Amogela Ditsholofetso tsa Modimo ka go Supa Tumelo

‘[Jehofa] o re neile dipolelo tsa one tsa tsholofetso tse di tlhokegang le tse dikgolo thata.’—2 PETERE 1:4.

1. Ke eng se se re thusang go bontsha tumelo ya boammaaruri?

JEHOFA o batla gore re supe gore re dumela ditsholofetso tsa gagwe. Lefa go ntse jalo, “batho ga ba na tumèlō botlhe.” (2 Bathesalonia 3:2) Nonofo eno ke loungo lwa moya wa Modimo o o boitshepo, kana maatla a gagwe a a dirang. (Bagalatia 5:22, 23) Ka jalo, ke fela ba ba gogwang ke moya wa ga Jehofa bao ba ka kgonang go bontsha tumelo.

2. Moaposetoloi Paulo o tlhalosa “tumelo” jang?

² Mme tumelo ke eng? Moaposetoloi Paulo a re ke “tlhōmamishō kaga dilō tse di sa bonweñ.” Tlhomamiso ya dilo tseno tse di sa bonweng e nonofile thata mo e leng gore tumelo e tshwana le yone. Gape ga twe tumelo ke “go ikanya kaga dilō tse di sholohèlwañ” ka gore ba ba nang le nonofo eno ba na le tlhomamisetso ya gore dilo tsotlhe tse Jehofa Modimo a di solofetsang di boammaaruri mo e leng gore go tshwana fela le gore di setse di diragaditswe.—Bahebera 11:1.

Tumelo le Ditsholofetso tsa ga Jehofa

3. Bakeresete ba ba tloditsweng ba tla amogela eng fa ba ka bontsha tumelo?

³ Gore re tle re itumedise Jehofa, re tshwanetse go dumela ditsholofetso tsa gagwe. Moaposetoloi Petere o ne a bontsha seno mo lokwalong lwa gagwe lwa bobedi lo lo tlhotlheleditsweng leo a le kwadileng mo e ka nnang ka 64 C.E. O ne a bontsha gore fa Bakeresete ka ene ba ba tloditsweng ba ne ba na le tumelo, ba ne ba tla bona fa Modimo o diragatsa “dipolèlō tsa ōna tsa choloheco tse di tlhōkègañ le tse dikgolo thata.” Ka ntlha ya seno, ba ne ba tla ‘nna baabedwi ba tlholego ya selegodimo’ e le baruaboswa mmogo le Jesu Keresete mo Bogosing jwa selegodimo. Ka tumelo le ka ntlha ya thuso e e tswang go Jehofa Modimo, ba ile ba tlogela go nna makgoba a mekgwa le ditiro tse di bosula tse di dirwang mo lefatsheng leno. (2 Petere 1:2-4) Mme a ko o akanye fela ka seo! Bao ba nang le tumelo ya boammaaruri ba itumelela kgololesego e e tlhwatlhwakgolo e e ntseng jalo gompieno.

4. Ke dinonofo dife tseo re tshwanetseng go di tsenya mo tumelong ya rona?

⁴ Go dumela ditsholofetso tsa ga Jehofa le go anaanela kgololesego e Modimo o e re fileng go tshwanetse go re tlhotlheletsa gore re dire gotlhe mo re ka go kgonang gore re nne Bakeresete ba ba tlhomang sekao. Petere o ne a bolela jaana: “Lo ko lo oketsè ka tlhōahalō, ke go re, mo tumeloñ ea lona lo tsenyè go [nna moyamontle, NW], le mo go [nneng moyamontle] ga lona lo tsenyè kicō; Le mo kicoñ ea lona lo tsenyè boikgapō; le mo boikgapoñ yoa lona lo tsenyè pelotelele; le mo peloteleleñ yoa lona lo tsenyè poihōmodimo; Le mo poihoñmodimo ea lona lo tsenyè go rata bakauleñwe: le mo go rateñ bakauleñwe lo tsenyè loratō.” (2 Petere 1:5-7) Ka jalo Petere o re fa lenaane leo re tla bong re dira sentle fa re ka dira gore le nne mo megopolong ya rona. A re ke re tlhatlhobeng dinonofo tseno.

