Ua Kalonikali
15 Pea naʻe hoko mai ʻa e laumālie ʻo e ʻOtuá kia ʻAsalaia ko e foha ʻo ʻŌtetí. 2 Ko ia naʻá ne ʻalu atu ke fakafetaulaki kia ʻAsa peá ne pehē ange kiate ia: “Fanongo mai, ʻe ʻAsa mo Siuta pea mo Penisimani kotoa! ʻE kau ʻa Sihova mo kimoutolu lolotonga hoʻomou nofo maʻu ʻiate iá;+ pea kapau te mou kumi kiate ia, te ne tuku ke mou ʻilo ia,+ ka ʻo kapau te mou liʻaki ia, te ne liʻaki kimoutolu.+ 3 Naʻe fuoloa ʻa e taimi* naʻe ʻikai maʻu ai ʻe ʻIsileli ʻa e ʻOtua moʻoní, ʻo ʻikai ha taulaʻeiki ke faiako, pea ʻikai ha lao.+ 4 Ka ʻi heʻenau faingataʻaʻiá naʻa nau foki kia Sihova ko e ʻOtua ʻo ʻIsilelí pea kumi kiate ia, naʻá ne tuku ke nau ʻilo ia.+ 5 ʻI he taimi ko iá naʻe ʻikai lava ke malu ʻa e fononga ʻa ha taha,* he naʻe lahi ʻa e taʻemanongá ʻi he lotolotonga ʻo e kakai kotoa ʻo e ngaahi fonuá. 6 Naʻe laiki ʻe ha puleʻanga ha puleʻanga pea ʻe ha kolo ʻe taha ha kolo ʻe taha, koeʻuhí naʻe tuku ai pē kinautolu ʻe he ʻOtuá ke nau ʻi ha tuʻunga māveuveu tupu mei he ngaahi faingataʻaʻia kehekehe.+ 7 Ka ko kimoutolu, ke mou mālohi pea ʻoua ʻe loto-siʻi,*+ he ʻe fakapaleʻi ʻa hoʻomou ngāué.”
8 ʻI he fanongo pē ʻa ʻAsa ki he ngaahi leá ni pea mo e kikite ʻa ʻŌteti ko e palōfitá, naʻá ne loto-toʻa ai ʻo ne toʻo ʻa e ngaahi ʻaitoli fakalieliá mei he fonua kotoa ʻo Siuta+ mo Penisimaní pea mei he ngaahi kolo naʻá ne hamu mei he feituʻu moʻungaʻia ʻo ʻIfalemí, pea naʻá ne fakafoʻou ʻa e ʻōlita ʻo Sihova ʻa ia naʻe ʻi muʻa ʻi he fale-hūʻanga ʻo e fale ʻo Sihová.+ 9 Pea naʻá ne fakatahatahaʻi mai ʻa Siuta mo Penisimani kotoa pea mo e kau muli naʻe ʻiate kinautolú mei ʻIfalemi mo Manase pea mo Simione,+ he naʻa nau mavahe tokolahi mai kiate ia mei ʻIsileli, ʻi heʻenau sio naʻe ʻiate ia ʻa Sihova ko hono ʻOtuá. 10 Ko ia naʻe fakatahatahaʻi ai kinautolu ki Selusalema ʻi he māhina hono tolu ʻo e taʻu hono 15 ʻo e pule ʻa ʻAsá. 11 ʻI he ʻaho ko iá naʻa nau feilaulauʻi ai kia Sihova mei he koloa vete naʻa nau ʻomí ʻa e pulu ʻe 700 pea mo e sipi ʻe 7,000. 12 ʻIkai ko ia pē, naʻa nau kau ki ha fuakava ke kumi kia Sihova ko e ʻOtua ʻo ʻenau fanga kuí ʻaki ʻa e kotoa ʻo honau lotó mo e kotoa ʻo ʻenau moʻuí.+ 13 ʻIlonga ʻa ia naʻe ʻikai kumi kia Sihova ko e ʻOtua ʻo ʻIsilelí naʻe pau ke tāmateʻi, ʻo tatau ai pē pe ko e siʻi pe lahi, tangata pe fefine.+ 14 Ko ia naʻa nau fai leʻo-lahi ai ha fuakava kia Sihova ʻaki ha kaikaila fiefia, pea ʻaki ʻa e ngaahi talupite pea mo e ngaahi meʻaifi. 15 Pea naʻe fiefia ʻa Siuta kotoa ʻi he fuakavá, he naʻa nau fai ʻa e fuakavá ʻaki ʻa e kotoa ʻo honau lotó pea naʻa nau kumi vēkeveke kiate ia peá ne tuku ke nau ʻilo ia,+ pea naʻe hokohoko atu hono ʻoange ʻe Sihova kiate kinautolu ha mālōlō ʻi he feituʻu kotoa pē.+
16 Naʻe aʻu ʻo toʻo ʻe ʻAsa ko e tuʻí ʻa Maaka+ ko ʻene kui fefiné mei hono tuʻunga ko e kuini fehuhú, koeʻuhí naʻá ne ngaohi ha ʻaitoli fakalielia ke faiʻaki ʻa e lotu ki he pou ʻakau toputapú.*+ Naʻe tā hifo ʻe ʻAsa ʻa ʻene ʻaitoli fakalieliá pea laiki mo tutu ia ʻi he Teleʻa Kitiloné.+ 17 Ka naʻe ʻikai ke toʻo mei ʻIsileli+ ʻa e ngaahi potu māʻolungá.+ Ka neongo ia, naʻe kakato* ʻa e loto ʻo ʻAsá ʻi he kotoa ʻo ʻene moʻuí.*+ 18 Pea naʻá ne fakahū ki he fale ʻo e ʻOtua moʻoní ʻa e ngaahi meʻa naʻá ne hanga mo ʻene tamaí ʻo fakatoputapuʻí—ʻa e silivá, koulá, mo e ngaahi naunau kehekehe.+ 19 Naʻe ʻikai fai ha tau ʻo aʻu ki he taʻu hono 35 ʻo e pule ʻa ʻAsá.+