Dikopano Tse Di Kgatlhang Di Buelela Thuto ya Bomodimo
GOMPIENO lefatshe le newa tshedimosetso e ntsi tota. Thelebishene, le radio, dibuka kana dikhomputara di naya batho kitso e e sa feleng ka sengwe le sengwe se o ka se akanyang. Lefa go ntse jalo, batho ba a lwala e bile ba swa. Bokebekwa, tlala, le lehuma di gongwe le gongwe mo lefatsheng, mme malwetsi a maikutlo a ntse a tlhasela batho ba bantsi go feta pele. Kitso yotlhe e e leng teng ga e kgone go baakanya dilo. Ka ntlha yang? Gonne motho o itlhokomolositse botlhale jwa Modimo.
A bo go tshwanela jang ne he, go bo “Thuto ya Bomodimo” e bo e ne e le setlhogo se se tlhophetsweng dikopano tsa bosheng tsa Basupi ba ga Jehofa! Thulaganyo eno e ne ya gakolola ba ba neng ba le teng gore eo ke yone thuto fela e e leng ya mmatota le e e ka bolokang botshelo e e bonwang mo Lefokong la Modimo, Bibela.
Kopano ya ntlha e ne ya simolola ka Labone, June 3, kwa Uniondale, kwa New York, kwa U.S.A. Go tloga foo, thulaganyo eno e ne ya neelwa mo metsemegolong ya dinaga ka go latelana, mme ya felela kwa dikontinenteng tsa Afrika le Amerika Borwa.
Thapama ya Letsatsi la Ntlha
Letsatsi lengwe le lengwe le ne le na le setlhogo se se neng se gatelela karolo nngwe ya thuto ya bomodimo. Ka sekai, thulaganyo ya letsatsi la ntlha e ne e theilwe mo setlhogong se se reng “Go Itse Thuto E E Tswang go Modimo.” (Yohane 7:17) Ntlha eno e ne ya tlhalosiwa ka botlalo fa letsatsi le ntse le tsamaya.
Fa go sena go opelwa le fa go sena go rapelwa, modulasetilo wa kopano o ne a simolola thulaganyo ka puo ya setlhogo se se reng “Thuto ya Bomodimo E A Kopanya.” O ne a bontsha gore batho ba ga Jehofa ba a utlwana ka go bo ba ithuta ditsela tsa Gagwe le go tsamaya mo ditselaneng tsa Gagwe. (Mika 4:1-5) Thuto ya bomodimo e nonotsha kutlwano ya bone. Ba ba neng ba tlile kopanong ba ne ba kgothalediwa gore ba itumelele kutlwano eno.—Pesalema 133:1-3.
Moragonyana mo thapameng eo, go ne ga tlotliwa ka dipokano tsa ka metlha tsa phuthego mo simposiamong sa setlhogo se se reng “Dipokano Tse Di Re Rutang ka Ditsela tsa ga Jehofa.” Sebui sa ntlha se ne sa gakolola ba ba neng ba tlile kopanong gore re tlotla Jehofa e bile O a re segofatsa fa re kopana mmogo. Sebui se se latelang se ne sa gatelela gore go botlhokwa thata go nna le seabe kwa dipokanong. Fa re dira jalo, re baka Jehofa phatlalatsa, re supa gore re na le tumelo, e bile re nonotsha tumelo ya ba bangwe. Sebui sa boraro mo simposiamong seo se ne sa bontsha gore go botlhokwa go dirisa se re se ithutang kwa dipokanong. Re tshwanetse go nna “badihi ba lehoko, e señ bautlwi hèla.”—Yakobe 1:22.
Morago ga foo go ne ga tlotliwa monate tota kaga go opelela Jehofa dipako. Kopelo e e opelwang go tswa mo pelong ke karolo e e botlhokwa ya kobamelo ya rona. Puo eno e ne ya latelwa ke puo ya setlhogo e e reng, “Thuto ya Bomodimo E A Fenya.” A setlhogo se se molemo ruri! Sebui se ne sa re: “Jehofa ke Motswedi wa thuto e e molemo go gaisa e motho a ka e amogelang.” O ne a bolela jaana fa a sena go tlotla ka bokhutshwane a bolela kafa boboko jwa motho bo gakgamatsang ka teng: “Re tshwanetse go dirisetsa nonofo ya rona ya go akanya go amogela thuto ya bomodimo. Ke yone fela e nayang botlhale jwa mmatota.” A bo seo se le boammaaruri jang ne!