Dikarolo Tse Di Botlhokwa tsa Tumelo

5, 6. Go nna moyamontle go kaya eng, mme re ka go tsenya jang mo tumelong ya rona?

⁵ Petere o ne a bolela gore dilo tseno, go nna moyamontle, kitso, boikgapo, go nna pelotelele, poifomodimo, go rata bakaulengwe le lorato re tshwanetse go di tsenya e nngwe mo go e nngwe re bo re di tsenye le mo tumelong ya rona. Re tshwanetse go dira ka natla gore dinonofo tseno e nne dikarolo tsa botlhokwa mo tumelong ya rona. Ka sekai, go nna moyamontle ga se nonofo eo re ka e bontshang fa re sena tumelo. Mokwadi wa bukantswe W. E. Vine o bontsha gore mo go 2 Petere 1:5, “go nna moyamontle go tsenngwa jaaka nonofo e e botlhokwa fa motho a batla go supa tumelo.” Nngwe le nngwe ya dinonofo tse dingwe tse Petere a di umakileng e tshwanetse gape ya nna karolo ya tumelo ya rona.

⁶ Sa ntlha re tshwanetse gore re tsenye go nna moyamontle mo tumelong ya rona. Go nna moyamontle go raya go dira se se molemo mo matlhong a Modimo. Lefoko la Segerika le le ranotsweng fano jaaka “go nna moyamontle,” dithanolo tse dingwe di le ranola jaaka “bomolemo.” (New International Version; The Jerusalem Bible; Today’s English Version) Go nna moyamontle go dira gore re tile go dira bosula kana go utlwisa ba bangwe botlhoko. (Pesalema 97:10) Gape go re tlhotlheletsa gore re dire ditiro tsa bopelokgale tse di molemo tse di solegelang ba bangwe molemo semoyeng, mo mmeleng, le mo maikutlong.

7. Ke eng fa re tshwanetse go tsenya kitso mo tumelong ya rona le mo go nneng moyamontle ga rona?

⁷ Ke eng fa Petere a re kgothaletsa go tsenya kitso mo tumelong ya rona re bo re e tsenye mo go nneng moyamontle ga rona? Ee, jaaka fa re lebana le dilo tse disha tse di gwetlhang tumelo ya rona, re tlhoka go nna le kitso gore re tle re kgone go ka farologanya molemo le bosula. (Bahebera 5:14) Re oketsa kitso ya rona ka go ithuta Bibela le go dirisa se se leng mo Lefokong la Modimo le ka go dira dilo ka botlhale mo botshelong jwa rona jwa letsatsi le letsatsi. Mme mo letlhakoreng le lengwe, seno se re thusa gore re nne re na le tumelo le go tswelela re dira ditiro tse di supang go nna moyamontle fa re lekwa.—Diane 2:6-8; Yakobe 1:5-8.

8. Boikgapo ke eng, mme bo amanngwa jang le go nna pelotelele?

⁸ Gore re tle re kgone go fenya le diteko ka tumelo, re tshwanetse go tsenya boikgapo mo kitsong e re nang le yone. Lefoko la Segerika le le kayang “boikgapo” le bua ka go kgona go ithiba. Loungo lono lwa moya wa Modimo lo re thusa gore re gape megopolo ya rona, mafoko a rona le boitshwaro jwa rona. Fa re nnela go ikgapa, re tsenya pelotelele. Lefoko la Segerika le le kayang “pelotelele” le kaya go ema o nitame ka bopelokgale, eseng go ikgogona o hutsafetse ka ntlha ya botlhoko jo o sa kgoneng go bo itshokela. Jesu o ne a itshokela mokgoro ka ntlha ya boitumelo jo a neng a itse gore bo mo emetse kwa pele. (Bahebera 12:2) Maatla ao re a fiwang ke Modimo le bopelotelele di nonotsha tumelo ya rona mme di re thusa gore re itumele fa re le mo pitlaganong, re emelane le thaelo, le gore re se ka ra ineela ka nako ya pogiso.—Bafilipi 4:13.

