Kgaolo Ya Lesomennè

Jehofa o Kaela Phuthego ya Gagwe Jang?

1. Baebele e senola tshedimosetso efe ka ga phuthego ya ga Jehofa, mme ke eng fa e le botlhokwa mo go rona?

A MODIMO o na le phuthego? Dikwalo tse di tlhotlheleditsweng di re bolelela gore o na le yone. Mo Lefokong la gagwe, o re tlhalosetsa go se kae ka karolo e e gakgamatsang ya selegodimo ya phuthego eo. (Esekiele 1:1, 4-14; Daniele 7:9, 10, 13, 14) Le fa re sa kgone go bona karolo eno e e sa bonaleng, e ama baobamedi ba boammaaruri fela thata gompieno. (2 Dikgosi 6:15-17) Phuthego ya ga Jehofa gape e na le karolo e e bonalang, mo lefatsheng. Baebele e re thusa go tlhaloganya gore ke eng le gore Jehofa o e kaela jang.

Go Lemoga Karolo e e Bonalang

2. Modimo o ne a dira gore go nne le phuthego efe e ntšha?

² Setšhaba sa Iseraele e ne e le phuthego ya Modimo ka dingwaga di le 1 545. (Ditiro 7:38) Mme Baiseraele ga ba a ka ba tshegetsa melao ya Modimo e bile ba ne ba gana Morwawe ka namana. Ka ntlha ya seo, Jehofa o ne a gana phuthego eo a ba a e latlha. Jesu o ne a raya Bajuda a re: “Bonang! Ntlo ya lona e tlogeletswe lona.” (Mathaio 23:38) Go tswa foo Modimo o ne a tlhoma phuthego e ntšha, e a neng a dira kgolagano e ntšha le yone. Phuthego eno e ne e tla bopiwa ka batho ba le 144 000 ba ba tlhophilweng ke Modimo ba ba neng ba tla kopana le Morwawe kwa legodimong.—Tshenolo 14:1-4.

3. Go ne ga diragalang ka Pentekosete ya 33 C.E. e le bosupi jo bo bonalang sentle jwa gore jaanong Modimo o ne a dirisa phuthego e ntšha?

³ Maloko a ntlha a phuthego eo e ntšha a ne a tlodiwa ka moya wa ga Jehofa o o boitshepo ka Pentekosete ya 33 C.E. Re bala jaana ka tiragalo eo e e gakgamatsang: “Jaanong fa letsatsi la moletlo wa Pentekosete le ntse le tsweletse ba ne ba le mmogo botlhe mo lefelong le le lengwe fela, mme ka tshoganyetso ga utlwala modumo o o tswang legodimong o tshwana fela le wa phefonyana e e maatla e e tsubutlang, mme wa tlala ka ntlo yotlhe e ba neng ba ntse mo go yone. Mme ba bona diteme tse e keteng tsa molelo mme tsa gasanngwa, e le nngwe ya nna mo go mongwe le mongwe wa bone, botlhe ba tlala moya o o boitshepo.” (Ditiro 2:1-4) Ka gone moya wa Modimo o ne wa naya bosupi jo bo bonalang sentle jwa gore jaanong seno e ne e le sone setlhopha sa batho ba Modimo a neng a tla ba dirisa go diragatsa boikaelelo jwa gagwe se kaelwa ke Jesu Keresete a le kwa legodimong.

4. Gompieno ke bomang ba ba bopang phuthego ya ga Jehofa e e bonalang?

⁴ Gompieno, go na le masalela fela a ba ba 144 000 mo lefatsheng. Mme jaaka boporofeti jwa Baebele bo boletse, “boidiidi jo bogolo” jwa “dinku tse dingwe,” dimilionemilione tsa bone, ba kopantswe le masalela a a tloditsweng. Jesu, Modisa yo o Molemo, o kopantse dinku tse dingwe tseno le masalela gore ba bope letsomane le le lengwe fela le le laolwang ke ene ka gonne e le Modisa wa bone yo o mongwe fela. (Tshenolo 7:9; Johane 10:11, 16) Botlhe bano ba bopa phuthego e le nngwe fela e e utlwanang, phuthego ya ga Jehofa e e bonalang.

