Tshela Botshelo Jo Bo Nang le Tekatekano, Jo Bo Motlhofo
“Lo lebè thata kaha lo sepelañ ka gōna, e señ yaka ba ba señ botlhale, . . . ka metlha e, e boshula.”—BAEFESIA 5:15, 16.
1, 2. Ke eng seo e leng kgwetlho ya mmatota gompieno, mme se ka bapisiwa le eng?
KE KGWETLHO go rulaganya dilo tse di tshwanetseng go tla pele, maikarabelo a a tlhakatlhakaneng, o bo o dirisetsa nako le maikatlapelo dilo tsa botlhokwa tsa botshelo ka tsela e e nang le tlhaloganyo. Gape ke kgwetlho go tila go dira dilo go tlola tekanyo le go nna o tlhomame mo mogopolong le mo maikutlong.—Baefesia 5:17; 1 Timotheo 4:8; 1 Petere 1:13.
2 Kgwetlho eno e ka tshwantshiwa le e motshameki yo o lekang go tsamaya mo godimo ga thapo e tshesane e e kwa godimo a lebanang le yone. Fa a ka palelwa ke go gata ka tekatekano seo e tla nna matlhotlhapelo mo go ene. Ka mo go tshwanang, go palelwa ke go nna le tekatekano ya semoya e ka nna matlhotlhapelo mo go rona. Motho yo o tsamayang mo godimo ga thapo e e kwa godimo eleruri ga a ithwese morwalo ka dilo di le dintsi. O tsaya dilo tse di tlhokafalang fela. Ka gone, gore re ke re nne le tekatekano ya semoya, re tshwanetse ra tshela botshelo jo bo motlhofo, jo bo senang merwalo ya dilo tse dintsi.—Bahebera 12:1, 2.
3. Ke eng seo re tshwanetseng go se dira gore re tshele botshelo jo bo motlhofo?
3 Gore re ke re tshele botshelo jo bo motlhofo, re tshwanetse ra tshwarega fela mo dilong tse di tlhokafalang gore re ke re kgone go tshela ka tekatekano. Go farologana le seo barutwa ba gagwe ba neng ba tshwanetse go se batla—eleng Bogosi jwa Modimo le tshiamo ya Gagwe—Jesu Keresete o ne a bua ka ‘dilo dingwe tse baditšhaba ba di lelekisang.’ (Mathaio 6:32, 33, NW) Jalo Jesu o ne a re tlhagisa gore re tile go iphuthela dilo tseno di le dintsi. Ka ntlhayang? Ka gonne di ka nna tsa dira gore botshelo jwa rona bo raraane le go re timetsa. (Luke 12:16-21; 18:25) Kgakololo eno e molemo, go sa kgathalesege gore a re humile kana a re humanegile, re rutegile thata kana nnyaa.
Lebaka La Go Bo E Le Botlhokwa Jaana Ga Jaanong
4. Ke ka ntlhayang fa go tshela botshelo jo bo nang le tekatekano, jo bo motlhofo go le botlhokwa jaana ga jaanong?
4 Go tshela botshelo jo bo nang le tekatekano, jo bo motlhofo go botlhokwa le go feta jaanong ka gonne Satane le badimona ba gagwe ba ile ba latlhelwa mo lefatsheng mme ba ikemiseditse go re imetsa thata le go tlosa tlhokomelo ya rona mo tirelong ya Modimo. (Tshenolō 12:7-12, 17) Ka gone, taelo eno ya Bibela e dira go feta lefa e le leng pele: “Lo lebè thata kaha lo sepelañ ka gōna, e señ yaka ba ba señ botlhale, me yaka ba ba botlhale; ka go shwèla lobaka molemō, ka metlha e, e boshula.” (Baefesia 5:15, 16) Ee, re tshela mo lefatsheng le le boikepo la ga Satane, eseng mo lefatsheng le lesha la Modimo. Ka gone, ga re kake ra nna fela go se letsapa le le re fisang pelo.—2 Bakorintha 4:4; 2 Petere 3:7, 13.