Moso wa Bobedi
“Nnang Lo Kgabisa Thuto ya Modimo Moreboloki” e ne e le setlhogo sa letsatsi la bobedi la kopano. (Tito 2:10) Go ne ga buiwa ka molaomotheo ono mo puong e e reng “Thuto ya Bomodimo Kgatlhanong le Dithuto tsa Badimona.” Ee, badimona ba na le dithuto tsa bone. (1 Timotheo 4:1) Jaaka sebui se ne sa tlhalosa, thuto ya bomodimo e fenya “botlhale” jwa ga Satane ka go senola dithuto tsa maaka le ditsela tsa maano tsa ga Diabolo. Seno se dirile gore Bakeresete ba le 4 500 000 ba ba nang le dipelo tse di siameng ba tswe mo botlhankeng jwa lefifi la ga Satane.—Yohane 8:32.
Lefa go ntse jalo, re tshwanetse ra nna re ntse re lwa gore Satane a se ka a re tlhotlheletsa. Seno se ne sa gatelelwa ke puo e e reng “A O Gana go Tlhotlhelediwa Ke Moya wa Lefatshe?” Moya wa lefatshe leno o lebisa fela kwa losong. O tlhotlheletsa boitsholo jo bo maswe, go tsuologela babusi, le go eletsa go nna le dilo tse di bonalang ka tsela e e feteletseng. Mokeresete o tshwanetse go nna a itlhatlhoba ka metlha. A o santse a ipeetse ditaolo tse di kwa godimo mabapi le se a se lebang, se a se reetsang, kana se a se balang? Sebui se ne sa bua jaana ka tsela e e kgothatsang: “Bakaulengwe, bokgaitsadi le lona basha re lo akgolela maiteko a lo a dirang lo tlhoafetse mo ntlheng eno.”—1 Yohane 2:15-17.
Go na le sengwe se se dirang gore go nne bokete tota go gana go tlhotlhelediwa ke moya wa lefatshe. Ke eng? Rotlhe ga re a itekanela. Ke boammaaruri gore Jesu o ne a swela maleo a rona, mme lefa go ntse jalo, re santse re tshwanetse go lwa le go rata ga rona go dira boleo. Go ne ga tlotliwa ka seno mo puong e e reng, “Go Lwa le Boleo Jo Bo Ngaparetseng Nama ya Rona E E Bokoa.” Gareng ga tse dingwe, sebui se ne sa bolela gore re ka fenya ntwa eno le boleo jwa rona fa re nnela go apara motho yo mosha mme re tila sengwe le sengwe se se ka kgotsofatsang mekgwa ya boleo e re ratang thata go e dira.
Setlhogo sa puo e e latelang se ne se re, “Dira Thuto E E Itekanetseng Tsela ya Gago ya go Tshela.” Bangwe ba tshwenyega thata ka boitekanelo jwa bone jwa mmele. Mme lefa go ntse jalo, gone go boammaaruri gore go itekanela sentle semoyeng go botlhokwa thata. Sebui se ne sa gatelela gore go botlhokwa go tsaya maikarabelo a rona masisi mo kgannyeng eno, mme se ne sa kgothatsa basadi ba Bakeresete tota. Se ne sa re: “Re itumelela thata bokgaitsadi ba ba godileng mmogo le bokgaitsadi ba babotlana ba ba tlhoafetseng mo bodiheding ka tsela e e lekalekaneng sentle le mo go direng maikarabelo a bone.” Ee, rotlhe re leboga Jehofa ka ntlha ya thuto e e itekanetseng e e re farologanyang le lefatshe.
