Ngāue ʻa e Kau ʻApositolo
23 ʻI he sio fakamamaʻu atu ʻa Paula ki he Sanetalimí,* naʻá ne pehē: “Kau tangata, fanga tokoua, ʻoku malava ke u lea ʻi he ʻao ʻo e ʻOtuá, ʻoku tala mai ʻe hoku konisēnisí kuo ʻikai te u fai ha meʻa ʻe taha ʻoku hala+ ʻo aʻu mai ki he ʻahó ni.” 2 ʻI he meʻá ni naʻe tuʻutuʻuni ai ʻe he taulaʻeiki lahi ko ʻAnanaiá ki he faʻahinga naʻe tuʻu ʻi hono tafaʻakí ke paaʻi ʻa hono ngutú. 3 Naʻe pehē ange leva ʻe Paula kiate ia: “ʻE hanga ʻe he ʻOtuá ʻo taaʻi koe, ʻa e holisi vali hina* ko koé. ʻOkú ke nofo hifo koā ke fakamāuʻi au ʻo fakatatau ki he Laó, pea ʻi he taimi tatau pē ʻokú ke maumauʻi ʻa e Laó ʻi hoʻo tuʻutuʻuni ke taaʻi aú?” 4 Naʻe pehē ʻe he faʻahinga naʻa nau tuʻu aí: “ʻOkú ke laukovi koā ki he taulaʻeiki lahi ʻa e ʻOtuá?” 5 Pea naʻe pehē ʻe Paula: “Fanga tokoua, naʻe ʻikai te u ʻilo ko ha taulaʻeiki lahi ia. He kuo tohi, ‘Kuo pau ke ʻoua te ke lea kovi ki ha pule ʻo ho kakaí.’”+
6 Pea ʻi hono ʻiloʻi ʻe Paula ko e vaeua ʻe taha ʻo e Sanetalimí ko e kau Sātusi pea ko e vaeua ʻe tahá ko e kau Fālesi, naʻá ne kalanga ai: “Kau tangata, fanga tokoua, ko ha Fālesi au,+ ko ha hako au ʻo e kau Fālesí. Kuo fakamāuʻi au koeʻuhi ko e ʻamanaki ʻo e toetuʻu ʻa e kau maté.” 7 Koeʻuhi ko ʻene leaʻaki ení, naʻe hoko ai ha fekīhiaki ʻi he vahaʻa ʻo e kau Fālesí mo e kau Sātusí, pea naʻe mavaeua ai ʻa e fuʻu fakatahá. 8 He ko e kau Sātusí ʻoku nau pehē ʻoku ʻikai ha toetuʻu pe ha ʻāngelo pe ha laumālie, ka ʻoku tali* kotoa ia ʻe he kau Fālesí.+ 9 Ko ia naʻe mapuna hake ai ha fuʻu longoaʻa, pea ko e niʻihi ʻo e kau sikalaipe ʻo e faʻahi ʻa e kau Fālesí naʻa nau tuʻu hake ʻo kamata fakakikihi fefeka, ʻo pehē: “ʻOku ʻikai te mau ʻilo ha hala ʻi he tangatá ni, naʻa kuo lea kiate ia ha laumālie pe ko ha ʻāngelo+—.” 10 Ko ia ʻi he fakaʻau ke fakalalahi ʻa e fekīhiakí, naʻe manavahē ʻa e ʻeikitaú telia naʻa nau tāmateʻi* ʻa Paula, peá ne tuʻutuʻuni ki he kau sōtiá ke nau ʻalu hifo ʻo hamusi mai ia mei honau lotolotongá pea ʻomi ia ki he ʻapitanga ʻo e kau sōtiá.
11 Ka ʻi he pō hono hokó naʻe tuʻu atu ai ʻa e ʻEikí kiate ia ʻo pehē: “Loto-toʻa!+ He hangē pē ko hoʻo fai ha fakamoʻoni fakaʻāuliliki fekauʻaki mo au ʻi Selusalemá, kuo pau ke ke toe faifakamoʻoni pehē pē foki ʻi Loma.”+
12 ʻI heʻene ʻaho haké, naʻe fai ʻe he kau Siú ha faʻufaʻufono pea nau fuakava ke hoko ha mala kiate kinautolu kapau te nau kai mo inu ki muʻa ke nau tāmateʻi ʻa Paula. 13 Naʻe laka hake he kau tangata ʻe toko 40 naʻa nau fai ʻa e fuakava ko ʻení. 14 Naʻe ʻalu ʻa e kau tangatá ni ki he houʻeiki taulaʻeikí mo e kau mātuʻá ʻo nau pehē: “Kuo mau mātuʻaki fai ha fuakava ke hoko ha mala kiate kimautolu kapau te mau kai ha momoʻi meʻa ʻe taha ki muʻa ke mau tāmateʻi ʻa Paula. 15 Ko ia ʻoku totonu leva kiate kimoutolu mo e Sanetalimí ke mou fakahā ki he ʻeikitaú ke ne ʻohifo ia kiate kimoutolu ke hangē pē nai ko haʻamou loto ke sivisiviʻi fakaʻāuliliki ange ʻa e meʻa fekauʻaki mo iá. Ka ki muʻa ke ne fakaofi maí, te mau ʻosi mateuteu kimautolu ke tāmateʻi ia.”
