ʻUluaki Tuʻi

1 Pea kuo motuʻa ʻa Tuʻi Tēvita,+ pea aʻuaʻu ʻa hono ngaahi taʻú,* pea neongo naʻa nau fakakafuʻi ia ʻaki ha ngaahi kofu, naʻe ʻikai lava ke ne māfana ai. 2 Ko ia naʻe pehē ange ʻe heʻene kau sevānití kiate ia: “Tuku ke kumi mai ha taʻahine, ha taʻahine kei nofo anga-maʻa maʻa homau ʻeiki ko e tuʻí, pea te ne tokangaʻi ʻa e tuʻí ʻo ne hoko ko hono tauhi. Te ne tokoto ʻi ho nimá koeʻuhí ke ongoʻi māfana ai ʻa homau ʻeiki ko e tuʻí.” 3 Naʻa nau kumi ʻi he feituʻu kotoa ʻo ʻIsilelí ki ha taʻahine hoihoifua, pea naʻa nau maʻu ʻa ʻApisaki+ ko e taʻahine Sūnemi+ pea ʻomi ia ki he tuʻí. 4 Ko e taʻahiné naʻe hoihoifua ʻaupito, pea naʻá ne hoko ko e tauhi ʻo e tuʻí ʻo ne tokangaʻi ia, ka naʻe ʻikai ke mohe* ʻa e tuʻí mo ia.

5 Lolotonga ení, ko ʻAtunaisa+ ko e tama ʻa Hakití naʻá ne ʻai ia ke ne māʻolunga, ʻi heʻene pehē: “Ko au te u hoko ko e tuʻí!” Naʻá ne fekau ke ngaohi maʻana ha saliote pea ʻai mo ha kau tangata heka hoosi pea ke lele muʻomuʻa ʻiate ia ʻa e kau tangata ʻe toko 50.+ 6 Ka naʻe ʻikai ʻaupito ke fakafepakiʻi ia* ʻe heʻene tamaí ʻaki haʻane pehē: “Ko e hā kuó ke fai ai ení?” Ko ha tangata foki ia naʻe matātangata ʻaupito, pea naʻe fanauʻi ia ʻe heʻene faʻeé ʻi he hili ʻa ʻApisalomé. 7 Naʻá ne alea mo Sioape ko e tama ʻa Seluvaiá mo ʻĀpaiata+ ko e taulaʻeikí, pea naʻá na fai ʻa e tokoni mo e poupou kia ʻAtunaisa.+ 8 Ka ko Sātoki+ ko e taulaʻeikí, ko Penaia+ ko e foha ʻo Sihoiatá, ko Nētane+ ko e palōfitá, ko Simi,+ ko Lei, pea mo e kau tangata ʻa Tēvita naʻe toʻa ʻi he taú+ naʻe ʻikai te nau poupou kia ʻAtunaisa.

9 Faifai atu pē naʻe fai ʻe ʻAtunaisa ha feilaulau+ ʻo e fanga sipi, ko e fanga pulu, mo e fanga manu sisino ʻi he veʻe maka ko Soheletí, ʻa ia ʻoku ofi ki ʻEni-lokelí, pea naʻá ne fakaafeʻi ki ai ʻa hono fanga tokouá kotoa, ʻa e ngaahi foha ʻo e tuʻí, pea mo e kau tangata kotoa pē ʻo Siutá, ʻa e kau sevāniti ʻa e tuʻí. 10 Ka naʻe ʻikai te ne fakaafeʻi ʻa Nētane ko e palōfitá, ko Penaia mo e kau tangata toʻa ʻi he taú, pe ko Solomone ko hono tokouá. 11 Naʻe pehē ange leva ʻe Nētane+ kia Pati-sepa,+ ko e faʻē ʻa Solomoné:+ “Kuo ʻikai koā te ke fanongo ai kuo hoko ʻo tuʻi ʻa ʻAtunaisa+ ko e tama ʻa Hakití, pea ko hotau ʻeiki ko Tēvitá ʻoku ʻikai te ne ʻiloʻi ha meʻa ʻe taha ʻo fekauʻaki mo ia? 12 Ko eni ke ke haʻu pea tuku muʻa ke u faleʻi koe, koeʻuhí ke ke fakahaofi ai ʻa hoʻo moʻuí tonu pea mo e moʻui ʻa hoʻo tama ko Solomoné.+ 13 Hū kia Tuʻi Tēvita peá ke pehē kiate ia, ‘ʻIkai ko koe ia, ʻa hoku ʻeiki ko e tuʻí, naʻá ke fakapapau ki hoʻo sevānití, ʻo pehē: “Ko hoʻo tama ko Solomoné ʻe hoko ko e tuʻi ʻi he hili aú, pea ko ia ʻa e tokotaha ʻe nofo ʻi hoku taloní”?+ Ko ia ko e hā kuo hoko ai ʻa ʻAtunaisa ia ko e tuʻí?’ 14 Lolotonga hoʻo kei ʻi ai ʻo lea ki he tuʻí, te u muimui atu ʻiate koe ʻo fakapapauʻi ʻoku moʻoni ʻa e ngaahi meʻa ʻokú ke leaʻakí.”

