30 “ʻI he hili mei ai ʻa e taʻu ʻe 40, naʻe hā ha ʻāngelo kiate ia ʻi he toafa ʻo Moʻunga Sainaí ʻi he afi naʻe ulo ʻi ha fuʻu ʻakau talatala.+ 31 ʻI he mamata ʻa Mōsese ki aí, naʻá ne ofoofo he meʻa naʻe haá. Ka ʻi heʻene fakaofiofi atu ke vakaiʻí, naʻe ongo mai ʻa e leʻo ʻo Sihová:* 32 ‘Ko e ʻOtua au ʻo hoʻo fanga kuí, ko e ʻOtua ʻo ʻĒpalahame mo ʻAisake pea mo Sēkope.’+ Naʻe kamata ke tetetete ʻa Mōsese ʻo ʻikai te ne fakatoʻotoʻa ke kei vakaiʻi ia. 33 Naʻe pehē ange ʻe Sihova* kiate ia: ‘Toʻo ʻa e senitoló mei ho vaʻé, he ko e potu ʻa ia ʻokú ke tuʻu aí ko e kelekele toputapu ia. 34 Kuó u mātā moʻoni ʻa hono ngaohikoviʻi ʻa hoku kakai ʻa ia ʻoku nau ʻi ʻIsipité, pea kuó u fanongo ki heʻenau toʻé,+ pea kuó u ʻalu hifo ke fakahaofi kinautolu. Ko eni, haʻu, te u fekauʻi atu koe ki ʻIsipite.’