5. Batlhanka ba Modimo ba metlha ya bogologolo ba re tlhometse sekao se se molemo jang?
5 Batlhanka ba Modimo bao ba neng ba tshela mo lefatsheng leno le le laolwang ke Satane mo metlheng ya bogologolo ba re tlhometse sekao se se molemo. Ba ne ba “ipolèla ha ba le baeñ le baeti mo lehatshiñ.” Ka gone, ba ne ba batla “lehatshe ye le molemō bogolo, ke go re, ya selegodimo.” (Bahebera 11:13-16) Ba ne ba ineetse mo Bogosing jwa Modimo jwa selegodimo fela, fela jaaka le rona re tshwanetse go dira jalo. Ka ntlha ya seno, moaposetoloi Petere o ne a bitsa Bakeresete a re “bayaki le baeti.” (1 Petere 2:11; Bafilipi 3:20) Tota, Jesu o ne a bolela gore balatedi ba gagwe ba boammaaruri “ga se ba lehatshe.” Seno se bolela, jaaka moaposetoloi Paulo a boletse, gore Bakeresete ga ba tshwanela ‘go ipapalela ka lefatshe go fetisa selekanyo.’—Yohane 17:16; 1 Bakorintha 7:31.
6. (a) Ke eng seo re tshwanetseng ra se gakologelwa, mme boemo jwa rona bo ka bapisiwa le eng? (b) Ke sekai sefe se eleng tlhagiso seo rotlhe re tshwanetseng ra se tlhokomela?
6 Jalo ka metlha re tshwanetse ra gakologelwa gore lefatshe leno la ga Satane ke lefelo le le kotsi leo re tshelang mo go lone. Fa re ka fosa go gata sentle gangwe fela seo se ka bolela dipharagobe. (1 Yohane 5:19; 1 Petere 5:8) Boemo jwa rona bo ka nna jwa tshwantshiwa le jwa motho yo a tsamayang a raletse lefelo leo go epetsweng dithunyi tsa kafa tlase ga lefatshe mo go lone. Fa moaposetoloi Paulo a ne a umaka sekai se eleng tlhagiso mo Bakereseteng, o ne a bolela ka Baiseraele bao ba neng ba atametse go tsena mo Lefatsheng la Tsholofetso. Ba le bantsi ba ne ba latlhegelwa ke tekatekano ya bone ya semoya, ba kopanela mo boitshwarong jo bo sa siamang, mme ba ne ba bolawa ke Modimo. “Ke gōna,” Paulo o ne a kwala, “eo o gopolañ, go re, o eme, a a itisè gore a se ka a [latlhegelwa ke tekatekano ya gagwe ya semoya mme] a wa.”—1 Bakorintha 10:12.
Lebaka La Go Bo Seno E Le Tshireletso
7. Ke go itlhatlhoba gofe ka namana goo re tshwanetseng ra go dira ka botlhale?
7 Go tshela botshelo jo bo nang le tekatekano, jo bo motlhofo go tla go sireletsa ka gonne go tla go fa nako e e oketsegileng le maikatlapelo go ka dira dilo tsa semoya. Ka gone ipotse jaana ka botlhale: A ke dira gore botshelo jwa me bo nne motlhofo, kana a ke bo dira gore bo raraane? Tota ke dilo dife tse di tlang pele mo botshelong jwa me? Ba bangwe ba bolela gore ba na le nako e nnyane ya go ithuta Bibela kana ya go nna le seabe mo bodiheding jwa tshimo. Ke eng se se bakang seno? Gongwe, ke ka ntlha ya go bo ba palelwa ke go tshela botshelo jo bo nang le tekatekano, jo bo motlhofo. Ke ka ntlhayang fa o sa bapise selekanyo sa nako eo o e senyang mo go intsheng bodutu, jaaka ya go lebelela thelebishene, le nako eo o e senyang o direla Jehofa mo karolong e e rileng ya tiro ya Bokeresete? A o dirisa nako ka tsela e e lekanang? Fa o dira botshelo jwa gago gore bo nne motlhofo seo se tla go naya nako ya go dira dilo tse di botlhokwa ka mo go golwane, tseo di kopanyeletsang go nna le seabe se segolwane mo thobong e e botlhokwatlhokwa ya semoya.—Bafilipi 1:9, 10; Mathaio 9:37.
8. Motho a ka reetsa jang tlhagiso ya ga Jesu ya gore re batle Bogosi pele, mme ke eng seo se bontshang kafa go tsamaela kwa pele go leng botlhokwa ka gone?