Phuthego e e Kaelwang ke Modimo

5. Ke mang yo o kaelang phuthego ya Modimo, mme o dira jalo jang?

⁵ Polelwana e e mo Dikwalong e e reng “phuthego ya Modimo yo o tshelang” e bontsha sentle gore ke mang yo o e kaelang. Phuthego eno e kaelwa ke Modimo kgotsa e busiwa ke ene. Jehofa o kaela batho ba gagwe ka Jesu, ene yo A mo tlhomileng gore a nne Tlhogo e e sa bonaleng ya phuthego, a dirisa Lefoko la Gagwe le le tlhotlheleditsweng, Baebele.—1 Timotheo 3:14, 15; Baefeso 1:22, 23; 2 Timotheo 3:16, 17.

6. (a) Mo lekgolong la ntlha la dingwaga go ne ga bonala jang gore phuthego e kaelwa go tswa kwa legodimong? (b) Ke eng se se bontshang gore Jesu e sa ntse e le Tlhogo ya phuthego?

⁶ Kaelo eo e ne ya bonala sentle ka Pentekosete. (Ditiro 2:14-18, 32, 33) E ne ya bonala fa moengele wa ga Jehofa a ne a kaela gore dikgang tse di molemo di anamisiwe mo Afrika, fa lentswe la ga Jesu le ne le ntsha ditaelo fa Saulo wa Tareso a ne a sokololwa, le fa Petere a ne a simolola tiro ya go rera mo Baditšhabeng. (Ditiro 8:26, 27; 9:3-7; 10:9-16, 19-22) Le fa go ntse jalo, fa nako e ntse e ya, ga go a ka ga tlhola go utlwiwa mantswe a mangwe go tswa kwa legodimong, ga go a ka ga tlhola go bonwa baengele ba bangwe, ga go a ka ga tlhola go ntshiwa dimpho dipe tsa semoya ka kgakgamatso. Le fa go ntse jalo, Jesu o ne a solofeditse jaana: “Bonang! ke na le lona malatsi otlhe go fitlha bokhutlong jwa tsamaiso eno ya dilo.” (Mathaio 28:20; 1 Bakorintha 13:8) Gompieno, Basupi ba ga Jehofa ba amogela kaelo ya ga Jesu. Fa e ka bo e se ka yone ba ka bo ba sa kgone go bolela molaetsa wa Bogosi ba ntse ba tlhoilwe mo go kanakana.

7. (a) Ke bomang ba ba bopang “motlhanka yo o boikanyego le yo o botlhale,” mme ka ntlha yang? (b) “Motlhanka” o ne a newa kabelo efe?

⁷ Nakwana fela pele Jesu a swa, o ne a bolelela barutwa ba gagwe kaga “motlhanka yo o boikanyego le yo o botlhale” yo ene jaaka Mong a neng a tla mo naya boikarabelo jo bo kgethegileng. “Motlhanka” yoo o ne a tla bo a le teng fa Morena a ya legodimong mme o ne a tla bo a sa ntse a dira ka natla fa Keresete a boela mo maatleng a Bogosi a sa bonale. Tlhaloso eo e ka se ka ya bo e bua ka motho a le mongwe fela, mme gone e tshwanela phuthego e e tloditsweng ya ga Keresete. E re ka Jesu a ne a e rekile ka madi a gagwe, o ne a e bitsa “motlhanka” wa gagwe. O ne a roma ba maloko a yone gore ba dire barutwa mme ba ba fepe ka metlha, ba ba naya “dijo tsa bone [tsa semoya] ka nako e e tshwanetseng.”—Mathaio 24:45-47; 28:19; Isaia 43:10; Luke 12:42; 1 Petere 4:10.

8. (a) Setlhopha sa motlhanka jaanong se na le maikarabelo afe? (b) Ke ka ntlha yang fa tsela e re arabelang ka yone kaelo e re e newang ka thulaganyo ya Modimo e le botlhokwa?

⁸ E re ka setlhopha sa motlhanka se ne se dira tiro ya Mong ka boikanyegi fa a ne a boa a sa bonale ka 1914, go na le bosupi jwa gore se ile sa newa maikarabelo a a oketsegileng ka 1919. Dingwaga tsa fa e sa le ka nako eo e ntse e le tsa go naya bosupi ka Bogosi mo lefatsheng lotlhe, mme boidiidi jo bogolo jwa baobamedi ba ga Jehofa bo ntse bo kokoanngwa ka boikaelelo jwa gore bo falole pitlagano e kgolo. (Mathaio 24:14, 21, 22; Tshenolo 7:9, 10) Bano le bone ba tlhoka dijo tsa semoya, mme ba di abelwa ke setlhopha sa motlhanka. Ka gone, gore re itumedise Jehofa re tlhoka go amogela kaelo e a re e nayang ka thulaganyo eno le go dira tumalanong le yone.

