Onde wɛ akeyaka?

Ngande ‘wakawɛmbaka’ dja lo nshi y’edjedja?

LO Etatelo 22 mbutaka dia l’oyango wa ndjalɔngɔsɔla dia tolambola olambo ɔmɔtshi lo dihole di’etale, Abrahama “akɛndja ɔnande Isaka nkunyi ya tolambola olambo wa lotshumba. Oma laasɔ, nde akakimɛ dja la lokuwa lo anya ande, ko vɔ 2 wakatshu.”—Eta. 22:6.

Afundelo hawɔtɛkɛta ndooko dihole lo kɛnɛ kendana la yoho yakakambaka la wɔ lo nshi y’edjedja dia mpɛtsha dja. Lo kɛnɛ kendana la ɔkɔndɔ ɔsɔ, ofundji ɔmɔtshi mbutaka dia “aki wolo dia owa wa dja ntetemala mpɛta lo edja tshɛ kakaviya lɔkɛndɔ” laki Abrahama nde la Isaka. Ɔnkɔnɛ, mbeyaka monga ko kɛnɛ katɛkɛtawɔ lanɛ ekɔ ehomɔ kaki ohomba dia mpɛtsha dja.

Anto akina mbutaka dia komonga dui dia tshitshɛ dia mpɛtsha dja lo nshi y’edjedja. Anto wakakombolaka mbɔsa yɔngɔnya oma le asukanyi awɔ lo dihole di’onto ndjotatɛ mpemba mpɛtsha dja ndamɛ. Laasɔ wa nombewo efula mbutaka dia kɛnɛ kakɛmbɛ Abrahama aki ehomɔ, ondo mpoke kakalɛndjalɛndjama la mɔlɔla, kaki la akalanga, kana akalanga wahɛta w’oma lo dja yaki la otsho wakete. (Isa. 30:14) La akalanga wahɛta wɛmbami lo yoho shɔ, vɔ wakakoke nkamba la nkunyi dia mɔngɔnya dja lo dihole tshɛ diakawakomaka.