ʻUluaki Tuʻi
14 ʻI he taimi ko iá naʻe puke ʻa ʻĀpaia ko e foha ʻo Selopoamé. 2 Ko ia naʻe pehē ange ʻe Selopoame ki hono uaifí: “Tuʻu hake muʻa, peá ke fakapuli koeʻuhí ke ʻoua naʻa nau ʻilo ko e uaifi koe ʻo Selopoamé, peá ke ʻalu ki Sailo. Vakai! ʻOku ʻi ai ʻa e palōfita ko ʻĀhisá. Ko ia ʻa e tokotaha naʻe lea fekauʻaki mo ʻeku hoko ko e tuʻi ki he kakaí ni.+ 3 Ke ke toʻo ha foʻi mā ʻe hongofulu, mo e ngaahi foʻi keke, pea mo ha hina hone, peá ke ʻalu kiate ia. Te ne tala atu leva kiate koe ʻa e meʻa ʻe hoko ki he tamasiʻí.”
4 Naʻe fai ʻe he uaifi ʻo Selopoamé ʻa e meʻa naʻá ne leaʻakí. Naʻá ne mālanga hake ʻo ʻalu ki Sailo+ peá ne aʻu ki he fale ʻo ʻĀhisá. Ko e ongo mata ʻo ʻĀhisá naʻe hanga fakamamaʻu pē ki muʻa, pea naʻe ʻikai lava ke ne sio koeʻuhí ko ʻene taʻumotuʻá.
5 Ka naʻe folofola ange ʻa Sihova kia ʻĀhisa: “Ko e uaifi eni ʻo Selopoamé ʻoku haʻu ke ne fehuʻi kiate koe ʻo fekauʻaki mo ʻene tamasiʻí, he ʻoku puke. Te u fakahā atu kiate koe ʻa e meʻa ke ke leaʻaki kiate iá.* ʻI heʻene aʻu maí, te ne fakapuli.”
6 ʻI he fanongo pē ʻa ʻĀhisa ki he ongo mai ʻa ʻene taulaká ʻi heʻene aʻu mai ki he hūʻangá, naʻá ne pehē atu: “Hū mai, ʻa e uaifi ʻo Selopoamé. Ko e hā ʻokú ke fakapuli aí? Kuo tuku mai kiate au ke u ʻoatu kiate koe ha pōpoaki kakaha. 7 ʻAlu ʻo tala kia Selopoame, ‘Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí: “Naʻá ku fokotuʻu hake koe mei he lotolotonga ho kakaí ke ʻai koe ko ha taki ki hoku kakai ko ʻIsilelí.+ 8 Pea naʻá ku hae ʻa e puleʻangá mei he fale ʻo Tēvitá pea foaki atu ia kiate koe.+ Ka kuo ʻikai te ke hoko ʻo hangē ko ʻeku sevāniti ko Tēvitá, ʻa ia naʻá ne tauhi ʻa ʻeku ngaahi fekaú pea muimui ʻiate au ʻaki ʻa e kotoa ʻo hono lotó, ʻo ne fai pē ʻa e meʻa naʻe totonu ʻi heʻeku vakaí.+ 9 Ka kuó ke fai ʻa e meʻa ʻoku kovi ange ia ʻi he faʻahinga kotoa naʻe ʻi muʻa ʻiate koé, pea naʻá ke ngaohi maʻau ha ʻotua ʻe taha mo e ngaahi ʻīmisi mētale* ke fakalotomamahiʻi au,+ pea ko au ia kuó ke sītuʻa mei aí.+ 10 ʻI he ʻuhinga ko iá ʻoku ou ʻomi ai ʻa e mala ki he fale ʻo Selopoamé, pea te u fakaʻauhamālie* meia Selopoame ʻa e tangata kotoa pē,* ʻo kau ai ʻa e tokotaha ʻoku ʻikai hano tokoní mo e vaivai ʻi ʻIsilelí, pea te u tafiʻi ke maʻa ʻa e fale ʻo Selopoamé,+ ʻo hangē pē ko hono toʻo atu ʻe ha taha ʻa e kinohaʻá kae ʻoua kuo puli kotoa! 11 Ko ha taha pē ʻoku kau kia Selopoame ʻe mate ʻi he koló, ʻe kai ia ʻe he fanga kulií; pea ko ha taha pē ʻe mate ʻi he vaó, ʻe keina ia ʻe he fanga manupuna ʻo e langí, he kuo folofolaʻaki ia ʻe Sihova.”’
