Kgaolo 16
Tlhopho e e Tlhomamisang Botshelo mo Kagisong ya Boammaaruri le Polokesego
1. Fa re dira tlhopho e e siameng, ke kagiso efe le tsholofelo tse e ka nnang tsa rona jaanong?
A NAMANE e tona ya boipelo go nna le boikaelelo jwa nnete mo botshelong, go itse ko o yang teng! Mme ebile abo o nna le kagiso ya mogopolo le pelo ka ntlha ya go tlhomamisa gore ga go na tsela e nngwe e e botoka eo o ka e tsayang! Kagiso e e ntseng jalo le tsholofelo di ka nna tsa gago, mme fela fa o dira tlhopho e e siameng gone jaanong.
2. Go itse ga rona Jehofa le maikaelelo a gagwe go tla re thusa jang malebana le tebo yotlhe ya rona ya botshelo?
2 Bosupi jotlhe bo bontsha gore ga re ka ke ra leba go lefatshe le jaaka motswedi wa kagiso ya boammaaruri le polokesego. Ditsamaiso tsa papadi, tsa bodumedi, le tsa bopolotiki, go akareletsa le Merafe e e Kopaneng ka go bolela ga yone ‘kagiso le polokesego,’ ga di ka ke tsa e tlisa. Ka jalo, Bibela e re kaela go Jehofa Modimo jaaka Motswedi o le mongwe fela wa kagiso ya boammaaruri le polokesego. Go itse ka ene le maikaelelo a gagwe go re thusa go tlhaloganya gore ke eng fa re le mono lefatsheng le gore ke eng fa dilo di ntse jaaka di ntse gompieno. Re ithuta ka kganetsano e kgolo e e kopanyeletsang bolaodi jwa lobopo lotlhe jwa ga Jehofa, le kafa e amang mongwe le mongwe wa rona ka gone. Re ithuta go lekanya tshiamo le botlhale jwa mekgele ya rona, mme re bona ditekanyetso tse di boikanngo tsa boitsholo tseo re ka tshelang ka tsone. Fa re lebane le bolwetsi, botsofe, kana loso, re na le tsholofelo e e gomotsang ya botshelo mo thulaganyong e ntšha ya tshiamo, e e itekanetseng, le e leng ka go tsosiwa mo baswing, fa go tlhokafala jalo.
3. Ke eng fa Jehofa e le ene yo re tshwanetseng go baya ditsholofelo tsotlhe tsa rona go ene?
3 Ga go gakgamatse, he, go bo Isaia 26:4 e kgothatsa: “Ikanyeñ mo go Yehofa ka bosakhutleñ; gonne mo go MORÈNA YEHOFA go na le lehika ya bosaeeñkae.” A sa fetoge, a le mothatayotlhe, mme ebile a se na bokhutlo, Jehofa eleruri ke ene yo re ka bayang ditsholofelo tsotlhe tsa rona go ene. A o batla go ipelela tsamaiso ya gagwe le tshireletso e seng fela mo nakong ya jaanong mme eleng le mo nakong ya isagwe mo Thulaganyong ya gagwe e Ntšha e e solofeditsweng? Fa go ntse jalo, o tlamegile go dirang?
4. Go bona kamogelo ya ga Jehofa, re tlhokang, mme ke eng se se dirang gore e nne gone?
4 Setho sotlhe se ikgogonne mo Modimong ntateng ya boleo jwa batsadi ba rona ba ntlha. Mme Modimo o butse tsela ya go letlana le ene le go nna le botsalano ka setlhabelo sa Morwawe. (2 Bakorintha 5:19-21; Baefesia 2:12, 13) Lefa go le jalo, ga go a lekana ka rona jaanong go bolela fela gore re batla botsalano jwa Modimo.
