Ba Latlhegelwa ke Paradaise

DINGWAGANGWAGA pele ga Modimo a bopa batho, o ne a bopa dibopiwa di le dintsi tsa semoya—baengele. Kwa Edene, moengele mongwe wa motsuolodi, yo moragonyana a neng a itsege e le Satane Diabolo, o ne a raela Efa ka boferefere gore a je leungo la setlhare se le sengwe fela se Modimo a neng a ba laetse gore ba se ka ba se ja.

Satane o ne a dirisa noga go bolelela Efa gore Modimo o tima mosadi yono le monna wa gagwe sengwe se se monate. Moengele yono o ne a bolelela Efa gore ene le monna wa gagwe ba ne ba se kitla ba swa fa ba ka ja leungo le le ileditsweng. Ka go dira jalo, Satane o ne a latofatsa Modimo ka gore o aketsa bana ba gagwe ba mo lefatsheng. Motsietsi yono o ne a dira gore go bonale e kete go tsuologela Modimo go dira gore motho a nne le kitso e e kgethegileng le kgololesego. Mme seno sotlhe e ne e le maaka—tota e bile, ke one maaka a ntlha a a neng a buiwa mo lefatsheng. Tota fano kgangkgolo e ne e ama bolaodi jwa Modimo, kgotsa gore ke mang yo o tshwanelwang ke go busa—gore a Modimo o na le tshwanelo ya go busa le gore a o busa ka tsela e e siameng le e e tla solegelang batho ba a ba busang molemo.

Efa o ne a dumela maaka a ga Satane. A simolola go eletsa leungo, mme a le ja. Moragonyana ga moo o ne a le naya monna wa gagwe, mme le ene a le ja. Ka ntlha ya seo ba ne ba nna baleofi. Tiragalo eo e go neng go bonala e sa re sepe, tota e ne e bontsha gore ba a tsuologa. Fa Adame le Efa ba tlhopha go tlola taelo ya Modimo ka boomo, ba ne ba gana go laolwa ke Mmopi yo o neng a ba neile sengwe le sengwe, go akaretsa le botshelo jo bo itekanetseng.

Modimo o ne a atlhola batsuolodi bano botlhoko ka ntlha ya botsuolodi joo jwa bone. O ne a bolelela pele go tla ga Losika lo lo solofeditsweng kgotsa Mogolodi, yo o neng a tla senya noga e e emelang Satane. Modimo ga a ka a diragatsa katlholo ya gagwe ya loso mo go Adame le Efa ka yone nako eo, ka go dira jalo a bontsha kutlwelobotlhoko mo baneng ba bone ba ba neng ba ise ba tsholwe. Bana bano ba ne ba tla nna le lebaka la go nna le tsholofelo ka gonne Yo Modimo a neng a tla mo romela o ne a tla dirolola ditlamorago tse di botlhoko tse di neng tsa nna gone ka ntlha ya botsuolodi jwa kwa Edene. Fa Baebele e ntse e kwalwa, go ne ga senoga kgato ka kgato gore Modimo o ne a tla diragatsa jang boikaelelo jwa gagwe ka Mmoloki yoo yo o neng a tla tla mo isagweng le gore morongwa yoo e tla nna mang.

Modimo o ne a leleka Adame le Efa mo Paradaiseng. E le gore ba kgone go tswelela ba tshela ba ne ba tla tshwanelwa ke go bereka ka thata gore ba kgone go lema mmu o o neng o le kwa ntle ga tshimo ya Edene. Moragonyana Efa o ne a ima mme a tshola Kaine, ngwana wa ntlha wa ga Adame le Efa. Banyalani bano ba ne ba nna le bana ba bangwe ba basimane le ba basetsana, go akaretsa Abele le Sethe, rremogologolwane wa ga Noa.

—E tswa mo go Genesise kgaolo 3 go ya go 5; Tshenolo 12:9.