Lowanya diɔtɔnganelo diasayɛ la Jehowa

ƆNƆNYI tshɛ, ɛkɔkɔ efula wɔsama la nɛmɔ kalolaka l’etshumanelo k’Akristo. Ohokanyiya ‘ɔngɛnɔngɛnɔ w’efula wonga l’olongo’ etena kakalola anto asɔ tshɛ! (Luka 15:7, 10) Naka wɛ akakalola l’etshumanelo, kete wɛ koka monga l’eshikikelo dia Yeso, andjelo ndo Jehowa ndamɛ ngɛnangɛnaka dia kɛɛna ambokalola l’etshumanelo. Koko, etena kalɔngɔsɔlayɛ nto diɔtɔnganelo diasayɛ la Jehowa, wɛ mbeyaka mpomana l’ekakatanu. Naa ekakatanu ɛmɔtshi l’atei awɔ, ndo kakɔna kakoka kokimanyiya?

EKAKATANU AKƆNA WELE LA YƐ?

Anto efula ndɔshanaka la tokanyi ta kɔlɔ l’ɔkɔngɔ wa nkalola l’etshumanelo. Ondo wɛ shihodiaka woho wakayaoke nkumekanga Davidɛ. Kaanga l’ɔkɔngɔ wa vɔ mbodimanyiya pɛkato yande, nde akate ate: “Munga yami yambokonya ewo.” (Os. 40:12; 65:3) L’ɔkɔngɔ w’onto ɔmɔtshi nkalola le Jehowa, nde mbeyaka ntetemala ndjaɛndja onongo kana monga la sɔnyi l’edja k’ɛnɔnyi efula. Isabelle akatshanyema l’edja kolekanyi ɛnɔnyi 20.a Nde kate ate: “Lakɛnyi dia aki dui dia wolo efula dia mbetawɔ kanyi y’ɔnɛ Jehowa kokaka dimanyiyami.” Naka wɛ nkɔmɔ, kete wɛ mbeyaka nyomonga wɔdu nto lo nyuma. (Tok. 24:10) Tetawɔke dia dui sɔ kokomɛ.

Anto akina koka ndjakiyanya ɔnɛ waya bu l’akoka wa nsala kɛnɛ tshɛ kele ohomba dia monga la diɔtɔnganelo dia ma ma la Jehowa nto. L’ɔkɔngɔ wa nde kaloyama l’etshumanelo, Antoine akate ate: “Lakayaoke dia lambohɛ awui tshɛ wendana la lɔsɛnɔ l’Okristo Iaki lami ntondo.” L’ɔtɛ wa tokanyi tɔsɔ, anto amɔtshi koka mengenga dia ndjasha tshɛ lo tshɛ l’awui wa lo nyuma.

Ɛnyɛlɔ, onto ɔmɔtshi lele la luudu lalangande efula lambolanyema vwa la lɔpɛpɛ la wolo, koka diɛnɛ l’ekiyanu lam’akanyiyande tena ndo welo walɔmbama dia lilɔngɔsɔla. Woho akɔ waamɛ mbele, naka diɔtɔnganelo diasayɛ la Jehowa diakalana l’ɔtɛ wa pɛkato ka woke, kete wɛ koka mfɔnya ɔnɛ dia nɔngɔsɔla lonyuma layɛ, nɔmbamaka mbidja welo efula. Koko eya dia wɛ koka nkondja ekimanyielo.

Jehowa tɔlɔmbaka ɔnɛ: “Nyoye kakianɛ kele todje akambo l’ɔnɔngɔ.” (Isa. 1:18) Wɛ amboshilaka mbidja welo efula dia ‘mbidja akambo l’ɔnɔngɔ.’ Jehowa kolangaka l’ɔtɛ wadjayɛ welo ɛsɔ. Lam’ele wɛ ambokalola le Jehowa, nde koka nkamba l’ɛnyɛlɔ kayɛ dia mɛnya dia Satana ekɔ kanga kashi!—Tok. 27:11.

Lo nsala ngasɔ, wɛ akashile ndjasukanya la Jehowa ndo nde ndakaka dia nde ayoyasukanya la yɛ. (Jak. 4:8) Koko nɔmbamaka akambo efula aha tsho mbeyama le anto akina ɔnɛ wɛ ambokaloyama l’etshumanelo. Wɛ pombaka ntetemala nkeketsha ngandji kokayɛ Shɔ ndo Ɔngɛnyi ayɛ, Jehowa. Ngande wakokayɛ nsala dui sɔ?

YADJƐ EYANGO WAKOKAYƐ NKOTSHA

Sala la wolo dia ndjadjɛ eyango wakokayɛ nkotsha. Ondo wɛ ekɔ lo ntetemla mbohɔ wetshelo w’etatelo wakayeke wendana la Jehowa ndo daka diande dia paradiso. Koko l’etena kɛnɛ, wɛ pombaka monga la mbekelo y’amɛna, ɛnyɛlɔ oko sambishaka mbala la mbala, mbɔtɔka nsanganya ndo mbetshaka wenya kaamɛ l’ananyɔ l’akadiyɛyɛ. Enda eyango wayela ɛnɛ wakokayɛ ndjadjɛ.