9. (a) Poifomodimo ke eng? (b) Ke eng fa re tshwanetse go tsenya go rata bakaulengwe mo poifomodimong? (c) Re ka tsenya jang lorato mo go rateng bakaulengwe ga rona?

⁹ Mo bopeloteleleng jwa rona re tshwanetse go tsenya poifomodimo—re tlotle Jehofa, re mo obamele le go mo direla. Tumelo ya rona e a nonofa fa re ntse re bontsha poifomodimo mme re bona ka moo Jehofa a dirisanang ka teng le batho ba gagwe. Lefa go ntse jalo, re tshwanetse go rata bakaulengwe gore re kgone go supa poifomodimo. Tota ebile “eo o sa rateñ mogagabō eo o mmōnañ ka matlhō, ga a kake a rata Modimo o a e señ a o bone.” (1 Yohane 4:20) Dipelo tsa rona di tshwanetse go re tlhotlheletsa gore re rate batlhanka ba bangwe ba ga Jehofa ka lorato lwa boammaaruri mme re batla go ba direla molemo ka metlha. (Yakobe 2:14-17) Mme ke eng fa go twe re tshwanetse go tsenya lorato mo go rateng bakaulengwe ga rona? Kwantle ga pelaelo Petere o ne a bontsha gore re tshwanetse go bontsha batho botlhe lorato eseng bakaulengwe ba rona fela. Lorato lono lo bontshiwa segolobogolo ka go rera mafoko a a molemo le ka go thusa batho semoyeng.—Mathaio 24:14; 28:19, 20.

Matswela A A Farologaneng

10. (a) Re tla itshwara ka tsela efe fa re tsentse go nna moyamontle, kitso, boikgapo, go nna pelotelele, poifomodimo, go rata bakaulengwe le lorato mo tumelong ya rona? (b) Ke eng se se diragalang fa motho yo o ipitsang Mokeresete a sena dinonofo tseno?

¹⁰ Fa re tsenya go nna moyamontle, kitso, boikgapo, go nna pelotelele, poifomodimo, go rata bakaulengwe le lorato mo tumelong ya rona, re tla akanya, re tla bua le go itshwara ka ditsela tse Modimo a di amogelang. Mo letlhakoreng le lengwe, fa motho yo o ipitsang Mokeresete a palelwa ke go bontsha dinonofo tseno, o foufala semoyeng. O ‘[tswalela matlho a gagwe lesedi, NW]’ la Modimo a bo a lebala gore o setse a tlhapisitswe dibe tsa gagwe tsa bogologolo. (2 Petere 1:8-10; 2:20-22) A le ka motlha re se ka ra palelwa ka tsela eo mme ra se ka ra tlhola re dumela ditsholofetso tsa Modimo.

11. Ke eng seo ka tshwanelo re ka se lebelelang go tswa go batlodiwa ba ba ikanyegang?

¹¹ Bakeresete ba ba tloditsweng ba ba ikanyegang ba dumela ditsholofetso tsa ga Jehofa mme ba leka ka natla gore ba nne ba ntse ba le mo boemong jwa batho ba ba biditsweng ke ene le ba a ba itshenkentseng. Go sa kgathalesege dikgoreletsi tse ba ka kopanang le tsone, re ka lebelela go ba bona ba bontsha dinonofo tsa Modimo. Batlodiwa ba ba ikanyegang ba ‘newa go tsena ka megolokwane e megolo mo bogosing jo bo sa khutleng jwa ga Jesu Keresete’ ka go tsosediwa botshelong jwa semoya kwa legodimong.—2 Petere 1:11.