5. Tlhotlheletso ya rona e tshwanetse go nna efe mo go batleng botsalano jwa ga Jehofa?
5 Re tshwanetse go rata, e sita le go tlhoafalela, go mo supela gore re batla se, mme re se batla ka tlhotlheletso e e tshwanetseng. Ka sekai, a re batla botsalano jwa ga Jehofa fela e le gore re falole kudumedi e e rileng? Fa e le gore re tla bona boemo jo bo siameng mo Modimong, ga e ka ke ya nna fela mo lobakeng lono lo lo potlakileng pele ga katlholo ya gagwe kana go falola fela “sepitla se segolo” se se tlang. (Mathaio 24:21, 22) E tshwanetse go nna jwa nako yotlhe e e tlang. Ke lorato lo lo phepa fela lo lo tla re neelang tlhotlheletso e. E le gore re bontshe bonnete jwa keletso ya rona go nna tsala le ene, Jehofa o beile mo Lefokong la gagwe dilo tse di rileng tse mongwe le mongwe a tshwanetseng go di dira go bona tetlanyo le ene.
Tumelo e e Tshelang
6. Go kgatlha Modimo, re tlamegile go nna le tsholofelo efe malebana le one?
6 Jehofa ke Modimo wa boammaaruri. Jalo re ka nna le tsholofelo e e tletseng mo ditsholofetsong tsa gagwe. Tota, “kwa ntlè ga tumèlō go reteletse rure go o kgatlha: gonne eo o tlañ Modimoñ o na le go dumèla ha o leeō, e bile e le ōna moduedi oa ba ba o batlañ.” (Bahebera 11:6) Fa o na le tumelo e e ntseng jalo, he o itse gore sengwe le sengwe se Modimo o se dirang se na le boikaelelo jwa tshiamo le gore ka metlha yotlhe o batla go re direla molemo. Go tswa ditirong tsa ona tsa popo le mo Lefokong la ona le le kwadilweng, o ka bona gore ga se wa botlhale jotlhe fela le nonofo yotlhe mme gape ke Modimo wa bopelonomi jo bo lorato. Ka sebele, ga a kake a huralela ditekanyetso tsa gagwe tsa tshiamo. Mme, lefa ebile re sa itekanela le go dira diphoso, fa re rata tshiamo, o na le tsela eo a dirisanyang le rona ka yone eo e tla felelang ka masego.
7. Tsholofelo mo tshiamong ya ga Jehofa le botlhale e tla re sireletsa jang?
7 Ka gone, fa re amogela tshiamiso go tswa Modimong, re tla itse gore ke ya molemo wa rona wa go ya go ile. Re tla ikanya Jehofa jaaka morwa kana morwadi yo o ikanyang rre yo o lorato, yo o botlhale, le yo o nonofileng. (Pesalema 103:13, 14; Diane 3:11, 12) Re na le tumelo e e ntseng jalo, ga re kitla re belaela botlhale jwa kgakololo ya gagwe kana ditsela tsa gagwe tse di tshiamo, lemororo e ka re ka nakwana ra bo re ise re tlhaloganye gotlhelele dilo tse di rileng. Ka gone re ipaya go bao mopesalema a ba tlhalosang fa a re: “Ba ba ratañ molaō oa gago ba na le kagishō e kgolo; me ga ba na go kgopiwa gopè.”—Pesalema 119:165; Diane 3:5-8.
8. (a) Ke eng fa tumelo e le yosi fela e sa lekana? (b) Tumelo e tshwanetse go re suteletsa kgatong efe e e umakilweng go Ditihō 3:19?
8 Mme “tumèlō ha e tlhalanyè le ditihō e shule,” go bolela jalo Yakobe 2:26. Tumelo ya mmatota e tlhotlheletsa motho go tsaya kgato. Mme e nngwe ya dilo tsa ntlha tse e tlhotlheletsang motho go di dira ke seo moaposetoloi Petere a neng a se kgothaletsa: “Ikwatlhaeeñ, lo shokologè, gore dibe tsa lona di phimolwè, gore go tlo go tlè metlha ea thudishō yalo, e e cwañ ha pele ga Morèna [Jehofa].” (Ditihō 3:19) Seno se rayang?
