Kagiso ya Mogopolo mo Setšhabeng Se Se Nang le Moya wa Kgaisano

“A MOTHO moñwe leha e le mañ a rata go nna oa kwa pele,” Jesu Keresete o ne a gakolola baaposetoloi ba gagwe jalo, “èna o tla nna oa moragōragō, a ba a nna modihedi oa botlhe.” Baaposetoloi ba ne ba ganetsana gore ke mang yo mogolo mo go bone. Ba ne ba itse gore Jesu o ne a ila moya o o ntseng jalo. Le ka motlha o ne a se ke a dira gore baaposetoloi ba gagwe ba gaisane e le tsela ya go ba rotloetsa go gatela pele semoyeng.—Mareko 9:33-37.

Pele Jesu Keresete a tla mo lefatsheng o ne a nna le seabe fa banyalani ba ntlha ba batho ba ne ba bopiwa mme o ne a itse gore ba ne ba dirilwe jang. (Bakolosa 1:15, 16) Batho ba ntlha ba ne ba bopiwa ba na le kgono ya go gatela pele kwantle ga go gaisana mo go setlhogo le ba bangwe. Go ne go sa tlhokege gore batho ba lwe go bona gore ke mang yo o ka ba etelelang pele, lefa e le gone gore ba gaisane le diphologolo gore ba tswelele pele ba tshela.—Genesise 1:26; 2:20-24; 1 Bakorintha 11:3.

Kwa Moya wa Kgaisano O Simologileng Teng

Go tlile jang, he, gore moya wa kgaisano o o setlhogo o bo o le maatla thata jaana mo bathong? Tiragalo ya ntlha ya go bolaya mo hisitoring ya motho e re neela lesedi. Go nna le moya wa kgaisano ga ga Kaine, e bong morwa yo mogolo wa banyalani ba ntlha, go ne ga gogela kwa matlhotlhapelong ano. Kaine o ne a bolaya morwarraagwe e bong Abele ka gonne setlhabelo sa ga Abele se ne se itumedisa Modimo, fa sa ga Kaine sone se ne se sa mo itumedise. Mme Bibela e bolela gore Kaine o ne “a nna oa eo o boshula, me a bolaea monnawè.”—1 Yohane 3:12; Genesise 4:4-8.

Ee, yo o bosula, e bong Satane Diabolo, ke mosimolodi le morotloetsi wa moya wa kgaisano. Le mororo e ne e le morwa Modimo wa moengele yo o neng a na le ditshiamelo tse di kwa godimo, o ne a batla mo go oketsegileng. (Bapisa Esekiele 28:14, 15.) O ne a senola keletso ya gagwe fa a ne a tsietsa Efa. O ne a bolela gore fa Efa a ne a ka ja loungo lo lo ileditsweng, o ne a “tla nna yaka Modimo.” (Genesise 3:4, 5) Totatota, Satane ke ene yo o neng a batla go tshwana le Modimo, go gaisana le Jehofa. Moya wa go batla go gaisa Modimo o ne wa mo tlhotlheletsa gore a tsuologe.—Yakobe 1:14, 15.

Moya ono o a anama. Ka ntlha ya tlhotlheletso ya ga Satane, kagiso e e tswang kwa Modimong ya thulaganyo ya lelapa ya kwa tshimologong e ne ya fela. (Genesise 3:6, 16) Fa e sale ka Satane Diabolo a tsuologela Modimo, o ntse a busa batho, a tlhotlheletsa moya wa kgaisano mo go bone, tota e bile a tsietsa banna le basadi gore ba dumele gore go gaisana go go setlhogo ke yone tsela ya go atlega. Lefa go ntse jalo, Bibela e tlhalosa jaana: “Kwa go leñ lehuha le kgañ, go bile go na le tobekanō, le tihō ñwe le ñwe e e mashwè gōna.” (Yakobe 3:14-16) Ka jalo Satane o ne a dira gore motho a se ka a tlhola a itumela le gone go bona kagiso ya mogopolo tota.

