Ambola w’oma le ambadi
Etena kakɔna kayokomɛ olimu w’esambishelo ka lokumu l’ɔlɔlɔ?
Yeso akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” (Mat. 24:14) Tshɛkɛta ya lo Grɛkɛ telos yokadimɔmi ɔnɛ “ekomelo” yele lo divɛsa nɛ ndo lo divɛsa dia 6 ndo 13, mendanaka la ekomelo k’andja ɔnɛ wa Satana lo ta dia Aramangɛdɔna. (Ɛny. 16:14, 16) Kɛsɔ mɛnyaka dia tayotetemala nsambisha lokumu l’ɔlɔlɔ la Diolelo polo kaanga ambotshikala yema y’etena tshitshɛ dia Aramangɛdɔna ntatɛ. Kɛsɔ ambotshikitanya eokelo kaso ka ntondo.
Takataka ntondo dia tayokomiya esambishelo ka lokumu l’ɔlɔlɔ la Diolelo etena kayotatɛ mfɔnu ka woke ndo elanyelo ka Babilɔna ka woke. (Ɛny. 17:3, 5, 15, 16) Takafɔnyaka dia etena kayotatɛ mfɔnu ka woke, Jehowa hosha anto nto diaaso dia mbetawɔ lokumu l’ɔlɔlɔ. (Isa. 61:2) Takafɔnyaka nto dia wanɛ wayoka lo mfɔnu ka woke pombaka monga wanɛ wakakambɛ Jehowa la kɔlamelo la ntondo ka mfɔnu kakɔ ntatɛ. Takɛdikaka anto asɔ l’ase Juda wakake lo elanyelo ka Jɛrusalɛma lo 607 N.T.D. Anto asɔ wakadjama djembetelo ya mpanda yema tshitshɛ la ntondo nɛ dia vɔ wakatɛmɔlaka Jehowa ndo wakahetshaka kɛnɛ kele kɔlɔ. (Ɛzk. 5:11; 9:4) Koko, wɛdikelo ɔsɔ hɔtɔnɛ l’ɛtɛkɛta wa Yeso watanema lo Mateo 24:14, wɛnya di’anto koka nkondja diaaso dia mbetawɔ lokumu l’ɔlɔlɔ polo kaanga ambotshikala yema y’etena tshitshɛ dia Aramangɛdɔna ntatɛ.
L’ɔtɛ wa eokelo ka shikaa ka Mateo 24:14, ekɔ ohomba nsala etshikitanu wa eokelo kaso ka Ɛnyɛlɔ 16:21, lɛnɛ atɛkɛtama dia losango lele oko mbɔkɔ. Elembetshielo ekina wa laadiko mɛnyaka dia avɛsa akɔ ahende wekɔ la lokanyi lakɔ lamɛ. Lo ngande? Kɛnɛ katokimanyiya dia mbeya dui sɔ ele lo woho wɔsa anto losango la Diolelo. Le ‘wanɛ wayoshimbamɛ,’ ɔpɔstɔlɔ Pɔɔlɔ akafunde dia losango lɔsɔ lekɔ oko “opumu wa lɔsɛnɔ.” Koko le atunyi waki Nzambi, losango lɔsɔ lekɔ kɔlɔ oko “nsolo ka nyɔi.” (2 Kɔr. 2:15, 16) Vɔ petshaka losango la Diolelo nɛ dia lɔ tondjaka andja ɔnɛ la kɛnɛ kasalawɔ sɛkɛ, mbuta ate andja ɔnɛ wekɔ l’anto wa kɔlɔ, wekɔ lo nɔmbwama oma le Satana ndo losango lakɔ mɛnyaka dia andja ɔnɛ wayanga ndanyema keema edja.—Jni. 7:7; 1 Jni. 2:17; 5:19.
Tolembete nto dia mvula ka mbɔkɔ kɔtɛkɛtami lo Ɛnyɛlɔ 16:21, kayonga “wolo wa mamba.” Kɛsɔ koka nembetshiya dia l’edja tshɛ ka mfɔnu ka woke, olimu w’esambishelo wayoleka monga la shɛngiya ya wolo, mbuta ate lokombo la Jehowa layeyanyema lo yoho yele lateyanyemaka. (Ɛzk. 39:7) L’ɔkɔngɔ w’elanyelo ka Babilɔna ka Woke, onde anto amɔtshi wayɔsa lokumu l’ɔlɔlɔ la Diolelo oko malashi wa dimɛna? Koka monga ngasɔ. Ondo vɔ mbeyaka ndjohɔ kana ndjeya di’ɛnɔnyi efula la ntondo, Ɛmɛnyi wa Jehowa wakewoyaka dikambo di’ekomelo k’ɛtɛmwɛlɔ wa kashi.
Kɛsɔ mbɔtɔnɛka la kɛnɛ kakatombe l’Edjibito w’edjedja l’ɔkɔngɔ w’Asui Dikumi. L’ɔkɔngɔ wa Jehowa “[mbela] dilanya le tozambizambi tshɛ ta l’Edjibito,” “anto akina efula” waki komonga ase Isariyɛlɛ wakasɔhana la wodja ande. (Eto. 12:12, 37, 38) Mɛnamaka diele oko anto asɔ wakayongaka kaamɛ l’ekambi wa Jehowa etena kakawɛnyi woho wakatakotshamaka ɛtɛkɛta wa Mɔsɛ wendana l’Asui Dikumi.
Onto tshɛ layɔsa yɛdikɔ ya mbeta lo wedi wa Jehowa l’ɔkɔngɔ w’elanyelo ka Babilɔna ka Woke, ayonga la diɛsɛ dia nsukɛ anango Kristo wayonga l’etena kɛsɔ la lɔsɛnɔ lanɛ la nkɛtɛ. (Mat. 25:34-36, 40) Lo mɛtɛ, diɛsɛ dia mbɔsama oko ɛkɔkɔ diayokomɛ yema tshitshɛ la ntondo ka Aramangɛdɔna ntatɛ, etena kayolongola atshikadi w’akitami difuto diawɔ dia l’olongo.
Eokelo kɛnɛ mbikaka epole ɔsɛkɛ lo woke woke wa ngandji ndo kɛtshi ka Jehowa. Lo mɛtɛ, Jehowa “halange kaanga onto 1 ndanyema koko nde nangaka dia anto tshɛ nkondja diaaso dia ndjatshumoya.”—2 Pe. 3:9