Basha Ba Ba Itumetseng Ba Ba mo Tirelong ya ga Jehofa

“Le e leñ ñwanyana o tla a itshenole ka ditihō tsa gagwè, bo tihō ea gagwè e ntlè, le go re, a e siame.”—DIANE 20:11.

1. Ke dilo dife tse dingwe tse di tlhomologileng tseo Bibela e di buang ka Samuele?

SAMUELE yo mmotlana o tshwanetse a bo a ne a na le dingwaga di le tharo go ya go di le tlhano fa a ne a simolola go “dihèla” kwa motlaaganeng wa ga Jehofa kwa Shilo. Nngwe ya ditiro tsa gagwe e ne e le go “bula ntlo ea ga Yehofa.” Bibela e bolela gore “Samuele a golèla pele, me a ratwa ke Yehofa, le ke batho le bōnè.” Fa a setse a godile, o ne a busetsa Iseraele mo kobamelong ya boammaaruri. O ne a direla Modimo “malatsi aotlhe a botshelō yoa gagwè.” Le eleng le fa a ne a ‘tsofetse a thuntse’ o ne a santse a kgothaletsa batho go ‘boifa Jehofa . . . le go mo direla ka boammaaruri.’ A go ne go ka seka ga itumedisa fa batho ba ne ba ka kgona go bua dilo tse di molemo tseno ka wena fela jaaka Bibela e di bua ka Samuele?—1 Samuele 1:24; 2:18, 26; 3:15; 7:2-4, 15; 12:2, 24.

2. Ba babotlana ba ithuta eng kwa dipokanong tsa batho ba ga Jehofa gompieno?

² Fa e le gore o mongwe wa Basupi ba ga Jehofa kana o ya kwa dipokanong tsa bone tsa Bokeresete, sekaseka kwa Holong ya Bogosi koo thuto eno e ithutiwang gone. O bona batho ba dingwaga tsotlhe. Go tshwanetse ga bo go na le batho ba ba setseng ba ‘tsofetse ebile ba thuntse.’ Go na le batsadi, basha, bana, le masea a a kukilweng. A le ba babotlana thata ba setse ba simolotse go ithuta? Ee. Botsa fela bao ba neng ba tlisiwa kwa dipokanong tseno fa ba santse ba le babotlana. Ba tla go bolelela gore ba ne ba ithuta go tlotla Modimo, go rata batho ba gagwe, le go anaanela mafelo a gagwe a kobamelo ba santse ba le babotlana. Fa nako e ntse e tsamaya, bana ba ithuta boammaaruri jo bo gakgamatsang. Basha ba bantsi fa ba sena go nna le kitso le kanaanelo, ba nna karolo ya ‘makau, basetsana; bannabagolo le banyana’ bao mopesalema a neng a ba kgothaletsa gore ba “bakè leina ya ga Yehofa; gonne leina ya gagwè ke yeōna yeosi ye le goletsegileñ.”—Pesalema 148:12, 13.

3. Ke jang go ka tweng basha ba ba itseng Bibela ba leba botshelo ka tsela e e farologaneng go na le ba ba sa e itseng?

³ Fa o le mosha yoo batsadi ba gagwe ba tlang le ene ka metlha kwa dipokanong tse di ntseng jalo, o lesego tota. Basha ba bangwe ba bantsi ba tshwenngwa ke mathata a lefatshe. Bangwe ba ka tswa ba boifa gore batho ba tlile go senya lefatshe. O a itse gore Modimo ga o kitla o letla seo gore se diragale, gore ga a kitla a letla batho go tswelela go senya polanete e ntle eno. Go na le gore a lese seo gore se diragale, Modimo go ya ka Bibela, o tla “senya ba ba senyañ lehatshe.” O itse gore Bibela e solofetsa gore isagwe e e molemo e e tla nnang gone mo lefatsheng le lesha la Modimo la tshiamo e setse e le gaufi.—Tshenolō 11:18; Pesalema 37:29; 2 Petere 3:13.