Go Ikwatlhaya le go Sokologa
9. (a) Boikwatlhao jwa boammaaruri ke eng? (b) Re tshwanetse go ikwatlhaela eng?
9 Mo Bibeleng, boikwatlhao bo kaya phetogo ya mogopolo e patilwe ke go swabela tsela ya botshelo ya pele kana ditiro tse di dirilweng tse di phoso. (2 Bakorintha 7:9-11) Mme fa e le gore re tla ipelela “metlha ea thudishō” go tswa Modimong, ga re ka ke ra ikwatlhaela fela ditiro tse di phoso tsa nako e e fetileng. Go na le moo, re tshwanetse ra bontsha boikwatlhao ka jaana re lemoga gore, jaaka lotsalo lwa ga Adame, tlholego ya rona ke ya boleo. Jaaka moaposetoloi Johane a ile a tlhalosa: “Ha re re, ga re na boleo bopè, rea itsietsa, . . . rea o [Modimo] akisa, le lehoko ya ōna ga leeō mo go rona.” (1 Yohane 1:8, 10) Re tshwanetse ka tshwanelo ra emela Mmopi wa rona sentle, re supa ‘tshwano ya ona le setshwantsho.’ Lefa go le jalo boleo jo bo ruilweng bo re kganela go dira se ka tsela e e itekanetseng. Ka jalo, re ‘hosa letshwao,’ e leng se lefoko “boleo” le se rayang mo Bibeleng.—Genesise 1:26; Baroma 3:23.
10, 11. (a) Re molato wa botshelo go mang, mme ka ntlha yang? (b) Jalo, re tshwanetse ra bo re dirisa jang matshelo a rona?
10 Jalo re tlhoka boitshwarelo jwa Modimo. (Mathaio 6:12) Re lemoga gore re kolota botshelo jwa rona go ona jaaka Mmopi wa rona. Mme jaanong gape re ithuta gore ka setlhabelo sa Morwa Modimo, setho gape se ne sa ‘rekwa ka tlhotlhwa’ ya molemo o mogolo. Jalo ga re a tshwanela go nna “batlhanka ba batho,” le eleng ba dikeletso tsa rona tsa bogagapa. (1 Bakorintha 7:23) Lefa go le jalo, pele ga go ithuta le go amogela boammaaruri, a rotlhe re ne re sa nna jalo?—Yohane 8:31-34.
11 Mo pelong ya gago, a o anaanela mpho ya Modimo ya Morwawe le seo a se dirileng ka Keresete mo go buleng tsela ya go falola mo bokgobeng jwa boleo le loso? He ruri o tla ikwatlhaela tota tlholego efe le efe ya nako e e fetileng go dirisa botshelo jwa gago mo kutlong ya Mmopi wa gago. Seno se tla go suteletsa boikwatlhaong jwa boikutlo jwa pelo ka ntlha ya go latela tsela ya botshelo e e tshwanang le eo ya lefatshe, e e sa dumalaneng le thato ya Modimo le maikaelelo.—Ditihō 17:28, 30; Tshenolō 4:11.
12. Motho yo o ikwatlhaileng o bontsha jang gore ruri o latlhile tsela ya gagwe ya pele?
12 Boikwatlhao jono jwa boammaaruri bo isa go ‘sokologeng,’ eleng seo lefoko “tshokologo” le se rayang. Motho yo o ikwatlhayang ka nnete ga a ikwatlhaele fela tiriso e e seng yone ya nako e e fetileng ya botshelo jwa gagwe. O latlha tsela e e phoso eo mme tota a ila ditsela tsa gagwe tse di phoso. O bontsha seno ka go ‘sokologa’ mme a dira “ditihō tse di chwanetseñ boikwatlhaō,” a dumalanya botshelo jwa gagwe le thato ya Modimo.—Ditihō 26:20; Baroma 6:11.
