ʻIsikeli

14 Pea ko e niʻihi ʻo e kau mātuʻa ʻo ʻIsilelí naʻa nau haʻu ʻo tangutu ʻi hoku ʻaó.+ 2 Pea naʻe hoko mai ʻa e folofola ʻa Sihová kiate au, ʻo pehē: 3 “Foha ʻo e tangata, kuo fakapapauʻi ʻe he kau tangatá ni ke nau muimui ʻi heʻenau ngaahi ʻaitoli fakalieliá,* pea kuo nau fokotuʻu ha tūkiaʻanga ʻo fakatupunga ai ʻa e kakaí ke nau faiangahala. Te u tuku koā kinautolu ke nau kumi faleʻi meiate au?+ 4 Ko ia ke ke lea ʻo tala kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “Kapau kuo fakapapauʻi ʻe ha tokotaha ʻIsileli ke muimui ki heʻene ngaahi ʻaitoli fakalieliá peá ne fokotuʻu ha tūkiaʻanga ʻo fakatupunga ai ʻa e kakaí ke nau faiangahala peá ne haʻu leva ke kumi faleʻi mei ha palōfita, ko au Sihova, te u fai ha tali feʻungamālie kiate ia ʻo fakatatau ki he lahi ʻo ʻene ngaahi ʻaitoli fakalieliá. 5 He te u fakatupunga ha manavahē ʻi he loto ʻo e fale ʻo ʻIsilelí* koeʻuhi kuo nau holomui kotoa meiate au pea kuo nau muimui ʻi heʻenau ngaahi ʻaitoli fakalieliá.”’+

6 “Ko ia tala ki he fale ʻo ʻIsilelí, ‘Ko e meʻa eni ʻoku folofolaʻaki ʻe he ʻEiki Hau ko Sihová: “Mou foki mai pea mou tafoki mei hoʻomou ngaahi ʻaitoli fakalieliá pea hanga kehe homou matá mei hoʻomou ngaahi tōʻonga fakalieliá kotoa.+ 7 He kapau ʻoku ʻi ai ha tokotaha ʻIsileli pe ko ha muli ʻoku nofo ʻi ʻIsileli ʻokú ne fakamavaheʻi ia meiate au pea kuó ne fakapapauʻi ke muimui ʻi heʻene ngaahi ʻaitoli fakalieliá peá ne fokotuʻu ha tūkiaʻanga ʻo fakatupunga ai ʻa e kakaí ke faiangahala peá ne haʻu leva ke kumi faleʻi mei heʻeku palōfitá,+ ko au Sihova, te u fai ʻe au tonu ha tali kiate ia. 8 Te u fakafepakiʻi ʻa e tokotaha ko iá pea te u ʻai ia ko ha fakaʻilonga fakaefakatokanga mo ha fakatātā, pea te u tuʻusi ia mei hoku kakaí;+ pea kuo pau ke mou ʻiloʻi ko Sihova au.”’

9 “‘Ka ʻo kapau kuo kākaaʻi ʻa e palōfitá ʻo ne fai ha tali, ko au ia, Sihova, kuó u kākaaʻi ʻa e palōfita ko iá.+ Te u mafao atu leva hoku nimá kiate ia ʻo fakaʻauha ʻosi ia mei hoku kakai ʻIsilelí. 10 Kuo pau ke nau fua ʻenau hiá; ko e hia ʻa e tokotaha kumi faleʻí ʻe tatau pē mo e hia ʻa e palōfitá, 11 koeʻuhi ke taʻofi ʻe he fale ʻo ʻIsilelí ʻenau ʻalu hē meiate aú pea taʻofi ai mo ʻenau ʻuliʻi kinautolu ʻaki ʻa e kotoa ʻo ʻenau ngaahi faihalá. Pea te nau hoko ko hoku kakai, pea te u hoko ko honau ʻOtua,’+ ko e fakahaaʻi ia ʻe he ʻEiki Hau ko Sihová.”