Tumelo E E Leng ya Gago

4. Ke boikarabelo bofe joo go itse ditsela tsa Modimo go bo pegang basha, mme Samuele yo mmotlana o ne a tlhoma sekao se se molemo jang mo go seno?

⁴ Kwa tshimologong, e ka tswa batsadi ba gago e ne e le bone ba neng ba latelela tsela ya boammaaruri jwa Bokeresete. Gongwe o ne o tla kwa dipokanong tsa Bokeresete ka gonne ba ne ba go isa koo, mme o ka tswa o ne wa nna le seabe mo tirelong ya bomodimo gonne ba ne ba dira jalo. Lefa go le jalo, fa nako e ntse e tsamaya, go direla Jehofa le go mo ikobela go ka go ipedisa tota. Mmaagwe Samuele yo mmotlana o ne a mmaya mo tseleng e e siameng, mme o ne a tshwanela go e latela ka boene. Re bala jaana: “Le e leñ ñwanyana o tla a itshenole ka ditihō tsa gagwè, bo tihō ea gagwè e ntlè, le go re, a e siame.”—Diane 20:11.

5. (a) Bibela e botlhokwa thata go le kana kang? (b) Paulo o ne a bolelela Timotheo eng ka botlhokwa jwa Lefoko le le kwadilweng la Modimo?

⁵ Dikwalo di re bolelela se Modimo o se batlang mo go rona. Di re bontsha ka phepafalo fela kafa re ka mo itumedisang ka gone, di re naya tshedimosetso e ntsi thata e e ka re solegelang molemo tota. Moaposetoloi Paulo o ne a raya mothusi wa gagwe yo mmotlana Timotheo a re: “Lokwalō loñwe le loñwe lo lo kwadilweñ ka tlhotlheleco ea Modimo, lo bile lo molemō go ruta, le go kgalemèla, le go shokolola, le go kaèla ka tshiamō: Gore motho oa Modimo a tlè a nnè boitèkanèlō, a iketleeleletse rure tihō ñwe le ñwe e e molemō.”—2 Timotheo 3:16, 17.

6. Buka ya Diane e bolela eng ka botlhokwa jwa kitso le botlhale jwa bomodimo?

⁶ Bibela gape ya re “utlwañ thutō, le tlhalehè.” E bua gore re ‘ipeele’ ditaolo tsa Modimo, re ‘tlhaeletse tlhalemaleje,’ le ‘go nna re batla’ tlhaloganyo jaaka re ne re ka batla dikhumo tse di fitlhegileng. Fa o latela kgakololo eno, he “u tla tlhaloganya go boiha Yehofa, me u tla bōna kicō ea Modimo.” Re bona gape le kgakololo eno: “Bomorwaaka, ka re, Ntheetsañ: gonne go segō ba ba tshegetsañ ditsela tsa me. Utlwañ thutō, lo tlhalehè, me lo se ka loa e gana. Go segō motho eo o nkutlwañ . . . Gonne eo o mpōnañ o bōna botshelō, me o tla bōna botsalanō mo go Yehofa.” A o tseela Bibela kwa godimo jalo mo o dirang maiteko a a ntseng jalo go ithuta dilo tse e di buang?—Diane 2:1-5; 8:32-35.

Bona Kitso

7. Ke dilo dife tse di botlhokwatlhokwa tse re tshwanetseng go di ithuta?

⁷ Bangwe ba basha ba itse dipalo tsotlhe tsa metshameko, kana ba ka go bolelela sengwe le sengwe ka setlhopha sa bone sa mmino se ba se ratang thata. Ba fitlhela go le motlhofo go ithuta dilo tsotlhe tseno le go di gakologelwa ka gonne ba a di kgatlhegela. Mme potso ya botlhokwa ke eno, Ke eng seo ba se itseng ka Modimo? Akanya fela ka seo a se dirileng. Modimo o dirile lobopo. O ne wa bolelela pele se batho ba neng ba tla se dira le ditiragalo pele di diragala. Bibela ga e re bolelele fela ka Modimo, mme e re ruta gape le gore re ka mo itumedisa jang. E re bontsha ka moo re ka bonang botshelo jo bo itumetseng ka gone le kafa re ka bonang botshelo jo bosakhutleng ka gone mo lefatsheng je lesha la tshiamo. A seo ga se botlhokwa go gaisa go itse gore ke mang yo o fentseng motshameko wa kgwele kana go ithuta maina a baopedi bao batho ba tla tlogang ba ba lebala fela ka bonako?—Isaia 42:5, 9; 46:9, 10; Amose 3:7.

