Mofuta o o Molemolemo wa Lorato

MO MAKGETLHONG a mantsi mo Dikwalong Tsa Bokeresete Tsa Segerika, kgotsa mo Tesetamenteng e Ntšha, lefoko “lorato” ke thanolo ya lefoko la Segerika a·gaʹpe.

Buka ya Insight on the Scripturesa e bolela jaana fa e tlhalosa se lefoko leo le se kayang: “[A·gaʹpe] ga se go tseega maikutlo ka ntlha ya go kgatlhegela motho fela, jaaka batho ba bantsi ba akanya, mme ke lorato lo lo theilweng mo melaometheong kgotsa [mofuta wa lorato] lo motho a dirang tshwetso ya go nna le lone a laolwa ke melaometheo, go ikutlwa a na le boikarabelo le go batla go dira se se tshwanetseng, a leka ka bopeloephepa go direla ba bangwe molemo. A·gaʹpe (lorato) e fenya letlhoo, e dira gore le ka motlha letlhoo le se ka la tlogedisa motho melaometheo e e tshwanetseng, a bo a ipusolosetsa.”

Gape a·gaʹpe e ka akaretsa maikutlo a a boteng. Moaposetoloi Petere o ne a kgothatsa jaana: “Ratanang ka lorato [a·gaʹpe] lo logolo.” (1 Petere 4:8) Ka jalo, go ka twe a·gaʹpe e ama pelo mmogo le tlhaloganyo. Ke ka ntlha yang fa o sa sekaseke ditemana dingwe tse di bontshang kafa lorato lono lo lo molemolemo lo leng maatla ka teng le se lo se akaretsang? Ditemana tse di latelang di ka nna tsa go thusa: Mathaio 5:43-47; Johane 15:12, 13; Baroma 13:8-10; Baefeso 5:2, 25, 28; 1 Johane 3:15-18; 4:16-21.

[Ntlha e e kwa tlase]