Go Atlega Kwantle ga Kgaisano

Bibela e re neela dikai tsa batho ba ba neng ba atlega ba sa gaisana, e leng sengwe se se fapaaneng le tlhotlheletso ya ga Satane. Sekai se se di fetang tsotlhe ke sa ga Jesu Keresete. Le mororo a le mo setshwanong sa Modimo, le ka motlha ga a ise a itekanye le Modimo mme o ne a tsaya tshwano ya motlhanka mme a tla mo lefatsheng. Mo godimo ga moo, o ne a ikokobetsa mme a nna kutlo go ya bokgakaleng jwa gore a swele mo koteng ya tlhokofatso. Boikutlo jono jwa go nna kutlo, jo bo senang moya ope wa kgaisano, bo ne jwa dira gore a amogelwe ke Modimo. “Ke gōna ka mouō Modimo le ōna o mo godisitseñ thata, me oa mo naea yeōna leina ye le hetañ maina aotlhe.” (Bafilipi 2:5-9) Sebopiwa sepe fela se ne se ka atlega jang go feta fa? O ne a itumedisa Rraagwe go gaisa sebopiwa sepe fela, mme seno o ne a se dira a sena moya ope wa kgaisano.—Diane 27:11.

Baengele ba ba ikanyegang ba bantsi kwa legodimong ba bontsha boikutlo jono jo bo tshwanang. Le mororo Jesu, yo o neng a eteletse baengele pele, a ne a nna kwa tlasenyana ga bone fa a ne a tla mo lefatsheng, ba ne ba mo direla dilo tse a di tlhokang ka go rata. Go phepafetse gore ba ne ba sena mogopolo ope wa gore ba dirise boemo jono go leka go mo ntsha mo maemong a go nna Moengele Yo Mogolo.—Mathaio 4:11; 1 Bathesalonia 4:16; Bahebera 2:7.

Go sa rate ga bone moya wa kgaisano go bonala sentle fa re sekaseka tsela e ba ileng ba amogela boikaelelo jwa Modimo ka yone jwa go goleletsa batho ba bangwe ba ba sa itekanelang kwa botshelong jwa semoya jwa bosasweng, mme e re ba le mo boemong joo ba kgone go “atlhola baengele.” (1 Bakorintha 6:3) Baengele ba na le boitemogelo jo bontsi jwa go direla Jehofa e bile ba kgona go dira se se molemo go gaisa batho ba ba sa itekanelang kgakala. Lefa go ntse jalo, baengele ba direla batlodiwa ba ba mo lefatsheng ka boitumelo, ga ba fufegele se bano ba tlileng go se amogela. (Bahebera 1:14) Boikutlo jwa bone jo bo molemo, jo bo senang moya wa kgaisano bo ba dira gore ba kgone go tswelela pele ba direla fa pele ga setulo sa ga Jehofa Morena Molaodi.

He, akanya ka batlhanka ba Modimo ba ba ikanyegang ba bogologolo ba ba tla tsosediwang mo lefatsheng. Aberahame o ne a tlhoma sekao se se tlhomologileng sa tumelo mme o ne a bidiwa “rra botlhe ba ba dumèlañ.” (Baroma 4:9, 11) Jobe o ne a tlhoma sekao se se molemolemo sa boitshoko. (Yakobe 5:11) Moshe, yo o neng “a le boikokobeco thata, go heta batho botlhe ba ba neñ ba le mo lehatshiñ,” o ne a etelela pele morafe wa Iseraele gore o gololwe. (Dipalō 12:3) Ke mang gareng ga batho ba ba sa itekanelang yo o ileng a tlhoma sekao se se botoka sa tumelo, boitshoko, le boikokobetso go gaisa banna bano? Lefa go ntse jalo, ba tlile go rua Bogosi jwa Modimo mo lefatsheng. (Mathaio 25:34; Bahebera 11:13-16) Ba tla bewa kwa tlase ga “eo o leñ mmōtlana mo bogosiñ yoa legodimo,” jaaka Johane Mokolobetsi. (Mathaio 11:11) A tota ba tla ngongorega, ba gatelela gore tumelo ya bone, boitshoko, kana boikokobetso jwa bone bo ne bo lekana le jwa bao ba neetsweng botshelo kwa legodimong kana mo mabakeng a mangwe bo feta jwa bone? Totatota nnyaa! Ba tla bo ba le babusiwa ba ba itumetseng ba Bogosi jwa Modimo mo lefatsheng.