8 Tota, tiro ya gago ya semoya ke yone selo se se lekanyang se se bontshang gore a o tshela botshelo jo bo nang le tekatekano, jo bo motlhofo. Bakeresete bao ba reetsang tlhagiso ya ga Jesu ya gore re batle Bogosi jwa Modimo pele ba gatela pele ka lobelo lo lo siameng mo go ithuteng Bibela ka metlha, mo go nneng gone kwa dipokanong, le mo bodiheding jwa tshimo. Kgatelopele e e ntseng jalo ke selo sa mmatota se se go sireletsang gore o seka wa wa. Go ka bapisiwa le go palama baesekele. Bao ba kileng ba leka go dira gore baesekele e e tsamayang e iketlile fela thata e eme e seka ya ba diga ba itse ka mo go leng botlhokwa ka gone gore e nne e tsamaela kwa pele. Ka mo go tshwanang, fa fela o gatela pele ka lobelo lo lo siameng mo thulaganyong ya tiro ya semoya, seo se a go sireletsa gore o seka wa latlhegelwa ke tekatekano o bo o wa.—Bafilipi 3:16.
9. (a) Ke eng seo e leng kgakololo e e molemo mo go rona rotlhe? (b) Fa go na le sengwe seo re akanyang go se dira, ke dipotso dife tseo re ka di ipotsang?
9 Legale, re tshwanetse ra nna matlhagatlhaga, re gakologelwa gore fa re ithola morwalo wa dilo seo se ka re naya nako e e oketsegileng ya go ithuta, ya go baakanyetsa dipokano, le ya go thusa ba bangwe. “Nako le nako fa ke raelesega go reka sengwe seo ke sa se tlhokeng, kana go tsaya mmereko mongwe o ke sa o tlhokeng,” go ne ga bolela jalo rrakgwebo mongwe wa Mokeresete, “ke ithibela ka kgakololo eno dira dilo motlhofo. Ka dinako tse dingwe ke tshwanelwa ke go ikgalefela.” A seo ga se kgakololo e e molemo mo go rona rotlhe? Fa go na le sengwe seo o akanyang go se dira, gongwe o akanya go oketsa ntlo ya gago kana sengwe se sele, ke ka ntlhayang fa o sa ipotse jaana: A seno se tlile go tlatseletsa mo bomoyeng jwa me le jwa lelapa la me kana a se tlile go bo kgoreletsa? A tota ke tlhoka dilo tsotlhe tseno tseo batho ba lefatshe ba di lelekisang ka tlhoafalo, kana a ke ka kgona go tshela kwa ntle ga tsone?
10. Tsela eo “motho wa senama” a lebang dilo ka yone e farologana jang le eo “eo e leñ oa semōea” a di lebang ka yone?
10 Lefa go ntse jalo, mongwe a ka nna a ganela ka gore: ‘A tota go a tlhokafala gore o intshe setlhabelo jalo? A re tshwanela go tshela botshelo jo bo nang le tekatekano, jo bo motlhofo?’ Mme kana, Paulo o ne a bua ka “dilō tsa motho” le “dilō tsa Modimo” a bo a bolela jaana: “Eo e leñ motho oa tlhōlègō, [“motho wa senama,” NW] ga a amogele dilō tsa Mōea oa Modimo; gonne ke dinyana mo go èna; me ga a kake a di itse, ka di sekasekwa kaha mokgweñ oa semōea. Me eo e leñ oa semōea o sekaseka dilō cotlhe.” (1 Bakorintha 2:11, 14, 15) Go motlhofo fela gore o fetoge “motho wa senama” ka go eletsa dilo tse di bonalang tse di sa tlhokafaleng le go nna le tsone. Mo lekgetlong le le ntseng jalo, go intsha setlhabelo go lebega e le selo se segolo thata le seo se se kakeng sa kgonagala. Mme eo ke tsela eo “motho wa senama” a lebang dilo ka yone, eseng tsela eo “eo e leñ oa semōea” a di lebang ka yone.
11. Ke eng seo e neng e ka bo e le tsela ya go sa dire dilo ka tekatekano mo go Noa, mme re tshela botshelo jo bo nang le tekatekano jang gompieno?
