Ambola w’oma le ambadi

Onde Okristo kokaka monga l’okoma wa woke kana wa tshitshɛ dia ndjakokɛka oma le anto akina?

Atɔndɔ asɔ mɛnyaka ɔnɛ ekɔ kɔlɔ di’Akristo nkamba la dihomɔ dia ta dia ngasɔ ɛnyɛlɔ, ekoma wa totshitshɛ, wa weke kana weho ekina w’ekoma dia ndjakokɛ oma le anto akina. Tokane yimba la atɔndɔ wayela anɛ:

Lɔsɛnɔ l’onto lekɔ ekila le Jehowa. Omembi w’esambo Davidɛ akafunde lo dikambo dia Jehowa ate: “Le yɛ kele kiɔkɔ ya lɔsɛnɔ.” (Os. 36:9) Ɔnkɔnɛ, naka Okristo nsɔna dia ndjamɛ kana mamɛ diangɔ diande, kete nde pombaka nsala kɛnɛ tshɛ kakokande nsala diaha monga l’onongo wa dikila, mbuta ate monga l’onongo wa nyɔi k’onto okina.—Eoh. 22:8; Os. 51:14.

Ekɔ mɛtɛ dia ehomɔ tshɛ kakamba l’onto dia ndjamɛ koka mbokonya dia monga l’onongo wa dikila. Koko, ekoma mbakoka ndjaka onto esadi eto, oyadi l’okonda kana aha l’okonda.a Ndo nto, mbeyaka monga ko ɔndɔshi ekɔ la kɛlɛ, laasɔ naka nde ambɛna okoma, kete dui sɔ koka ndeka mbosha kɛlɛ ndo onto ɔmɔtshi koka ndjakema.

Etena kakatɛ Yeso ambeki ande dia mbɔsa tokuwa l’otsho wa la ntondo ka nde ndjakema, komonga dia vɔ ndjakokɛ. (Luka 22:36, 38) Koko Yeso akalange mbasha wetshelo ɔnɛ: Ambeki ande takawahombe nsala awui wa ngala, kaanga etena kakiwɔ la ntondo k’olui w’anto wele la dihomɔ dia ta. (Luka 22:52) L’ɔkɔngɔ wa Petero nkamba la lokuwa lande dia ndɔsha okambi w’ɔlɔmbɛdi wa laadiko, Yeso akadjangɛ Petero ate: “Kaloya lokuwa layɛ lo dihole.” Oma laasɔ Yeso akashikikɛ tɔndɔ dimɔtshi dialɔmbɔla ndo Akristo wa nshi nyɛ ate: “Wanɛ tshɛ wɛmbɛ anto akina tokuwa wayodiakema la tokuwa.”—Mat. 26:51, 52.

Oko wakadiatama lo Mika 4:3, ekambi wa Nzambi “wayotshula tokuwa tawɔ ta ta nkongo ndo akɔnga awɔ tɔshɔlɔ takɔlɔngawɔ adiyo.” Akristo wa mɛtɛ mbeyamaka oko ambidji wa wɔladi. Vɔ ndjelaka ɛlɛmbɛ wakasha Nzambi lo tshimbo y’ɔpɔstɔlɔ Pɔɔlɔ ɔnɛ “tanyokaloyake kɔlɔ lo kɔlɔ” ndo “nyodjasɛ l’anto tshɛ ki.” (Rɔmɔ 12:17, 18) Kaanga mbakinde l’ekakatanu wa wolo, Pɔɔlɔ akakitanyiyaka dui sɔ, mbidja ndo “waale w’oma le apɔtwanyi,” ndooko lushi lakandasekola atɔndɔ wa lo Bible l’oyango wa ndjakokɛ. (2 Kɔr. 11:26) Koko, nde akayaɛkɛka le Nzambi ndo akeyaka ɔnɛ alako wa lomba wa lo Bible “ndeka dihomɔ dia ta dimɛna.”​—Ond. 9:18.

Le Akristo, lɔsɛnɔ lekɔ la nɛmɔ efula ndeka lomombo la l’emunyi. Sho mbeyaka ɔnɛ “lɔsɛnɔ [l’onto] halolemanɛ la diangɔ diele la nde.” (Luka 12:15) Diakɔ diele, naka sho ntɛkɛta l’ɔpɔtwanyi wele l’okoma la memakana tshɛ ko nde hatshike, kete tayoyela dako dia Yeso di’ɔnɛ: “Tanyɔlɔshanake la onto a kɔlɔ.” Dui sɔ koka nembetshiya mbotshika dia nde mbɔsa kɛnɛ tshɛ kalangande. (Mat. 5:39, 40; Luka 6:29)b Lo mɛtɛ, ayoleka dimɛna dia mbewɔ nsala akambo wakoka nkonya atshi wa kɔlɔ dia tɔsɔma. Ondo vɔ hawotoleka tɔlɔsha naka sho ndjela alako wa lo Bible ndo mbewɔ “ɔsɛmɔ wa kɛnɛ kele la onto lo lɔsɛnɔ.” (1 Jni. 2:16) Ayonga nto ekokelo le so naka asukanyi aso teyaka oko Ɛmɛnyi wa Jehowa wadja wɔladi.​—Tok. 18:10.

Akristo nɛmiyaka nkum’otema y’anto akina. (Rɔmɔ 14:21) Anangɛso l’akadiyɛso amɔtshi koka nyanga kana takanyema naka vɔ mbeya dia ɔnangɛwɔ ɔmɔtshi l’Okristo ekɔ l’okoma dia ndjakokɛka oma le anto akina. Mbeyaka monga ko tekɔ la lotshungɔ la monga l’okoma, koko lam’ele sho nangaka anangɛso, hatohombe pondjo nsala dui dimɔtshi dieyaso ɔnɛ diayowatakanya.​—1 Kɔr. 10:32, 33; 13:4, 5.

Akristo nangaka monga ɛnyɛlɔ k’ɔlɔlɔ le anto akina. (2 Kɔr. 4:2; 1 Pe. 5:2, 3) Naka Okristo ekɔ l’okoma dia ndjakokɛka oma le anto akina, kete dikumanyi wayowosha alako w’oma lo Bible. Naka nde amboyashikikɛ dia monga l’okoma, kete nde hayosha ɛnyɛlɔ ka dimɛna. Nde hayokoka mɛmba ɛkɛndɛ akɔna tshɛ kana monga la waɛsɛ wa laande l’etshumanelo. Dui sɔ mendanaka ndo l’Okristo watetemala nkamba olimu wawɔlɔmba dia monga l’okoma. Ayoleka dimɛna dia nde nyanga olimu okina.c

Okristo ndamɛ mbahomba mbɔsa yɛdikɔ yendana la woho wakokande ndjakokɛ, nkokɛ nkumbo kande, diangɔ diande ndo lɛnɛ akambande olimu. Koko etena kasalande ɛsɔnwɛlɔ ɛsɔ, vɔ pombaka pikama l’atɔndɔ wa lo Bible. Nzambi kaso ka lomba akatosha atɔndɔ asɔ nɛ dia nde tolangaka. Diakɔ diele, Akristo wele la diɔtɔnganelo dia dimɛna la Jehowa sɔnaka diaha monga l’okoma dia ndjakokɛka oma le anto akina. Vɔ mbeyaka ɔnɛ naka vɔ ndjaɛkɛ le Nzambi ndo ndjela atɔndɔ wa lo Bible lo lɔsɛnɔ lawɔ, kete vɔ wayokondja ekokelo ka mɛtɛ pondjo pondjo.​—Os. 97:10; Tok. 1:33; 2:6, 7.