Tota le gompieno batho ba ba senang boikutlo jwa go gaisana ba a ratega. Yasuo, yo o umakilweng mo setlhogong sa ntlha, o ne a tsena thata mo dikolotong ka go reka le go rekisa gauta ka tsholofelo ya go bona poelo e e oketsegileng mme a latlhegelwa ke dithoto tsotlhe tsa gagwe. Bao go ka tweng e ne e le “ditsala” tsa gagwe ba ne ba mo tlogela. E re ka mosadi wa gagwe a ne a simolotse go ithuta Bibela le Basupi ba ga Jehofa, o ne a ya kwa dipokanong tsa bone ka gonne a ne a ipona molato wa go bo a dirile gore lelapa la gagwe le boge. Kgabagare, o ne a latlha moya wa kgaisano mme a simolola go nna mongwe wa Basupi ba ga Jehofa. Jaanong o itumelela go bo a na le ditsala tsa Bakeresete, e leng mofuta wa ditsala tse di eletsang go mo thusa mo dinakong tsa tlalelo.

Kafa O Ka Bolokang Kagiso ya Mogopolo ka Teng

Ga go motlhofo ka dinako tsotlhe go boloka kagiso ya mogopolo mo gare ga setšhaba se se senang kutlwelobotlhoko, se se nang le moya wa go gaisana. Go botlhale go lemoga gore Bibela e nyatsa “dikilanō, le kgañ, le mahuha, le dikgakalō, le ditomologanō, le dikgaoganō, le makōkō, le dipelotshètlha” e re ke “ditihō tsa nama” tse di thibelang batho gore ba se ka ba rua Bogosi jwa Modimo. Ditiro tseno tsotlhe di amana thatathata le moya wa kgaisano. Ga go gakgamatse go bo moaposetoloi Paulo a ne a kgothaletsa Bagalatia jaana: “A re se nne boipelahaco hèla, re se ka ra rumolana, ra dihèlana ka bopelotshètlha.”—Bagalatia 5:19-21, 26.

Gaufi le one mafoko ao Paulo o ne a bontsha tsela ya go itshokela moya wa kgaisano wa boipelafatso. O ne a bolela jaana: “Louñō loa Mōea ke loratō, le boitumèlō, le kagishō, le bopelotelele, le bopelonomi, le molemō, le boikañō, le boiñōtlō, le boikgapō: dilō tse, ga di añwe ke molaō opè.” (Bagalatia 5:22, 23) Loungo lwa moya lo re thusa go tlosa moya wa kgaisano mo megopolong ya rona. Tsaya ka sekai nonofo ya lorato. “Loratō ga lo pelotshètlha,” Paulo o tlhalosa jalo. “Loratō ga lo ko lo ikgantsha, ga lo mabela, ga lo ko lo diha kaha go sa chwanèlañ, ga lo ko lo ipatlèla hèla, ga lo ko lo gakatsèga.” (1 Bakorintha 13:4-7) Fa re tlhagolela lorato, re ka ntsha lefufa gotlhelele mo go rona, e leng lone maatla a a gwetlhang moya ono wa kgaisano. Maungo a mangwe a moya le one a re thusa go tlogela boikutlo bope jo bo ka tswang bo saletse jwa moya wa kgaisano, o o setlhogo mo dipelong tsa rona le mo megopolong ya rona. Ee ruri, tlhotlheletso epe fela e e ka tsogang ya go batla go gaisana le ba bangwe e le gore motho a fenye go sa kgathalesege gore matswela ke afe e ka kgona go fenngwa ka bofefo ka boikgapo!—Diane 17:27.

Lefa go ntse jalo, gore re tlhagolele dinonofo tseno, re tshwanetse go letlelela moya wa Modimo go dira mo go rona. Re ka kgothatsa moya ono o o boitshepo o o dirang ka natla ka go nnela ruri mo thapelong le go kopa moya wa Modimo go re thusa. (Luke 11:13) Modimo o tla re neela eng fa o araba thapelo ya rona? Bibela e araba jaana: “Lo se ka loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō. Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.”—Bafilipi 4:6, 7.

