Ua Kalonikali

23 ʻI he taʻu hono fitú, naʻe loto-toʻa ai ʻa Sihoiata peá ne fai ha aleapau* mo e ngaahi ʻeiki ʻo e ngaahi toko teaú,+ ʻa ia ko ʻAsalaia ko e foha ʻo Seloamí, ʻIsimeʻeli ko e foha ʻo Siohananí, ʻAsalaia ko e foha ʻo ʻŌpetí, Māseia ko e foha ʻo ʻAtaiá, pea mo ʻElisafati ko e foha ʻo Sikelí. 2 Naʻa nau ʻalu atu leva ʻi he kotoa ʻo Siutá ʻo fakatahatahaʻi mai ʻa e kau Līvaí+ mei he ngaahi kolo kotoa ʻo Siutá pea mo e ngaahi ʻulumotuʻa ʻo e ngaahi fale ʻo e ngaahi tamai ʻa ʻIsilelí. ʻI heʻenau aʻu ki Selusalemá, 3 naʻe fai ʻe he fakatahaʻangá fakakātoa ha fuakava+ mo e tuʻí ʻi he fale ʻo e ʻOtua moʻoní, ʻi he hili iá naʻe pehē ʻe Sihoiata kiate kinautolu:

“Vakai! ʻE pule ʻa e foha ʻo e tuʻí, ʻo hangē tofu pē ko ia naʻe talaʻofaʻaki ʻe Sihova ʻo fekauʻaki mo e ngaahi foha ʻo Tēvitá.+ 4 Ko e meʻa eni te mou faí: Ko e vahe tolu ʻe taha ʻo e kau taulaʻeikí mo e kau Līvaí ʻa ia te nau ngāue+ ʻi he Sāpaté te nau hoko ko e kau leʻo matapā;+ 5 ko e vahe tolu ʻe taha te nau ʻi he fale* ʻo e tuʻí,+ pea ko e vahe tolu leva ʻe tahá te nau ʻi he Matapā ʻo e Makatuʻungá, pea ko e kotoa ʻo e kakaí te nau ʻi he ongo lotoʻā ʻo e fale ʻo Sihová.+ 6 ʻOua naʻa tuku ha taha pē ke hū ki he fale ʻo Sihová tuku kehe ʻa e kau taulaʻeiki mo e kau Līvai ʻa ia ʻoku nau fakahoko fatongiá.+ ʻE lava ke hū ʻa e faʻahingá ni koeʻuhí ko ha kulupu toputapu kinautolu, pea ko e kotoa ʻo e kakaí te nau tauhi ʻa e fatongia kia Sihová. 7 Kuo pau ki he kau Līvaí ke nau takatakaiʻi ʻa e tuʻí ʻi he tafaʻaki kotoa pē, ʻo taki taha toʻo ʻene meʻatau. Ko ha taha pē ʻe hū ki loto ki he falé ʻe tāmateʻi. Te mou ʻi he tuʻí ʻi ha feituʻu pē te ne ʻalu ki ai.”*

8 Ko e kau Līvaí mo e kotoa ʻo Siutá naʻa nau fai ʻa e meʻa tofu pē ko ia naʻe fekauʻi ange ʻe Sihoiata ko e taulaʻeikí. Ko ia naʻe ʻave ʻe he tokotaha taki taha ʻene kau tangata ʻa ia naʻe ngāue ʻi he Sāpaté, fakataha mo kinautolu ko ia naʻe ʻikai ke ngāue ʻi he Sāpaté,+ he naʻe ʻikai ke tuku ange ʻe Sihoiata ko e taulaʻeikí ʻa e ngaahi vāhengá+ mei heʻenau ngāué. 9 Naʻe ʻoange leva ʻe Sihoiata ko e taulaʻeikí ki he ngaahi ʻeiki ʻo e ngaahi toko teaú+ ʻa e ngaahi tao mo e fanga kiʻi pā* pea mo e ngaahi pā fuopotopoto ʻa Tuʻi Tēvitá,+ ʻa ia naʻe ʻi he fale ʻo e ʻOtua moʻoní.+ 10 Naʻá ne fokotuʻu leva ʻa e kakaí kotoa, ʻo taki taha toʻo ʻene meʻatau,* mei he tafaʻaki toʻomataʻu ʻo e falé ki he tafaʻaki toʻohema ʻo e falé, ʻi he veʻe ʻōlitá pea ʻi he veʻe falé, ʻo takatakai kotoa ki he tuʻí. 11 Naʻa nau ʻomi leva ʻa e foha ʻo e tuʻí+ ki tuʻa pea ʻai kiate ia ʻa e kalauní pea mo e Fakamoʻoní,*+ pea naʻa nau fakanofo ia ko e tuʻi, pea naʻe pani ia ʻe Sihoiata mo hono ngaahi fohá. Pea naʻa nau pehē leva: “Ke lākoifie ʻa e ʻAfioná!”+