13. (a) Tlhaloso ya polelo ya ga Jesu gore ba ba batlang go mo latela ba tlamegile ‘go iitatola’ ke eng? (b) Ka gone re ineela ka botlalo go Jehofa ka lebaka lefe, mme go ama jang matshelo a rona?
13 Bontlha bongwe jwa go ikotlhaya le go sokologa bo akareletsa se Jesu a se biditseng ‘go iitatola.’ (Mathaio 16:24) Ke gore, ga re sa tlhole re tshela go ya fela kafa dikeletsong tsa rona tsa bogagapa re sa amege ka gope ka thato ya Modimo le maikaelelo. Mo boemong jwa moo, re lemoga gore Jehofa Modimo tota o na le tshwanelo e e tletseng mo matshelong a rona jaaka Mmopi wa rona le Moreki wa rona ka thekololo ya setlhabelo sa ga Morwawe. Jaaka Bibela e tlhalosa, ga ‘re ba rona, gonne re rekilwe ka tlhotlhwa.’ (1 Bakorintha 6:19, 20) Jalo, mo boemong jwa go sa dirise kafa tshwanelong kgololesego e kgolo e boammaaruri bo e re buletseng, re ineela ka botlalo go dira thato ya Modimo. (Bagalatia 5:13; 1 Petere 2:16) Mme re dira se e seng fela ka go bo se tshwanetse mme e le ka go bo re rata Jehofa Modimo ka ‘peloyotlhe ya rona, moya, mogopolo, le thata.’ (Mareko 12:29, 30) Ruri seno se biletsa gore mongwe le mongwe wa rona a tshele botshelo jwa boineelo go Modimo. Mo boemong jwa go nna mokgweleo, tsela eno e re kgonisa go ipelela botshelo go feta le eleng pele.—Mathaio 11:28-30.
Go Dira Polelo ya Phatlalatsa go Isa Polokong
14. (a) Fa motho a dumela gore ke wa ga Jehofa, a ka dira jang tlhaloso ya se mo Modimong? (b) O tshwanetse go eletsa go dira eng gape, jaaka go supilwe go Baroma 10:10?
14 Ke selo se sentle go tlhalosa mo thapelong tumelo ya rona mo dipaakanyetsong tsa Modimo, re dumela gore re ba gagwe. Mme re sa ntse re ka dira mo go oketsegileng go tswelela re bontsha tumelo ya rona mme re tshwanetse ra batla go go dira, jaaka Baroma 10:10 e re bolelela: “Motho o dumèla ka pelo go isa tshiamoñ; me boipolèlō bo dihwa ka molomo go isa polokoñ.” Boipolelo jono jwa ‘phatlalatsa’ jwa tumelo ya motho mo go Jehofa le mo dipaakanyetsong tsa gagwe bo tshwanetse jwa tswa ka boitumelo fela mo pelong ya motho e e tletseng ka kanaanelo. Go dira boipolelo jono go kopanyeletsa go ineela botshelo jwa rona go Jehofa le go dira thato ya gagwe re bo re supa seo ka kolobetso ya metsing.
15. Ke eng fa re tshwanetse go akanya ka tlhonamo kaga kolobetso ya metsing?
15 Fa Jesu Keresete a ne a simolola bodihedi jwa gagwe jwa phatlalatsa, o ne a ya go Johane Mokolobetsi gore a mo nwetse mo metsing. Bibela e bega gore Jesu o ne a re go Modimo: “Ke tsile go diha go rata ga gago.” (Bahebera 10:9; Pesalema 40:7, 8) Jesu o ne a laela gore botlhe ba ba nnang barutwa ba gagwe le bone ba tshwanetse go kolobediwa. A o morutwa yo o ntseng jalo? He kolobetso ya gago ya metsing e tla bo e le ‘boipolelo jwa phatlalatsa’ jwa seno.—Mathaio 28:19, 20.