12. Re tshwanetse go tlhaloganya jang mafoko a 2 Petere 1:12-15?

¹² Petere o ne a lemogile gore o tla tloga a swa, mme o ne a lebeletse gore e tla re kgabagare a tsosediwe botshelong jwa selegodimo. Mme ka nako ya fa a ne a santse a tshela a le mo “motlaaganeñ o”—eleng mmele wa gagwe—o ne a leka go dira gore badumedi ka ene ba nne le tumelo mme a ba tlhotlheletsa ka go ba gakolola ka dilo tse ba tshwanetseng go di dira gore ba amogelwe ke Modimo. Fa a sena go swa, bakaulengwe le bokgaitsadi ba ga Petere ba semoya ba ne ba nonotsha tumelo ya bone ka go gakologelwa mafoko a gagwe.—2 Petere 1:12-15.

Go Dumela Lefoko la Polelelopele

13. Modimo o ile a neela jang bosupi jo bo nonotshang tumelo kaga go tla ga ga Keresete?

¹³ Modimo ka boene o ne a neela bosupi jo bo nonotshang tumelo jwa gore eleruri Jesu o tla tla ka “nonohō le kgalalèlō e kgolo.” (Mathaio 24:30; 2 Petere 1:16-18) Ka go bo baperesiti ba baheitane ba ne ba sena bosupi ba ne ba bolela ditlhamane tsa maaka ka medimo ya bone, mme lefa go ntse jalo, Petere, Jakobe, le Johane e ne e le basupi ba ba boneng kgalalelo ya ga Keresete ka matlho ka nako ya fa a ne a fetolwa ponalo. (Mathaio 17:1-5) Ba ne ba mmona fa a ne a galalediwa mme ba utlwa modumo wa lentswe la Modimo fa a ne a amogela Jesu jaaka Morwawe yo o rategang. Go amogelwa ga ga Keresete jalo le go bonala ga gagwe ka kgalalelo mo a neng a go newa go ne go mo fa tlotlo le kgalalelo. Ka ntlha ya tshenolo eno e e tswang go Modimo, Petere o ne a bitsa lefelo le gongwe e neng e le thotana ya Heremone a re ke ‘thaba e e boitshepo.’—Bapisa Ekesodo 3:4, 5.

14. Tumelo ya rona e tshwanetse go amiwa jang ke go fetolwa ga ga Jesu ponalo?

¹⁴ Go fetolwa ga ga Jesu ponalo go tshwanetse ga ama tumelo ya rona jang? Petere o ne a bolela jaana: “Me re na le lehoko ya polèlèlō pele le rurehadicwe bogolo; ye lo tla boñ lo diha sentlè ha lo le tlhōkōmèla, yaka ha e ka bo e le lobōnè lo lo phatsimañ mo heloñ ha go lehihi, go tlo go tsamaeè bosa boo sè, le naledi ea moshō e lo cwèlè mo dipeduñ.” (2 Petere 1:19) Go bonala “lehoko ya polèlèlō pele” le ne le sa akaretse fela boperofeti jwa Dikwalo tsa Sehebera jo bo buang ka Mesia mme gape le ne le akaretsa polelo ya ga Jesu ya gore o ne a tla tla “ka nonohō le kgalalèlō e kgolo.” Lefoko le ne le “rurehadicwe bogolo” jang ka go fetolwa ga gagwe ponalo? Tiragalo eo e ne ya tlhomamisa lefoko la polelelopele kaga go tla ga ga Keresete a le mo kgalalelong a na le nonofo ya Bogosi.

15. Ke eng se se akarediwang mo go tlhokomeleng lefoko la polelelopele?

¹⁵ Gore re tle re nonotshe tumelo ya rona re tshwanetse go tlhokomela lefoko la polelelopele. Seno se raya gore re tshwanetse go ithuta lefoko leo, re tlotle ka lone kwa dipokanong tsa Bokeresete, mme re dirise kgakololo ya lone. (Yakobe 1:22-27) Re tshwanetse go dira gore e nne “lobōnè lo lo phatsimañ mo heloñ ha go lehihi,” go phatsimisa dipelo tsa rona. (Baefesia 1:18) Ke ka tsela eo fela e ka re kaelang go fitlhela “bosa boo sè,” kana fa “naledi ea moshō,” eleng Jesu Keresete a iponatsha a le mo kgalalelong. (Tshenolō 22:16) Fa a itshenola jalo go tla raya go senngwa ga ba ba senang tumelo mme ba ba nang le tumelo ba tla segofadiwa.—2 Bathesalonia 1:6-10.