Thulaganyo ya mo mosong e ne ya konela ka puo e e reng “Thuto ya Bomodimo E Senola Boikaelelo jwa Botshelo.” Sebui se ne sa re: “Nako nngwe, mo e batlileng e nna mongwe le mongwe o ipotsa jaana, ‘Lebaka la go bo botshelo bo le gone ke lefe?’” O ne a supa ka mabaka a a nonofileng tota gore Bibela ke yone fela e arabang potso eo. Morago ga moo, sebui se ne sa bontsha gore dilo tse di molemolemo tse Modimo o di solofeditseng ke tsone fela tse di kgonang go re naya lebaka la go tshela. Go lebega gore, bontsi jwa bareetsi bo ne bo ntse bo akanya jaana, ‘Seno ke sone tota se batho ba ba mo tshimong ya me ba tlhokang go se utlwa.’ Setlhopha Se Se Laolang le sone se akantse jalo. Boroutšhara e ntšha ya setlhogo se se reng Lebaka la Go Bo Botshelo Bo Le Gone Ke Lefe? e ne ya gololwa kwa bokhutlong jwa puo eno. A bo mongwe le mongwe a ne a itumetse jang ne! Nako ya boikhutso ya motshegare e ne ya naya batho tshono ya go leba kgatiso e ntšha eno.
Thapama ya Bobedi
Puo ya ntlha mo thapameng eo e ne e na le setlhogo se se gomotsang se se reng “Latlhela Tlhobaelo Yotlhe ya Gago mo go Jehofa.” Go na le dilo tse dintsi tse di bakang matshwenyego; lefa go ntse jalo, Lefoko la Modimo le bolela gore re tshwanetse go latlhela dilo tsotlhe tse di re tlhobaetsang mo go ene. (1 Petere 5:6, 7) Gone ke boammaaruri gore mathata a mangwe ga a rarabologe, mme sebui se ne sa kgothatsa jaana mabapi le seno: ‘Nna pelotelele. Lebelela fela mo go Jehofa. Dumela o nonofile gore go latela se Bibela e se bolelang go botlhokwa go gaisa dilo tsotlhe. Fa re boloka dipelo tsa rona re di tlhomile mo go Jehofa, re tla nna le “kagishō ea Modimo” e e fetang tlhaloganyo yotlhe.’—Bafilipi 4:6, 7.
Dipuo tse nne tse di latelang di ne tsa bontsha gore thuto ya bomodimo e ama kafa lelapa le tshelang ka teng. Ya ntlha, “Go Dira Lenyalo Tshwaragano ya Bosakhutleng,” e ne ya gakolola ba ba neng ba tlile kopanong gore Jehofa ga a lebe lenyalo jaaka thulaganyo e e ka senngwang fela jaaka batho ba bantsi mo lefatsheng ba le leba. Lefa go ntse jalo, re tshwanetse go latela kaelo ya ga Jehofa fa re batla gore manyalo a rona a atlege. O re dirile. Ke gone ka moo, Lefoko le le tlhotlheleditsweng la gagwe le nang le kgakololo e e gaisang ka lenyalo.
Puo e e reng, “Dira ka Natla Gore Lelapa la Gago le Bolokwe” e ne ya tlotla ka dilo tse di gwetlhang fa go tla mo go tlameleng lelapa mo dipakeng tseno tse di botlhoko. (2 Timotheo 3:1) Batsadi ba ruta bana ba bone gore ba boloke mebele le tikologo ya bone di le phepa, ba nne le maitseo a mantle, ba ba ruta kafa ba ka dirang ka teng, le gore ba nne pelotshweu le go amega ka batho ba bangwe. Se se botlhokwa le go feta, ba tshwanetse go ruta bana ba bone go nna batlhanka ba ba ineetseng ba ga Jehofa.—Diane 22:6.
Mo puong e e latelang e e neng e re, “Batsadi, Bana ba Lona ba Tlhoka Tlhokomelo E E Kgethegileng,” sebui se ne sa gakolola batho ba ba tlileng kopanong gore ba tshwanetse go akgola bana ba bone, le mororo ba sa itlhokomolose makoa a bone. Batsadi ba tshwanetse go nna ba butse matlho gore ba kgone go bona mekgwa ya go sa ikanyegeng, go rata dikhumo, kana bogagapa.
Basha ba ba neng ba tlile kopanong ba ne ba sekegela tsebe puo e e neng e re “Basha—Lo Utlwa Dithuto tsa ga Mang?” Basha ba Bakeresete ba na le mathata gompieno. Go motlhofo go tsamaya le lefatshe, mme go lebisa kwa losong. Le mororo go tlhopha go ngaparela thuto ya bomodimo go batla gore mosha a nne pelokgale, go lere masego a magolo tota jaanong le botshelo jo bo sa khutleng mo isagweng.—1 Timotheo 4:8.
