Onde wɛ ekɔ suke dia ‘nkita nkɛtɛ’?

Sho tshɛ tekɔ lo nongamɛ ekotshamelo ka daka dia Yeso di’ɔnɛ: “Ɔngɛnɔngɛnɔ le akanga wa lotutsha, nɛ dia vɔ wayokita nkɛtɛ.” (Mat. 5:5) Akitami wayokita nkɛtɛ lo woho wele vɔ wayolɛ l’olongo oko nkumi ya dikanga kaamɛ la Yeso. (Ɛny. 5:10; 20:6) Ɛlɔ kɛnɛ, Akristo efula wa mɛtɛ wekɔ lo nongamɛ dia nkita nkɛtɛ ndo dia nsɛna pondjo pondjo l’alemba wa kokele, lo wɔladi ndo l’ɔngɛnɔngɛnɔ. Etena kayokotshama daka dialongamɛwɔ sɔ tshɛ lo tshɛ, vɔ wayonga l’elimu a wolo wa nsala. Tɔsɛndingole esato l’atei awɔ: Vɔ wayolɛ nkɛtɛ, wayɔlɔngɔsɔla ahole wa mpangiya wanɛ wayolɔ ndo mbaetsha. Tɔsɛdingole woho wakokayɛ mɛnya oma ko kakianɛ dia wɛ ekɔ la nsaki ka nsala akambo asɔ lo nshi yayaye.

ONDE WƐ EKƆ SUKE DIA MBETƐ NKƐTƐ PARADISO?

Etena kakadjangɛ Jehowa anto dia ‘ndodia nkɛtɛ ndo ndjiolɛ’, nde akɛnya di’andja w’otondo wayokoma paradiso. (Eta. 1:28) Wanɛ wayɔsɛna pondjo pondjo lanɛ la nkɛtɛ pombaka nkitanyiya ɔlɛmbɛ ɔsɔ. Nkɛtɛ hayotokoma paradiso oma lo etatelo nɛ dia ekambɔ ka Ɛdɛna kaya bu nto. Lo mɛtɛ, l’ɔkɔngɔ wa Aramangɛdɔna, tayonga l’olimu efula wa nkamba dia mbidja pudipudi lo bɛtshi dia nkɛtɛ diadjama mindo efula ɛlɔ kɛnɛ. Ɔsɔ ayonga mɛtɛ olimu wa wolo!

Dui sɔ toholaka olimu wa wolo wakakambe ase Isariyɛlɛ etena kakawakalola oma lo lɔhɔmbɔ la Babilɔna. Nkɛtɛ yawɔ yakatshikala tɔngɔ l’edja k’ɛnɔnyi 70. Koko, Isaya akate dia diɛsɛ l’ɔtshɔkɔ wa Jehowa, vɔ wayonga l’akoka wa ndjikonya olangala. Prɔfɛsiya kɛsɔ mbutaka ɔnɛ: “Nde ayetɛ eswe ayɔ oko Ɛdɛna ndo laandja layɔ l’oswe oko ekambɔ ka Jehowa.” (Isa. 51:3) Jehowa akakimanyiya ase Isariyɛlɛ dia vɔ konya nkɛtɛ yawɔ dihole di’olangala. Woho akɔ wamɛ mbele, diɛsɛ l’ɔtshɔkɔ wa Jehowa, wanɛ wayokita nkɛtɛ wayonga l’akoka wa mbetɛ nkɛtɛ kɛnɛ paradiso k’olangala efula. Ndo wɛ koka mɛnya oma ko kakianɛ dia wɛ ekɔ la nsaki ka mbisha lonya l’olimu ɔsɔ.

Yoho mɔtshi yakokayɛ nsala dui sɔ ele lo nama luudu layɛ ndo dihole dodjashiyɛ pudipudi ndo aha l’ofukutanu. Wɛ koka nsala dui sɔ oyadi kaanga asukanyi ayɛ hawodisale. Wɛ koka nto mbidja pudipudi ndo nama mbalasa ka diolelo ndo mbalasa ka nsanganya ya weke. Lo ndjela akoka wele layɛ, wɛ koka nto ndjakimɔ la lolango dia nkimayiya l’ɛtshi kayɛ ka nkɛtɛ etena katomba mpokoso. Kɛsɔ ayɛnya dia wɛ kombolaka nkimanyiya ananyɔ ndo akadiyɛyɛ wele lo dihombo. Wɛ koka ndjambola ɔnɛ: ‘Onde dimi koka pamia akoka ami amɔtshi dia ndjokamba lawɔ naka lambonga la diaaso dia nkita nkɛtɛ?’

Olui ɔmɔtshi w’anangɛso l’akadiyɛso wasola ndo walɔngɔsɔla Mbalasa ka Diolelo.

ONDE WƐ EKƆ SUKE DIA NKIMANYIYA WANƐ WAYOLWAMA?

Aha la ntshimbatshimba, l’ɔkɔngɔ wa nde mbolola ɔna womoto laki Jairo, Yeso akate dia wakahombe mbisha ɔnakɔ yangɔ ya ndɛ. (Makɔ 5:42, 43) Ondo ɔsɔ bu dui dia wolo dia nkokɛ ɔna womoto l’ɛnɔnyi 12. Ohokanyiya yema kɛnɛ kayotomba, etena kayokotsha Yeso daka diande di’ɔnɛ: “Wanɛ tshɛ wele lo waombo wohɔma wayoka dui diande ko wayotomba.” (Jni. 5:28, 29) Kaanga mbele Bible hatotɛ oseka kiambokiambo tshɛ, sho koka fɔnya dia wanɛ wayolɔ wayonga l’ohomba wa nkondja yangɔ ya ndɛ, dihole dia ndala ndo ahɔndɔ wa ndɔta. Onde wɛ koka mɛnya oma ko kakianɛ dia wɛ kombolaka monga suke dia nkimanyiya? Nyɛsɔ tɔsɛdingole ambola amɔtshi.