16. Ke eng fa re ka dumela gore ditsholofetso tsotlhe tse di boleletsweng pele mo Lefokong la Modimo di tla diragadiwa?

¹⁶ Baperofeti ba Modimo e ne e se banna ba ba botlhale fela ba ba neng ba bolela dipolelelopele tse di botlhale ka go bo Petere o ne a bolela jaana: “Ga go na polèlèlō pele epè ea dikwalō e e iphuthololèlwañ ke motho a le moñwe hèla. Gonne ga go polèlèlō pele epè e e kileñ ea tla ka go rata ga motho hèla: me go bua ga batho ga cwa mo Modimoñ, ka ba tlhotlhelediwa ke Mōea o o Boitshèpō.” (2 Petere 1:20, 21) Ka sekai, Dafide o ne a bolela jaana: “Mōea oa ga Yehofa o no oa bua ka nna.” (2 Samuele 23:1, 2) Mme Paulo o ne a kwala jaana: ‘Lokwalo longwe lo longwe lo kwadilwe ka tlhotlheletso ya Modimo.’ (2 Timotheo 3:16) Ereka baperofeti botlhe ba Modimo ba ne ba tlhotlheleditswe ka moya wa gagwe, re ka dumela gore ditsholofetso tsotlhe tse di mo Lefokong la gagwe di tla diragadiwa.

Ba Ne Ba Dumela Ditsholofetso tsa Modimo

17. Ke tsholofetso efe e e neng e le motheo wa tumelo ya ga Abele?

¹⁷ Ditsholofetso tsa ga Jehofa e ne e le motheo wa tumelo ya “boididi yo bogolo” jwa basupi ba Bakeresete ba pele. (Bahebera 11:1–12:1) Ka sekai, Abele o ne a dumela tsholofetso ya Modimo e e kaga “losika” lo lo neng lo tla kgoba tlhogo ya “nōga.” Go na le bosupi jwa gore Modimo o ne a diragatsa katlholo ya gagwe mo batsading ba ga Abele. Ka kwa ntle ga Edene, Adame le lelapa la gagwe ba ne ba ja dijo ka mofufutso wa difatlhego tsa bone ka gonne mmu o o neng o hutsitswe o ne o ntsha mebitlwa le sitlwasitlwane. Gongwe Abele o ne a bona keletso e Efa a neng a na le yone mo monneng wa gagwe le ka moo Adame a neng a mo laola ka teng. Tota o ne a bua ka botlhoko jwa fa a imile. Mme lefelo leo go neng go tsenwa ka lone mo tshimong ya Edene le ne le thibetswe ke ditšheruba le ke kgabo ya tšhaka. (Genesise 3:14-19, 24) Dilo tseno tsotlhe e ne e le “tlhōmamishō” e e neng e tlhomamisetsa Abele gore kgololo e tla tla ka Losika lo lo solofeditsweng. Abele o ne a ntshetsa Modimo setlhabelo se se gaisang sa ga Kaine thata ka go bo a ne a na le tumelo.—Bahebera 11:1, 4.

18, 19. Aberahame le Sara ba ne ba bontsha tumelo ka ditsela dife?

¹⁸ Ditlhogo tsa lotso ebong Aberahame, Isake, le Jakobe le bone ba ne ba dumela ditsholofetso tsa ga Jehofa. Aberahame o ne a dumela tsholofetso ya Modimo ya gore ditshika tsotlhe tsa lefatshe di tla itshegofatsa mo go ene mme losika lwa gagwe lo tla newa lefatshe. (Genesise 12:1-9; 15:18-21) Morwawe Isake le setlogolo sa gagwe ebong Jakobe e ne e le “barua boshwa ka èna ba eōna polèlō euō ea choloheco.” Ka tumelo Aberahame a “cwa moyaki mo lehatshiñ ya polèlō ea choloheco” mme a lebelela “motse o e leñ ōna o o nañ le methèō tōta,” Bogosi jwa Modimo jwa selegodimo jo ka jone a neng a tla tsosiwa gore a tshele mo lefatsheng. (Bahebera 11:8-10) A o na le tumelo e e tshwanang le eo?