Sawolaka la Jehowa mbala la mbala. Shɔ koka nshihodia dia l’ɔtɛ watetemalayɛ ndjaɛndja onongo, koka monga okakatanu le yɛ dia mbɔɔlɔmba. (Rɔmɔ 8:26) Koko ‘ntetemala nɔmba,’ tɛ Jehowa dia wɛ nangaka efula lɔngɛnyi lasayɛ la nde. (Rɔmɔ 12:12) Andrej mbohɔka ate: “Lakayaɛndjaka onongo ndo laki la sɔnyi. Koko l’ɔkɔngɔ wa dɔmbɛlɔ tshɛ, tokanyi tɔsɔ takatakitakitaka. Lakaleke monga la ki ka lo yimba.” Naka wɛ heye kɛnɛ ka nɔmba, kete nsɛdingola alɔmbɛlɔ wa Davidɛ, nkumekanga kakayatshumoya watanema l’Osambo 51 ndo 65.

Ekaka Bible mbala la mbala. Dui sɔ diayokokimanyiya dia monga la lonyuma la wolo ndo dia ngandji kokayɛ Jehowa mfula. (Os. 19:7-11) Felipe akate ate: “Tshika mbetsha mbekelo ya lo nyuma lo dihole dia ntondo mbele ɔkɔkɔ wakakonya dia dimi monga wɔdu ndo ntshika kambɛ Jehowa. Halange nyomosala munga kɛsɔ mbala ka hende, diakɔ diele lakɔshi yɛdikɔ ya salaka wekelo w’onto ndaamɛ.” Wɛ koka nsala woho akɔ waamɛ. Naka wɛ ekɔ l’ohomba w’ɛlɔmbwɛlɔ dia mbeya awui amɔtshi w’ohomba wakokayɛ mbidja lo wekelo ayɛ w’onto ndamɛ, kete wɛ koka mimbola ɔngɛnyi ayɛ ɔmɔtshi wambotshunda dia kokimanyiya.

Nyomonga la diɔtɔnganelo l’anangɛyɛ l’akadiyɛyɛ. Anto amɔtshi wakakaloyama l’etshumanelo waki l’okiyanu ɔnɛ anto akina wayowaomalɛ. Larissa mbetawɔka ate: “Laki la sɔnyi k’efula. Lakoke dia lakasale kɔlɔ ndo lakanyangiya anangɛmi l’akadiyɛmi. Lakatetemala monga la tokanyi tɔsɔ l’etena k’otale.” Onga l’eshikikelo dia dikumanyi ndo anto akina wambotshunda lo nyuma nomɔlomɔka dia kokimanyiya etena kayayalowanya lonyuma layɛ. (Enda kiombo yele l’ɔtɛ a dui ɔnɛ: “Kakɔna kakoka dikumanyi nsala?”) Vɔ wekɔ l’ɔngɛnɔngɛnɔ lo woho wakayakalola l’etshumanelo ndo vɔ nangaka dia wɛ monga l’ɔngɛnɔngɛnɔ!—Tok. 17:17.

Kakɔna kakoka ndeka kosukanya l’etshumanelo? Yasha tshɛ lo tshɛ lo kɛnɛ kasala anangɛyɛ l’akadiyɛyɛ, mbuta ate mbɔtɔka nsanganya ndo sambishaka mbala la mbala. Ngande wayokokimanyiya dui sɔ? Felix akate ate: “Ase etshumanelo wakakongɛɛka l’asolo walomɔlomɔ dia dimi nkalola l’etshumanelo. Lakayaoke dia lakɔsamaka la nɛmɔ. Vɔ tshɛ wakakimanyiya dia dimi monga lo nkumbo kɛsɔ nto, lakayaoke dia lambodimanyiyama ndo dimi koka ntetemala kambɛ Jehowa.”—Enda kiombo yele l’ɔtɛ a dui ɔnɛ: “Kakɔna kakokayɛ nsala?”

TOHEKƆKE!

Satana ayotetemala kela “mpɛpɛ ya wolo” dia ketɛ wɔdu etena kayayalowanya diɔtɔnganelo diasayɛ la Jehowa. (Luka 4:13) Onga suke dia nkeketsha lonyuma layɛ oma ko kakianɛ.

Lo kɛnɛ kendana la ɛkɔkɔ ande, Jehowa ndakaka ate: “Dimi layoyanga wɔnɛ wakashishɔ, dimi layokaloya wɔnɛ wakanganɛ, dimi layɔmba mpota ya wɔnɛ wakahomɔ ndo dimi layokeketsha wɔnɛ wambɔlɛmba.” (Ɛzk. 34:16) Jehowa ambokimanyiya anto akina efula dia vɔ ndowanya diɔtɔnganelo diasawɔ la nde. Onga l’eshikikelo dia nde nangaka kokimanyiya dia wɛ ntetemala ndowanya diɔtɔnganelo diasayɛ la nde dia diɔ ndeka ndjala wolo.

Kakɔna kakoka dikumanyi nsala?