15 Ko ia naʻe hū ʻa Pati-sepa ki he tuʻí, ki hono loki mohé. Naʻe motuʻa ʻaupito ʻa e tuʻí, pea naʻe tokangaʻi ʻa e tuʻí ʻe ʻApisaki+ ko e taʻahine Sūnemí. 16 Naʻe punou leva ʻa Pati-sepa ʻo ne fakatōmapeʻe ki he tuʻí, pea naʻe pehē ʻe he tuʻí: “Ko e hā ʻa hoʻo kolé?” 17 Naʻá ne tali ange: “ʻE hoku ʻeiki, ko koe ia naʻá ke fakapapau ʻia Sihova ko ho ʻOtuá ki hoʻo sevānití, ‘Ko hoʻo tama ko Solomoné ʻe hoko ko e tuʻi ʻi he hili aú, pea ko ia ʻa e tokotaha ʻe nofo ʻi hoku taloní.’+ 18 Kae vakai! Kuo hoko ʻa ʻAtunaisa ia ko e tuʻi pea ko hoku ʻeiki ko e tuʻí ʻoku ʻikai te ne ʻiloʻi ha meʻa ʻe taha ʻo fekauʻaki mo ia.+ 19 Naʻá ne feilaulauʻaki ʻa e fanga pulu, mo e fanga manu sisino, mo e fanga sipi tokolahi ʻaupito pea fakaafeʻi ʻa e ngaahi foha kotoa ʻo e tuʻí mo ʻĀpaiata ko e taulaʻeikí pea mo Sioape ko e ʻeikitaú;+ ka naʻe ʻikai te ne fakaafeʻi ʻe ia ʻa hoʻo sevāniti ko Solomoné.+ 20 Pea ko eni, ʻe hoku ʻeiki ko e tuʻí, ko e mata ʻo ʻIsilelí kotoa ʻoku hanga atu kiate koe ke ke tala ange kiate kinautolu pe ko hai ʻe nofo ʻi he taloni ʻo hoku ʻeiki ko e tuʻí ʻi he hili iá. 21 He ka ʻikai, ko e tuai pē ʻa e toka ʻo mālōlō ʻa hoku ʻeiki ko e tuʻí fakataha mo ʻene fanga kuí, ko au pea pehē ki heʻeku tama ko Solomoné ʻe lau kimaua ko e ongo lavaki.”

22 Pea ʻi he lolotonga ʻene kei lea ki he tuʻí, naʻe hū mai ʻa Nētane ko e palōfitá.+ 23 ʻI he taimi pē ko iá naʻe tala ki he tuʻí: “Ko Nētane eni ko e palōfitá!” Naʻá ne hū atu ki he ʻao ʻo e tuʻí ʻo ne fakatōmapeʻe ki he tuʻí mo hanga ki he kelekelé. 24 Naʻe pehē ange leva ʻe Nētane: “ʻE hoku ʻeiki ko e tuʻí, naʻá ke pehē koā, ‘Ko ʻAtunaisa ʻe hoko ko e tuʻi ʻi he hili aú, pea ko ia ʻa e tokotaha ʻe nofo ʻi hoku taloní’?+ 25 He ʻi he ʻaho ní kuó ne ʻalu hifo ai ke feilaulauʻaki+ ʻa e fanga pulu, ko e fanga manu sisino, mo e fanga sipi tokolahi ʻaupito, pea kuó ne fakaafeʻi ʻa e ngaahi foha kotoa ʻo e tuʻí mo e ngaahi ʻeiki ʻo e kau taú pea mo ʻĀpaiata ko e taulaʻeikí.+ ʻOku nau ʻi ai ʻo kai mo inu fakataha mo ia, pea ʻoku nau hanganaki pehē, ‘Ke lākoifie ʻa Tuʻi ʻAtunaisa!’ 26 Ka naʻe ʻikai te ne fakaafeʻi au, ʻa hoʻo sevānití, pe ko Sātoki ko e taulaʻeikí, pe ko Penaia+ ko e foha ʻo Sihoiatá, pe ko hoʻo sevāniti ko Solomoné. 27 Kuo fakamafaiʻi koā ʻe hoku ʻeiki ko e tuʻí ʻa e meʻá ni ʻo ʻikai tala ki hoʻo sevānití pe ko hai ʻe nofo ʻi he taloni ʻo hoku ʻeiki ko e tuʻí ʻi he hili iá?”

