ʻIsikeli

13 Pea naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, fai ha kikite ki he kau palōfita ʻo ʻIsilelí,+ pea fai ha lea ki he faʻahinga ʻoku nau faʻu pē ʻenau ngaahi kikite ʻa kinautolú,*+ ‘Fanongo mai ki he folofola ʻa Sihová. 3 Ko e meʻa eni ʻoku folofolaʻaki ʻe he ʻEiki Hau ko Sihová: “ʻOiauē ʻa e kau palōfita vale, ʻoku nau muimui ʻi honau laumālie pē ʻo kinautolú, ka kuo ʻikai te nau sio ki ha meʻa!+ 4 ʻE ʻIsileli, kuo hoko hoʻo kau palōfitá ʻo hangē ha fanga fōkisi ʻi he lotolotonga ʻo e ngaahi feituʻu kuo maumaú. 5 Heʻikai ke mou ʻalu ki he ngaahi feituʻu maumau ʻi he ngaahi ʻā maká ke toe langa ia maʻá e fale ʻo ʻIsilelí,+ koeʻuhí ke kei tuʻu ai pē ʻa ʻIsileli ʻi he taú ʻi he ʻaho ʻo Sihová.”+ 6 “Kuo nau sio ki ha ngaahi vīsone loi pea tomuʻa tala ʻa e loi, ʻa e faʻahinga ʻoku nau pehē, ‘Ko e folofola eni ʻa Sihová,’ lolotonga ia naʻe ʻikai ke fekau mai kinautolu ʻe Sihova, pea kuo nau tatali ke hoko ʻa ʻenau leá.+ 7 ʻIkai ko ha vīsone loi kuo mou sio ki aí mo ha loi ʻa ia kuo mou tomuʻa talá ʻi hoʻomou pehē, ‘Ko e folofola eni ʻa Sihová,’ lolotonga ia naʻe ʻikai te u leaʻaki ha meʻa?”’

8 “‘Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: “‘Koeʻuhi ko hoʻomou leaʻaki ʻa e meʻa ʻoku loi pea ko hoʻomou ngaahi vīsoné ko e loi, ʻoku ou hoko ko homou fili,’ ko e fakahaaʻi ia ʻe he ʻEiki Hau ko Sihová.”+ 9 Te u ngāueʻaki hoku nima mālohí ki he kau palōfita ko ia ʻoku nau vīsone ʻaki ʻa e loí mo tomuʻa tala ʻa e loí.+ Heʻikai te nau ʻi he lotolotonga ʻo e kakai ʻa ia ʻoku ou fengāueʻaki vāofi mo iá; pea heʻikai ke hiki kinautolu ʻi he tohi lēsisita ʻo e fale ʻo ʻIsilelí; pea heʻikai te nau foki ki he fonua ko ʻIsilelí; pea kuo pau ke mou ʻilo ko e ʻEiki Hau au ko Sihová.+ 10 Kuo hoko ʻa e meʻá ni kotoa koeʻuhí kuo nau takiheeʻi ʻa hoku kakaí ʻaki ʻenau pehē, “ʻOku ʻi ai ha melino!” Lolotonga ia ʻoku ʻikai ke ʻi ai ha melino.+ ʻI he taimi ʻoku fokotuʻu ai ha holisi ngāvaivai, ʻoku nau palasitaaʻi ia ʻaki ʻa e lahe.’*+

11 “Tala ki he faʻahinga ʻoku nau palasitā ʻaki ʻa e lahé ʻe holo ia. ʻE haʻaki mai ha fuʻu ʻuha lōvai, pea ko ha fuʻu ʻuha-ʻaisi ʻe* tō mai, mo ha fuʻu matangi mālohi ʻo ne holoki ia.+ 12 Pea ʻi he holo ʻa e holisí ʻe ʻeke atu kiate kimoutolu ʻo pehē, ‘Ko fē hoʻomou palasitā naʻe faí?’+

13 “Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: ‘Te u ʻai ke tō atu ha fuʻu matangi mālohi ʻi heʻeku tuputāmakí, mo ha fuʻu ʻuha lōvai ʻi heʻeku ʻitá, mo ha ʻuha-ʻaisi ʻi heʻeku houhau faifakaʻauhá. 14 Te u holoki ʻa e holisi naʻa mou palasitā ʻaki ʻa e lahé ʻo tuku hifo ia ki he kelekelé, pea ʻe tekeutua atu ʻa hono fakavaʻé. ʻI he tō ʻa e koló, te mou ʻauha fakataha mo ia; pea kuo pau ke mou ʻilo ai ko Sihova au.’