Dikumanyi koka nsala awui efula dia nkimanyiya apandjudi wambokaloyama l’etshumanelo dia ndowanya diɔtɔnganelo diasawɔ la Jehowa. Tende kɛnɛ kakokawɔ nsala lo dikambo dia wanɛ wambokaloyama l’etshumanelo.

Nyowashikikɛ. Ɔpɔstɔlɔ Pɔɔlɔ akeyaka di’otshi wa pɛkato wamboyatshumoya koka monga la ‘lonyangu lambotamanya.’ (2 Kɔr. 2:7) Nde mbeyaka monga la sɔnyi ndo nshisha elongamelo. Pɔɔlɔ akasha etshumanelo dako dia “monga suke dia mbodimanyiya ndo mbosamba.” Wanɛ wambokaloyama l’etshumanelo wekɔ l’ohomba wa monga l’eshikikelo ɔnɛ Jehowa ndo asekawɔ ambetawudi mbalangaka efula. Lowando la l’etete ndo ekimanyielo ka shikaa mbeyaka mbashimba dia nkɔmɔ.

Nyɔlɔmbɛ kaamɛ la wɔ. “Ɔsɛngɔsɛngɔ w’onto ɔlɔlɔ wekɔ la shɛngiya ya wolo.” (Jak. 5:16) Larissa, lakatatɛkɛtshi l’etatelo ka sawo nɛ mbutaka ate: “Lakatɛ dikumanyi lo kɛnɛ kendana la taamu ndo wɔma waki lami. Vɔ wakalɔmbɛ lo dikambo diami kaamɛ la mi. Oma laasɔ, lakashihodia dia dikumanyi bu la nkɛlɛ oya le mi. Vɔ wakalangaka kimanyiyami dia dimi ndowanya diɔtɔnganelo diasami la Jehowa.” Theo mbutaka ate: “Alɔmbɛlɔ wa dikumanyi wakambisha eshikikelo dia Jehowa nangakami mɛtɛ ndo mɛnaka waonga ami w’ɛlɔlɔ, koko aha paka wa kɔlɔ.”

Nyonge angɛnyi awɔ. Wanɛ wambokaloyama wekɔ l’ohomba w’angɛnyi l’etshumanelo. Ekumanyi kɛmɔtshi kelɛwɔ Justin mbutaka ate: “Nyokambe la diaaso tshɛ diakondjanyu dia mbalɔmba dia nsambisha kaamɛ la nyu ndo kɛnɛ koleki tshɛ ohomba ele ntshɔ towaembola lawakawɔ. Lɔngɛnyi lekɔ ohomba efula!” Ekumanyi kekina kelɛwɔ Henry mbutaka ate: “Etena kayɛna ase etshumanelo akina dikumanyi wɔtɔ lɔngɛnyi l’onto lambokaloyama l’etshumanelo, vɔ wayosala la wolo dia nsala woho akɔ waamɛ.”

Nyaakimanyiya dia vɔ mbekaka. Ɔngɛnyi wambotshunda lo nyuma koka nkimanyiya onto lambokaloyama l’etshumanelo dia monga l’ekongelo ka dimɛna ka wekelo. Ekumanyi kɛmɔtshi kelɛwɔ Darko mbutaka ate: “Dimi nangaka nkahana la wɔ diangɔ di’oshinga wolo dia lo nyuma diakamashola lo wekelo ami w’onto ndaamɛ ndo mbasambiyɛ waasaso wele la mi lo kɛnɛ kendana la wekelo wa Bible. Dimi mbɔsaka nto yɛdikɔ ya mbeka la wɔ awui amɔtshi kaamɛ.” Ekumanyi kekina kelɛwɔ Clayton, mbutaka ate: “Dimi mbakeketshaka dia mbishola ɛkɔndɔ wa lo Bible w’anto wakahomana la woho wa dui dimɔtshi diambohomana la wɔ.”

Nyonge alami w’ɛkɔkɔ w’ɛlɔlɔ. Wanɛ wambokaloyama l’etshumanelo mbɔsaka dikumanyi paka oko toshushi. Laasɔ, etena kɛnɛ kambowoleka monga l’ohomba wa mbaɔsa oko alami w’ɛkɔkɔ. (Jɛr. 23:4) Nyonge suke dia mbahokamɛ ndo suke dia mbawandola. Nyosawolake la wɔ mbala la mbala. Nyende kɛnɛ kasala ekumanyi kɛmɔtshi kelɛwɔ Marcus lo wembwelo ande w’ɛkɔkɔ. Nde mbutaka ate: “Sho kahanaka kanyi mɔtshi y’oma l’Afundelo, dimi mbawandolaka, ndo mbashikikɛka dia tekɔ l’ofunu lo dikambo diawɔ lo woho wosadiwɔ la wolo dia nkalola l’etshumanelo ndo Jehowa nde la wɔ ekɔ l’ofunu lo dikambo diawɔ. L’ekomelo ka wembwelo tshɛ, sho sɔnaka lushi lokina lahombaso ndjohomana.”

a Nkombo ya lo sawo nɛ yakatshikitanyema.