16. (a) O ka tlhomamisa jang gore a e ka ne o ipaakanyeditse go kolobediwa? (b) Balebedi ba thusa batho jang go ipaakanyetsa kolobetso?
16 Ke tshiamelo e kgolo go fetoga mosupi yo o ineetseng, yo o kolobeditsweng wa ga Jehofa, Molaodi wa lobopo lotlhe. Jaanong tlhatlhoba gore se se kopanyeletsang: Jehofa ka lorato o go buletse tsela go re o bone botsala jwa gagwe. Mme go bo bona, o tshwanetse go nna le tumelo, o dumela tota gore Bibela ke Lefoko le le tlhotlheleditsweng la Modimo. (2 Timotheo 3:16, 17) O tshwanetse gape wa bontsha tumelo mo setlhabelong sa thekololo sa ga Jesu jaaka tsela fela eo o ka bonang kemo e e amogelesegang le Modimo. (Ditihō 4:12) O tshwanetse go lemoga kafa o ikaegileng ka gone mo go Jehofa le go neela botshelo jwa gago go ene go dira thato ya gagwe, e seng fela ka dingwaga di sekaenyana, mme ka bosakhutleng. Tsela e e ntseng jalo e kopanyeletsa go sa nne ‘karolo ya lefatshe.’ (Yohane 17:16; 1 Yohane 2:15) Jaaka bosupi jwa gore o ikotlhaile le go ‘sokologa,’ o tlamegile wa bo o setse o latlhile ditlwaelo tse di fapaaneng le ditekanyetso tsa tshiamo tsa Modimo mme wa bo o dira se Modimo a se laetseng. A o setse o fetotse mogopolo wa gago mme jaanong o leba botshelo ka tsela e? (Baroma 12:1, 2) He, Bibela e go kgothaletsa gore o dire ‘polelo ya phatlalatsa’ ya tumelo e e ntseng jalo. Kgato ya ntlha e tla bo e le go atamela mongwe wa balebedi ba phuthego ya Basupi ba ga Jehofa mo lefelong la gaeno mme o mo ipolelele kafa o ikutlwang ka teng. O tla rulaganyetsa go tlhatlhoba le wena dithuto tsa motheo tsa Bibela mo boipaakanyetsong jwa kolobetso.
17. O dirisa Bibela, bontsha ka moo re tlamegileng go tswelela re dira ‘polelo ya phatlalatsa ya tumelo ya rona.’
17 Kgato ya kolobetso ga e ne e tshwaya go khutla go dira ga gago ‘polelo ya phatlalatsa ya tumelo ya gago.’ Jaaka Mokeresete yo o ineetseng go Jehofa Modimo, o tla batla go bolela tsholofelo ya gago ka go itshupa mo kokoanong ya phatlalatsa, o mo “ntshetsa malebogō mo phuthegoñ e kgolo.” (Pesalema 35:18; 40:9, 10) O tla batla gape go arola mo tirong e e kgethegileng ya ‘polelo ya phatlalatsa’ eo Jehofa a e abelang botlhe ba ba tla mo direlang—go rera mafoko a a molemo a Bogosi mo lefatsheng lotlhe le go dira barutwa mo merafeng yotlhe.—Mathaio 24:14; 28:19.