8. Josia le Jesu ba ne ba tlhoma sekao sefe se se molemo?

⁸ Kgosi Josia yo mmotlana o ne a “simolola go batla Modimo oa ga Dafide rragwè,” fa a na le dingwaga di le 15. Jesu o ne a fitlhelwa a “dutse ha gare ga baruti,” mo tempeleng ya ga Jehofa, “a ba utlwa, a ba a ba botsa dipocō” fa a na le dingwaga di le 12.a Lefa o ka tswa o na le dingwaga di le kae, a wena jaaka Josia le Jesu, o kgatlhegela go ithuta ka dilo tse Modimo o di dirileng le tse a santseng a tla di dira?—2 Ditihalō 34:3; Luke 2:46.

9. (a) Basha ba bantsi ba na le bothata bofe? (b) Ke eng se se ka dirang gore go bala le go ithuta go nne motlhofo, mme a wena ka bowena o fitlhetse gore ruri go ntse jalo?

⁹ Lefa go ntse jalo, o ka nna wa re: ‘Go ithuta ke tiro e e bokete.’ Batho ba bantsi, ba bannye le ba bagolo, ga ba ise ba bale mo go lekaneng gore go bala go ba tlhofofalele. Fa o ntse o bala ka mo go oketsegileng, go bala go tla nna motlhofo. Fa o ithuta ka mo go oketsegileng, go ithuta go nna motlhogo. O nna le dikgopolo tse disha ka dilo tse o setseng o di itse, seo se dira gore o di tlhaloganye motlhofo le go di gakologelwa.

10. (a) O ka bona mo go oketsegileng jang go tswa mo dipokanong tsa Bokeresete? (b) O itemogetse eng mabapi le seno?

¹⁰ Ke eng se se ka go thusang gore o ithute ka mo go oketsegileng ka Modimo? Gongwe o ka nna gone kwa dipokanong tsa Bokeresete ka metlha ka mo go oketsegileng. A o ka baakanyetsa pele wa bo wa tsaya karolo tota? Ka sekai, a o ka kgona go bona kitso e e oketsegileng mo thutong eno ka go bala Dikwalo tsotlhe tse di umakilweng mme di sa tsopolwa? A go na le lefoko kana a mabedi a o a kwadileng fa thoko ga dirapa go go gakolola seo temana nngwe le nngwe e se tlhalosang mo serapeng kana mo thutong eo? A o itlwaetsa go akaretsa lefa e le e le nngwe fela ya ditemana tseno fa o araba go supa gore o anaanela motlotlo ono wa Dikwalo? Mogolwane mongwe wa phuthego yo a sa bolong go nna a ya kwa dipokanong tseno ka metlha ka dingwaga di le dintsi o bua jaana: “Ga go motlhofo mo go nna go tsepamisa mogopolo wa me mo thutong epe fela fa tota ke sa e baakanyetsa, mme go monate tota fa ke ipona ke ntse ke tshwara dintlha fa thuto eo ke e ithutileng sentle e ntse e tsweletse.”

11. O ka solegelwa molemo ka mo go oketsegileng go tswa mo dipuong tse di thailweng mo Bibeleng jang, mme ke ka ntlhayang fa seno se le botlhokwa?