9, 10. (a) Mo lekgolong la ntlha la dingwaga, go ne go na le thulaganyo efe ya go rarabolola dikgang tse di malebana le thuto ya motheo le go naya kaelo kaga go rera dikgang tse di molemo? (b) Go na le thulaganyo efe gompieno ya go rulaganya ditiro tsa batho ba ga Jehofa?

⁹ Ka dinako tse dingwe, go tsoga dipotso malebana le thuto ya motheo le tsamaiso. Go tweng he fa go le jalo? Ditiro kgaolo 15 e re bolelela kafa kgang nngwe malebana le basokologi ba Baditšhaba e ileng ya rarabololwa ka teng. Kgang eo e ile ya isiwa kwa baaposetoloing le kwa banneng ba bagolwane kwa Jerusalema, ba ba neng ba direla e le setlhopha se se laolang se se okametseng diphuthego tsotlhe. Banna bao e ne e se batho ba ba se nang diphoso, mme Modimo o ne a ba dirisa. Ba ne ba tlhatlhoba dikwalo tse di buang ka kgang eo le bosupi jwa kafa moya o o boitshepo wa Modimo o neng wa nna le seabe ka teng mo go buleng tshimo ya Baditšhaba. Go tswa foo ba ne ba dira tshwetso. Modimo o ne a segofatsa thulaganyo eo. (Ditiro 15:1-29; 16:4, 5) Setlhopha seo se se laolang se ne sa romela batho go ya go tsweletsa pele tiro ya go rera ka Bogosi.

¹⁰ Mo motlheng wa rona Setlhopha se se Laolang sa phuthego e e bonalang ya ga Jehofa se bopilwe ka bakaulengwe ba ba tloditsweng ka moya ba ba tswang mo dinageng tse di farologaneng mme se kwa ntlokgolong ya lefatshe lotlhe ya Basupi ba ga Jehofa. Setlhopha se se Laolang se okametswe ke Jesu Keresete mme se tsweletsa pele kobamelo e e itshekileng mo nageng nngwe le nngwe, se rulaganya ditiro tsa go rera tsa Basupi ba ga Jehofa ka diphuthego tsa bone tse di dikete tse di masomesome. Ba ba mo Setlhopheng se se Laolang ba leba dilo jaaka moaposetoloi Paulo, yo o neng a kwalela Bakeresete ka ene jaana: “E seng gore re beng ba tumelo ya lona, fa e se gore re badirimmogo gore lo ipele, gonne lo eme ka tumelo ya lona.”—2 Bakorintha 1:24.

11. (a) Bagolwane le batlhanka ba bodiredi ba tlhomiwa jang? (b) Ke eng fa re tshwanetse go dirisana thata le ba ba tlhomilweng?

¹¹ Basupi ba ga Jehofa mo lefatsheng lotlhe ba leba kwa Setlhopheng se se Laolang gore se tlhophe bakaulengwe ba ba tshwanelegang bao le bone ba nang le tshiamelo ya go tlhoma bagolwane le batlhanka ba bodiredi gore ba tlhokomele diphuthego. Dilo tse di batlegang ka bao ba tlhomiwang di boletswe mo Baebeleng mme ga go lebalwe gore banna bao ga ba a itekanela ka jalo ba dira diphoso. Bagolwane ba ba buelelang bakaulengwe ba ba tshwanelegang mmogo le ba ba ba tlhomang ba na le boikarabelo jo bo masisi fa pele ga Modimo. (1 Timotheo 3:1-10, 12, 13; Tito 1:5-9) Ka gone, ba rapelela thuso ya moya wa Modimo e bile ba batla kaelo mo Lefokong la gagwe le le tlhotlheleditsweng. (Ditiro 6:2-4, 6; 14:23) A re bontsheng gore re anaanela ‘dimpho tseno tse e leng banna,’ tseo di re thusang rotlhe go fitlhelela “bongwefela mo tumelong.”—Baefeso 4:8, 11-16.

12. Jehofa o dirisa basadi jang mo thulaganyong e a e kaelang?

¹² Dikwalo di kaela gore banna e nne bone ba okamelang mo phuthegong. Seno ga se go nyatsa basadi, ka gonne bangwe ba bone ke baruaboswa ba Bogosi jwa selegodimo, e bile ba dira go le gontsi mo tirong ya go rera. (Pesalema 68:11) Se sengwe gape ke gore fa basadi ba diragatsa maikarabelo a bone a lelapa ka dinako tsotlhe, ba thusa gore phuthego e nne e na le leina le lentle. (Tito 2:3-5) Mme mo phuthegong go ruta go dirwa ke banna ba ba tlhometsweng go dira tiro eo.—1 Timotheo 2:12, 13.