¹⁹ Mosadi wa ga Aberahame ebong Sara, o ne a na le dingwaga di ka nna 90 ebile a setse a tsofetse go ka tshola ngwana fa a ne a dumela tsholofetso ya Modimo mme o ne a newa nonofo ya “go ithwala” mme a tshola Isake. Jalo he, Aberahame yo o neng a le dingwaga di le 100, “a chwana yaka a shule” fa go buiwa kaga go tshola bana, mo go ene go ne ga ‘tlholega bontsi jo bo kana ka dinaledi tsa legodimo.’—Bahebera 11:11, 12; Genesise 17:15-17; 18:11; 21:1-7.

20. Le mororo ditlhogo tsa lotso di ile tsa se ka tsa bona go diragadiwa ga ditsholofetso tsa Modimo ka botlalo, ke eng seo ba neng ba se dira?

²⁰ Ditlhogo tsa lotso tse di ikanyegang di ile tsa swa di sa bona ditsholofetso tsotlhe tsa Modimo di diragadiwa ka botlalo. Lefa go ntse jalo, “ba di bōna, ba ba ba di itumèlèla di le kgakala, me ba ipolèla ha ba le baeñ le baeti mo lehatshiñ.” Go ne ga feta dikokomane di le dintsi pele Lefatshe Le Le Solofeditsweng e nna boswa jwa bana ba ga Aberahame. Lefa go ntse jalo, ditlhogo tsa lotso tse di boifang Modimo di ile tsa dumela ditsholofetso tsa Modimo mo botshelong jwa bone jotlhe. Ereka le ka motlha ba ne ba se ka ba felelwa ke tumelo, mo bogautshwaneng ba tla tsosediwa go tshela mo lefatsheng le e leng “motse” o Modimo o ba o baakanyeditseng eleng Bogosi jwa Bomesia. (Bahebera 11:13-16) Ka mo go tshwanang, tumelo e ka dira gore re nne re ikanye Jehofa lefa re bona ditsholofetso tsa gagwe tsotlhe tse di gakgamatsang di sa diragadiwe ka bonako. Tumelo ya rona gape e tla dira gore re utlwe Modimo, fela jaaka fa Aberahame a dirile. Mme fela jaaka a ne a naya bana ba gagwe boswa jwa semoya, le rona re ka thusa bana ba rona gore ba dumele ditsholofetso tse di itumedisang tsa ga Jehofa.—Bahebera 11:17-21.

Go Botlhokwa Gore Bakeresete Ba Nne le Tumelo

21. Ke eng seo re tshwanetseng go se akaretsa mo tumelong ya rona gore re tle re amogelwe ke Modimo gompieno?

²¹ Legale, tumelo e akaretsa mo go oketsegileng go na le go dumela fela gore ditsholofetso tsa ga Jehofa di tla diragadiwa. Go ralala hisitori ya batho, go bontsha tumelo mo Modimong ka ditsela tse di farologaneng e nnile selo se se botlhokwa gore a tle a re amogele. Paulo o ne a bontsha gore “kwa ntlè ga tumèlō go reteletse rure go kgatlha [Jehofa Modimo]: gonne eo o tlañ Modimoñ o na le go dumèla ha o leeō, e bile e le ōna moduedi oa ba ba o batlañ.” (Bahebera 11:6) Gompieno, gore motho a amogelwe ke Jehofa o tshwanetse gore a dumele mo go Jesu Keresete le mo setlhabelong se Modimo a se ntshitseng ka ene. (Baroma 5:8; Bagalatia 2:15, 16) Go ntse fela jaaka Jesu ka boene a ne a bolela a re: “Modimo o ratile lehatshe mo go kalo kalo, oa ntsha Morwa ōna eo o tsecweñ a le esi, gore leha e le mañ eo o dumèlañ mo go èna a se ka a nyèlèla, me a bōnè botshelō yo bo sa khutleñ. Eo o dumèlañ mo go Morwa Modimo o na le botshelō yo bo sa khutleñ; me eo o ganañ go utlwa, Morwa Modimo, ga a ketla a bōna botshelō, me bogale yoa Modimo bo nntse mo go èna.”—Yohane 3:16, 36.