Kakɔna kakokayɛ nsala oma ko kakianɛ dia mɛnya dia wɛ ekɔ suke dia nkita nkɛtɛ?

Anangɛso l’akadiyɛso amɔtshi wele l’ɔngɛnɔngɛnɔ wakaye lo sɛkɛ di’aviyɔ dia ndjolongola wanɛ woye lo losanganya la wedja efula la Paris.

Etena kashama diewoyelo di’ɔnɛ omendji w’otshimbedi ayembola etshumanelo kanyu, onde wɛ mbelɛka dia ndjɔlɛ yangɔ kaamɛ layɛ? Etena kashila olimu w’ose Bɛtɛlɛ ɔmɔtshi kana olimu w’omendji w’eteta, onde wɛ koka mbokimanyiya dia nde nkondja dihole dia mbidjasɛ? Naka losanganya la rɛjɔ kana losanganya la laande layosalema l’ɛtshi kanyu ka nkɛtɛ, onde wɛ koka ndjakimɔ la lolango dia nkamba la ntondo kana l’ɔkɔngɔ wa losanganya, kana nongola wanɛ wayoya?

ONDE WƐ EKƆ SUKE DIA MBETSHA WANƐ WAYOLWAMA?

Lo ndjela Etsha 24:15, sho nongamɛka dia miliyɔ y’anto wayolɔ. Efula ka l’atei awɔ, kombeya Jehowa la ntondo ka vɔ mvɔ. Vɔ wayokondja diaaso sɔ l’ɔkɔngɔ wa eolwelo kawɔ.a Ekambi waki Nzambi wa kɔlamelo ndo wa tomanamana wayowaetsha. (Isa. 11:9) Charlotte lakasambisha l’Éurope, l’Amérique du Sud ndo l’ Afrique du Sud, ekɔ lo kongɛ l’asolo wa lomɔlomɔ dui sɔ. L’ɔngɛnɔngɛnɔ tshɛ, nde mbutaka ate: “Lekɔ lo nomɔlomɔ dia mbetsha wanɛ wayolɔ. Etena kadiami dikambo di’onto ɔmɔtshi lakasɛnaka lo nshi yakete, mbala efula dimi mbutaka ɔnɛ: ‘Otondongaka onto ɔnɛ akeye Jehowa, tshiki lɔsɛnɔ lande lotonga woho okina.’ Lekɔ lo nomɔlomɔ mbutɛ wanɛ wayolɔ akambo wendana la Jehowa ndo woho wotonga lɔsɛnɔ lawɔ otondongaka wakawokambɛ.”

Kaanga ekambi wa kɔlamelo wa Jehowa wakasɛnɛ la ntondo ka Yeso ndja lanɛ la nkɛtɛ wayonga l’akambo efula wa mbeka. Ohokanyiya ɔngɛnɔngɛnɔ ndo diɛsɛ diayonga la so dia nembetshiya Danyɛlɛ okotshamelo wa prɔfɛsiya yakandafunde, kaanga mbakinde kondjishihodiaka. (Dan. 12:8) Kana lo kɛnɛ kendana la nkimanyiya Ruta nde na Naomi dia vɔ mbeka woho wele nkumbo kawɔ l’ɔlɔndji wa Mɛsiya? Ande ɔngɛnɔngɛnɔ wayonga la so dia nkamba l’ekongelo ka wetshelo ka l’andja w’otondo, aha la tshutshuyama ndo fukutanyema l’andja ɔnɛ wa kɔlɔ lee!

Kadiyɛso kɛmɔtshi asha mama kɛmɔtshi traktɛ lo dihole dimɔtshi diasolawɔ ahɔndɔ lo mashinyi.

Kakɔna kakokayɛ nsala oma ko kakianɛ dia mɛnya dia wɛ ayonga suke dia mbetsha wanɛ wayolɔ? Yoho mɔtshi yakokayɛ nsala dui sɔ ele lo nsala kɛnɛ tshɛ kakokayɛ nsala dia nkoma ombetsha wa manamana ndo sambishaka mbala la mbala. (Mat. 24:14) Oyadi lotshundu kana awui akina wakodjɛ elelo l’olimu ayɛ ɛlɔ kɛnɛ, welo wadjayɛ koka mɛnya dia wɛ ekɔ suke dia ndjetsha wanɛ wayolwama.

Eelo, ekɔ dimɛna kana yimba la ambola w’ohomba anɛ: Onde wɛ ekɔ lo konga l’asolo wa lomɔlomɔ dia nkita nkɛtɛ? Onde wɛ ekɔ lo nomɔlomɔ dia mbolɛ nkɛtɛ, dia nkimanyiya ndo dia mbetsha wanɛ wayolɔ? Wɛ koka mɛnya oma ko kakianɛ dia wɛ ekɔ suke lo ndjasha l’elimu akɔ waamɛ wakokongɛ etena kayoyokita nkɛtɛ!

a Enda sawo diele l’ɔtɛ a dui ɔnɛ: “Wakonya efula lo losembwe” lo Tshoto y’Etangelo ya Ngɔndɔ ka divwa 2022.