16 Kae kehe, naʻe fanongo ʻa e tamasiʻi ʻa e tuofefine ʻo Paulá ki he teu lapasi naʻa nau palaniʻí, pea naʻá ne hū ki he ʻapitanga ʻo e kau sōtiá ʻo fakahā ia kia Paula. 17 Naʻe ui mai leva ʻe Paula ʻa e taha ʻo e kau ʻōfisa fakakautaú peá ne pehē ange: “ʻAve ʻa e talavoú ni ki he ʻeikitaú, he ʻoku ʻi ai ʻa e meʻa ke ne fakahā kiate ia.” 18 Ko ia naʻá ne ʻave ia ʻo ne taki atu ki he ʻeikitaú peá ne pehē: “Ko e pōpula ko Paulá naʻá ne ui ange au ʻo ne kole mai ke ʻomai ʻa e talavoú ni koeʻuhí ʻoku ʻi ai ʻa e meʻa ke ne tala atu kiate koe.” 19 Naʻe puke ʻe he ʻeikitaú hono nimá ʻo na mavahe fakaekinaua pē peá ne ʻeke ange kiate ia: “Ko e hā ʻokú ke fie fakahā mai kiate aú?” 20 Naʻá ne pehē ange: “Ko e kau Siú kuo nau loto-taha ke kole atu kiate koe ke ʻohifo ʻa Paula ki he Sanetalimí ʻapongipongi, ke hangē pē nai ko haʻanau taumuʻa ke ʻilo ha toe ngaahi fakaikiiki lahi ange ʻo kau ki he meʻa fekauʻaki mo iá.+ 21 Kae ʻoua ʻe tuku ke nau fakalotoʻi koe, he ʻoku laka hake he kau tangata ʻe toko 40 ʻo kinautolu ʻoku nau taliʻi ke lapasi ia, pea kuo nau fai ha fuakava ke hoko ha mala kiate kinautolu kapau te nau kai mo inu ki muʻa ke nau tāmateʻi ia;+ pea ʻoku nau mateuteu he taimí ni, ʻo fakatatali mai ke ke tali ʻenau kolé.” 22 Ko ia naʻe tuku ange ʻe he ʻeikitaú ʻa e talavoú ke ne ʻalu, hili ia ʻene tala kiate ia: “ʻOua naʻa tala ki ha taha kuó ke fakahā mai ʻa e meʻá ni kiate au.”
23 Pea naʻá ne fekau ki ha toko ua ʻo e kau ʻōfisa fakakautaú ʻo pehē: “Teuteu ha kau sōtia ʻe toko 200 ke nau laka atu ki Sesalia, pehē foki ki ha kau tangata tau heka hoosi ʻe toko 70 mo ha kau tangata toʻo tao ʻe toko 200, ʻi he houa hono tolu* poʻulí. 24 Pehē foki, ʻave ha fanga hoosi kia Paula ke malu ai ʻene fononga kia Filike ko e kōvaná.” 25 Pea naʻá ne fai ha tohi ʻo peheni:
26 “Meia Kalautiasi Lisiasi Kiate Koe, ʻEiki Kōvana Filike: Mālō e laumālie! 27 Ko e tangatá ni naʻe puke ia ʻe he kau Siú pea naʻe teu ke nau fakapoongi ia, ka naʻá ku ʻalu vave atu mo ʻeku kau sōtiá ʻo fakahaofi ia,+ koeʻuhí naʻá ku toki ʻilo ko ha Loma ia.+ 28 Pea ʻi heʻeku loto ke u ʻilo ʻa e ʻuhinga naʻa nau talatalaakiʻi ai iá, naʻá ku ʻohifo ia ki heʻenau Sanetalimí.+ 29 Naʻá ku ʻiloʻi naʻa nau tukuakiʻi ia ki he ngaahi meʻa fekauʻaki mo ʻenau Laó,+ ka naʻe ʻikai ke tukuakiʻi ia ki ha meʻa ʻe taha ʻoku tuha mo e maté pe ko e tuku pilīsoné. 30 Ka koeʻuhi kuo fakahā mai kiate au ha faʻufaʻu fakafufū kuo fai ki he tangatá,+ ʻoku ou tuku atu leva ia kiate koe peá u tuʻutuʻuni ki he kau talatalaakí ke nau fai hono talatalaakiʻi iá ʻi ho ʻaó.”
31 Ko ia naʻe ʻave ʻe he kau sōtia ko ení ʻa Paula+ ʻo fakatatau ki he ngaahi tuʻutuʻuni naʻe ʻoangé pea nau ʻomi poʻuli ia ki ʻAnitepeta. 32 ʻI he ʻaho hono hokó naʻe hoko atu ʻa e fononga ʻa e kau tangata tau heka hōsí mo ia, ka naʻe foki ʻa e toenga ʻo e kau sōtiá ia ki honau ʻapitangá. 33 Naʻe hū atu ʻa e kau tangata tau heka hōsí ki Sesalia ʻo ʻoatu ʻa e tohí ki he kōvaná pea nau tuku atu foki mo Paula kiate ia. 34 Ko ia naʻá ne lau ia peá ne ʻeke ange pe ko ʻene haʻu mei he vahefonua fē, peá ne ʻiloʻi ai ko ʻene haʻú mei Silisia.+ 35 “Te u fanongo fakaʻāuliliki kiate koe,” ko ʻene tala angé ia, “ʻi he taimi ʻe aʻu mai ai ho kau talatalaakí.”+ Pea naʻá ne fekau ke leʻohi malu ia ʻi he palasi* ʻo Hēlotá.