Bahebera

10 Molao wa ga Moshe o tshwana le moriti+ wa dilo tse dintle tse di tla tlang,+ mme one ga se dilo tseo tse dintle e bile Molao* oo ga o ka ke wa dira gore ba ba obamelang Modimo ba se ka ba nna le boleo ka gonne ba ntsha ditlhabelo tse di tshwanang ngwaga le ngwaga.+ 2 Go seng jalo, a ditlhabelo di ne di tla tswelela di ntshiwa? Ka gonne fa ba ba dirang tirelo e e boitshepo ba dirilwe phepa ba ne ba ka se tlhole ba ikutlwa ba le molato. 3 Le fa go ntse jalo, ditlhabelo tseno di dira gore ngwaga le ngwaga batho ba gakologelwe gore ba a leofa,+ 4 ka gonne madi a dipoo le a dipodi a ka se tlose maleo.

5 Ka jalo, fa a tla mo lefatsheng o ne a raya Modimo a re: “‘O ne o sa batle setlhabelo le mpho, mme o ne wa mpaakanyetsa mmele. 6 O ne wa se ka wa amogela ditlhabelo tse di fisiwang di feletse le ditlhabelo tsa boleo.’+ 7 Foo ke ne ka re: ‘Ke tlile (mo momenong* go kwadilwe ka nna) go dira thato ya gago, Modimo wa me.’”+ 8 Fa a sena go bua a re: “O ne o sa batle ditlhabelo tsa diphologolo le dimpho le ditlhabelo tse di fisiwang di feletse le ditlhabelo tsa boleo e bile o ne wa se ka wa di amogela,” e leng ditlhabelo tse Molao wa ga Moshe o laelang gore di ntshiwe, 9 go tswa foo o ne a re: “Ke tlile go dira thato ya gago.”+ O* tlosa thulaganyo ya bogologolo gore a tlhome e ntšha. 10 Go ya ka “thato”+ eno ya Modimo re dirilwe boitshepo ka setlhabelo sa mmele wa ga Jesu Keresete gangwe fela.+

11 Gape, letsatsi le letsatsi moperesiti mongwe le mongwe o a ema gore a dire tirelo e e boitshepo+ a bo a ntsha ditlhabelo tse di tshwanang gangwe le gape,+ mme ga di kgone go tlosa maleo gotlhelele.+ 12 Mme monna yono o ne a isa setlhabelo se le sengwe a se isetsa maleo a batho a bo a nna ka fa seatleng sa moja sa Modimo,+ 13 go tloga ka nako eo o ne a leta go fitlha baba ba gagwe ba bewa ka fa tlase ga dinao tsa gagwe.+ 14 Gonne ka go ntsha setlhabelo se le sengwe o ne a dira gore ba ba dirwang boitshepo ba itekanele+ ka bosakhutleng. 15 Mo godimo ga moo, moya o o boitshepo le one o re netefaletsa seno, ka go bua o re: 16 “‘Eno ke kgolagano e ke tla e dirang le bone morago ga metlha eo,’ go bua Jehofa.* ‘Ke tla tsenya melao ya me mo dipelong tsa bone, e bile ke tla e kwala mo megopolong ya bone.’”+ 17 Go tswa foo, moya wa re: “Mme ga nkitla ke tlhola ke gakologelwa maleo a bone le ditiro tsa bone tse di bosula.”+ 18 Jaanong fa Modimo a itshwarela maleo ao, ga go tlhole go tlhokega setlhabelo sa boleo.

19 Ka jalo bakaulengwe, e re ka madi a ga Jesu a dira gore re nne le bopelokgale jwa go dirisa tsela e e tsenang mo lefelong le le boitshepo,+ 20 e a neng a re e bulela e le tsela e ntšha* e e isang kwa botshelong ka go feta mo sesirong+ se se tshwantshetsang mmele wa gagwe, 21 e bile e re ka re na le moperesiti yo mogolo mo ntlong ya Modimo,+ 22 a re atameleng Modimo ka dipelo tsa rona tsotlhe le ka tumelo e e feletseng, ka gonne dipelo tsa rona le digakolodi tsa rona tse di bosula di dirilwe phepa+ e bile mebele ya rona e tlhapisitswe ka metsi a a phepa.+ 23 A re tsweleleng re bolelela batho botlhe tsholofelo e re nang le yone re sa ineele,+ ka gonne yo o solofeditseng dilo tseno o a ikanyega. 24 E bile a re akanyetsaneng* gore re tle re tlhotlheletsane go nna le lorato le go dira ditiro tse di molemo.+ 25 A re se ka ra tlogela go phuthega mmogo,+ jaaka bangwe ba tlwaetse go dira, go na le moo, a re kgothatsaneng,+ mme re dire jalo le go feta e re ka re bona letsatsi la Modimo le atamela.+

26 Gonne fa re dira boleo ka boomo re sena go amogela kitso ya boammaaruri,+ ga go tlhole go na le setlhabelo sepe se sengwe se se ka ntshediwang maleo a rona,+ 27 mme go na le katlholo e e boifisang e e tlang le bogale jo bo tukang jo bo tla lailang ba ba ganetsang Modimo.+ 28 Ope fela yo o itlhokomolositseng Molao wa ga Moshe o bolawa a sa tlhomogelwe pelo ka bosupi jwa batho ba le babedi kgotsa ba le bararo.+ 29 Lo akanya eng? Motho yo o gatakileng Morwa Modimo le yo o nyaditseng boleng jwa madi a kgolagano+ a a ileng a dirwa boitshepo ka one, le yo o tlhapaditseng moya wa Modimo wa bopelonomi jo bogolo,* a ene ga a kitla a tshwanelwa ke go otlhaiwa botlhoko?+ 30 Gonne re itse yo o neng a re: “Ke tla busolosa; ke tla duela.” Mme gape o ne a re: “Jehofa* o tla atlhola batho ba gagwe.”+ 31 Ke selo se se boifisang go wela mo diatleng tsa Modimo yo o tshelang.

32 Le fa go ntse jalo, nnang lo gakologelwa malatsi a pele, a e rileng lo sena go nna le kitso ya boammaaruri,+ lo neng lwa itshokela dilo tse dintsi le fa lo ne lo boga. 33 Ka dinako dingwe lo ne lo kgobiwa e bile lo bogisiwa fa pele ga batho,* mme ka dinako dingwe lo ne lo thusa* ba ba neng ba diragalelwa ke dilo tse di ntseng jalo. 34 Gonne lo ne lwa utlwela ba ba mo kgolegelong botlhoko e bile lo ne lwa tswelela lo itumetse le fa dilo tsa lona di ne di gapiwa,+ ka gonne lo ne lo itse gore lo na le boswa jo bo botoka le jo bo nnelang ruri.+

35 Ka jalo, tswelelang lo na le bopelokgale* jo lo nang le jone, jo bo tla nnang le maduo a magolo.+ 36 Gonne lo tlhoka boitshoko,+ gore fa lo sena go dira thato ya Modimo, lo tle lo amogele se a se solofeditseng. 37 Gonne go setse “nako e khutshwane thata,”+ e bile “yo o tlang o tla goroga mme ga a kitla a diega.”+ 38 “Mme motlhanka wa me yo o siameng o tla tshela ka ntlha ya tumelo ya gagwe,”+ mme “fa a kata ka morago ga ke mo itumelele.”+ 39 Jaanong ga re mofuta o o katang ka morago go ya go senngwa,+ mme re mofuta o o nang le tumelo gore re kgone go boloka matshelo* a rona.