15 “‘ʻI heʻeku tuku ange kakato atu ʻeku ʻitá ki he holisí pea ki he faʻahinga naʻa nau palasitaaʻi ia ʻaki ʻa e lahé, te u lea kiate kimoutolu: “ʻOku ʻikai toe ʻi ai ha holisi, pea ʻoku mole atu ʻa e faʻahinga naʻa nau palasitaaʻi iá.+ 16 Kuo mole atu ʻa e kau palōfita ʻo ʻIsilelí, ʻa e faʻahinga ʻoku nau fai ʻa e kikite ki Selusalemá pea ʻoku nau mata vīsone ʻo fekauʻaki mo ha melino ʻe hoko kiate iá, lolotonga ia ʻoku ʻikai ke ʻi ai ha melinó,”’+ ko e fakahaaʻi ia ʻe he ʻEiki Hau ko Sihová.

17 “Ka ko koe, foha ʻo e tangata, sio fakamamaʻu ki he ngaahi ʻofefine ʻo ho kakaí ʻa ia ʻoku nau faʻu ʻenau ngaahi kikite pē ʻa kinautolú, peá ke fai ha kikite kiate kinautolu. 18 Tala kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “ʻOiauē ʻa e kau fefine ʻoku nau tuitui ʻa e ngaahi meʻa-haʻi ki he ngaahi nima* kotoa pē mo ngaohi ʻa e ngaahi pūlou ʻo e lalahi kehekehe ki he ʻulu ʻo e kakaí koeʻuhí ke tauheleʻiʻaki ʻa e moʻui ʻa e kakaí! ʻOku mou tauheleʻi ʻa e moʻui ʻa hoku kakaí pea feinga ke fakahaofi ʻa hoʻomou moʻuí tonu? 19 Te mou taʻetokaʻi au ʻi he lotolotonga ʻo hoku kakaí ki ha falukunga paʻale mo ha konga mā,+ ʻo tāmateʻi ʻa e faʻahinga ʻoku ʻikai totonu ke nau maté pea fakahaofi moʻui ʻa e faʻahinga ʻoku ʻikai totonu ke nau moʻuí, ʻo mou fai ia ʻaki hoʻomou loi ki hoku kakaí, ʻa ia ʻoku nau fanongo ki hoʻomou ngaahi loí?”’+

20 “Ko ai ai, ko e meʻa eni ʻoku folofolaʻaki ʻe he ʻEiki Hau ko Sihová: ‘Ko eni te u fai ha meʻa ki hoʻomou ngaahi meʻa-haʻí, siʻi kau fefine, ʻa ia ʻoku mou ngāueʻaki ke tauheleʻiʻaki ʻa e kakaí ʻo hangē ko ha fanga manupuna kinautolú, pea te u halu ia mei homou nimá pea tuku ange ʻa e faʻahinga ʻoku mou tauheleʻi ʻo hangē ha fanga manupuná. 21 Te u halu homou pūloú pea fakahaofi ʻa hoku kakaí mei homou nimá, pea heʻikai te nau toe hoko ko ha meʻa ʻe maʻu ʻi hoʻomou tauhelé; pea kuo pau ke mou ʻilo ko Sihova au.+ 22 He kuo mou fakalotosiʻi ʻa e tokotaha māʻoniʻoní ʻaki hoʻomou loí+ lolotonga ia naʻe ʻikai te u fakatupunga ʻa ʻene faingataʻaʻiá,* pea kuo mou fakaivimālohiʻi ʻa e nima ʻo e tokotaha fulikivanú,+ koeʻuhi ke ʻoua naʻá ne tafoki mei hono hala koví ka ne moʻui.+ 23 Ko ia ai, ko kimoutolu kau fefine ʻe ʻikai te mou toe sio ki ha ngaahi vīsone loi mo fai ha vavalo;+ pea te u fakahaofi ʻa hoku kakaí mei homou nimá, pea kuo pau ke mou ʻilo ko Sihova au.’”