28 Naʻe tali ange leva ʻe Tuʻi Tēvita: “Ui mai ʻa Pati-sepa kiate au.” Ko ia naʻá ne hū mai leva ʻo tuʻu ʻi he ʻao ʻo e tuʻí. 29 Naʻe fai leva ʻe he tuʻí ha fuakava: “ʻOku ou fuakava ʻia Sihova ko e ʻOtua moʻuí, ʻa e tokotaha naʻá ne fakahaofi au mei he faingataʻá kotoa,+ 30 hangē pē ko ʻeku fuakava kiate koe ʻia Sihova ko e ʻOtua ʻo ʻIsilelí, ʻo pehē, ‘Ko hoʻo tama ko Solomoné ʻe hoko ko e tuʻi ʻi he hili aú, pea ko ia ʻa e tokotaha ʻe nofo ʻi hoku taloní ʻo fetongi aú!’ Ko e meʻa ia te u fakahoko ʻi he ʻaho ní.” 31 Naʻe punou leva ʻa Pati-sepa ʻo ne hanga ki he kelekelé peá ne fakatōmapeʻe ki he tuʻí mo ne pehē: “ʻOfa ke moʻui ʻo taʻengata ʻa hoku ʻeiki ko Tuʻi Tēvitá!”

32 ʻI he taimi pē ko iá naʻe pehē ʻe Tuʻi Tēvita: “Ui mai kiate au ʻa Sātoki ko e taulaʻeikí, mo Nētane ko e palōfitá, pea mo Penaia+ ko e foha ʻo Sihoiatá.”+ Ko ia naʻa nau hū atu ki he ʻao ʻo e tuʻí. 33 Naʻe pehē ange leva ʻe he tuʻí kiate kinautolu: “Mou ō mo e kau sevāniti ʻa homou ʻeikí, pea ʻai ʻa hoku foha ko Solomoné ke ne heka ʻi heʻeku miulí,*+ pea taki hifo ia ki Kīhoni.+ 34 Ko Sātoki ko e taulaʻeikí mo Nētane ko e palōfitá te na pani ia+ ʻi ai ke ne hoko ko e tuʻi ki ʻIsileli; pea mou ifi leva ʻa e meʻaifí mo mou pehē, ‘Ke lākoifie ʻa Tuʻi Solomone!’+ 35 Pea mou muimui ʻiate ia ʻo foki mai, pea te ne hū mai ʻo nofo ʻi hoku taloní; pea te ne hoko ko e tuʻi ʻo fetongi au, pea te u fakanofo ia ke ne hoko ko e taki ki ʻIsileli pea mo Siuta.” 36 ʻI he taimi pē ko iá naʻe pehē ange ʻe Penaia ko e foha ʻo Sihoiatá ki he tuʻí: “ʻĒmeni! ʻOfa ke fakapapauʻi ia ʻe Sihova ko e ʻOtua ʻo hoku ʻeiki ko e tuʻí. 37 Hangē pē ko e kau ʻa Sihova mo hoku ʻeiki ko e tuʻí, ke pehē pē ʻa ʻene kau mo Solomoné,+ pea ʻofa ke Ne ʻai ʻa hono taloní ke lahi ange ia ʻi he taloni ʻo hoku ʻeiki ko Tuʻi Tēvitá.”+

38 Pea ko Sātoki ko e taulaʻeikí, ko Nētane ko e palōfitá, ko Penaia+ ko e foha ʻo Sihoiatá, pea mo e kau Kēletí mo e kau Pēlití+ naʻa nau ʻalu hifo pea nau ʻai ʻa Solomone ke ne heka ʻi he miuli ʻa Tuʻi Tēvitá,+ pea naʻa nau ʻomi ia ki Kīhoni.+ 39 Pea naʻe toʻo ʻe Sātoki ko e taulaʻeikí ʻa e meʻatui ʻaiʻanga loló+ mei he tēnití+ ʻo ne pani ʻa Solomone,+ pea naʻe kamata ke nau ifi ʻa e meʻaifí, pea ko e kakaí kotoa naʻe kamata ke nau kaikaila: “Ke lākoifie ʻa Tuʻi Solomone!” 40 ʻI he hili iá, naʻe muimui ʻiate ia ʻa e kakaí kotoa pea nau ʻalu hake, mo nau ifi fuluta pea nau fiefia lahi, ko ia naʻe mafahi ʻa e kelekelé ʻi heʻenau longoaʻá.+

