Mafoko A A Molemo go batho botlhe!
“ME KA bōna moengele eo moñwe a hoha gare ga legodimo, a na le Mahoko a a Molemō a a sa khutleñ go a bolèlèla ba ba agileñ mo lehatshiñ, le chaba ñwe le ñwe, le locō, le puō, le batho.” (Tshenolō 14:6) Moaposetoloi yo o tsofetseng Johane o ne a tlhalosa ponatshegelo ya gagwe e e tlhotlheleditsweng ya seperofeti ka mafoko ao, eleng ponatshegelo e e diragadiwang mo motlheng wa rona. Abo go wetsa dibete jang ne go itse gore go na le mafoko a a molemo mo motlheng ono o o tletseng ka go oketsega ga bokebekwa, kgotlelo, borukhutlhi, ntwa, le go sa tlhomamang ga itsholelo! Mme ke mafoko afe ao a leng molemo mo go kalo mo a bileng a tlhoka go bolelwa ke moengele? Ke dikgang dife tse di itumedisang mo go kalo mo di bileng di tshwanela go bolelwa mo morafeng mongwe le mongwe le lotso le puo le batho?
Re ka araba seo fa re ka akanya ka nako nngwe fa moengele mongwe a ne a itsise mafoko a a molemo ka namana. E ne e le fa lekgolo la ntlha la dingwaga B.C.E. le ne le ya kwa bokhutlong mo e ka nnang dingwaga di le lekgolo pele ga fa Johane a ne a bona pono ya gagwe. Badisa ba ne ba na le matsomane a bone mo nageng gaufi le Bethelehema, mme moengele o ne a itlhagisa go itsise botsalo jwa ga Jesu a bua jaana: “Bōnañ, ke lo lereditse mahoko a a molemō, a boitumèlō yo bogolo, yo bo tla dihalèlañ batho botlhe. Gonne, gompiyeno, mo motsiñ oa ga Dafide, lo tsalecwe Mmoloki, eo e leñ Keresete Morèna.”—Luke 2:10, 11.
Botsalo jwa ga Jesu eleruri e ne e le “mahoko a a molemō, a boitumèlō yo bogolo.” O ne a gola mme a nna Keresete le Mogolodi yo o solofeditsweng, yoo a neng a neela botshelo jwa gagwe jo bo itekanetseng jaaka motho gore badumedi ba ba pelo di siameng ba tshele. Mo godimo ga moo, e ne e tla nna Kgosi ya Bogosi jwa Modimo, “Kgōsana ea Kagishō,” eo kgabagare batho ba tla bonang tshiamo le kagiso mo pusong ya gagwe. (Isaia 9:6; Luke 1:33) Eleruri, botsalo jwa gagwe e ne e le mafoko a a molemo a a neng a tshwanela go bolelwa ke moengele!
Jesu ke Kgosi
Jesu o ne a diragatsa bontsi jwa boikaelelo jwa Modimo ka ene bogologolo mo lekgolong la ntlha la dingwaga, mme ga a ka a pegwa mo setulong sa bogosi jaaka Kgosi ya Bogosi jwa Modimo ka nako eo. Jaaka makasine ono o ile wa nna wa bontsha, seo ga se a ka sa diragala go fitlha ka 1914. Jaaka go diragadiwa ga boperofeti go supa ka phepafalo, Bogosi jwa Modimo bo ne jwa tlhomiwa kwa legodimong mo go one ngwaga oo. (Tshenolō 12:10, 12) Lemororo go ne ga nna le mafoko a a sa itumediseng ka 1914—go tlhagoga ga Ntwa ya Lefatshe I—go tsalwa ga Bogosi jwa Modimo e ne e le mafoko a a molemo go gaisa. E ne e le ka ntlha ya gone moo Jesu a neng a perofesa jaana ka motlha wa rona: “Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe.”—Mathaio 24:14.
A boperofeti joo jwa ga Jesu bo setse bo diragaditswe? Karabo ke ee! Ponatshegelo ya ga Johane le yone e diragaditswe. Ke boammaaruri gore, ga re kgone go bona moengele yo o sa bonaleng yoo Johane a neng a mmona. Mme Basupi ba ga Jehofa ba ile ba bonala jaaka ba bolela mafoko a a molemo a moengele “go chaba ñwe le ñwe, le locō, le puō, le batho.” Mantswe a bone a ile a utlwala mo dinageng tse 212 le mo ditlhaketlhakeng tsa lewatle. Mme bontsintsi jwa batho bo a arabela. Boitemogelo jwa bangwe ba bano bo tla supa gore eleruri mafoko a Bogosi jwa Modimo a molemo go le kana kang.