Letsatsi la bobedi le ne la felela ka terama e e itumedisang thata e e reng, Basha ba ba gakologelwang Mmopi wa bone Gone Jaanong. Mo ketapeleng ya gagwe, mokaedi o ne a bitsa basha ba ba mo phuthegong ya Modimo a re ke “mophato wa bomodimo o o direlang Jehofa Modimo le Kgosi ya gagwe ya selegodimo e a e tlhomileng ebong Keresete Jesu ba ineetse e bile ba ikanyega.” O ne a oketsa jaana: “Basha ba rona ruri ba dira sengwe se se molemo!” Terama eno e ne ya bontsha sentle gore fa motsadi a ruta ngwana wa gagwe sentle, seo se tla mo thusa fa a ntse a gola mme a tsamaya go ya go direla Jehofa a le nosi koo.
Moso wa Letsatsi la Boraro
Setlhogo sa letsatsi la boraro se ne se re “Tswelelang Pele Lo Ruta Batho ba Merafe Yotlhe.” (Mathaio 28:19, 20) Ga go belaetse gore ba ba neng ba tlile kopanong ba ne ba lebeletse gore ba tlile go gakololwa ka tiro ya go rera, mme ga ba ka ba swabisiwa. Simposiamo sa setlhogo se se reng, “Go Dira Tiro E Re E Filweng ya go Rera le go Ruta ka Boitumelo” se ne sa nonotsha go iketleetsa ga bone go nna le seabe mo tirong ya go neela bosupi. Puo ya ntlha e ne ya bua ka maeto a ntlha, ya bobedi, ya bua ka maeto a go boela, ya boraro ya bua ka dithuto tsa Bibela. Barongwa ba ba mo lefatsheng lotlhe ba ne ba boleletswe gore ba ye kwa gae go ya go nna le bamalapa le ditsala kwa dikopanong. Kwa mafelong a mangwe go ne go na le barongwa ba ba etileng, mme bangwe ba bone ba ne ba nna le seabe mo karolong eno ya thulaganyo. Go ne go itumedisa tota go itse kafa ba atlegang ka teng mo dikabelong tsa bone. Morago ga foo puo e e reng, “Go Fitlhelela Mongwe le Mongwe ka Mafoko A A Molemo” e ne ya tlotla ka tiro e kgolo e e dirwang ka bosupi jo e seng jwa ka tlwaelo.
Mo mosong go ne ga konelwa ka puo ya kolobetso, e ka metlha e leng yone e e itumedisang thata kwa dikokoanong tse dikgolo tsa Basupi ba ga Jehofa. Mo dikopanong ka go tlhatlologana ga tsone, go ne go na le ditlhopha tse dikgolo tsa ba ba sa tswang go ineela bosha tse di neng di eme fa pele ga bontsintsi jo bo kokoaneng joo mme ba ne ba araba dipotso tse pedi tse ba neng ba di bodiwa, ka ee ba nonofile. Morago ba ne ba kolobediwa fa pele ga botlhe. A bo seo e le bosupi jo bo nonofileng jang ne jwa kafa thuto ya bomodimo e leng maatla ka teng!
Thapama ya Letsatsi la Boraro
Thulaganyo ya thapama e ne ya simolola ka motlotlo o o tseneletseng wa Dikwalo. Basupi ba ga Jehofa ba itse mafoko a a mo go Mathaio kgaolo 24 le a a mo go Luke kgaolo 21. A go na le bangwe ba ba neng ba akanya gore ga go na sepe se sesha se se neng se ka buiwa ka dikgaolo tseno tsa Bibela? A bo ba ne ba le phoso jang ne! Dipuo tse di neng di re, “Sesupo sa Go Nna Gone ga Gago E Tla Nna Eng?” le “Re Bolèlèlè, go Re, Dilō Tse Di Tla Dihala Leñ?” di ne tsa tlotla ka tsela e e kgatlhang ka dikarolo tsa dikgaolo tse pedi tseo mme tsa tlhalosa dingwe tsa ditemana tseo ka tsela e ntšha. Go ne go tlotliwa monate tota morago ga thulaganyo fa ba ba neng ba tlile kopanong ba ne ba bapisa dintlha tse ba di kwadileng go bona fa ba di tlhalogantse ruri. Kwantle ga pelaelo, dipotso tse dintsi di tlile go arabiwa fa tshedimosetso eno e gatisiwa mo go Tora ya Tebelo.