¹¹ Fa o reeditse dipuo tsa Bibela, a o kwala dintlha tse dikhutshwane go go thusa go bona gore puo eno e tswelela jang le go tsepamisa mogopolo mo go seo se buiwang? A o bapisa seo o se utlwang le seo o setseng o se itse, gore o tle o kgone go se tlhaloganya motlhofo le go se gakologelwa botoka? Jesu o ne a rapela jaana: “Botshelō yo bo sa khutleñ ke yo, gore ba gu itse, wèna, Modimo o o osi, o o boamarure, le èna eo u mo romileñ, eboñ Yesu Keresete.” (Yohane 17:3) A kitso e e isang kwa botshelong ga se e e molemo go gaisa e o ka e bonang? Elatlhoko seo Bibela e se buang kaga seno: “Gonne Yehofa o aba botlhale; kicō e cwa mo molomuñ oa gagwè, le tlhaloganyō: Gonne botlhale bo tla gu tsèna mo peduñ, le kicō e tla nna monate mo moeeñ oa gago; Tlhalemaleye e tla gu tlhodumèla, tlhaloganyō e tla gu boloka.”—Diane 2:6, 10, 11.

A Kanaanelo ya Gago E Gole

12. Ke dilo dife tse dingwe tse di tlhomologileng tseo Modimo o di re diretseng?

¹² A ruriruri re anaanela seo Modimo o se re diretseng? O bopile lefatshe le lentle wa bo wa le baakanya gore go nne le botshelo mo go lone. O bopile batsadi ba rona ba ntlha, ka gone a dira gore re kgone go tsholwa. O ne a rulaganya gore re tshegediwe ke malapa le phuthego e e lorato. (Genesise 1:27, 28; Yohane 13:35; Bahebera 10:25) O ne a romela Morwa yo e leng wa gagwe wa leitibolo go tla go re ruta ka Ene le go ntsha thekololo eo e dirang gore go nne le botshelo jo bosakhutleng. A ruriruri o anaanela dimpho tse di molemolemo tseo? A di go tlhotlheletsa gore o amogele taletso ya go ithuta ka ene le go mo direla?—Mathaio 20:28; Yohane 1:18; Baroma 5:21.

13. Ke ka ntlhayang fa o ikutlwa gore Modimo o kgatlhegela batho ka bongwe?

¹³ Mmopi wa lobopo o kgatlhegela batho. O ne a bitsa Aberahame “tsala ea me” a bo a raya Moshe a re: “Kea gu itse ka leina.” (Isaia 41:8; Ekesodo 33:12) Buka ya Tshenolō e bontsha gore Modimo o na le buka ya tshwantshetso, kana ‘lokwalo lwa botshelo,’ le le nang le maina a batlhanka ba ba ikanyegang go tloga fa “lehatshe le thaiwa.” A leina la gago le tla nna gone moo?—Tshenolō 3:5; 17:8; 2 Timotheo 2:19.

14. Go dira kafa melaometheong ya Modimo go ka tokafatsa botshelo jwa gago jang?

¹⁴ Melaometheo ya Modimo e a dira. Go dira dilo ka tsela ya gagwe go tlosa mathata a mantsi—boitsholo jo bo sa siamang, go tshwakgolwa ke diokobatsi, go lemalela bojalwa, go ima go go sa batlegeng, malwetsi a tlhakanelodikobo, thubakanyo, go bolaana, le malwetsi a mangwe gape a mantsintsi. Go tsamaya mo ditseleng tsa gagwe gape go tla go thusa go bona ditsala tsa mmatota le go tshela botshelo jo bo itumetseng. A ga go mosola go dira jalo? (1 Bakorintha 6:9-11) Le eleng motho yo mmotlana yo a setseng a iketleeditse go dira dilo ka tsela ya Modimo a ka bona nonofo e e oketsegileng ya go dira se se siameng. Bibela e bua jaana: “Monna eo o boitekanèlō [Jehofa] u tla mo ichupetsa u le boitekanèlō.” E re tlhomamisetsa gape gore ga a kitla a ‘latlha baitshepi ba gagwe’ kana gone go “latlha batho ba gagwè.”—Dipesalema 18:25; 37:28; 94:14; Isaia 40:29-31.