Go Tlhagolela Kamano ya Gago Le Modimo
18. Thuto ya botho e botlhokwa jang mo go tlhomamiseng gore kamano ya motho le Jehofa e tla tlhomama?
18 Jaanong, he, o ka tlhomamisa jang gore, fa e setse e bonwe, kamano ya gago le Jehofa e tla nna ya go ya go ile ka bosaengkae ka boipelo jwa kagiso le polokesego? Selo se sengwe ke gore o tla batla go tswelela o ntse o gola mo kitsong ka ene. Ka thuto ya botho o tla bona boipelo jwa mmatota mo go bapaleng mahumo a botlhale ao a bolokilweng mo Lefokong la Modimo. O ka tshwana le motho yo Pesalema 1:2, 3 e mo tlhalosang: “Go itumèla ga gagwè go mo molaoñ oa ga Yehofa; me o akanya mo molaoñ oa gagwè motshegare le bosigo. Me o tla nna yaka setlhare se se tlhomilweñ mo dinokaneñ tsa metse, se se uñwañ louñō loa shōna mo motlheñ oa shōna, se lekakaba ya shōna, le yeōna, le se keñ le shwaba; me leha e le eñ se o se dihañ se tla segōhala.” Ee, go bapala kitso ya Modimo, le go e dirisa, go tla go kgonisa gore o sepele ka “ditsela tsa monate” le mo ‘ditselaneng tsa kagiso,’ ka go bo e tla go neela botlhale jwa go lebana le mathata otlhe a botshelo. (Diane 3:13, 17, 18) Go nyorelwa kitso eo ya Bibela gone jaanong go tla bontsha gore o tshwanelegela botshelo mo Thulaganyong e Ntšha ya Modimo ka go bo “lehatshe le tla bo le tletse kicō ea go itse Yehofa, yaka metse a khurumeditse lewatlè.”—Isaia 11:9.
19. Ke eng fa go nna gone ka metlha mo dipokanong e le tlhokafalo mo botshelong jwa batho ba ga Jehofa?
19 Se sengwe gape se o se tlhokang tota ke go nna gone ka metlha le ba bangwe ba e leng batlhanka ba ga Jehofa mo dipokanong. Koo o tla bona tlhotlheletso ya nnete loratong le ditirong tse di molemo, kgothatso go tswelela o bolokile kamano ya gago e e siameng le Modimo. (Bahebera 10:23-25) Bokopano jo bo itumedisang, jo bo tshwanang le jwa lelapa jwa batlhanka ba ga Jehofa bo neela bosupi jo bo nonofileng jwa gore kagiso le polokesego tse di solofeditsweng Thulaganyong e Ntšha ya Modimo ke nnete.—Pesalema 133:1; 1 Bakorintha 14:26, 33.
20. Ke jang bagolwane mo phuthegong ba ka re thusang mo dinakong tsa kganetso le mo bothateng jwa botho?
20 Mo phuthegong o ka ikamogelela molemo mo paakanyetsong e nngwe e e lorato. Jesu, ebong ‘Modisa yo o Molemo,’ o na le ‘badisa ba babotlana’ mo lefatsheng. Bano ke balebedi, kana banna bagolo ba semoya, ba ba babalelang “dinku” tsa gagwe. Ke lebaka le le maatla mo go godiseng kagiso le polokesego gareng ga batho ba ba phuthegileng ba Modimo go kgabaganya lefatshe. (1 Petere 5:2, 3) Banna ba ba “nna yaka boipotelecō mo phehoñ, le boitekelecō mo ledimoñ; yaka dinoka tsa metse mo sekakeñ, yaka moruti oa lehika ye legolo mo nageñ e e lapisañ.” (Isaia 32:1, 2) Ee, mo dinakong tsa setsuatsue sa mathata le kgatelelo ntateng ya kganetso ya lefatshe kana mathata a botho, ka tumelo ya bone e e tshwanang le lefika le ngaparelo ya bone e e nitameng mo Lefokong la Modimo, banna bagolo ba ba semoya ba ka neelana ka tshegetso ya nnete. Ba ka go neela kgakololo e e lapolosang le kgothatso.