Setlhogo se se neng se bua ka dithuto tsa Bibela se ne sa tswelela mo puong e e reng “Dikarabo Tse Di Nang le Tshedimosetso Kaga Dipotso tsa Gago tsa Bibela.” Morago ga foo, thulaganyo e ne ya bua ka sengwe se se farologaneng. Ngwaga wa 1993 ke wa bo 50 Sekolo sa Bibela sa Watchtower sa Gileade se ntse se le teng. Puo e e reng, “Dingwaga Tse Di Masome a Matlhano tsa Katiso le Tiro ya Borongwa jwa Gileade” e ne ya bontsha ba ba tlileng kopanong seo se ileng sa dirwa mo lobakeng lo lo fetileng. Fa go ne go na le barongwa bangwe ka nako ya puo e e reng, “Se Boefangele Bo Se Dirileng mo Tshimong ya Lefatshe ka Bophara” ba ne ba bidiwa gore ba tle go bolelela bareetsi maitemogelo a bone. Go ne go itumedisa tota go utlwa dipego tsa barongwa!
Puo e e latelang e e neng e re, “Lebaka la Go Bo Basupi ba ga Jehofa Ba Nna Ba Disitse,” e na le thuto e nngwe e e neng e bua ka hisitori. E ne ya bontsha kafa Bakeresete ba sa bolong go nna ba disitse ka teng go tloga mo lekgolong la ntlha la dingwaga C.E. go tla go fitlha gompieno. Seo se ne sa re isa gape kwa sengweng se se gakgamatsang. Fela fa puo e e latelang ya setlhogo se se reng “Baboledi ba Bogosi Ba Dira mo Lefatsheng Lotlhe,” e simolola sebui se ne sa tsholetsa buka nngwe e kgolo (fa e le gore e teng ka puo ya lefelo la lona) a bo a re: “Ke itumelela go lo itsise gompieno gore re golola buka e ntšha, ya setlhogo se se reng Basupi ba ga Jehofa—Baboledi ba Bogosi jwa Modimo.” Buka eno e na le pego e e nang le dilo tse dintsi tsa hisitori ya motlha wa segompieno ya Basupi ba ga Jehofa. E bolela kgang e e kgatlhang thata ka boitshoko, boiketleetso, le kafa ba ileng ba atlega ka teng, e naya bosupi jo bo nonofileng jwa gore moya wa ga Jehofa o dira tota mo batlhankeng ba gagwe.
Moso wa Bone
E ne e setse e le letsatsi la bofelo la kopano. Setlhogo sa letsatsi leo se se neng se re, “Go Solegelwa Molemo Ke Thuto ya Bomodimo,” se ne sa supa gore thulaganyo e tlile go felela e kgatlha tota. (Isaia 48:17) Mo mosong ba ba neng ba tlile kopanong ba ne ba utlwa dipuo tse tharo tse di nonofileng tsa simposiamo. Simposiamo sa setlhogo se se reng “Molaetsa wa ga Jeremia O O Tlhotlheleditsweng wa Tlhagiso—Wa Nako E E Fetileng le wa Jaanong,” se ne sa tlotla ka temana nngwe le nngwe ya kgaolo 23, 24, le 25 ya Yeremia. A bo dikgaolo tseno di na le molaetsa o o nonofileng jang ne! Iseraele o o sa ikanyegeng wa motlha wa ga Jeremia o tshwanetse a bo a ne a roroma tota fa a ne a utlwa ditlhagiso tseno tse di tlhamaletseng, tse di tlhotlheleditsweng ke Modimo. Lefatshe lotlhe le ne la roroma le go feta ka nako ya fa dilo tseno tse ba neng ba tlhagisitswe ka tsone di diragala. A dilo di farologane gompieno? Nnyaa. Basupi ba ga Jehofa ba rera molaetsa wa Modimo wa katlholo ba le pelokgale. Kgabagare, tsamaiso eno yotlhe ya dilo e tla tshwanela go lebana le ditiro tse Jehofa a tla di dirang fa a ba atlhola. Seo se tla raya gore lefatshe la ga Satane le tla nyelediwa gotlhelele.
