Ua Sāmiuela

13 Pea ko e foha ʻo Tēvita ko ʻApisalomé naʻe ʻi ai hono tuofefine hoihoifua ko Tema,+ pea ko e foha ʻo Tēvita ko ʻAmanoní+ naʻá ne ʻofa ʻiate ia. 2 Naʻe faingataʻaʻia lahi ʻa ʻAmanoni ʻo ne hoko ʻo puke koeʻuhi ko hono tuofefine ko Temá, he ko e taʻahine ia naʻe kei nofo anga-maʻa, pea naʻe hā ngali faingataʻa kia ʻAmanoni ke ne fai ha meʻa kiate ia. 3 Pea ko ʻAmanoní naʻe ʻi ai hono kaungāmeʻa ko Sionatapi,+ ko e foha ʻo Simia,+ ko e tokoua ʻo Tēvitá; pea ko Sionatapí ko ha tangata naʻe olopoto ʻaupito. 4 Ko ia naʻá ne pehē ange kiate ia: “Ko e hā ʻokú ke mātuʻaki loto-mafasia ai ʻi he pongipongi kotoa pē, ʻa koe ko e foha ʻo e tuʻí? Ko e hā ʻoku ʻikai te ke tala mai ai kiate aú?” Naʻe tali ange ʻe ʻAmanoni kiate ia: “ʻOku ou ʻofa au ʻia Tema, ko e tuofefine+ ʻo hoku tokoua ko ʻApisalomé.” 5 Naʻe tali ange ʻe Sionatapi kiate ia: “Tokoto ʻi ho mohengá ʻo fakangalingali ʻokú ke puke. ʻI he haʻu hoʻo tamaí ke vakai koé, te ke pehē kiate ia, ‘Kātaki muʻa ʻo tuku ʻa hoku tuofefine ko Temá ke ne haʻu ʻo ʻomai haʻaku meʻakai. Kapau te ne teuteu ʻa e meʻakai ʻoku ʻave maʻá e tokotaha mahakí* ʻi hoku ʻaó, te u kai ia mei hono nimá.’”

6 Ko ia naʻe tokoto ai ʻa ʻAmanoni ʻo fakangalingali ʻokú ne puke, pea naʻe hū mai ʻa e tuʻí ke vakai ia. Naʻe pehē ange leva ʻe ʻAmanoni ki he tuʻí: “Kātaki muʻa ʻo tuku ʻa hoku tuofefine ko Temá ke ne haʻu ʻo taʻo ha foʻi keke ʻe ua ʻi hoku ʻaó koeʻuhí ke u kai ia mei hono nimá.” 7 Ko ia naʻe ʻave ai ʻe Tēvita ha pōpoaki kia Tema ʻa ia naʻe ʻi ʻapi, ʻo pehē: “Kātaki muʻa ʻo ʻalu ki he fale ho tuongaʻane ko ʻAmanoní pea teuteu ha meʻakai* maʻana.” 8 Ko ia naʻe ʻalu ʻa Tema ki he fale ʻo hono tuongaʻane ko ʻAmanoní, ʻa ia naʻá ne tokoto aí. Naʻá ne toʻo ʻa e takaongá ʻo natu ʻaki ia ʻa e ongo foʻi keke ʻi hono ʻaó pea fakapaku ʻa e ongo foʻi keké. 9 Naʻá ne toʻo leva ʻa e fakapakú ʻo ne tuku atu ʻa e keké kiate ia. Ka naʻe fakafisi ʻa ʻAmanoni ke kai peá ne pehē: “Ke mavahe ʻa e tokotaha kotoa pē meiate au!” Ko ia naʻe mavahe ai ʻa e tokotaha kotoa pē meiate ia.