Gatelang Pele mo Go Direleng Modimo

15. Solomone o ne a naya basha kgakololo efe ya bomodimo?

¹⁵ A mekgele ya gago e remeletse mo lefatsheng le legologolo leno le le swang kana mo go le lesha la tshiamo? A o reetsa Modimo, kana batho ba ba tlhalefileng ka tsela ya lefatshe ba ba mo ganetsang? A o beile boitlosobodutu, thuto e e kwa godimo, kana tiro ya boitshediso e e go tseelang nako yotlhe kwa pele ga Modimo le tirelo ya gagwe? Kgosi Solomone yo o botlhale o ne a kwala buka yotlhe ya Bibela ya Moreri go bontsha seo se tshwanetseng go tla pele mo matshelong a rona. O ne a konela jaana: “U bo u gakologèlwè Mmopi oa gago mo metlheñ ea bokau yoa gago, metlha ea boshula e se e be e tle, le dinyaga di e se di atamele, motlhañ u tla buañ, u re, Ga ke na kgatlhègō mo go cōna. Bokhutlō yoa mahoko ke yo; go utlwilwe gotlhe: Boiha Modimo, u bo u tshegetsè ditaolō tsa ōna; gonne mo, ke chwanèlō eotlhe ea motho.”—Moreri 12:1, 13.

16. Batho ba basha ba ka gagabelela ditshiamelo tse di oketsegileng jang?

¹⁶ Bakaulengwe botlhe ba ba godileng ba Bakeresete ba o ba itseng—bagolwane, babulatsela, le molebedi wa gago wa potologo le wa kgaolo—ka nako nngwe e ne e le bana. Ke eng seo se neng sa dira gore ba bone masego a ba a itumelelang gompieno? Ba ne ba rata Modimo mme ba batla go mo direla. Bontsi jwa bone bo ne jwa dirisa nako e ba neng ba sena sepe se ba se dirang ka yone fa ba santse ba le basha go bona kitso le boitemogelo. Ba ne ba ithuta ba bo ba tsaya karolo kwa dipokanong. Ba ne ba nna le seabe mo go ruteng, mme ba ne ba gagabelela go bona ditshiamelo tse di oketsegileng—bobulatsela, tirelo ya Bethele, kana tiro epe e nngwe gape e e duelang. E ne e se ‘basha ba ditswerere’; mme ba ne ba kgatlhegela dilo tse di tlwaelegileng ba bile ba tshwenyega jaaka wena. Lefa go le jalo ba ne ba dirisa kgakololo eno: “Leha e ka bo e le eñ se lo se dihañ, lo se dihè ka pelo eotlhe, yaka e ka bo e le go dihèla Morèna, e señ batho.”—Bakolosa 3:23; bapisa Luke 10:27; 2 Timotheo 2:15.

17. Ke eng se se ka thusang basha go tswelela pele mo tirelong ya Modimo?

¹⁷ Go tweng ka wena? A ruriruri o anaanela dilo tsa bomodimo? A o tlhopha ditsala mo go bao ba bayang dilo tsa semoya kwa pele? A o kgothaletsa ba bangwe go dira le wena mo tirong ya Bokeresete? A o kopanela le mo tirong ya Bokeresete le ba bangwe ba ba godileng, ba ba nang le boitemogelo jo bogolwane gore o ithute mo go bone, go utlwa kafa ba itumelang ka gone, le go kgothadiwa ke ditiro tsa bone tse di molemo? Mosupi mongwe o gakologelwa letsatsi lengwe, mo e ka nnang dingwaga tse 20 tse di fetileng, fa e ne e le lantlha motho mongwe yo mogolo a mo laleletsa ka lorato go dira le ene mo bodiheding jwa tshimo. Seno, jaaka a bolela, se ne sa fetola botshelo jwa gagwe: “E ne e le lantlha ke ya ka gonne ke ne ke batla, eseng ka gonne batsadi ba me ba ne ba ntsaya go tsamaya le bone.”