22. Bogosi jwa Bomesia bo tla diragatsa tsholofetso efe?

²² Jesu o na le seabe se segolo mo go diragadiweng ga ditsholofetso tsa Modimo kaga Bogosi jo Bakeresete ba bo rapelelang. (Isaia 9:6, 7; Daniele 7:13, 14; Mathaio 6:9, 10) Jaaka fa Petere a ne a bontshitse, go fetolwa ponalo go ne go tlhomamisa polelelopele ya go tla ga Jesu a na le maatla a Bogosi a le mo kgalalelong. Bogosi jwa Bomesia bo tla diragatsa tsholofetso e nngwe ya Modimo ka gonne Petere o ne a kwala jaana: “Kaha poleloñ ea ōna ea choloheco, re lebeletse magodimo a masha, le lehatshe ye lesha, a go tla agañ tshiamō mo go aōna.” (2 Petere 3:13) Go ne ga diragadiwa polelelopele e e tshwanang fa Bajuda bao e neng e le batshwarwa kwa Babelona ba ne ba busediwa kwa nagagaeng ya bone ka 537 B.C.E. ka nako ya fa Serubabele a ne a le mmusi mme Joshua e ne e le moperesiti yo mogolo. (Isaia 65:17) Mme Petere o ne a bua ka isagwe ka nako ya fa “magodimo a masha”—Bogosi jwa Bomesia jwa selegodimo—bo busa “lehatshe ye lesha” eleng batho ba ba siameng ba ba tshelang mo lefatsheng leno.—Bapisa Pesalema 96:1.

23. Ke dipotso dife tse di leng malebana le go nna moyamontle tse re tla tlotlang ka tsone?

²³ Jaaka batlhanka ba ba ikanyegang ba ga Jehofa le balatedi ba Morwawe yo o rategang, Jesu Keresete, re eletsa thata go bona lefatshe le lesha le Modimo o le solofeditseng. Re a itse gore le atametse, mme re dumela gore ditsholofetso tsotlhe tsa ga Jehofa tse di itumedisang di tla diragadiwa. Gore re tle re sepele ka tsela e Modimo wa rona a e amogelang, re tshwanetse go nonotsha tumelo ya rona ka go tsenya go nna moyamontle, kitso, boikgapo, go nna pelotelele, poifomodimo, go rata bakaulengwe le lorato mo go yone.a Malebana le seno, go ka nna ga bodiwa gore, Re ka supa go nna moyamontle jang? Le gore go nna moyamontle ga rona go tla solegela rona le ba bangwe molemo jang, segolobogolo ditsala tsa rona tsa Bakeresete, bao ba amogetseng ditsholofetso tsa Modimo ka go nna le tumelo?

[Ntlha e e kwa tlase]

O Tla Araba Jang?

◻ “Tumelo” e ka tlhalosiwa jang?

◻ Go ya ka 2 Petere 1:5-7, ke dinonofo dife tse di tshwanetseng go tsenngwa mo tumelong ya rona?

◻ Go fetolwa ga ga Jesu ponalo go tshwanetse ga ama tumelo ya rona jang?

◻ Abele, Aberahame, Sara le ba bangwe ba bogologolo ba ne ba tlhoma sekao jang malebana le tumelo?

[Setshwantsho mo go tsebe 15]

A o itse gore go fetolwa ga ga Jesu ponalo go ka ama tumelo ya motho jang?