21. Ke eng se se ka re kganelang mo go letleng ditlhaelo tsa ba bangwe go senya kamano ya rona le Jehofa?
21 Ke boammaaruri gore ditlhaelo tsa botho di tla itlhagisa, e sita le gareng ga batlhanka ba Modimo. Rotlhe re dira diphoso ka metlha. (Yakobe 3:2) Mme a re tla itetla go kgotšwa ke ditlhaelo tsa ba bangwe mme re letle seno go senya kamano ya rona le Jehofa? Ereka le rona re fosa, a ga re a tshwanela go bontsha ba bangwe kutlwelo botlhoko e e tshwanang le boitshwarelo tse re ipatlelang tsone? (Mathaio 6:14, 15) Fa re tla itshupa re le babusiwa ba ba tshwanelang ba botshelo mo Thulaganyong e Ntšha ya kagiso ya Modimo, jaanong re tlamegile go bontsha kgono ya rona go dirisana le ba bangwe mo kagisong. Ga re ka ke ra rata Modimo kwantle ga go rata bakaulengwe ba rona ba semoya le bokgaitsadi bao Keresete a ba swetseng.—1 Yohane 4:20, 21.
22. Thapelo e tshwanetse go nna le sebaka sefe mo matshelong a rona?
22 Kamano ya gago e e siameng le Modimo e go neela tshiamelo e nngwe e kgolo: katamelo mo Modimong ka thapelo le tlhomamiso gore o a go utlwa. Somarela tshiamelo eo ka kelotlhoko mme o e dirise ka metlha yotlhe, go phololetsa letsatsi. Mathata a tla tsoga. Gongwe ditlhaelo tsa gago di tla go tshwenya. Lefa go le jalo Bibela e ya gakolola: “Lo se ka loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō. Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.”—Bafilipi 4:6, 7.
23. Fa re lebane le diteko le go bogisediwa tumelo ya rona, ke eng se se tla re thusang go itshoka?
23 Ka go tlhopha go direla Jehofa, Motswedi wa boammaaruri wa kagiso le polokesego, le go baya tsholofelo ya gago mo Thulaganyong e Ntšha ya ona, o tla bo o dirile tshimologo e e siameng. Jaanong, jaaka Bibela e tlhalosa, “lo chwanetse go dihana le bopelotelele, gore e tle e re lo sena go diha go rata ga Modimo, lo bo lo amogèlè polèlō ea choloheco.” (Bahebera 10:36) O setse o utlwile masego a kamano e e siameng le Jehofa, ikemisetse go sa e tlogele. Se letle menate e e fetang ya lefatshe go go haposa. Lemororo diteko go tswa lefatsheng la mmaba di nna botlhoko thata, gopola gore le tsone ke tsa nakwana fela. Fa di bapisiwa le masego ao Jehofa a tla a neelang ba ba mo ratang, dipogisego tse di ntseng jalo ga se sepe.—2 Bakorintha 4:16-18.
24. (a) Ke go eng gompieno segolo re nang le lebaka la go ipela? (b) Go tshwana le mopesalema, re tshwanetse go ikutlwa jang ka metlha yotlhe kaga Jehofa le kamano ya rona le ene?
24 Tswelela mo tseleng ya poihomodimo, o na le tsholofelo ya gore ke tsela e e molemo-lemo ya botshelo jaanong mme le gore e tla gogela botshelong jo bosakhutleng mo Thulaganyong e Ntšha ya Modimo. (1 Timotheo 4:8) Ipele mo bosuping jwa bogaufi jwa Thulaganyo e Ntšha eo le kagiso ya go ya go ile le polokesego tseo e tla di tlisang. Jaaka o ntse o agelela kamano ya gago le Jehofa, ekete o ka ikutlwa ka metlha yotlhe jaaka go dirile mopesalema yo o tlhotlheleditsweng, yo o kwadileng a re: “Modimo ke thata ea pelo ea me, le kabèlō ea me ka bosakhutleñ. Gonne, bōna, ba ba leñ kgakala nau ba tla nyèlèla: u sentsè botlhe ba ba gu tlogèlañ ba ea boakeñ. Me mo go nna go molemō go atamèla Modimo: ke dihile Yehofa, Modimo, botshabèlō yoa me, gore ke tlè ke bolèlè kaga ditihō tsa gago cotlhe hèla.”—Pesalema 73:26-28.
[Ditshwantsho mo go tsebe 181]
Go Ipolela Phatlalatsa