EKADIMWELO LO AMBOLA W’OMA LO BIBLE

Ngande wakoka ɔngɛnɔngɛnɔ monga lo diwala?

Alako watanema lo Bible wɛnya woho wakoka ɔngɛnɔngɛnɔ monga lo diwala wekɔ ohomba efula nɛ dia vɔ ndja oma le Jehowa Nzambi lele Otungi wa diwala. Vɔ tetshaka dia sho monga la waonga w’amɛna wakoka nkimanyiya dia ɔngɛnɔngɛnɔ monga lo diwala. Alako asɔ mɛnyaka nto weho w’asawo wahomba atshukanyi sawolaka di’ɔngɛnɔngɛnɔ monga lo diwala diawɔ.​—Adia Kɔlɔsayi 3:8-10, 12-14.

Wadi l’omi pombaka nɛmiyanaka lam’asawɔ. Vɔ wayonga l’ɔngɛnɔngɛnɔ lo diwala diawɔ naka onto l’onto nɛmiya ɔkɛndɛ wakawosha Nzambi lo diwala.​—Adia Kɔlɔsayi 3:18, 19.

Kakɔna kaleka nkeketsha diwala?

Wadi l’omi koka mbidjasɛ kaamɛ naka vɔ mbokana ngandji ka shikaa lam’asawɔ. Nzambi tetshaka woho wahombaso mbokana ngandji. Nde la Yeso y’Ɔnande wekɔ bɛnyɛlɔ di’eshika dia monga la ngandji ka ndjahombia.​—Adia 1 Joani 4:7, 8, 19.

Naka wadi l’omi mbɔsa diwala la nɛmɔ di’efula ndo mbɔsa dia ɔsɔ ekɔ dui diakakongɛma oma le Nzambi, kete vɔ wayotshikala kaamɛ. Nzambi akatonge diwala l’oyango wa pami la womoto mbidjasɛka pondjo pondjo dia nkumbo kokamɛ. Diwala koka nkeketala nɛ dia Nzambi akasha pami la womoto akoka w’onto l’onto kotshaka ehomba wa lo demba ndo wa longandji w’osekande. Ndo nto, nde akawatonge l’efanelo kande l’akoka wa vɔ mbokoya ngandji kande.​—Adia Etatelu 1:27; 2:18, 24.