11 Motho wa semoya ke motho yo o lebang dilo ka matlho a tumelo. O bona dilo go ya kafa Modimo o di lebang ka gone. A o ke o akanye ka Noa. A o ne a tla bo a ile a nna motho yo o dirang dilo ka tekatekano fa, e ne e ka re morago ga a sena go utlwa gore Modimo o ikaeletse go senya lefatshe ka morwalela, a bo a senya nako ya gagwe a aga legae le legolwane le le le botoka le go bapala dilo tse di oketsegileng tse di bonalang? Tota o ne a se kake a dira jalo! Araka e ne e le yone selo sa boammaaruri se se mo sireletsang. Mo go Noa, go tshela botshelo jo bo nang le tekatekano, jo bo motlhofo go ne go kopanyeletsa gore a neele go agiwa ga araka tlhokomelo yotlhe ya gagwe le gore a nne “moreri oa tshiamō,” go sa kgathalesege go bo ‘batho ba senama’ bao ba senang tumelo ba ne ba mo kgala. (2 Petere 2:5; Mathaio 24:37-39) Ka mo go tshwanang, ereka re rutilwe gore bokhutlo jwa lefatshe bo gaufi, tsela e le nngwe fela e re ka dirang gore botshelo jwa rona bo nne le tekatekano ka yone ke ka go tlhoma tlhokomelo ya rona mo go direng thato ya Modimo le mo go itsiseng mafoko a a molemo, lemororo seo se ka nna sa kopanyeletsa seo ba le bantsi ba se lebang jaaka go ntsha se se fa se go tweng ke tsela e e tlwaelegileng ya go tshela setlhabelo.—1 Yohane 2:17.
Jesu O Re Rutile Ka Moo Re Ka Dirang Seo Ka Gone
12. (a) Ke eng seo Jesu a neng a bolela gore re tshwanetse ra tlogela go se dira, mme ke eng seo re tshwanetseng ra se dira mo boemong jwa seo? (b) Ke ka ntlhayang fa re tshwanetse go fetola boikaelelo ka tsela eno?
12 Mo Therong ya gagwe ya kwa Thabeng, Jesu o ne a neela kgakololo e e molemo malebana le go tshela botshelo jo bo nang le tekatekano, jo bo motlhofo. O ne a bolela jaana: “Se [“tlogelang,” NW] iphutheleñ dikhumō mo lehatshiñ, kwa motoutwana o senyañ gōna, le morodu, le kwa magodu a phunyetsañ go ucwa gōna.” Jesu o ne a dirisa lefoko “tlogelang” ka gonne batho gantsi ba tswela pele fela ba ‘iphuthela dilo’ tse di bonalang ba sa kgaotse. Mme motho yo o fetogang morutwa wa ga Jesu ga a kake a bo a santse a dira seno. Botshelo jwa gagwe bo tshwanetse jwa nna le boikaelelo jo bo farologaneng, jaaka go bontshitswe ke taelo eno ya ga Jesu e e neng ya latela morago ga eo: “Me iphutheleñ dikhumō kwa legodimoñ, kwa motoutwana o sa senyeñ gōna leha e le morodu, le kwa magodu a sa phunyeñ leha e le go ucwa gōna.” Fa Jesu a ne a neela lebaka la go bo go tlhokafala gore go fetolwe boikaelelo jaana o ne a bolela gore: “Kwa khumō ea gago e gōna, pelo ea gago le eōna e tla nna hèla gōna.”—Mathaio 6:19-21.
13. Gore o ke o iphuthele dikhumo kwa legodimong, ke eng seo o tshwanetseng wa tlhatswega pelo ka sone?
13 Khumo ya gago ke selo seo o se tsayang jaaka sa botlhokwatlhokwa. A dilo tse di bonalang ke tsone khumo ya gago? Kana a ke go itshepisiwa ga leina la ga Jehofa Modimo le tuelo e a e solofeditseng? Gore o ke o dirise botshelo jwa gago o iphuthela dikhumo kwa legodimong go na le go di iphuthela mo lefatsheng, o tshwanetse wa bo o tlhatswegile pelo ka botlalo gore Bogosi ke selo sa mmatota. Lefatshe le lesha e tshwanetse ya nna selo sa mmatota mo go wena mo e leng gore o kgona go le bona ka leitlho la gago la mogopolo le go ipona o le mo go lone o berekela gore maikaelelo a ga Jehofa ka lefatshe a fitlhelelwe. Jaaka Moshe, o tshwanetse wa ‘bona Ena yo o sa bonaleng’ mme o dumele ka tlhomamo gore ‘o tla duela bao ba mmatlang ka tlhoafalo.’—Bahebera 11:6, 27.