41 Ko ʻAtunaisa mo e faʻahinga kotoa naʻá ne fakaafeʻí naʻa nau fanongo atu ki ai ʻi he ʻosi ʻenau kaí.+ ʻI he fanongo pē ʻa Sioape ki he leʻo ʻo e meʻaifí, naʻá ne pehē: “Ko e hā ʻa e fuʻu mavava longoaʻa ko ena ʻi he koló?” 42 Lolotonga ʻene kei leá, naʻe haʻu ʻa Sionatane+ ko e foha ʻo ʻĀpaiata ko e taulaʻeikí. Naʻe pehē ange leva ʻe ʻAtunaisa: “Hū mai, he ko koé ko ha tangata lelei,* pea ʻoku pau pē ʻokú ke ʻomi ha ongoongo lelei.” 43 Ka naʻe tali ange ʻe Sionatane kia ʻAtunaisa: “ʻIkai! Ko hotau ʻeiki ko Tuʻi Tēvitá kuó ne ʻai ʻa Solomone ke tuʻi. 44 Naʻe ʻave ʻe he tuʻí fakataha mo ia ʻa Sātoki ko e taulaʻeikí, ko Nētane ko e palōfitá, ko Penaia ko e foha ʻo Sihoiatá, pea mo e kau Kēletí mo e kau Pēlití, pea naʻa nau ʻai ia ke ne heka ʻi he miuli ʻa e tuʻí.+ 45 Pea ko Sātoki ko e taulaʻeikí pea mo Nētane ko e palōfitá naʻá na pani ia ke ne hoko ko e tuʻi ʻi Kīhoni. ʻI he hili iá, naʻa nau haʻu mei ai ʻi he fiefia, pea ʻoku ʻi ai ha fuʻu mavava ʻi he koló. Ko e longoaʻa ia naʻa mou fanongo ki aí. 46 ʻIkai ngata aí, kuo nofo ʻa Solomone ʻi he taloni fakatuʻí. 47 Ko e toe meʻa ʻe taha, ko e kau sevāniti ʻa e tuʻí kuo nau haʻu ke talamonū ki hotau ʻeiki ko Tuʻi Tēvitá, ʻo pehē, ‘ʻOfa ke ʻai ʻe ho ʻOtuá ʻa e hingoa ʻo Solomoné ke lelei ange ia ʻi ho hingoá, pea ʻofa ke Ne ʻai hono taloní ke lahi ange ia ʻi ho taloní!’ Ko ia naʻe punou hifo ai ʻa e tuʻí ʻi he mohengá. 48 Pea naʻe toe pehē ʻe he tuʻí, ‘ʻOfa ke fakahīkihikiʻi ʻa Sihova ko e ʻOtua ʻo ʻIsilelí, ʻa ia kuó ne tuku ʻi he ʻahó ni ha taha ke ne nofo ʻi hoku taloní pea kuó ne tuku ke sio ki ai ʻa hoku matá tonu!’”

49 Pea ko kinautolu kotoa ko ia naʻe fakaafeʻi ʻe ʻAtunaisá naʻa nau hoko ʻo manavahē, pea ko kinautolu taki taha naʻa nau mālanga hake ʻo taki taha ʻalu ʻi hono hala. 50 Naʻe ilifia foki mo ʻAtunaisa koeʻuhí ko Solomone, ko ia naʻá ne tuʻu hake ʻo ne ʻalu ʻo piki ʻi he ngaahi meʻatui ʻo e ʻōlitá.+ 51 Naʻe fakahā kia Solomone: “Ko eni kuo hoko ʻo ilifia ʻa ʻAtunaisa ʻia Tuʻi Solomone; pea kuó ne piki ʻi he ngaahi meʻatui ʻo e ʻōlitá, ʻo ne pehē, ‘Tuku ke ʻuluaki fakapapau mai ʻa Tuʻi Solomone kiate au ʻe ʻikai te ne tāmateʻi ʻa ʻene sevānití ʻaki ʻa e heletaá.’” 52 ʻI he meʻá ni naʻe pehē ʻe Solomone: “Kapau ʻe taau ʻene tōʻongá, ʻe ʻikai tō hano fulufuluʻiʻulu ʻe taha ki he kelekelé; ka ʻo kapau ʻe ʻilo ʻiate ia ha kovi,+ kuo pau ke ne mate.” 53 Ko ia naʻe fekau atu ai ʻa Tuʻi Solomone ke ʻohifo ia mei he ʻōlitá. Pea naʻá ne hū mai ʻo punou kia Tuʻi Solomone, ʻi he hili iá naʻe pehē ange ʻe Solomone kiate ia: “ʻAlu ā ki ho ʻapí.”