkɛtɛ kɛmɔtshi kaki l’akona efula ka la Californie lo États-Unis. Nde mbutaka ate: “Ɔnangɛso lakatasambishaka la so akahema lo vɔatirɛ yanunya dui ko akadɛ la yɔ lo shɔdi ya dikona. Etena kakandahɛtsha vɔatirɛ shɔ, anto tshɛ wakokaka oko dui diekɔ lo ntomba oma l’olongo ndo ase ngelo kɛsɔ wakahembe mbala la mbala dia mbeya oma lɛnɛ atomba dui, koko vɔ kombeya. L’ɔkɔngɔ wa nde nyima vɔatirɛ shɔ, takatshɔka tosambisha wanɛ wakahokamɛka losango lɔsɔ. Lakakambe nto la tovɔatirɛ tohende tanunya dui ndo anto efula konangaka mpokamɛ losango la Diolelo. Koko takiwɔ la dui dikina dia nsala nɛ dia losango lakokamaka ahole tshɛ. Takɛnyi dia Jehowa kambaka la toho t’amɛna lo tena diahombama dia lokumu l’ɔlɔlɔ sambishama. Toho takakambaka la so tɔsɔ takatokimanyiya dia monga la dihonga l’oyango wa nkotsha sangwelo diaki Jehowa, mbuta ate ntombola lokombo lande.”

L’ɛnɔnyi 1930 ndo l’etatelo k’ɛnɔnyi 1940, Ɛmɛnyi wa Jehowa wakakambaka la fɔnɔ ndo l’asawo wakadjama l’eshinga dia nsambisha. Kadiyɛso kɛmɔtshi mbutaka ate: “Kadiyɛso kɛmɔtshi k’osekaseka akatasambishaka lo luudu la luudu l’ekimanyielo ka fɔnɔ. L’ɔkɔngɔ wa nde pokamiya pami kɛmɔtshi awui wakadjama lo fɔnɔ wendana la losango la Diolelo, pami kɛsɔ akakikɔmɔla ɔfɛkɛ ndo tɔ kakakɔ la nkɛtɛ koko tɔ kondana. Apami akina asato waki yema tshalola walɛ wakɛnyi kɛnɛ kakatombe ndo wakelɛ kadiyɛso dia nde ndjahokamiya losango lakɔ ndo wakɔshi ekanda wakandawasha. Dui sɔ diakôkeketsha.” Kadiyɛso kɛsɔ akahombe monga la dihonga dia mbikikɛ ehemba wa ngasɔ.

Kadiyɛso kakɔ kâmɛ akate nto ate: “Lam’akatatatɛ kahɛ anto periodikɛ l’ɛsɛsɛ l’etatelo ka 1940, taketetaka l’ɔnɔngɔ lo toshinga tokime akatshi wa weke l’anya wakawafunde ɔnɛ “Ɔtɛmwɛlɔ ekɔ djonga ndo lokeso” ndo “Nyokambe Nzambi nde la Kristo Nkumekanga.” L’etena kakɔ kâmɛ, takakahɛka anto traktɛ. Wanɛ waketetaka lo toshinga wakahombe monga la dihonga nɛ dia vɔ waki l’oyango wa ntondja lokombo la Jehowa ndo l’ekambi ande sɛkɛ.”

Kadiyɛso kekina mbutaka ate: “Aki dui dia wolo dia nkaha periodikɛ l’esomba wa totshitshɛ djekoleko etena kakahɛnyahɛnyamaka Ɛmɛnyi wa Jehowa. . . . Wanɛ wakemalaka l’asanga wa mboka wokime periodikɛ l’anya ndo wata ɛtɛkɛta wele la diko engo wakahombaka mɛtɛ monga la dihonga. Koko takasambishaka samalo tshɛ. Anto amɔtshi wakatolongolaka dimɛna. Lo tena dimɔtshi, dengalenga diakayelanaka la so ndo lo waaso amɔtshi, takahombaka minya demba diaha vɔ tosalɛ kɔlɔ.”

Kânga mbakawahɛnyahɛnyamaka etena kakalɔmaka Ta dia hende di’andja w’otondo, Ɛmɛnyi wa Jehowa wakatetemala nsambisha la dihonga. L’esambishelo ka lânde kakaviya nshi 43 ntatɛ lo Ngɔndɔ ka dikumi l’ahende 1, 1940 polo lo Ngɔndɔ ka ntondo 12, 1941, suke l’apandjudi 50 000 wa l’États-Unis wakakahe tobukubuku oko miliyɔ enanɛi.

Dikumanyi efula dia l’okongamelo waki Nzambi mbohɔka l’ɔngɛnɔngɛnɔ tshɛ ekakatanu wakahomana la wɔ wâkalɔmbɛ dia vɔ monga la dihonga. Amɔtshi mbohɔka ɔnɛ l’edja k’ɛnɔnyi vɔ wakɛnya dia waki la dihonga lo mbuta ɛtɛkɛta ɛnɛ: “Nyɛsɔ totetemale nsambisha l’ohetoheto polo ndo l’ekomelo.” Hateye toho tokina tayotosambisha losango la lo Bible la ntondo k’ekomelo ka dikongɛ nɛ di’akambo dia kɔlɔ ndja. Koko l’ekimanyielo ka Jehowa, tayotetemala nsambisha la mbetawɔ ndo la dihonga.

[Efundelo wa l’etei w’odingɔ wa lo lɛkɛ 9]

Sho pombaka monga la dihonga dia nsambisha