“Go Jala Peo Ya Bogosi” Ka Ditselana Tsa Dimakasine

¹ Pina 133 e e mo bukeng ya Opelelang Jehofa Dipako e na le setlhogo se se reng “Go Jala Peo ya Bogosi.” E theilwe mo setshwantshong sa ga Jesu se se tshwantshang tiro ya go dira barutwa le go jala peo. (Math. 13:4-8, 19-23) Mafoko a pina eno a balega jaana: “Go ikaegile ka wena gore a peo/E wela mo mmung o montle.” Re ka dira jang gore bodiredi jwa rona bo nne le matswela thata? Tsela e nngwe ke go simolola tselana ya dimakasine le go e kgomarela.

² Go ka fitlhelelwa maikaelelo a mantsi ka tselana ya dimakasine. (1) Go dira maeto ka metlha mo dibekeng dingwe le dingwe tse pedi go ka go thusa gore o nne tsala le motho yono yo o kgatlhegang. (2) Ka metlha o mo neela tshedimosetso e e bolokang botshelo e e tswang mo dimakasineng tsa Tora ya Tebelo leTsogang! (3) Fa o ntse o buisana le motho yono o ka mo thusa gore a tlhologelelwe boammaaruri jwa Dikwalo, mme go felele ka gore a ithute Baebele.—1 Pet. 2:2.

³ Tsela ya go Simolola Tselana ya Dimakasine: Nako le nako fa mongwe a kgatlhegela dimakasine, mo tlhalosetse gore ditlhogo tseno tse di tlhomologileng di tswa mo tokololong nngwe le nngwe mme o ka itumelela go mo tlisetsa tsone mo dibekeng dingwe le dingwe tse pedi. Fa o sena go tswa, kwala leina le aterese tsa motho yono, letlha le o mo etetseng ka lone, matlha a dimakasine tse o mo tsamaiseditseng tsone, setlhogo se o se bueletseng mmogo le ditlhogo tse di ileng tsa kgatlha motho yono thata.

⁴ O ka nna wa simolola tselana eno ka batho ba sekaenyana fela. Go tswa foo leka go e oketsa ka go tsenya batho ba bangwe ba o ba tsamaiseditseng dimakasine. Fa tselana ya gago e ntse o oketsega, o ka e rulaganya go ya ka tshimo e le gore go nne motlhofo go e fitlhelela. Kwala gore ke dimakasine dife tse o di tsamaisitseng mo loetong longwe le longwe le gore o di tsamaisitse leng. Kwala dintlha dingwe tse lo buisaneng ka tsone le kafa o ka tswelelang o dira ka gone gore motho yono a kgatlhegele boammaaruri mo loetong lo lo latelang.

⁵ Akaretsa Borakgwebo le Batho ba ba Rutegileng: Maitemogelo a bontshitse gore boramabenkele le batho ba bangwe ba ba rutegileng ba ka nna ba tsaya dimakasine tsa rona ka metlha. Mogolwane mongwe o ne a na le ratoropo wa motse wa gabone mo tselaneng ya gagwe ya dimakasine. Mmoledi mongwe o ile a simolola thuto le mong wa khampani e e rekisang dilo tsa go aga yo o neng a na le dingwaga di le 80, morago ga gore a nne a mo tsamaisetse dikamasine ka dingwaga di le lesome ka go latelana ga tsone!

⁶ Mmulatsela mongwe o ne a tsena mo lebenkeleng mme a buisana le banyalani bangwe ba ba neng ba se botsalano mo go ene. Le fa go ntse jalo, e re ka ba ne ba tsaya dimakasine, o ne a akanya gore a tsenye banyalani bano mo tselaneng ya gagwe ya dimakasine. Fa nako e ntse e ya, kgaitsadi yono o ne a batla go tlogela go ba etela ka gonne ba ne ba se botsalano le e seng e bile ba ne ba sa bue thata le ene, tota le fa a ne a boditse potso e e ba fatang maikutlo. Mme kgaitsadi yono o ne a rapela ka kgang eno mme kgabagare o ne a tsamaisetsa banyalani bano buka ya Tshelela Ruri. Fa mosadi yono a sena go e bala o ne a bua jaana: “Kgabagare ke bone boammaaruri!” O ne a simolola thuto ya Baebele le bone, mme kgabagare banyalani bano ba ne ba kolobediwa. Go itshoka ga mmulatsela yono ruri go ne ga ungwa maungo a a molemo.

⁷ Go Dira Maeto a go Boela: Fa o amogela makasine o mosha, bala setlhogo sengwe le sengwe. Leba dintlha tse di ka kgatlhegelwang ke mongwe le mongwe yo o mo tselaneng ya gago ya dimakasine. Go tswa foo fa o boela, o ka bolela jaana: “Fa ke ne ke bala setlhogo seno, ke ne ke akantse ka wena le gore o tlile go se kgatlhegela.” Baboledi ba dingwaga tsotlhe ba ka itumelela go nna le tselana ya dimakasine. Tota le ngwana yo monnye a ka bolela jaana: “Ke itumelela go go bona gape. Dikhopi tsa gago tsa bosheng tsa Tora ya Tebelo le Tsogang! di gorogile. Ke akanya gore o tla rata setlhogo seno se se reng . . .”

⁸ Dira gore a kgatlhegele ditlhogo tse di latelang ka go mmontsha lebokose le le reng “Mo Makasineng o o Tlang.” Fa ditlhogo di tla di tsamaisana, mo tlhalosetse seno mme o kgothaletse mmadi gore a se ka a tlolwa ke sepe sa tsone. O se ka wa lebala gore nako le nako fa o isa dimakasine tsa motho yo o mo tselaneng ya gago ya dimakasine, o kwala seo e le loeto lwa go boela. Mme mo godimo ga moo, gakologelwa gore mokgele wa rona ke go dira gore maeto ano e fetoge dithuto tsa magae tsa Baebele.

⁹ Etela Batho Ba ba Mo Tselaneng ya Gago ya Dimakasine ka Metlha: O ka etela batho ba ba mo tselaneng ya gago ya dimakasine nako nngwe le nngwe e e go siametseng—mo gare ga beke mo mosong, mo motshegareng wa maitseboa, ka lotlatlana, kana mo mafelobekeng fa o tswa kwa tirong ya ntlo le ntlo. Fa e le gore ga o kgone go etela ba ba mo tselaneng ya gago ya dimakasine ka gonne o lwala kana o ile boikhutsong, kopa mmoledi yo mongwe mo lelapeng la gaeno kana mo phuthegong gore a go isetse dimakasine kwa go bone. Ka tsela eno, batho ba ba mo tselaneng ya gago ya dimakasine ba ka se palelwe ke go bona dimakasine tsa bone ka nako.

¹⁰ Tsela e nngwe ya go jala peo ya Bogosi ke go isetsa botlhe ba ba mo tselaneng ya gago ya dimakasine Tora ya Tebelo le Tsogang! Fa o ntse o ba ruta boammaaruri jwa Dikwalo, ba ka nna ba tlhaloganya lefoko la Bogosi mme kgabagare ba ungwe maungo a Bogosi mmogo le wena.—Math. 13:8, 23.