14. Diphelelo e tla nna eng fa dipelo tsa rona di tlhomilwe mo dilong tse di bonalang?
14 Mme go tweng fa pelo ya gago, eo e kopanyeletsang dilo tseo o di eletsang le tseo o di ratang, e beilwe mo dikhumong tsa dilo tse di bonalang? Bibela e bolela jaana: “Go rata madi ke mocwe oa mashula mañwe le mañwe aotlhe: ke mo e rileñ bañwe ba go gwalalèla ba timèlwa ke tumèlō, me ba iphololeditse ka mahutsana a le mantsi.” Go lelekisa dilo tse di bonalang tseo di ka rekwang ke madi ruri ga go leretse kgotsofalo ya boammaaruri le e e nnelang ruri. (1 Timotheo 6:10; Moreri 5:10) Mme se se kotsi le go feta, go rata madi le dilo tse di bonalang go tla senya kamano ya gago le Modimo, o o lebeletseng gore re mo direle ka “pelo yotlhe.”—1 Ditihalō 28:9, NW.
15. (a) Ke setshwantsho sefe seo Jesu a neng a se neela malebana le leitlho? (b) Ka kgopolo ya senama le ya semoya, motho a ka dira jang gore a nne le leitlho le le motlhofo? (c) Fa e le gore leitlho la rona le motlhofo, pono ya rona ya semoya e tla tshwana jang le ya baaposetoloi bale ba ga Jesu ba bararo?
15 Go re thusa gore re tile serai sa go rata dilo tse di bonalang, Jesu o ne a neela ditshwantsho di le pedi. Sa ntlha, o ne a bolela jaana: “Lobōnè loa mmele ke leitlhō: ke gōna ea re ha leitlhō ya gago le bōna sentlè, [“le le motlhofo,” NW] mmele otlhe oa gago o tlale lesedi. Me ea re ha leitlhō ya gago le le boshula, mmele otlhe oa gago o tlale lehihi.” (Mathaio 6:22, 23) Ka kgopolo e e tlwaelegileng, leitlho “le le motlhofo” ke le le bonang selo sentle, le fetisetsa ditshwantsho tse di bonalang sentle kwa mogopolong. Leitlho le le sa tlhongwang mo selong ka tshwanelo le romela ditshwantsho tse di tlhakatlhakaneng le tse di sa bonaleng sentle. Ka mo go tshwanang, leitlho la semoya leo le leng “motlhofo,” kana le le bonang selo sentle, le romela setshwantsho se se bonalang sentle sa Bogosi jwa Modimo kwa mogopolong, eseng setshwantsho se se sa bonaleng sentle, seo go neng go sa tsepamisiwa matlho ka tshwanelo mo go sone seo se dirang gore lefatshe le lesha le lebege jaaka kgang nngwe e e itlhametsweng kana jaaka tlhamane. Fa e le gore leitlho la gago la semoya le bona ka tshwanelo, lefatshe le lesha le le solofeditsweng ke Modimo le tla nna la mmatota mo go wena fela jaaka Bogosi bo ne bo ntse mo baaposetoloing bale ba bararo bao ba neng ba nna le tshiamelo ya go bona setshwantsho sa kafa bo tlileng go nna ka gone ba se bona mo ponatshegelong nngwe e e gakgamatsang ka nako e Jesu a neng a fetoga ponalo mo go yone.—Mathaio 16:28–17:9; Yohane 1:14; 2 Petere 1:16-19.