12 “Ko eni ke ke tuʻu hake; ʻo ʻalu ki ho falé. ʻI he taimi ʻe tuʻu ai ho vaʻé ʻi he koló, ʻe mate ʻa e tamasiʻí. 13 Ko ʻIsileli kotoa te nau tengihia ia pea tanu ia, he ko ia tokotaha pē ʻi he fāmili ʻo Selopoamé ʻe fakatokoto ʻi ha faʻitoka, koeʻuhí ko ia tokotaha pē ʻi he fale ʻo Selopoamé ʻoku ʻilo ai ʻe Sihova ko e ʻOtuá ha meʻa ʻoku lelei. 14 ʻE fokotuʻu ʻe Sihova maʻana ha tuʻi ki ʻIsileli ʻa ia te ne fakaʻauha* ʻa e fale ʻo Selopoamé+ mei he ʻaho ko iá ʻo faai atu ai, ʻio, naʻa mo e taimí ni. 15 ʻE taaʻi ʻe Sihova ʻa ʻIsileli ʻo hangē ko ha kaho ʻoku maleʻei holo ʻi he vaí, pea te ne taʻakifuʻu ʻa ʻIsileli mei he fonua lelei ko eni naʻá ne foaki ki heʻenau fanga kuí,+ pea te ne fakamovete kinautolu ki he tafaʻaki ʻe taha ʻo e Vaitafé,*+ koeʻuhí naʻa nau ngaohi ʻenau ngaahi pou ʻakau toputapu,*+ ʻo fakalotomamahiʻi ai ʻa Sihova. 16 Pea te ne liʻaki ʻa ʻIsileli koeʻuhí ko e ngaahi angahala kuo fai ʻe Selopoamé pea kuó ne fakatupunga ke fai ʻe ʻIsilelí.”+
17 Ko ia naʻe mālanga hake ai ʻa e uaifi ʻo Selopoamé ʻo hoko atu ʻene fonongá peá ne aʻu ki Tilisa. ʻI heʻene aʻu atu ki he hūʻanga ʻo e falé, naʻe mate ʻa e tamasiʻí. 18 Ko ia naʻa nau tanu ia, pea naʻe tengihia ia ʻe ʻIsileli kotoa, ʻo hangē ko e folofola ʻa Sihova naʻá ne folofolaʻaki fakafou heʻene sevāniti ko ʻĀhisa ko e palōfitá.
19 Pea ko e toenga ʻo e hisitōlia ʻo Selopoamé, ʻa e anga ʻo ʻene faitaú+ mo e anga ʻo ʻene pulé, kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí. 20 Pea ko e lōloa* ʻo e pule ʻa Selopoamé ko e taʻu ʻe 22, ʻi he hili iá naʻá ne toka ʻo mālōlō fakataha mo ʻene fanga kuí;+ pea naʻe hoko ʻa hono foha ko Nātapí ko e tuʻi ʻo fetongi ia.+
21 Lolotonga iá, naʻe hoko ʻa Lehopoame ko e foha ʻo Solomoné ko e tuʻi ʻi Siuta. Naʻe taʻu 41 ʻa Lehopoame ʻi heʻene hoko ko e tuʻí, pea naʻá ne pule ʻi he taʻu ʻe 17 ʻi Selusalema, ʻa e kolo naʻe fili+ ʻe Sihova mei he ngaahi matakali kotoa pē ʻo ʻIsilelí ke hoko ko e feituʻu ia ke ʻai ki ai hono huafá.+ Ko e hingoa ʻo e faʻē ʻa Lehopoamé ko Naama ko e fefine ʻĀmoni.+ 22 Pea naʻe fai ʻe Siuta ʻa e meʻa naʻe kovi ʻi he vakai ʻa Sihová,+ pea ʻi he ngaahi angahala naʻa nau faí naʻa nau fakahouhauʻi ai ia ʻo lahi ange ʻi he meʻa naʻe fai ʻe heʻenau fanga kuí.+ 23 Ko kinautolu foki naʻa nau hanganaki langa maʻanautolu ha ngaahi potu māʻolunga, mo e ngaahi pou maka toputapu, pea mo e ngaahi pou ʻakau toputapu*+ ʻi he ngaahi foʻi māʻolunga+ kotoa pē pea mo e lalo ʻakau tupu ʻāfaʻafa+ kotoa pē. 24 Naʻe ʻi ai foki mo e kau tangata feʻauaki ʻi he temipalé ʻi he fonuá.+ Naʻa nau tōʻongafai ʻo hangē ko e ngaahi meʻa fakalielia kotoa pē ʻa e ngaahi puleʻanga ʻa ia naʻe kapusi ʻe Sihova mei he ʻao ʻo e kau ʻIsilelí.
25 ʻI he taʻu hono nima ʻo e pule ʻa Tuʻi Lehopoamé, naʻe ʻalu hake ai ʻa Tuʻi Sīsake+ ʻo ʻIsipité ʻo tauʻi ʻa Selusalema.+ 26 Naʻá ne ʻave ʻa e ngaahi koloa ʻi he fale ʻo Sihová mo e ngaahi koloa ʻi he fale*+ ʻo e tuʻí. Naʻá ne ʻave ʻa e meʻa kotoa pē, ʻo kau ai ʻa e ngaahi fuʻu pā koula kotoa pē ʻa ia naʻe ngaohi ʻe Solomoné.+ 27 Ko ia naʻe ngaohi ʻe Tuʻi Lehopoame ʻa e ngaahi fuʻu pā kopa ke fetongiʻaki ia, pea naʻá ne tuku ia ki he kau pule kaʻaté,* ʻa ia naʻa nau leʻohi ʻa e hūʻanga ki he fale ʻo e tuʻí. 28 ʻI he taimi pē naʻe haʻu ai ʻa e tuʻí ki he fale ʻo Sihová, naʻe toʻo ia ʻe he kau kaʻaté, pea naʻa nau fakafoki leva ia ki he loki kaʻaté.
29 Pea ko e toenga ʻo e hisitōlia ʻo Lehopoamé, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá?+ 30 Naʻe ʻi ai ha tau hokohoko ʻi he vahaʻa ʻo Lehopoame mo Selopoamé.+ 31 Pea naʻe toka ʻa Lehopoame ʻo mālōlō fakataha mo ʻene fanga kuí pea naʻe tanu ia fakataha mo ʻene fanga kuí ʻi he Kolo-ʻo-Tēvitá.+ Ko e hingoa ʻo ʻene faʻeé ko Naama ko e fefine ʻĀmoni.+ Pea naʻe hoko ʻa hono foha ko ʻApisamí*+ ko e tuʻi ʻo fetongi ia.