12 Pea naʻe toe hoko mai ʻa e folofola ʻa Sihová kiate au, ʻo pehē: 13 “Foha ʻo e tangata, ka faiangahala mai ha fonua kiate au ʻaki haʻane tōʻonga taʻefaitōnunga, te u mafao atu hoku nimá ki ai ʻo fakaʻauha ʻa ʻene maʻuʻanga meʻatokoní,*+ pea te u tuku atu ʻa e honge ki ai+ pea tuʻusi mei ai ʻa e tangata mo e manu.”+ 14 “‘Neongo kapau ko e kau tangata ʻe toko tolu ko ení—ʻa Noa,+ Taniela,+ mo Siope+—naʻa nau ʻi ai, te nau malava ke fakahaofi ʻa kinautolu pē koeʻuhi ko ʻenau māʻoniʻoní,’+ ko e fakahaaʻi ia ʻe he ʻEiki Hau ko Sihová.”

15 “‘Pe kapau te u ʻai ha fanga manu fekai ke nau hū atu ki he fonuá ʻo keina ia ke tokosiʻi* pea ʻai ia ko ha feituʻu maomaonganoa ʻo ʻikai ha taha ʻe hū ki ai koeʻuhi ko e fanga manu fekaí.+ 16 ʻOku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘neongo kapau naʻe ʻi ai ʻa e kau tangata ʻe toko tolu ko ení, heʻikai te nau lava ʻo fakahaofi honau ngaahi fohá pe ko honau ngaahi ʻofefiné, ʻe ngata pē ʻenau fakahaofí ʻiate kinautolu, pea ʻe hoko ʻa e fonuá ʻo maomaonganoa.’”

17 “‘Pe kapau te u ʻomi ha heletā ki he fonua ko iá+ mo pehē: “Tuku ke hū atu ʻa e heletaá ki he fonuá,” ʻo tuʻusi fakatouʻosi mei ai ʻa e tangata mo e manu,+ 18 neongo kapau naʻe ʻi ai ʻa e kau tangata ʻe toko tolu ko ení, ʻoku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘heʻikai te nau lava ʻo fakahaofi honau ngaahi fohá pe ko honau ngaahi ʻofefiné; ʻe ngata pē ʻenau fakahaofí ʻiate kinautolu.’”

19 “‘Pe kapau te u tuku atu ha mahaki fakaʻauha ki he fonua ko iá+ pea huaʻi ʻeku ʻita kakahá ki ai ʻi he lingitoto ke tuʻusi mei ai ʻa e tangata mo e manu, 20 neongo kapau naʻe ʻi ai ʻa Noa,+ Taniela,+ mo Siope,+ ʻoku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘heʻikai te nau lava ʻo fakahaofi honau ngaahi fohá pe ko honau ngaahi ʻofefiné; ʻe ngata pē ʻenau fakahaofí ʻiate kinautolu koeʻuhi ko ʻenau māʻoniʻoní.’”+

21 “He ko e meʻa eni ʻoku folofolaʻaki ʻe he ʻEiki Hau ko Sihová: ‘ʻE pehē pē ʻa e taimi te u tuku atu ai ʻeku ngaahi tautea ʻe faá*+—ʻa e heletaá, hongé, fanga manu fekaí, mo e mahaki fakaʻauhá+—ki Selusalema ke tuʻusi mei ai ʻa e tangata mo e manu.+ 22 Kae kehe, ko e niʻihi ʻe toe aí te nau hao pea ʻe ʻomi kinautolu ki tuʻa mei ai,+ fakatouʻosi ʻa e ngaahi foha mo e ngaahi ʻofefine. Te nau omi kiate kimoutolu, pea ʻi he taimi te mou sio ai ki honau ngaahi ʻalungá mo ʻenau ngaahi ngāué, te mou hoko moʻoni ai ʻo fiemālie pē ʻi he fakatamaki naʻá ku ʻomi ki Selusalemá, ʻi he meʻa kotoa pē naʻá ku fai ki aí.’”

23 “‘Te nau fakafiemālieʻi kimoutolu ʻi hoʻomou sio ki honau ngaahi ʻalungá mo ʻenau ngaahi ngāué, pea te mou ʻilo ai naʻe ʻikai te u fai tuʻungaʻa pē ʻa e meʻa naʻe pau ke u fai ki aí,’+ ko e fakahaaʻi ia ʻe he ʻEiki Hau ko Sihová.”