13. (a) Baebele e rotloetsa bagolwane go leba maemo a bone jang? (b) Rotlhe re ka nna le seabe mo tshiamelong efe?

¹³ Mo lefatsheng, motho yo o nang le maemo a a kwa godimo o tsewa a le botlhokwa, mme mo phuthegong ya Modimo molao ke gore: “Yo o itshwarang jaaka yo mmotlanyana mo gare ga lona lotlhe ke ene yo mogolo.” (Luke 9:46-48; 22:24-26) Dikwalo di gakolola bagolwane gore ba nne kelotlhoko gore ba se ka ba rena mo go ba e leng boswa jwa Modimo, mme go na le moo, ba nne dikao mo letsomaneng. (1 Petere 5:2, 3) Basupi botlhe ba ga Jehofa, banna le basadi, e seng setlhopha se se rileng fela se se tlhophilweng, ba na le tshiamelo ya go emela Molaodimogolo wa lobopo, ba bua ka boikokobetso ka leina la gagwe e bile ba bolelela batho gongwe le gongwe kaga Bogosi jwa gagwe.

14. Dirisa ditemana tse di umakilweng fano go tlotla ka dipotso tse di kwa bofelong jwa serapa seno.

¹⁴ Re dira sentle fa re ipotsa jaana: ‘A ruri ke anaanela kafa Jehofa a kaelang phuthego ya gagwe e e bonalang ka teng? A maikutlo a me, puo le ditiro di bontsha seo?’ Go tlhatlhanya ka dintlha tse di latelang go ka thusa mongwe le mongwe wa rona go itlhatlhoba.

Fa ruri ke ikobela Keresete jaaka Tlhogo ya phuthego, he, jaaka ditemana tse di latelang di bontsha, ke tla bo ke dirang? (Mathaio 24:14; 28:19, 20; Johane 13:34, 35)

Fa ke amogela ka boitumelo dithulaganyo tsa semoya tse di tlang ka setlhopha sa motlhanka le Setlhopha sa sone se se Laolang, ke a bo ke bontsha gore ke tlotla mang? (Luke 10:16)

Mongwe le mongwe mo phuthegong, segolobogolo bagolwane, ba tshwanetse ba dirisana jang? (Baroma 12:10)

15. (a) Boikutlo jwa rona ka phuthego ya ga Jehofa e e bonalang bo bontsha eng? (b) Re ka supa ka ditsela dife gore Diabolo ke moaki ra ba ra ipedisa pelo ya ga Jehofa?

¹⁵ Jehofa gompieno o re kaela ka phuthego ya gagwe e e bonalang e okametswe ke Keresete. Boikutlo jwa rona ka thulaganyo eno bo bontsha kafa re ikutlwang ka teng ka kgang ya bolaodi. (Bahebera 13:17) Satane o batla go re gatelela gore re dumele gore selo se segolo se re amegileng thata ka sone ke rona ka borona fela. Mme fa re direla ka tsela nngwe le nngwe fela e e tlhokegang e bile re sa dire dilo tse di isang tlotla mo go rona go sa tlhokege, re supa fa Diabolo e le moaki. Fa re rata e bile re tlotla ba ba re etelelang pele mme re gana go ‘kgatlhwa ke batho ba maemo gore re iponele molemo,’ re ipedisa Jehofa. (Jude 16; Bahebera 13:7) Fa re ikanyega mo phuthegong ya ga Jehofa, re bontsha gore Jehofa ke Modimo wa rona le gore re mo obamela ka kutlwano.—1 Bakorintha 15:58.

Motlotlo wa Poeletso

• Phuthego ya ga Jehofa e e bonalang ke eng gompieno? Boikaelelo jwa yone ke bofe?

• Tlhogo e e tlhomilweng ya phuthego ke mang, mme o re naya kaelo e e lorato ka dithulaganyo dife tse di bonalang?

• Re tshwanetse ra nna le maikutlo afe a a siameng ka bao ba leng mo phuthegong ya ga Jehofa?

[Ditshwantsho mo go tsebe 133]

Jehofa o re kaela ka phuthego ya gagwe e e bonalang e okametswe ke Keresete