16. Mo setshwantshong sa bobedi, Jesu o ne a bontsha jang gore re tshwanetse ra nna le boikaelelo bo le bongwe fela?
16 Jesu o ne a neela setshwantsho sa bobedi. O ne a bolela jaana: “Ga go na motho opè eo o ka dihèlañ barèna ba le babedi: ka a tla ila eo moñwe, me a rate eo moñwe; goñwe a ñaparèle eo moñwe, me a nyatse eo moñwe.” Fa a ne a tlhalosa ntlha eo go ya pele gore e utlwale, gape o ne a otlelela kafa go tlhokafalang ka gone gore re bontshe gore re na le boikaelelo bo le bongwe fela, ka go bolela jaana: “Ga lo kake loa dihèla Modimo le Dikhumō.” (Mathaio 6:24) Seo ruri ga se kake sa atlega. Jalo Jesu o ne a tswela pele jaana: “Ke gōna se itlhobaeleleñ, loa re, Re tla ya eñ? kgotsa, Re tla nwa eñ? kgotsa, Re tla apara eñ? Gonne Badichaba ba batla cōna dilō cotlhe tseuō; gonne Rra eno oa legodimo oa itse ha lo tlhōka dilō tse cotlhe.”—Mathaio 6:25-32.
17. (a) Ke ntlha efe eo Jesu a neng a e tlhalosa ka ditaelo tsa gagwe tse di malebana le dilo tse di bonalang? (b) Ke eng seo Jesu a neng a se otlelela fano, mme go tshela botshelo jo bo nang le tekatekano, jo bo motlhofo go kopanyeletsang?
17 Jesu o ne a sa bolele gore balatedi ba gagwe ba tshwanetse ba akanya gore dilo tse di bonalang tse di tlhokafalang di tla itlela fela ka kgakgamatso kana gore ba tshwanetse ba nna botshwakga le go gana go bereka e le gore ba ke ba itlamele mmogo le malapa a bone. (1 Timotheo 5:8) Nnyaa, mme ntlha ke gore dilo tseno tse di bonalang tseo Baditšhaba ba di lelekisang ka tlhoafalo ga ya tshwanela go nna tsone di tlang pele. Go na le moo, jaaka Jesu a ile a tlhagisa jaana: “Me batlañ pele bogosi yoa gagwè, le tshiamō ea gagwè; me dilō cotlhe tse lo tla di okelediwa.” (Mathaio 6:33) Jalo Jesu fano o ne a bua ka mekgele ya mo botshelong mme o ne a otlelela kafa go lelekisa dilo tse di bonalang go senang mosola wa sepe ka gone. Go tshela botshelo jo bo nang le tekatekano, jo bo motlhofo go kopanyeletsa go tlhoma matlho a rona mo dikgatlhegong tsa Bogosi fela, re dira gore sengwe le sengwe se sele se tle fa morago ga tsone.
Sekao sa ga Jesu le sa Ba Bangwe
18. Jesu o ne a re tlhomela sekao se se siameng jang?
18 Fa Paulo a ne a kgothaletsa Bakeresete gore ba ‘latlhe bokete bongwe le bongwe, le boleo [jwa go tlhaela tumelo kana go latlhegelwa ke yone] jo bo bofefo go re raraetsa,’ o ne a kgothatsa jaana: “A re sianeñ ka bopelotelele tshianō e re e beilweñ pele, Re nntse re lebile kwa go Yesu, mosimolodi le mowetsi oa tumèlō ea rona.” (Bahebera 12:1, 2) Jesu o ne a ineetse mo dikgatlhegong tsa Bogosi fela mo eleng gore boemo jwa gagwe bo ne bo ntse jaaka a ne a tlhalosa jaana: “Diphokoyè di na le mesima, dinōnyane tsa loapi di na le ditlhaga; me Morwa Motho èna, ga a na ha o ka baeañ tlhōgō ea gagwè gōna.” (Mathaio 8:20) Lefa go ntse jalo, Jesu e ne e se motho yo o ikitsang sengwe le sengwe se se monate. Dikwalo di bontsha gore o ne a ipelela dijo tse di monate le diaparo tse dintle, lefa go ntse jalo mokgele wa gagwe o mogolo mo botshelong e ne e le gore a swetse bodihedi jwa gagwe. Ka gone Jesu o ne a tshela botshelo jo bo nang le tekatekano, jo bo motlhofo.—Luke 5:29; Yohane 19:23, 24.
19, 20. (a) Ke sekao sefe se Paulo a neng a se tlhoma mabapi le dilo tse di bonalang? (b) Ke thuto efe e ba le bantsi ba ileng ba e ithuta gompieno, mme ba ikutlwa jang ka tsela ya bone ya botshelo?
