Ambola w’oma le ambadi
Lande na kahomba Akristo monga la shɛnɔdi y’efula lo kɛnɛ kendana la okambelo wa la aplikasiɔ watomanɛwɔ mesajɛ?
Akristo amɔtshi kambaka la tshulatshula dia nshi nyɛ dia sawolaka l’ase nkumbo ndo l’Ɛmɛnyi wa Jehowa ekina. Koko Akristo wambotshunda lo nyuma pombaka mbohɔka dako nɛ: “Kanga yewo atɛnaka waale, ko nde atoyashɛka, koko ɔnɛ lahatahokɔ akambo atotshɔka tsho, ko atodiɛnɛka la etombelo wa kɔlɔ.”—Tok. 27:12.
Sho shihodiaka ɔnɛ Jehowa nangaka tokokɛ. Diakɔ diele, hatɔtɔ lɔngɛnyi la wanɛ wadja diatɔnelo, wanɛ wakatshanyema oma l’etshumanelo kana wanɛ wasukɛ wetshelo wa kashi. (Rɔmɔ 16:17; 1 Kɔr. 5:11; 2 Jni. 10, 11) Ondo anto amɔtshi wasangana kaamɛ laso hawokitanyiya ɛlɛmbɛ wa lo Bible. (2 Tim. 2:20, 21) Etena kasɔnaso angɛnyi, tatohɛke dui sɔ. Koka monga wolo dia nsɔna angɛnyi w’eshika naka tekɔ lo nkamba l’aplikasiɔ ɔmɔtshi watomanɛwɔ mesajɛ.
Ekɔ ohomba monga la shɛnɔdi lo kɛnɛ kendana la nsɔna angɛnyi w’eshika djekoleko naka tekɔ lo olui ɔmɔtshi wa woke w’anto watomanɛ mesajɛ lo aplikasiɔ ɔmɔtshi. Akristo amɔtshi mongaka l’atei w’elui w’anto efula watomanɛ mesajɛ, ndo dui sɔ mongaka l’etombelo wa kɔlɔ. Ngande wakoka ɔnangɛso kana kadiyɛso kɛmɔtshi monga la yewo naka olui awɔ aya l’anto nkama kana nunu? Ayonga wolo dia mbaeya dimɛna ndo mbeya lonyuma la wanɛ tshɛ wele l’olui akɔ. Osambo 26:4 mbutaka ɔnɛ: “Dimi halekesanɛ l’akanga wa lokeso, ndo dimi mbewɔka wanɛ washɛ woho wewɔ.” Dui sɔ mɛnyaka di’ekɔ dui dia lomba tomɛka paka wanɛ weyaso ato mesajɛ.
Oyadi olui w’anto watomanɛ lande mesajɛ wekɔ yema tshitshɛ, Okristo pombaka monga la yewo lo kɛnɛ kendana la lofulo la wenya letshande lo tomanɛ mesajɛ ndo awui wasawola anto wele l’olui awɔ. Hatohombe mbɔsa dia sho pombaka nkadimola mesajɛ oyadi woho akɔna wewɔ kana otale wa ngande wewɔ. Pɔɔlɔ akahɛmɔla Timɔte lo dikambo dia ‘akanga wa vate vate ndo wayatambiya l’akambo akana.’ (1 Tim. 5:13) Ɛlɔ kɛnɛ, anto wokoka nsala awui asɔ lo tshimbo ya tshulatshula.
Okristo wambotshunda lo nyuma hahombe mɔnyɔla kana mpokamɛ asawo wa diɔnyɔ kana awui wa toseke wendana l’asekande ambetawudi. (Os. 15:3; Tok. 20:19) Ndo nde pombaka mbewɔ nsanya ɛkɔndɔ wa kɔlɔ kana awui wele nde bu l’eshikikelo dia wekɔ mɛtɛ. (Ɛf. 4:25) Sho kondjaka mbo ya ndɛ ya lo nyuma ndo ya mbɛkɛ otema lo sitɛ kaso ka jw.org ndo lo JW Televisiɔ® katondjama ngɔndɔ la ngɔndɔ.
Ɛmɛnyi wa Jehowa ɛmɔtshi kambaka la mesajɛ dia nsondja, nsomba ndo nsala piblisite ka diangɔ diawɔ kana mbewoya wanɛ wele l’ohomba w’elimu. Ɔsɔ ekɔ awui w’okanda ndo hawendana l’awui w’ɔtɛmwɛlɔ. Akristo wele ‘bu la ngandji ka falanga’ hawokambe pondjo l’anangɛwɔ dia nkondja falanga.—Hɛb. 13:5.
Onde sho pombaka nkamba l’aplikasiɔ watomanɛwɔ mesajɛ dia nɔmba falanga dikambo di’anangɛso wele lo dihombo kana lo dikambo dia wanɛ wadiɛnɛ la mpokoso k’oma lo diangɔ diakatongama? Sho mbokaka anangɛso ngandji, sho ndjashaka le wɔ ndo mbala efula sho kimanyiyaka wanɛ wele lo dihombo ndo sho mbakeketshaka. (Jak. 2:15, 16) Koko nsala dui sɔ lo tshimbo y’olui w’anto efula watomanɛ mesajɛ, koka monga okakatanu efula le Bɛtɛlɛ kana etshumanelo dia mbakimanyiya. (1 Tim. 5:3, 4, 9, 10, 16) Ndo lo mɛtɛ, ndooko onto l’atei aso lalanga nkonya anto dia mfɔnya ɔnɛ takalongola ɔkɛndɛ wa laande l’atei w’ekambi wa Nzambi.
Sho kombolaka nsala kɛnɛ kayosha Nzambi lotombo. (1 Kɔr. 10:31) Diakɔ diele etena kɔsayɛ yɛdikɔ dia kana wɛ koka nkamba l’aplikasiɔ watomanɛwɔ mesajɛ kana etshulatshula kekina, enda waale wele la dui sɔ ndo onga la yewo.