12 ʻI he fanongo ʻa ʻAtalaia ki he ongo mai ʻa e lele ʻa e kakaí mo ʻenau fakahīkihikiʻi ʻa e tuʻí, naʻá ne ʻalu atu ʻi he taimi pē ko iá ki he kakaí ʻi he fale ʻo Sihová.+ 13 Pea naʻá ne sio atu ki he tuʻí ʻokú ne tuʻu mai ai ʻi ha veʻe fuʻu pou* ʻi he hūʻangá. Ko e ngaahi ʻeikí+ mo e kau ifi talupité naʻa nau ʻi he tuʻí, pea ko e kakai kotoa ʻo e fonuá naʻa nau fiefia+ mo ifi ʻa e ngaahi talupité, pea ko e kau hiva naʻa nau toʻo ʻa e ngaahi meʻaleá naʻa nau taki ʻi he* fakahīkihikí. ʻI he meʻá ni naʻe hae ai ʻe ʻAtalaia ʻa hono ngaahi kofú peá ne kalanga: “Ko e faʻufaʻufono! Ko e faʻufaʻufono!” 14 Ka naʻe ʻomai ʻe Sihoiata ko e taulaʻeikí ʻa e ngaahi ʻeiki ʻo e ngaahi toko teaú, ʻa e faʻahinga naʻe fakanofo ke nau tokangaʻi ʻa e kau taú, ʻo ne pehē kiate kinautolu: “ʻAve ia mei he lotolotonga ʻo e ngaahi ʻotú, pea kapau ʻe muimui ha taha ʻiate ia, tāmateʻi ia ʻaki ʻa e heletaá!” He naʻe pehē ʻe he taulaʻeikí: “ʻOua naʻa tāmateʻi ia ʻi he fale ʻo Sihová.” 15 Ko ia naʻa nau puke ia, pea ʻi heʻene aʻu ki he hūʻanga ʻo e Matapā Hoosi ʻi he fale* ʻo e tuʻí, naʻa nau tāmateʻi leva ia ʻi ai.

16 Naʻe fai leva ʻe Sihoiata ha fuakava ʻi he vahaʻa ʻoʻona mo e kakaí kotoa pea mo e tuʻí, te nau kei hoko ai pē ko e kakai ʻa Sihova.+ 17 ʻI he hili iá, naʻe ʻalu atu ʻa e kakaí kotoa ki he fale* ʻo Pēalí ʻo holoki hifo ia,+ pea naʻa nau laiki ʻa hono ngaahi ʻōlitá mo hono ngaahi ʻīmisí,+ pea naʻa nau tāmateʻi ʻa Mātani ko e taulaʻeiki ʻa Pēalí+ ʻi muʻa ʻi he ngaahi ʻōlitá. 18 Naʻe tuku leva ʻe Sihoiata ʻa hono tokangaʻi ʻo e fale ʻo Sihová ki he nima ʻo e kau taulaʻeikí mo e kau Līvaí, ʻa ia naʻe vaheʻi ʻe Tēvita ki he ngaahi vāhenga ke nau tokangaʻi ʻa e fale ʻo Sihová, ke nau ʻohake ʻa e ngaahi feilaulau tutu kia Sihová+ ʻo fakatatau ki he meʻa kuo hiki ʻi he Lao ʻa Mōsesé,+ fakataha mo e fiefia pea mo e hiva, ʻo hangē ko ia naʻe fakahinohino ʻe* Tēvitá. 19 Naʻá ne toe fokotuʻu ʻa e kau leʻo matapaá+ ʻi he ngaahi matapā ʻo e fale ʻo Sihová, koeʻuhí ke ʻoua naʻa lava ke hū ki ai ha taha ʻokú ne taʻemaʻa ʻi ha faʻahinga tuʻunga pē. 20 Naʻá ne ʻave leva ʻa e ngaahi ʻeiki ʻo e ngaahi toko teaú,+ mo e kau māʻolungá, mo e kau pule ʻo e kakaí pea mo e kakai kotoa ʻo e fonuá pea nau fakafeʻao hifo ʻa e tuʻí mei he fale ʻo Sihová. Pea naʻa nau hū mai ʻi he matapā ʻolungá ki he fale* ʻo e tuʻí pea nau fakanofo ʻa e tuʻí ki he taloni+ ʻo e puleʻangá.+ 21 Ko ia naʻe fiefia ʻa e kakai kotoa ʻo e fonuá pea naʻe nonga ʻa e koló, he kuo nau tāmateʻi ʻa ʻAtalaia ʻaki ʻa e heletaá.