Bahebera

13 Tswelelang lo ratana jaaka bana ba motho ba ratana.+ 2 Lo se ka lwa lebala go amogela baeng,*+ ka gonne bangwe ka go dira jalo ba ne ba amogela baengele ba sa itse.+ 3 Nnang lo akantse ka ba ba kwa dikgolegelong*+ jaaka e kete lo tshwerwe le bone,+ le ba ba bogisiwang, ka gonne le lona lo tshela mo lefatsheng.* 4 A batho botlhe ba tlotle lenyalo, e bile monna le mosadi ba ba nyalaneng ba tshwanetse go tshelela maikano a ba a dirileng,+ ka gonne Modimo o tla atlhola batho ba ba dirang boitsholo jo bo sa siamang jwa tlhakanelodikobo* le batho ba ba dirang boaka.+ 5 Lo se ka lwa rata madi,+ go na le moo, kgotsofalelang dilo tse lo nang le tsone.*+ Gonne Modimo o rile: “Ga nkitla ke go tlogela, e bile ga nkitla ke go latlha.”+ 6 Ka jalo, a re se kang ra boifa mme re re: “Jehofa* ke mothusi wa me; ga nkitla ke boifa. Motho a ka ntira eng?”+

7 Gakologelwang ba ba lo etelelang pele,+ ba ba lo boleletseng lefoko la Modimo, mme fa lo ntse lo bona melemo ya tsela e ba itshwarang ka yone, lo etse tumelo ya bone.+

8 Jesu Keresete e sa ntse e le ene go tloga maabane, go tla go fitlha gompieno le ka bosakhutleng.

9 Lo se ka lwa faposiwa ke dithuto tse di farologaneng le tse di sa tlwaelegang, ka gonne bopelonomi jo bogolo* ke jone jo bo tla lo nonotshang* e seng dijo,* ka gonne ba ba amegileng ka dijo ga di ba tswele mosola.+

10 Re na le sebeso se ba ba dirang tirelo e e boitshepo kwa motlaaganeng* ba se nang taolo ya go ja mo go sone.+ 11 Gonne ditoto tsa diphologolo tse moperesiti yo mogolo a isang madi a tsone e le setlhabelo sa boleo mo lefelong le le boitshepo, di jewa ka molelo kwa ntle ga kampa.+ 12 Ka jalo, Jesu le ene o ne a bogisediwa ka kwa ntle ga kgoro ya motse,+ gore a dire batho boitshepo ka madi a gagwe.+ 13 Ka jalo, a re yeng kwa go ene kwa ntle ga kampa, mme re kgobiwe fela jaaka a ne a kgobiwa,+ 14 ka gonne mono ga re na motse o o nnelang ruri, mme ka tlhoafalo re letetse o o tla agiwang mo nakong e e tlang.+ 15 A ka metlha re bakeng Modimo ka Jesu, ka gonne seno se tshwana le setlhabelo se re se ntshetsang Modimo.+ Re dirise melomo ya rona go bolelela ba bangwe leina la gagwe phatlalatsa.+ 16 Gape lo se ka lwa lebala go dira se se molemo le go abela ba bangwe dilo tse lo nang le tsone,+ ka gonne go dira jalo go tshwana le go ntsha ditlhabelo mme seo se itumedisa Modimo.+

17 Utlwang ba ba lo etelelang pele+ mme lo ba ikobele,+ ka gonne ba lo tlhokometse e bile Modimo o tla ba atlhola go ya ka ditiro tsa bone.+ Fa lo dira jalo, ba tla dira tiro ya bone ka boitumelo mme e seng ka kutlobotlhoko, gore seno se se ka sa lo gobatsa.

18 Nnang lo re rapelela, ka gonne re dumela gore re na le segakolodi se se ikanyegang,* e bile re eletsa go ikanyega mo dilong tsotlhe.+ 19 Mme segolobogolo ke lo rotloetsa gore lo rapelele gore ke tle ke boele kwa go lona ka bonako.

20 Jaanong e kete Modimo wa kagiso, yo o tsositseng modisa yo mogolo+ wa dinku mo baswing, e bong Morena wa rona Jesu, ka madi a kgolagano ya bosakhutleng, 21 a ka lo naya sengwe le sengwe se se molemo gore lo dire thato ya gagwe. E bile e kete a ka re tlhotlheletsa go dira se se mo itumedisang a dirisa Jesu Keresete. A a galalediwe ka bosakhutleng le go ya go ile. Amen.

22 Jaanong bakaulengwe, ke lo rotloetsa gore lo reetse lefoko leno la kgothatso ka bopelotelele, ka gonne ke lo kwaletse lekwalo le lekhutshwane. 23 Ke lo itsise gore mokaulengwe wa rona Timotheo o golotswe. Fa a ka tla ka bonako, ke tla tla le ene fa ke tla go lo bona.

24 Ntumedisetseng botlhe ba ba lo etelelang pele le badumedimmogo le rona. Bakaulengwe ba kwa Itali+ ba a lo dumedisa.

25 A bopelonomi jo bogolo jwa Modimo bo nne le lona.