10 Naʻe pehē ange leva ʻe ʻAmanoni kia Tema: “ʻOmi ʻa e meʻakaí* ki he loki mohé, koeʻuhi ke u kai ia mei ho nimá.” Ko ia naʻe toʻo ai ʻe Tema ʻa e ongo foʻi keke naʻá ne ngaohí ʻo ne ʻave ia ki hono tuongaʻane ko ʻAmanoní ʻi he loki mohé. 11 ʻI heʻene ʻomi ia kiate ia ke ne kaí, naʻá ne puke ia peá ne pehē ange: “Haʻu ke ta mohe, ʻe hoku tuofefine.” 12 Ka naʻá ne pehē ange kiate ia: “ʻIkai, ʻe hoku tuongaʻane! ʻOua te ke fakamaaʻi aú, he ʻoku ʻikai ke fai ha meʻa pehē ʻi ʻIsileli.+ ʻOua ʻe fai ʻa e meʻa fakamā ko ení.+ 13 ʻE lava fēfē ke u ʻai ke ngalo atu ʻa hoku tuʻunga fakamaá? Pea ʻe lau koe ko e taha ʻo e kau tangata fakamā ʻi ʻIsilelí. Ko eni, lea muʻa ki he tuʻí, koeʻuhí ʻe ʻikai te ne taʻofi au meiate koe.” 14 Ka naʻá ne fakafisi ke fanongo kiate ia, pea naʻá ne fakamālohiʻi ia pea fakamaaʻi ia ʻaki hono tohotohoʻi ia. 15 Pea naʻe kamata ke fehiʻa ʻa ʻAmanoni ʻiate ia ʻi ha fehiʻa lahi ʻaupito, ko ia naʻe hoko ai ʻa ʻene fehiʻa kiate iá ʻo lahi ange ia ʻi he ʻofa naʻá ne ongoʻi kiate iá. Naʻe pehē ange ʻe ʻAmanoni kiate ia: “Tuʻu hake; peá ke ʻalu!” 16 ʻI he meʻá ni naʻá ne pehē ange kiate ia: “ʻIkai, ʻe hoku tuongaʻane, he ko hono fekau au ke u ʻalú ʻoku kovi ange ia ʻi he meʻa kuó ke fai kiate aú!” Ka naʻá ne fakafisi ke fanongo kiate ia.

17 Ko ia naʻá ne ui ai ʻa e kiʻi talavou ko ʻene tamaioʻeikí ʻo ne pehē ange: “ʻAve muʻa ʻa e tokotahá ni ki tuʻa mei hoku ʻaó, pea lokaʻi ʻa e matapaá.” 18 (Pea naʻá ne tui ha kofu makehe,* he ko e ngaahi teunga ia naʻe tui ʻe he ngaahi ʻofefine kei nofo anga-maʻa ʻo e tuʻí.) Ko ia naʻe taki ia ʻe he tamaioʻeiki ʻa ʻAmanoní ki tuʻa, peá ne lokaʻi ʻa e matapaá. 19 Naʻe ʻai leva ʻe Tema ʻa e efuefu ki hono ʻulú,+ pea naʻá ne hae ʻa e kofu fakaʻofoʻofa naʻá ne tuí; pea naʻá ne hanganaki puke ʻa hono ʻulú peá ne mavahe, ʻo ne tangi pē mo ʻalu.

20 ʻI he meʻá ni naʻe ʻeke ange ai ʻe hono tuongaʻane ko ʻApisalomé+ kiate ia: “Ko ho tuongaʻane ko ʻAmanoní naʻe ʻiate koé? Pea ko eni ke ke fakalongolongo pē, ʻe hoku tuofefine. Ko ho tuongaʻane ia.+ ʻOua ʻe tuku ke nofo ʻa e meʻá ni ʻi ho lotó.” Naʻe nofo mavahe leva ai ʻa Tema ʻi he fale ʻo hono tuongaʻane ko ʻApisalomé. 21 ʻI he fanongo ʻa Tuʻi Tēvita fekauʻaki mo e ngaahi meʻa kotoa ko ení, naʻá ne hoko ai ʻo ʻita ʻaupito.+ Ka naʻe ʻikai te ne ʻai ke ongoʻi mamahi ʻa ʻAmanoni ko hono fohá, koeʻuhí he naʻá ne ʻofa ʻiate ia, he ko ia ʻa hono ʻuluaki fohá. 22 Pea naʻe ʻikai ke teitei lea ʻa ʻApisalome kia ʻAmanoni, ʻo tatau pē ʻi he kovi pe ko e lelei; he naʻe fehiʻa ʻa ʻApisalome+ ʻia ʻAmanoni koeʻuhí ko ʻene fakamaaʻi ʻa hono tuofefine ko Temá.+

23 ʻI he hili ʻa e taʻu kakato ʻe ua, naʻe ʻi Pēali-hasoa ai ʻa e kau kosi sipi ʻa ʻApisalomé ʻo ofi ki ʻIfalemi,+ pea naʻe fakaafeʻi ʻe ʻApisalome ʻa e ngaahi foha kotoa ʻo e tuʻí.+ 24 Ko ia naʻe haʻu ʻa ʻApisalome ki he tuʻí ʻo ne pehē: “ʻOku kosi ʻa e fanga sipi ʻa hoʻo sevānití. Tuku muʻa ke ʻalu mo au ʻa e tuʻí mo ʻene kau sevānití.” 25 Ka naʻe pehē ange ʻe he tuʻí kia ʻApisalome: “ʻIkai, ʻe hoku foha. Kapau te mau ō kotoa, te mau hoko ko e fakakavenga kiate koe.” Neongo naʻá ne hanganaki kōlenga kiate ia, naʻe ʻikai te ne loto ke ʻalu, ka naʻá ne tāpuakiʻi ia. 26 Naʻe pehē leva ʻe ʻApisalome: “Kapau ʻe ʻikai te ke ʻalu, tuku mai muʻa ʻa hoku tokoua ko ʻAmanoní ke ne ʻalu mo kimautolu.”+ Naʻe tali ange ʻe he tuʻí kiate ia: “Ko e hā ke ne ʻalu ai mo koé?” 27 Ka naʻe kōlenga ʻa ʻApisalome kiate ia, ko ia naʻá ne fekauʻi ʻa ʻAmanoni mo e ngaahi foha kotoa ʻo e tuʻí ke nau ō mo ia.