Moso wa Sontaga o ne wa konelwa ka terama ya bobedi e e reng, O Se Ka Wa Tsietsega Kana wa Sotla Modimo. E ne ya supa ka tsela e e phepafetseng tota gore thuto ya bomodimo e ka re sireletsa gore re se ka ra tlhotlhelediwa ke dibidio le mmino o o senyang maitsholo e bile e ka re sireletsa mo go rateng go jala dikgotlhang mo Bakereseteng ba bangwe. Fa terama eno e khutla, modulasetilo o ne a nopola mafoko ano a a dirang gore motho a akanye tota a a neng a buiwa ke mongwe wa setlhopha sa terama: “Lefatshe leno le tla re tlhotlheletsa. Lefatshe leno le ka leswefatsa tsela e re akanyang ka yone fa re sa itsetsepele. Go sala ga rona re ntse re ikanyega kana go latlha ga rona boikanyegi jwa rona go tla ikaega ka gore re ntse re jala eng.” A bo seo se le boammaaruri jang ne!
Thapama ya Bofelo
Kopano e ne e setse e fela ka bonako fa sebui se ne se ya kwa seraleng go ya go neela puo ya phatlalatsa ya setlhogo se se reng, “Thuto E E Mosola ya Metlha ya Rona E E Nang le Mathata.” O ne a bolela ka tsela e e phepafetseng le e e utlwalang tota ka mathata a magolo a a re amang gompieno mme a supa ditsela dingwe tse thuto ya bomodimo e ka re thusang ka tsone go tshela botoka. O ne a bolela gore, fa re latela thuto ya Dikwalo jaanong, re tlile go kgona go e latela ka bosakhutleng mo lefatsheng le lesha la ga Jehofa.
Fa go sena go sobokanngwa thuto ya beke le beke ya Tora ya Tebelo, go ne ga latela puo ya bofelo. Sebui se ne sa boeletsa ka bonako dintlha tse dikgolo tsa thulaganyo eo ya malatsi a mane mme sa gakolola ba ba neng ba tlile kopanong ka dibuka tse disha. O ne a itsise gore khasete ya bobedi ya bidio ya motseletsele wa The Bible—A Book of Fact and Prophecy e tla tloga e gololwa ka bonako. E bile, khasete eo ya bidio ya setlhogo se se reng The Bible—Mankind’s Oldest Modern Book jaanong e teng ka Seesemane. Go ne ga balwa dipego tse di amang pelo tota go tswa kwa mafelong a a nang le dintwa tse di masisi, jaaka kwa Bosnia le Herzegovina. Sebui se ne sa konela ka go bala mafoko ano a a mo go Moreri 12:13: “Bokhutlō yoa mahoko ke yo; go utlwilwe gotlhe: Boiha Modimo, u bo u tshegetsè ditaolō tsa ōna; gonne ke chwanèlō eotlhe ea motho.”
A kgakololo e e molemo ruri! A re lebeleleng pele letsatsi la fa batho botlhe ba tla bo ba baka Jehofa, Mokaedi yo Mogolo, le ya fa ba tla bo ba reetsa thuto ya bomodimo.
[Ditshwantsho mo go tsebe 24, 25]
Dikopano tsa “Thuto ya Bomodimo” tsa kwa Moscow le Kiev di ne tsa lere boitumelo jo bogolo tota
[Ditshwantsho mo go tsebe 26, 27]
1. Batho ba bantsi ba ile ba supa gore ba ineetse mo Modimong ka go kolobediwa
2. Motho mongwe yo o neng a tlile kopanong yo o nang le dingwaga di le 100 o ne a itumelela go amogela buka e ntšha
3, 4. Diterama tse di dirang gore motho a akanye tota di ne tsa itumelelwa thata
5. Barongwa ba ba neng ba botsolodiwa kwa dikopanong ba ne ba gatelela gore thuto ya bomodimo e molemo tota