19 Moaposetoloi Paulo le ene o ne a rulagantse dilo tsa gagwe tse di tshwanetseng go tla pele ka tshwanelo. O ne a tlhalosa jaana: “Botshelō yoa me ga ke bo kaee sepè, go re, ekete ke bo rata thata, e le gore ke tlè ke wetsè sebaka sa me sa tshianèlō, le tihèlō e ke e amogetseñ mo go Morèna Yesu, ea go shupa Mahoko a a Molemō.” (Ditihō 20:24) Ee, gore Paulo a dire bodihedi jono jo bo botlhokwatlhokwa, o ne a ritibetse pelo ka dilo tse di tlhokafalang tse di lekaneng fela legale o ne a itumelela go atlaanegelwa ke dilo ka dinako tse dingwe. O ne a kwala jaana: “Mo go señwe le señwe, le mo diloñ cotlhe ke ithutile bokwateñ yoa go kgora le go bolawa ke tlala, go atlanegèlwa le go tlhōka.”—Bafilipi 4:12.
20 Tota dikete tse di masomesome tsa batho di ile tsa ithuta thuto e e tshwanang le eo gompieno. Bontsi jwa bone ke badihedi ba nako e e tletseng ba Basupi ba ga Jehofa, go kopanyeletsa le barongwa, babulatsela, balebedi ba ba etang, le bao ba direlang kwa ntlongkgolo ya Mokgatlho ya boditšhabatšhaba le kwa diofising tsa makala. Morago ga bontsi jwa bone bo sena go nna mo tirelong ya nako e e tletseng ka dingwagangwaga, ba bolela jaana: “Fa ke ne ke ka tshwanelwa ke gore ke dire seno go tloga kwa tshimologong gape, ke ne ke se kake ka dira sepe ka tsela e e farologaneng le eno.”
Masego Ao O Ka A Ipelelang
21, 22. (a) Ke dituelo dife tseo di ipelelwang le eleng ga jaanong fa re tshela botshelo jo bo nang le tekatekano, jo bo motlhofo? (b) Ke masego afe a mo isagweng ao o ka nnang le one?
21 Lemororo go tshela botshelo jo bo nang le tekatekano, jo bo motlhofo go kopanyeletsa go intsha setlhabelo, masego le maipelo a gone ga a kake a lekanngwa le ape. Ka gone o tla nna le nako e e oketsegileng ya go tsweletsa dikgatlhego tsa Bogosi pele le sebaka se segolwane sa go bona ba ba kgatlhegang le go ba ruta maikaelelo a Modimo. O tla bona kgotsofalo ya boammaaruri le thetebalo, go kopanyeletsa le kagiso ya mogopolo le tlhomamisetso ya gore o kgatlhisa Jehofa Modimo. Eo ke tuelo eo o ka nnang le yone le eleng ga jaanong.—Bafilipi 4:6, 7.
22 Mme masego a mo isagweng a tla nna magolo le eleng go feta moo, a dira gore ditlhabelo lefa e ka nna dife tseo o ka di dirang ga jaanong e nne tse e seng tsa sepe fa di bapisiwa le one. Ditshegofatso tsa ga Jehofa di kopanyeletsa “botshelō ka bosakhutleñ.” Ee, o ka bona tshegofatso eo—botshelo jo bo sa khutleng ka boitumelo mo lefatsheng le lesha la tshiamo la ga Jehofa. Tshela botshelo jo bo nang le tekatekano, jo bo motlhofo, o seka le ka motlha wa letla dilo tsa lefatshe leno di dira gore o se nne le tekatekano. Gakologelwa gore Modimo o tla go naya dilo tse o di kopang mo pelong ya gago.—Pesalema 21:3, 4; 37:4; 133:3.
Dipotso tsa Poeletso
◻ Ke dikai dife le ditshwantsho tse o di lemogileng tse di ka go thusang gore o tshele botshelo jo bo nang le tekatekano, jo bo motlhofo?
◻ Go tshela botshelo jo bo nang le tekatekano, jo bo motlhofo go tla re sireletsa jang?
◻ Fa leitlho la rona la semoya le le motlhofo, seno se tla kayang mo go rona?
◻ Jesu o ne a re ruta jang gore re tshele botshelo jo bo motlhofo?
◻ Masego a go tshela botshelo jo bo nang le tekatekano, jo bo motlhofo ke afe?