Seno se ne se phepafetse sentle mo kgannyeng ya baaposetoloi ba ga Jesu. Tota le morago ga gore Jesu a simolodise Sejo sa Morena sa Maitseboa mo bosigong jwa gagwe jwa bofelo le baaposetoloi, ba ne ba ntse ba ganetsana gore ke ofe wa bone yo o lebegang a le mogolo. (Luke 22:24-27) Mo makgetlong a le mantsi Jesu o ne a ile a leka go ba thusa go baakanya tsela e ba akanyang ka yone, mme lefa go ntse jalo boikutlo jono jwa go batla go gaisana bo ne bo nweleletse thata mo go bone. (Mareko 9:34-37; 10:35-45; Yohane 13:12-17) Lefa go ntse jalo, e ne ya re ba sena go amogela moya o o boitshepo morago ga malatsi a le 50 ba sena go ganetsana jalo, boikutlo jwa bone bo ne jwa fetoga. Ba ne ba sa ganetsane ka gore ke mang yo o tla ba emelang fa ba ya go bua le boidiidi jwa batho jo bo neng bo shwegashwega jo bo neng bo phuthegile ka lone letsatsi leo la Pentekosete.—Ditihō 2:14-21.

Go ne go sa letlelelwe motho ope go rena mo godimo ga phuthego ya Bokeresete. Fa ba ne ba tshwanetse go rarabolola bothata bongwe jo bo malebana le go rupa, Jakobe, yo o bileng a ne a se morutwa ka nako ya loso lwa ga Jesu, o ne a okamela pokano eo ya botlhokwa. Ga go na sesupo sepe se se bontshang gore go kile ga nna le kgang mabapi le gore ke mang yo o tla etelelang pele mo pokanong eo ya setlhopha se se laolang sa phuthego ya Bokeresete. A bo go fapaane jang ne le nako e baaposetoloi ba neng ba tshasegetswe ke moya wa kgaisano! Ka thuso ya moya o o boitshepo, ba ne ba gakologelwa dithuto tsa ga Jesu mme ba simolola go tlhaloganya bokao jwa dithuto tsa gagwe.—Yohane 14:26.

Seno se ka dira le mo go rona. Moya o o boitshepo o ka re thusa gore re fenye tlhotlheletso epe fela e e saletseng ya go gaisana le ba bangwe ka maikaelelo a gore re gatele pele ka go ba gataka ka dinao. Go na le moo, re ka bona kagiso ya mogopolo e e fetang tlhaloganyo yotlhe. Bibela e re tlhomamisetsa gore mosimolodi wa kgaisano e e setlhogo eno, e bong Satane Diabolo, o tla tloga a tsenngwa mo moleting, a le mo boemong jwa go sa dire. (Tshenolō 20:1-3) Go tla bo go sa tlhole go na le kgaisano gareng ga baagisani. A go tla felela ka gore e nne setšhaba se se sa gateleng pele? Le e seng! Batho ba tla tswelela pele ba itekanela, e seng ka go gaisana, mme ka go dirisa setlhabelo sa thekololo sa ga Jesu.—1 Yohane 2:1, 2.

Keinosuke, yo o umakilweng pelenyana, yo pele a neng a itumelela kgalalelo ya go atlega ga selefatshe ka go rekisa palo e kgolo go gaisa botlhe ya dikoloi, o ne a itiretse letsapa mo mogopolong le mo mmeleng, mme lefa go ntse jalo kgabagare o ne a tlogela tiro. “Jaanong, ke tshela ke itumetse eleruri,” o bolela jalo. O ne a simolola go lemoga lebaka la go bo botshelo jwa ga Jesu bo ne bo atlegile ka boammaaruri. Jaanong o iponela tapologo mo go sengwe le sengwe se a se dirang mo phuthegong ya Modimo ya lefatshe ka bophara. Ka gone o ipaakanyetsa lefatshe le lesha, le le tla bong le sena kgaisano. Le wena o ka bona go sa le pele batho ba lefatshe le lesha ka go etela nngwe ya Diholo tsa Bogosi tse di mo lefelong la lona le go itsalanya le Basupi ba ga Jehofa.

[Setshwantsho mo go tsebe 7]

Setšhaba sa batho mo lefatsheng le lesha la Modimo se tla nna le kagiso le tirisanommogo