18. Ke dilo dife tse motho a tshwanetseng go akanya ka tsone pele a ka kopa go kolobediwa?

¹⁸ Fa e le gore o dira botswelelopele mo go direng dilo ka tsela ya Modimo, o ka nna wa akanya ka go kolobediwa go ise go e kae. Go botlhokwa go gakologelwa gore kolobetso ga se kgato ya go fetela mo go nneng mogolo yo mmotlana. Ga e supe gore jaanong o a gola, kana ebile ga se selo se o tshwanetseng go se dira ka gonne ditsala tsa gago le tsone di tsere kgato eo. Pele o kopa gore o kolobediwe, o tshwanetse wa bo o setse o na le kitso ya motheo ka boammaaruri ebile o tshela tumalanong le Lefoko la Modimo. O tshwanetse wa bo o na le boitemogelo jo bo lekaneng mo go abalaneng le ba bangwe kitso eo ebile o lemoga gore seno ke karolo ya botlhokwatlhokwa ya kobamelo ya boammaaruri. (Mathaio 24:14; 28:19, 20) Gape o tshwanetse go itse gore o tlile go lebelelwa gore o tshele tumalanong le melaometheo ya Bibela ya boitsholo ya tshiamo morago ga go tsaya kgato eno e e botlhokwa ya Bokeresete.b O tshwanetse wa bo o neetse botshelo jwa gago mo go Rre wa selegodimo yo o lorato mo pelong ya gago.—Bapisa Pesalema 40:8, 9.

19. Motho o tshwanetse go kolobediwa leng?

¹⁹ Kolobetso ke kgato e o e tsayang fa o setse o sweditse tota gore lefa go ka diragala eng mo botshelong jwa gago, o tla direla Modimo. Ke sesupo sa phatlalatsa sa gore o ineetse ka botlalo, o sa itshiele sepe, ebile o sena mabaka ape a o a beetseng fa thoko mo go Jehofa, o ineetse ka Jesu Keresete go dira go rata ga Modimo. Mogolwane mongwe wa Mokeresete o gakologelwa letsatsi lengwe, mo e ka nnang dingwaga tse di masome a matlhano tse di fetileng, fa a ne a lemoga go re: “Ke tshwanetse go dira sengwe ka gone!” Michelle, ebong Mosupi mongwe yo mmotlana yo a neng a kolobediwa kwa Newcastle kwa Ennyelane dingwaga di le mmalwa tse di fetileng, o ne a bua jaana: “Ke ne ka lemoga gore ke tshwanetse go ineela le go kolobediwa fa ke na le dingwaga di le 13; go ne go se sepe seo ke neng ke batla go se dira fa e se go direla Modimo.”

20. (a) Diketekete tse di masomesome tsa basha di ile tsa tlhoma sekao sefe se se molemo? (b) Kgato eno e tshwanetse go lejwa jang?

²⁰ Bosheng jaana go ile ga kolobediwa dikete tse di masomesome tsa basha. Ba ne ba setse ba ithuta Lefoko la Modimo le ditsela tsa gagwe, mme morago ba kolobediwa mo metsing, mme ba kopana le ba bangwe ba bagolo mo go tshwantshetseng boineelo jwa bone mo Modimong phatlalatsa. Ba itse gore kolobetso ga se bokhutlo mme ke tshimologo ya tsela ya boammaaruri ya go ineela ya botshelo joo ba iketleeditseng go bo senya mo tirelong ya ga Jehofa ka bosakhutleng.

[Dintlha tse di kwa tlase]

O Ne O Ka Araba Jang?

◻ Ke ka ntlhayang fa go le botlhokwa jaana go itse Lefoko la Modimo?

◻ O ka bona go go oketsegileng go tswa mo dipokanong tsa Bokeresete jang?

◻ Ke masego afe a a tswang kwa Modimong a a tshwanetseng go re tlhotlheletsa gore re mo ikobele?

◻ O ka gatela pele jang mo go direleng Modimo?

◻ Motho o tshwanetse go kolobediwa leng?