28 Naʻe tuʻutuʻuni leva ʻe ʻApisalome ki heʻene kau tamaioʻeikí: “Mou siofi, pea ko e taimi ko ē ʻe fiefia ai ʻa e loto ʻo ʻAmanoní ʻi he uainé, te u pehē atu kiate kimoutolu, ‘Taaʻi ʻa ʻAmanoni!’ Kuo pau leva ke mou tāmateʻi ia. ʻOua ʻe ilifia. ʻIkai ko au ia ʻoku ou fekauʻi kimoutolú? Mou tuʻu mālohi pea loto-toʻa.” 29 Ko ia naʻe fai ʻe he kau tamaioʻeiki ʻa ʻApisalomé kia ʻAmanoni ʻa e meʻa tofu pē ko ia naʻe tuʻutuʻuni ʻe ʻApisalomé; pea naʻe tuʻu hake leva ʻa e ngaahi foha kehe kotoa ʻo e tuʻí, ʻo heka ʻa e tokotaha taki taha ki heʻene miuli pea nau hola. 30 Lolotonga ʻenau holá, naʻe aʻu atu ʻa e tala kia Tēvita: “Kuo taaʻi ʻe ʻApisalome ʻa e ngaahi foha kotoa ʻo e tuʻí pea ʻoku ʻikai ha taha ʻo kinautolu ʻe hao.” 31 ʻI he meʻá ni naʻe tuʻu hake ai ʻa e tuʻí ʻo ne hae ʻa hono valá pea tokoto ʻi he kelekelé, pea ko e kotoa ʻo ʻene kau sevānití naʻa nau tutuʻu ʻo ofi ai kuo hae ʻa honau ngaahi kofú.

32 Kae kehe, ko Sionatapi+ ko e foha ʻo Simia+ ko e tokoua ʻo Tēvitá, naʻá ne pehē: “ʻOua naʻa tuku ke fakakaukau ʻa hoku ʻeikí kuo nau tāmateʻi ʻa e ngaahi foha iiki kotoa ʻo e tuʻí, he ko ʻAmanoni pē kuo maté.+ Naʻe hoko eni ʻi he tuʻutuʻuni ʻa ʻApisalome, ʻa ia naʻá ne fakapapauʻi ke fai eni+ mei he ʻaho ko ia naʻe fakamaaʻi ai ʻe ʻAmanoni ʻa hono tuofefine+ ko Temá.+ 33 Ko eni ʻoua naʻa tuku ke tokanga* ʻa hoku ʻeiki ko e tuʻí ki he tala ʻo pehē, ‘Ko e ngaahi foha kotoa ʻo e tuʻí kuo nau maté’; ko ʻAmanoni pē kuo maté.”

34 Lolotonga ení, naʻe hola ʻa ʻApisalome.+ Ki mui ai, naʻe hanga hake ʻa e tangata leʻó ʻo ne mamata atu naʻe ʻi ai ʻa e kakai tokolahi ʻoku nau haʻu mei he hala ʻi mui ʻiate iá ʻi he veʻe moʻungá. 35 ʻI he meʻá ni naʻe pehē ange ai ʻe Sionatapi+ ki he tuʻí: “Vakai! Ko e ngaahi foha ē ʻo e tuʻí kuo nau foki mai. ʻOku hangē tofu pē ko ia naʻe leaʻaki ʻe hoʻo sevānití.” 36 ʻI he ʻosi ʻa ʻene leá, naʻe hū mai ʻa e ngaahi foha ʻo e tuʻí, ʻoku nau tangi leʻo-lahi; pehē foki ki he tuʻí mo ʻene kau sevānití kotoa naʻa nau mātuʻaki tangi mamahi. 37 Ka naʻe hola ʻa ʻApisalome ʻo ne ʻalu kia Talimai+ ko e foha ʻo ʻAmihuti ko e tuʻi ʻo Kēsulí. Naʻe tengihia ʻe Tēvita ʻa hono fohá ʻi ha ngaahi ʻaho lahi. 38 ʻI he hili ʻa e hola ʻa ʻApisalome ʻo ne ʻalu ki Kēsulí,+ naʻá ne nofo ai ʻi ha taʻu ʻe tolu.

39 Naʻe faifai pē pea fakaʻamu ʻa Tēvita ke ne ʻalu kia ʻApisalome, he kuo fai ha fakafiemālie kiate ia* ʻi he mate ʻa ʻAmanoní.